LISOMO 24

Tuli Twafumia pi Nfalanga ya Kukwasia Miilo Yeetu?

Muntu ali mukubiika bulongio bwa kwitonena

Bakasininkizia Bakue Yehova bali mu kusimikila mpunda iweeme — Népal

Balupua ni bankazi bepeele kwa kwitonena bali mu kukuula Nsesi ya Bukolo mu kyalo kya Togo — Togo

Balupua ni bankazi bepeele kwa kwitonena ku Beteli ya mu kyalo kya Grande-Bretagne — Grande-Bretagne

Kila muaka, tuli twafumia ni kukasania kwa bule mamilioni a Bibilia ni mpapulo inge. Tuli twakuula ni kusuunga Masesi a Bukolo ni ma Beteli. Tuli twafikilizia bintu bikabiilue na maelufu a balupua ni bankazi bali babombela ku Beteli ni ba misionere, ni kukwasia basanzilue. Paange kunti waiipuzia eevi: Eba, nfalanga ili yakwasia miilo eezi yoonse ili yafuma pi?

Te twizi kulomba ata kya likumi ao kupatikizia bantu baleete bulongio kabili te twizi kulomba sadaaka. Anzia kine miilo yeetu ya mu kyalo kyoonse ili yabonvia nfalanga iingi, te twizi kulombelezia nfalanga. Tekusyapitile miaka ikilile pa mia, tangia nimero ya bubili ya Munara wa Mulinzi (Lupungu Lwakue Kamwenenena) ilande nangue, tumuswapiile sie Yehova atukwasie mu miilo yeetu. Pakaako, tetuviinda kulombelezia nfalanga ni kulilila ku bantu eevi batukwasieko. Ni leenu, i vituli twakita!—Mateo 10:8.

Miilo yeetu ili yakwasiiwa na bulongio bwa kwitonena. Bantu beengi, bali batasia saana masambilizio eetu a Bibilia kabili bali balongia mu kwitonena palua miilo ezio. Bakasininkizia benka beene, bali ni nsaansa ya kufumia musita, maka, nfalanga ni bunoonsi buunge, eevi kutona kwakue Leeza kukitike mu kyalo kyoonse. (1 Milandu ya Nsiku 29:9) Baalia batonene, kunti babiika nfalanga yaabo kwa kwitonena mu bisanduku bya bulongio ku Nsesi ya Bukolo ni kufuasi ku twakitila kulonghaana kukata. Nfalanga iingi ituli twapokelela ili yafuma ku bantu basili na nfalanga iingi, nga olia mwanakazi mukanfwilua watasiiziwe na Yesu, paantu wafumiizie nfalanga ya bingolongolo bibili bya paansi saana palua bunoonsi bwa mu ekalu. (Luka 21:1-4) Ni pakaako, lili lyoonse, kila muntu kunti wafumia “pa elia ianonkele ni kuisunga,” eevi “apaane sie mwamweneene.”—1 Bakorinto 16:2; 2 Bakorinto 9:7.

Tuli ni kisinka nangue Yehova wakaba kutwalilila kukinkizia mitima ya bantu baalia batonene kumukindika kupitila “bintu [byaabo] bya mana,” ni kukwasia miilo ya Bukolo, eevi kutona kwakue kukitike.—Tuswalo ni Mafunde 3:9, nwt-ZS.

Sababu ya ki diini yeetu ipuseene ni madiini aange?
Bulongio bwa kwitonena buli bwabomba siani?