Sambilizia mu Nzila Ileengele

Yesu Waakitile ki?

VIIDEO: Yesu Waleeta Mufuano Ulangiliile Baba Weetu Vyali Watwemena

1. Mona VIIDEO, ao soma Mateo 6:25-27. Kisia, asuka biipuzio bili paapa pensina:

1. Yesu waaleetele mufuano ki ulangilile nangue Yehova ali watwemena?

2. Atasie kine Yesu waali wamanine bintu bingi palua tooni, waapoozele maano ku bintu ki bileengele? Juu ya ki ezio yaali nzila iweeme ya kusambilizia?

Mufuano Wakue Yesu Watusambilizia ki?

2. Kine twasambilizia mu nzila ileengele, bantu bakaba kulanguluka beelia bitwakibasambilizia, kabili tuli kubakumia ku mutima.

Koonka Mufuano Wakue Yesu

3. Te kulanda bingi saana. Kuliko kulanda bintu byonse biumanine palua lyasi, pooza maano ku bintu bilandilue mu lyasi limuli mukusambilila. Kisia kwipuzia kiipuzio, pembelela wasipikiziizie musambi obe aasuke. Kine tamanine kyasuko ao waleeta kyasuko kyapuseene ni beelia bili byasambilizia Bibilia, mwipuzie biipuzio binge eevi umukwasie atontonkanie palua bobo buavia. Kine musambi waunvua kintu kikata kimuli mukulandila, endo mwaye mu seemu ikoonkelepo.

4. Mukwasie musambi obe apatanisie beelia byali kusambilila ni beelia byakimana kale. Kwa mufuano, ntaanzi ya kutendeka lisomo linge lilandile palua kufufuka, kunti wapitulukamo nakue mu kifupi beelia byakisambilila kale palua aali ya muntu afuile.

5. Bombia buino mifuano. Ntaanzi ya kubombia mufuano, iipuzie eevi:

1. ‘Eba, ozu mufuano uleengele?’

2. ‘Eba, musambi wane ali kuleenga kunvua ozu mufuano?’

3. ‘Eba, ozu mufuano, wakaba kumukwasia musambi wane akabe kulanguluka bintu bikata bitwasambilila, apana akabe kulangulukasie mufuano?’