Kipuzio Kilengele kya Kubepuzia Bantu

Mary pamo ni mulume wakue, olia ali wakuutua John,a bali baikala mu kyalo molia muli mwaya bantu bengi ba kufuma ku Ufilipino evi kwikala ni kubomba. Ba Mary ni John bali batona kubasimikila. Mu kipindi kya korona (COVID-19), Mary waatendekeziizie masambililo a Bibilia, apana sie mu kyalo molia mwali waikala, inzi ni mu byalo binge. Waakitile syani evio?

Mary abanga wabepuzia evi basambi bakue ba Bibilia: “Eba, mumanineko ni muntu unge atonene kusambilila Bibilia?” Kine balanda nangue een, abanga wabepuzia kine kunti bamukwasia evi amanane nabo. Lingi, kwipuzia keki kipuzio kilengele kuli kwaleta mazabo aweme. Juu ya ki? Pantu lingi bantu baalia bali batona Mulandu Wakue Leza bali batona kubabwilako bantu ba mu lupua lwabo pamo ni ba rafiki babo baalia babatonene bintu bibali basambilila. Kwipuzia kekio kipuzio kuli kwaleta mazabo ki?

Jasmin abanga wali musambi wa Bibilia wakue Mary. Wene waamukwasiizie Mary amanane ni bantu bana baalia babanga batonene kusambilila Bibilia. Umo pakati kabo, Kristine, waatonene sana kusambilila, ni kekio kyaalengiizie amulande Mary atendeke kumusambilizia mara ibili mu mulungu. Musita Mary lwaamwipuziizie kine abanga wamanineko ni muntu unge olia abanga watonene kusambilila Bibilia, Kristine waalandile evi: “Een, nakaba kukukwasia evi mukabe kumanana ni ba rafiki bane.” Kisia milungu inini, Kristine waamukwasiizie Mary evi amanane ni ba rafiki bakue bana baalia babanga batonene kusambilila Bibilia. Kisia kabili, Kristine waamukwasiizie Mary amanane ni ba rafiki bakue bange. Bamo pakati kabo baazimbwile ni meena a bange baalia baali batonene kusambilila Bibilia.

Kabili, Kristine waatonene lupua lwakue mu Ufilipino lubambe kusambilila palua Bibilia. Pa kako, waalanzyene ni mwana wakue mwanakazi, Andrea. Ku ntendeko, Andrea waali watontonkania evi: ‘Ne manine nangue Bakasininkizia Bakue Yehova bali mu dini isimanikile bwino, bene tebezi kumuketekela Yesu, kabili bali babombia sie Kipingo kya Kale.’ Inzi, kisia sie kusambilila mara imo, wene waainikile nangue bintu byabanga watontonkania lwa kale palua Bakasininkizia Bakue Yehova bibanga byali bya bufi. Lyonse, kine wene wasambilila kintu kya lenu, abanga wapapa ni kulanda evi: “Kakiine, keki ni kisinka pantu i vyalanda Bibilia!”

Kisia musita unini, Andrea waamukwasiizie Mary amanane ni ba rafiki bakue babili pamo ni mubombi nakue umo olia waatendekele kusambilila Bibilia. Kabili, Andrea abanga wali ni shangazi wakue olia abanga wakuutua Angela. Wene abanga wali mpofu, kabili abanga watwilizia lyonse musita Mary lwabanga wamusambilizia Andrea. Inzi, Mary tabanga wamanine nangue Angela abanga watwilizia. Kisia papo, busiku bumo, Angela waamwanine Andrea amukwasie evi bamanane ni Mary, kabili waalombele atendeke kusambiliziiwa Bibilia. Angela waatonene belia byabanga wasambilila. Mu mwezi umo, waabiikiliile malembo engi, kabili waatonene batendeke kumusambilizia mara ina mu mulungu. Kukila pa kako, kupitila kukwasiiwa na Andrea, waatendekele kutwilizia lyonse kulonghaana kupitila vidéoconférence.

Musita Mary lwabanga wamona Joshua, muka Kristine, waikala pepi nabo musita wa lisambililo, Mary waamwipuziizie kine ni wene kunti watona kutendeka kusambilila pamo nabo. Joshua waalandile evi: “Nene ndi kuya natwiliziizie sie, inzi tekungipuzie kipuzio ata kimo; kine mwangipuzia, ndi kufumapo.” Mu dakika sie isano ya lisambililo, Joshua waaipuziizie bipuzio bingi sana kupita ni vyaakitile Kristine, kabili ni wene waatonene kutendeka kusambilila Bibilia.

Kipuzio kilengele kyakue Mary kyaamukwasiizie kupata masambilo engi a Bibilia. Wene waatendekeziizie masambililo a Bibilia 28 mu byalo bina. Inzi, waakwete mipango evi bengi pakati kabo baye basambiliziiwa na Bakasininkizia bange.

Jasmin, mwanafunzi wa kwanza olia azimbwilue mu leli lyasi, waabatiziiziwe mu Mwezi wa 04, 2021. Kristine waabatiziiziwe mu Mwezi wa 05, 2022, kabili waabwelele mu Ufilipino evi ekale pamo ni lupua lwakue. Kristine waamukwasiizie Mary amanane ni bantu bange babili baalia babanga batonene kusambilila Bibilia. Ni bene baabatiziiziwe. Myezi inini kisia Kristine kubatiziiwa, Angela ni wene waabatiziiziwe. Lonu, ni painia wa lonse. Joshua muka Kristine, pamo ni mwana wabo umo mwanakazi Andrea, kubiika mukati ni basambi bange bengi ba Bibilia, bonse batwaliliile kusambilila Bibilia ni kumupalama sana Yehova.

Mu nsita yakue Yesu pamo ni batumua, bantu bengi babanga bababwila bantu ba mu lupua lwabo pamo ni ba rafiki babo bintu bibabanga basambiliziiwa na Yesu. (Yoan. 1:​41, 42a; Miil Bat. 10:​24, 27, 48; 16:​25-33) Wamona syani kine ni wewe watendeka kubepuzia evi basambi bobe ba Bibilia pamo ni bantu bange batonene kusambilila Bibilia: “Eba, mumanineko ni muntu unge atonene kusambilila Bibilia?” Kine ni wewe waipuzia keki kipuzio kilengele, pange kunti wapata bantu bengi batonene kusambilila Bibilia.