Weewe, “Wakaba Pamo ni Neene mu Paradiso”

1. Musita uniini ntaanzi ya kufua kwakue, Yesu waamulandile ki olia mubiifi abanga wali ku mbali yakue? (Luka 23:39-43)

YESU pamo ni baalia babiifi babili babanga pa mbali yakue, baali baema musita ubabanga basyafua. (Luk. 23:32, 33) Baalia babiifi bonse babili babanga bamuseka Yesu, keekio kilangiliile nangue te babanga bali basambi bakue. (Mat. 27:44; Mark. 15:32) Inzi, umo pakati kaabo, waaluluile mutima wakue. Waalandile eevi: “We Yesu, ndanguluke musita luwakengila mu Bukolo bobe.” Yesu waamwasukile eevi: “Kisinka nakulanda leelo nangue, wakaba pamo ni neene mu Paradiso.” (Soma Luka 23:39-43b.) Te kuli kintu kisininkiziizie nangue ozo mubiifi waaitabiile mpunda ilangiliile nangue ‘Bukolo bwa mwiulu bwapalama.’ Kabili Yesu taalandile ata kaniini nangue ozo muntu wakaba mu Bukolo ku muulu. (Mat. 4:17) Yesu waali walandila palua Paradiso ya pa kyalo ili mukuiza. Juu ya ki twalanda evio?

2. Ni kiki kilangiliile nangue olia muntu waalapiile paange abanga wali Muyuda?

² Mubiifi Olia waalapiile, kipalile abanga wali Muyuda. Ozo mubiifi, waamulandile eevi mwinakue: “Eba, weewe tewizi kumutiina Leeza ata kaniini, paantu loonu wapata bupinguzi bolia bwenka?” (Luk. 23:40, NWT) Bayuda babanga bapupa Leeza umosie, inzi bantu ba ntundu inge babanga bapupa baleeza bengi. (Kuf. 20:2, 3; 1 Bakor. 8:5, 6) Babo babiifi, babenge bali ba mu ntundu inge, nga kiipuzio kyaalukile eevi: “Eba, weewe tewizi kubatiina baleeza ata kaniini?” Kukila pakaako, Yesu taatuminue ku bantu ba ntundu inge, inzi waatuminue ‘ku mikooko izeezele ya Israeli.’ (Mat. 15:24) Leeza waababuilile Baisraeli nangue wakatuntumuna bafuile. Paange mubiifi olia waalapiile, waali wamanine evio, kabili milandu yakue yaasininkiziizie nangue Yehova wakamutuntumuna Yesu eevi akateeke mu Bukolo Bwakue Leeza. Kimonekele ozo mwalalume waali waswapiile nangue Leeza wakamutuntumuna ni weene.

3. Kipalile olia mubiifi waatontonkaniizie ki musita Yesu lwaazimbuile Paradiso? Londolola. (Kutendeka 2:15)

³ Kine abanga wali Muyuda, kipalile mubiifi olia waalapiile abanga wamanine mpunda palua ba Adamu ni Eva ni palua Paradiso, moolia mubaateekelue na Yehova. Kansi, kipalile olia mubiifi waamanine nangue Paradiso elia yaazimbuile Yesu, yakaba yaali busitani bwaweeme saana paanu pa kyalo.​—Soma Kutendeka 2:15.

4. Milandu yaalandile Yesu ku olia mubiifi ipalile kutukinkizia kutontonkania palua ki?

⁴ Milandu yaalandile Yesu ku olia mubiifi, ipalile kutukinkizia kutontonkania palua buikazi vibwakaba mu Paradiso. Kakiine, kunti twasambilila kintu kimo palua Paradiso, kupitila buteeko bwa mutende bwakue Likolo Sulemani. Kabili, kunti twaswapila nangue Yesu olia mukulu kuliko Sulemani, wakabomba pamo ni baalia bakateeka nakue, eevi kuleeta aali iweeme saana pa kyalo. (Mat. 12:42) Kakiine bantu baundile “mikooko inge” bapalile kupooza maano ku beelia bibapalile kukita, eevi bakeekale loonse mu Paradiso.​—Yoan. 10:16.

