Lupupo lwa mu Lupua Ni Kiki?

Kutendeka ku kale, Yehova atonene bantu ba mu lupua baye bapisia musita pamo, eevi bakosie bukibuza bwabo pamo ni Yehova kabili ni beneenke. (Malanguluzi a Mizilo 6:6, 7) Keekio i kilengele Bakasininkizia Bakue Yehova baye basaakula musita, mu kila mulungu, wa kumupupa Yehova mu lupua. Bali balondolola baasekeleele kabili mu mutende bintu paleepale bya kimupasi kukoonkana ni beelia bibakabiile mu lupua lwabo. Anzia kine uli sie buunke, twakupapaata usaakule musita wakusambilila we buunke lyasi lya Bibilia liwatona pa lwakue Leeza.

Ni musita wakumupalama Yehova. ‘Mupalame Leeza, ni ye ali kumipalama.’ (Yakobo 4:8) Tuli twamumana buino Yehova kupitila kusambilila biingi palua mibeele yakue, ni beelia byali wakita bilandilue mu Bibilia Mulandu wakue. Nzila ileengele ya kukita lupupo lwa mulupua ni kubeleenga Bibilia pamo mu lizui likata, paange kunti mwakoonka ntantiko ya kila mulungu ya kulonghaana kwa Utumishi na Maisha ya Mukristo (Miilo ni Buikazi bwa Mukristu). Kila muntu mu lupua lwenu kunti bamupeela kipitu kya kusoma. Kupuako, boonse kunti balondolola beelia bibasambilila.

Ni musita wa kupalamana mu lupua. Kine bamulume ni mukazi ao baviazi ni baana baabo, bali basambilila Bibilia lwa pamo, bukibuza buli bwakila kukosa. Oozo, upalile kuya waali musita wa nsaansa kabili wa mutende upembeelue ni nkulu ikata na kila muntu mu lupua. Baviazi bapalile kusaakula maasi afuene kubakwasia baana baabo ni kualondoluela pamo naabo, kukoonkana ni miaka yaabo. Paange kunti balondoluela palua meezio ali asaanga baana ku masomo ni kubakwasia. Musita unge, kunti babombia lyasi lya mu Munara wa Mulinzi (Lupungu Lwakue Kamwenenena) ao Amuka! (Buuke!), ni lili mu kitente kyetu kya Enternete kya jw.org. Ao paange, kunti bakoonka programe imo ya JW Télédiffusion (tv.jw.org), ni kuilondoluela lwa pamo. Kunti mwasambilila nghiimbo ili yaimbua ku kulonghaana. Kisia musita oozo, beengi bali baatona kulia ao kumina tuntu paleepale.

Kupisia musita uweeme nga oozu mu mulungu sababu ya kumupupa Yehova kwakaba kukwasia lupua loonse kutona kusambilila Bibilia. Leeza takaba kuandua kupaala mute weenu.​—Malumbo 1:1-3.

• Sababu ya ki tupalile kuya twali ni musita wa kukita lupupo lwa mu lupua?

• Baviazi, kunti bakita siani eevi lupupo lwa mu lupua luye lwasaansamusiizie?