Eba, Walanguluka?

Eba, waakisoma wapoozeleko maano ma kazeeti a Lupungu Lwakue Kamwenenena a onu muaka? Kine ni evio, ale asuka beebi biipuzio bili paapa:

“Kwalulula maano enu” kuli na mana ki? (Bar. 12:2)

Te kuli na mana ya kukita sie tuntu tuniini tuweeme. Inzi, tupalile kutoosia bumuntu bwetu bwa mukati ni kukita bupilibuko bupalile eevi kunakila mafunde akue Yehova.—w23.01, lub. 8-9.

Kunti twalangilila siani kuteekamana musita utuli twamona bintu bili mukukitika mu kyalo?

Tuli twatona saana kupooza maano ku bintu bili mukukitika mu kyalo ni kumana vibili mukufikilizia bukabika bwa Bibilia. Anzia evio, tupalile kutiina kulinguila beelia byakaba kukitika, paantu keekio kunti kyalengia kilonghaano kikasanike. Kili buino bulondolozi bwetu buye bwaimaniine pa bintu bili byapundua na kuteania kwakue Yehova. (1 Bakor. 1:10)—w23.02, lub. 16.

Lubatizio lwakue Yesu lupuseene siani ni loolia lwa basambi bakue?

Weene taali wakabiile kwipeela ye muine kuli Yehova nga fwefue, paantu waavyelue mu ntundu yaali yaipeele kuli Leeza. Abanga wali muntu apuililikile, asili na lizaambi. Taali wakabiile kulapila mazaambi.—w23.03, lub. 5.

Kunti twakwasia siani bange mu kulonghaana baasukepo?

Kunti twaleeta byasuko bifupi, keekio kili kulengia ni bange baasukepo. Kabili musita utuli mukwasuka, te tupalile kulandila palua tuntu twingi saana. Kine twakita evio, ni bange bali kulandako tuntu tunge.—w23.04, lub. 23.

“Nzila ya Butakatiifu” izimbuilue mu Isaya 35:8 ilangiliile ki?

Kya kuanza, ezio nzila ikata ya mufuano ilangiliile musebo waabombiizie Bayuda pa kufuma ku Babiloni babuela ku kyalo kyabo. Ale mu miaka ingi ya buleenu? Ma mia engi a miaka, ntaanzi ya kufika mu muaka wa 1919, miilo ya kuteania musebo yaakitilue, nga evelia kupilibula Bibilia ni kuifumia ku mapapie, pamo ni bintu binge. Bantu bakue Leeza bali mukwenda mu “Nzila ya Butakatiifu” baya ku paradiso ya kimupasi, elia ili yabatwala ku mpaalo ili yaleetua na Bukolo.—w23.05, lub. 15-19.

Lileembo lya Tuswalo ni Mafunde katue ka 9 lyaleeta masoke aswapiile banakazi babili ba mufuano ba siani?

Lileembo lya Tuswalo ni Mafunde lilandiile palua “mwanakazi kipuba” olia ali ni mukupo uli wafikyania ku “Mankabuli.” Kabili lilandiile palua “mulangue wa kisinka,” olia uzimbuilue kuya wali mwanakazi, ali ni mukupo uli watwalana ku “nzila ya buviinde bwa kunvua” ni ku bukose. (Tus Maf. 9:1, 6, 13, 18)—w23.06, lub. 22-24.

Kwikeefia kwakue Yehova ni malanga akue ateekameene byaamonekele siani kukoonkana ni vyaamukitiile Loti?

Yehova waamulandile Loti afume mu Sodoma ni kubutukila ku fuasi ya mpili. Loti waamuloombele Yehova eevi amupeele nsaambu ya kubutukila ku Soari. Yehova waamwitabiziizie.—w23.07, lub. 21.

Mukazi kunti wakita siani kine wakwakue ali wamona porno?

Tapalile kwimona nangue ali ni kilubo. Apalile kwikwinda kupooza maano ku bukibuza bwakue pamo ni Yehova. Kabili apalile kutontonkania mifuano ili mu Bibilia elia ilangiliile banakazi babanga bali ni maavia inzi baatekiiziwe mutima kuli weene. Apalile kumukwasia mulume wakue eevi te kunti akite bintu bili kumusonsezia amone porno.—w23.08, lub. 14-17.

Kine twaeziiwa palua bintu bituzumiine, buviinde bwa kwinika kunti bwatukwasia siani kusiala twafuukile?

Tupalile kumona kiipuzio ao buezio kuya bwali nzila ya kutukwasia kumana beelia bili byatontonkania bange ao beelia bibali baemena saana. Kine twakita evio, tuli kuya twaiteaniizie buino kwasuka mu nzila ya bufuuke.—w23.09, lub. 17.

Kupitila mufuano wakue Maria, kunti twasambilila ki palua kupata maka?

Kisia Maria kumana nangue wakaba kwaluka mama wakue kwa Masia, waapatile maka kupitila bange. Gabrieli ni Elizabeti baamukoseleziizie kupitila kubombia Maleembo. Ni fwefue, kunti twapata maka kupitila balupua ni bankazi betu.—w23.10, lub. 15.

Yehova kunti waasuka mapepo etu mu nzila ki?

Alaile kutuilizia mapepo etu, kabili ali wamona mapepo azo viapateene ni kutona kwakue. (Yer. 29:12) Weene kunti waasuka mu nzila ipuseene mapepo a bantu baalia bali mukupepa palua kintu kimo, inzi wakaba kutukwasia lyonse.—w23.11, lub. 21-22.

Lileembo lya Baroma 5:2 lizimbuile ‘kiswapilo,’ ale juu ya ki keekio kilondolwelue kabili mu mulongo wa 4?

Kine muntu wasimikilua mpunda iweeme, kunti waaluka ni kiswapilo kya kusekelela bukose mu paradiso paanu pa kyalo. Inzi keekio kiswapilo kili kukila kukosa ni kwaluka kya kisinka kuli weene, kine wasipikizia maavia ni kwinika nangue etabiilue na Leeza.—w23.12, lub. 12-13.