BUIKAZI MU PARADISO BWAKABA BWALI SIANI?

5. Weewe, uli watontonkania buikazi bwakaba siani mu Paradiso?

⁵ Uli watontonkania buikazi bwakaba bwali siani mu Paradiso? Paange uli watontonkania palua buazimo bufwaniine saana nga busitani bwa Edeni. (Kut. 2:7-9) Paange uli walanguluka bukabika bwaaleembele Mika bulandile nangue bantu bakue Leeza bakekala “kila muntu munsina kimuti kyakue kya muzabibu ni munsina kimuti kyakue kya tini.” (Mik. 4:3, 4) Kabili, paange kunti walanguluka maleembo a mu Bibilia alandile nangue kwakaba kwali byakulia bingi. (Malum. 72:16; Is. 65:21, 22) Kansi, kunti watontonkania kuya wali mu busitani ifuaniine saana, waikeele ku meza yaizuzipo byakulia biweeme saana. Paange, weewe kunti watontonkania ka mwela kalimo bunu bwaweeme bwa bimuti ni maluba. Kabili, kipalile saana kunti watontonkania palua bantu ba mu lupua lobe ni babibuza, kubiika mukati ni baalia bakatuntumunua, bali mukuseka ni kupisia nsita lwa pamo. Bebio byonse, te biloto. Bila kutwisika, bintu nga bebio byakakitika pa kyalo. Anzia evio, mu Paradiso twakaba twabomba ni miilo ya kusaansamusia.

6. Twakaba twakita ki mu Paradiso? (Mona foto.)

⁶ Yehova waatubumbile twali ni buviinde bwa kusekelela miilo yeetu. (Kas. 2:24) Twakaba twali ni bintu bingi bya kukita, asa mu kipindi kya Buteeko bwa Miaka Elufu bwakue Kristu. Baalia bakapita pa lyemo likata, ni alia mamilioni a bantu akatuntumunua, bakaba bakabiile kupata maubo, byakulia ni fuasi mwakwikala. Pa kupata bebio bintu, kyakaloomba tukabombe miilo ingi isaansamusiizie. Ba Adamu ni Eva babanga bapalile kulima busitani mu fuasi mubaali baikeele. Ni fwefue twakaba twali ni lisyuko lya kukita kyalo kikaaluke Paradiso. Kabili, tontonkania vikyakaba kyasaansamusiizie kusambilizia mamilioni a bantu bakatuntumunua, baalia bakaba bamanine bintu biniini palwakue Yehova ni mupaango wakue. Kukila pakaako, tontonkania vikyakaba kyasaansamusiizie kukwasia bantu ba kisinka baalia baafuile ntaanzi ya nsita yakue Yesu, eevi basambilile bintu byaakitikile kisia kufua kwabo!

7. Kunti twasininkizia ki, kabili juu ya ki?

⁷ Kunti twasininkizia nangue musita utwakaba twali mu Paradiso, twakaba twaikeele mu mutende, twakwete kila kintu kitukabiile, kabili twapaangilue buino. Juu ya ki? Paantu Yehova waatupeele kale mufuano ulangiliile buikazi vibwakaba mu buteeko bwakue Muana wakue. Kunti twamona ozo mufuano kupitila mpunda palua buteeko bwakue Likolo Sulemani.

BUTEEKO BWAKUE LIKOLO SULEMANI KUNTI BWATUKWASIA KUMANA BUIKAZI VIBWAKABA MU PARADISO

8. Milandu ili mu Malumbo 37:10, 11, 29 yaafikiliziiziwe siani kisia Likolo Daudi kuleemba milandu ezio? (Mona “Biipuzio Kufuma ku Bakabeleenga” mu kaanu kazeeti.)

⁸ Likolo Daudi waatungulwilue na mupasi eevi aleembe palua buikazi vibwakaba musita likolo wa mulangue kabili wa kisinka lwali wakeekala pa kitebe kya bukolo. (Soma Malumbo 37:10, 11, 29.) Lingi, tuli twabasomena bantu lileembo lya Malumbo 37:11, musita utuli twalondoluela palua Paradiso ili mukuiza. Tuli ni nsaambu iweeme ya kukita evio, paantu Yesu waazimbuile ezio milandu mu Nsimiko yakue ya ku Lupili, ni kulangilila nangue yakafikiliziiwa musita uli waiza. (Mat. 5:5) Inzi kabili, milandu yakue Daudi yaalangiliile buikazi vibwakaba mu nsiku yakue Likolo Sulemani. Musita Sulemani lwaateekele mu Israeli, bantu bakue Leeza baasekeleele saana mutende ni buyantanzi mu kyalo “kili kyapongokamo maziwa ni mape.” Leeza waalandile eevi: “Kine mwatwalilila kwenda mu mizilo yane . . . , Nakaleeta mutende mu kyalo, kabili mwakalaala bila muntu ata umo wa kumileetela muenzo.” (Bal. 20:24; 26:3, 6) Bobo bulayo bwaafikiliziiziwe musita Sulemani lwabanga wateeka Israeli. (1 Mil Nsi. 22:9; 29:26-28) Kabili Yehova waalaile nangue bantu babiipile babanga bapupa baleeza bange, “te bakabapo.” (Malum. 37:10) Pakaako, kunti twalanda nangue milandu ili mu Malumbo 37:10, 11, 29 yaafikiliziiziwe mu musita waapitile, kabili yakafikiliziiwa ni mu musita uli mukuiza.

9. Likolo mwanakazi wa ku Sheba, waalandile ki palua buteeko bwakue Likolo Sulemani?

⁹ Likolo mwanakazi wa ku Sheba waapatile mpunda palua mutende ni buyantanzi bwa ntundu ya Israeli musita Sulemani lwabanga wateeka. Ozo kateeka mwanakazi waakitile bulendo bwaleepele mpaka ku Yerusalemu eevi emwene aali ezio. (1 Mak. 10:1) Kisia kumona vili buteeko bwakue Sulemani, ozo likolo mwanakazi waalandile eevi: “Bintu binaabuililue te byaafikile ata mu nusu. . . . Bali ni nsaansa ni balalume bobe, kabili bali ni nsaansa ni babombi bobe baalia bali baimana lyonse ntaanzi yobe, batuiliziizie mulangue obe!” (1 Mak. 10:6-8) Inzi, aali ya buteeko bwakue Sulemani ibanga yalisie mufuano wa beelia byakakita Yehova ku bantu mu buteeko bwakue Muana Wakue, Yesu.

10. Yesu ni mukulu kuliko Sulemani mu nzila ki?

¹⁰ Yesu ni mukulu kuliko Sulemani mu nzila yonse. Sulemani abanga wali muntu asipuililikile, kabili waakitile bilubo bikata mu bupinguzi ni kuleeta maavia ku bantu bakue Leeza. Inzi, Yesu weene ni kateeka apuililikile, asiizi kukita bilubo ata kaniini. (Luk. 1:32; Baeb. 4:14, 15) Yesu waasiele wali wa kisinka kuli Leeza anzia kine waapatile meezio akolele saana kufuma kuli Sataana. Kristu waalangiliile nangue takakita lizaambi ata kaniini ao kukita kintu kya kubakisia bantu bakue ba kisinka. Weene i Likolo aweeme saana utupalile kuya twali nakue.

11. Yesu wakakwasiiwa na baani pa kuteeka?

¹¹ Yesu wakateeka pamo ni baalia ba mia ni makumi ana na bana elufu (144 000) eevi kwemena bantu ni kufikilizia mupaango wakue Yehova palua kyalo. (Nfy. 14:1-3) Babo bantu, baapatile maavia engi ni kusaanzua musita lubabanga baikeele pa kyalo. Pakaako, bakamana buino aali ili yasaakaana ni bantu bali pa kyalo. Babo bantu bakateeka pamo ni Yesu, bakakita miilo ki?

BAALIA BABIIKILUE MAFUTA BAKABA NI MIILO KI?

12. Yehova wakabapeela miilo ki baalia ba mia ni makumi ana na bana elufu (144 000)?

¹² Yesu pamo ni baalia bakateeka nakue, bali ni miilo ingi ya kukita kuliko elia yaakitile Sulemani. Sulemini, Likolo wa Israeli, abanga waemena mamilioni a bantu ba mu kyalo kimosie. Inzi, baalia bakaba bateeka mu Bukolo Bwakue Leeza, bakakwasia kwemena mabilioni a bantu ba mu kyalo kyonse. Kakiine, Yehova abapeele lisyuko likata baalia ba mia ni makumi ana na bana elufu (144 000)!

13. Miilo yakabomba baalia bakateeka pamo ni Yesu yakaba yabiikile mukati miilo ki iibeleele?

¹³ Baalia ba mia ni makumi ana na bana elufu (144 000), bakabomba bali bamakolo ni bamakoani nga Yesu. (Nfy. 5:10) Musita Baisraeli lubaali baloombelue kunakila Muzilo wakue Musa, bamakoani babanga baemenanke aali ya kimubili ya bantu ni kubakwasia kuya bali peepi ni Yehova. Muzilo ubanga wali “kizinzimiasie kya beelia bintu biweeme byakeeza.” Pakaako, kunti twalanda nangue Yesu pamo ni baalia bakateeka nakue, bakaba ni miilo iibeleele ya kubakwasia bantu bakue Leeza eevi bakabe bali ni bukose bwali buino ni kuya bamupaleeme Yehova. (Baeb. 10:1) Tupalile kupembelela eevi tukabe kumona babo bamakolo ni bamakoani vibakaba kuya balondolola ni bekazi ba mu Bukolo bali pa kyalo. Anzia kintu kyonse kipaangile Yehova, kunti twasininkizia nangue mu Paradiso ili mukuiza, baalia bakaba pa kyalo bakapata butunguluzi bubakabiile.​—Nfy. 21:3, 4.

“MIKOOKO INGE” IPALILE KUKITA KI EEVI IKEEKALE MU PARADISO?

14. “Mikooko inge” ni balupua bakue Kristu bapalameene siani?

¹⁴ Yesu waabakuutile baalia bali bakateeka pamo nakue nangue “libumba liniini.” (Luk. 12:32) Kabili, waalandiile palua kikundi kya bubili, keelia kyaakuutile nangue “mikooko inge.” Bebio bikundi bibili, byundile libumba limo. (Yoan. 10:16) Bonse bali mu bebio bikundi bibili, bali mukubombela pamo loonu. Kabili bakatwalilila kubombela pamo musita kyalo lukyakaaluka Paradiso. Kisia, kakiine baalia ba mu “libumba liniini” bakaba bali ku muulu, ni “mikooko inge” yakaba ni kiswapilo kya kusekelela buikazi pa kyalo loonse. Inzi, kuli bintu bipalile kukita “mikooko inge” eevi ikabe kufikiila kwikala mu Paradiso.

15. (a) “Mikooko inge” ili yabombela siani pamo ni balupua bakue Kristu? (b) Weewe, kunti wapala siani mufuano wakue olia lupua ali mu farmasi? (Mona foto.)

¹⁵ Muntu mubiifi olia waalapiile, waafuilesie tanapate fuasi ya kulangilila kutasia palua bintu byaakitiilue na Kristu. Inzi, fwefue ba “mikooko inge” tuli ni fuasi ingi loonu ya kulangilila vituli twaiunvua palwakue Yesu. Kwa mufuano, tuli twalangilila nangue tumutonene weene, kukoonkana ni vituli twabakitila balupua bakue babiikilue mafuta na mupasi. Yesu waalandile nangue wakapingula mikooko kukoonkana ni viili yabakitila balupua bakue. (Mat. 25:31-40) Kunti twabakwasia balupua bakue Kristu kupitila kubakwasia kwa mute mu miilo ya kusimikila ni kukita basambi. (Mat. 28:18-20) Keekio, i kili kyalengia tuye twatonene kubombia buino biombo bili byatukwasia kusambilizia Bibilia, nga evelia kitabu Sekelela Buikazi Loonse! Kine teunatendeke kusambilizia muntu kupitila keeki kiombo, wamona siani ukabe kwibiikila mupaango wa kutendeka kusambilizia bantu bengi kukoonkana ni buviinde bobe?

16. Kunti twakita ki loonu eevi kwiteania kwaluka bekazi ba mu Bukolo Bwakue Leeza?

¹⁶ Te tupalile kupembelela mpaka Paradiso ifike mane twaluke bantu batonene Yehova eevi bekale moomo. Kutendekela loonu, kunti twaikwinda kubombelapo eevi tuye twali ba kisinka mu bulanzi bwetu ni mu bikitua byetu, ni kuya twateekameene mu mibeele yeetu. Kabili, kunti twaaluka ba kisinka kuli Yehova, kuli mulume ao mukazi weetu ni ku balupua ni bankazi betu. Kine twamunakila Yehova loonu mu kyalo kibiipile, twakaba kumona kyaleengelesie kumunakila ni mu Paradiso. Kabili, kunti twakuzia bufundi ni bikitua bilangiliile nangue tuli mukwiteania eevi kwikala mu keekio kyalo. Mona lyasi lilandile “Eba, Weewe Witeaniizie Juu ya ‘Kupyana Kyalo’?” lili mu kaanu kazeeti.

17. Eba, tupalile kutioka mutima juu ya mazaambi aatwaakitile musita waapitile? Londolola.

¹⁷ Kabili, tupalile kulekela kwimona kuya twali ni bilubo palua mazaambi akata aatwaakitile lwa kale. Anzia evio, te tupalile kuya twafyamina mu kilubula mulandu eevi tuye twakita ‘bibalo [ao, mazaambi] na bufue.’ (Baeb. 10:26-31) Inzi, kunti twasininkizia nangue kine twaakimuloomba Yehova atweleele ni kuya kubamona bakote eevi batukwasie, kisia twaalulula lwendo lwetu, Yehova waakitweleela kale mu nzila ikata. (Is. 55:7; Miil Bat. 3:19) Languluka milandu yakue Yesu yaabalandile Bamafarisayo. Waabalandile eevi: “Paantu nsyaaiziile balunghami, inzi naaiziile ba bibalo [ao, ba mazaambi].” (Mat. 9:13) Ngeleelo ya kilubula mulandu ili ni buviinde bwa kuvimba mazaambi etu onse.

WEEWE, KUNTI WAIKALA LOONSE MU PARADISO

18. Ati, weewe wakatona kulanda ki pamo ni olia muntu mubiifi waafuile wali pa mbali yakue Yesu?

¹⁸ Eba, weewe kunti waezia kutontonkania wali mu Paradiso wali mukulanda pamo ni olia muntu mubiifi waalondoluele ni Yesu? Kakiine mwe bonse babili kunti mwatasia saana palua kilubula mulandu kyakue Yesu. Weewe kunti wamwipuzia eevi akubuile bingi palua beelia byaakitikile mu nsa iniini ya kupeleezia ya buikazi bwakue Yesu paanu pa kyalo, ni vyaaiunvuile musita Yesu lwaasukile ku kintu kyaamuloombele. Kabili ni weene kunti wakwipuzia buikazi vibubanga bwali mu nsiku ya mpeleezio ya kyalo kyakue Sataana. Kakiine, kyakaba kyaweeme saana kusambilila Mulandu Wakue Leeza pamo ni bantu bali nga ozo mwalalume!​—Baef. 4:22-24.

19. Juu ya ki buikazi mu Paradiso tebukatopia? (Mona foto ili ku ntendeko ya kazeeti.)

¹⁹ Buikazi mu Paradiso, tebukatopia. Lyonse twakaba twasaakaana ni bantu baweeme kabili twakita miilo ya mana. Kukila pa byonse, kila busiku twakaba twakila kusambilila palwakue Baba weetu wa ku muulu ni kuya twasekelela byonse byali wakaba watuteaniizia. Lyonse, kwakaba bintu bingi saana bya kusambilila palwakue, kabili kwakaba kwali bingi saana bya kusambilila palua bibumbua byakue. Vitwakaba twatwaliliile kuya twaikeele, ni ntono yeetu kuli Leeza i viyakaba kuya yakila kutana. Kakiine, tuli mukumutasia saana Yehova pamo ni Yesu pa kutupeela bulayo bwa kwikala loonse mu Paradiso!