Yehova Akentele pa Bantu Bakue

1. Juu ya ki Yesu waamuloombele Baba wakue abasuunge basambi bakue?

MU NSITA ya busiku ntaanzi ya kufua kwakue, Yesu waamuloombele Baba wakue wa ku muulu kintu kiibeleele. Waamuloombele Yehova abasuunge basambi bakue. (Yoan. 17:15, 20) Kakiine, lyonse Yehova ali wasaangua wakentele pa bantu bakue, i kulanda ali wabeemena ni kubasuunga. Anzia evio, Yesu waali wamanine nangue Sataana wakaba kubapinga saana basambi bakue. Kabili, Yesu waali wamanine nangue basambi bapalile kukwasiiwa na Yehova eevi baviinde kwanzia maavia ali aleetua na Kibanda.

2. Nga vilandile Malumbo 33:18-20, juu ya ki te tupalile kutiina maavia?

² Keenu kyalo kitunguluilue na Sataana, kili mukubaleetela Bakristu ba kisinka maavia engi. Tuli twasaakaana ni maavia ali alengia paange twatioka mutima, kabili ali aezia bukisinka bwetu kuli Yehova. Inzi, nga vituli kumona mu leeli lyasi te tupalile kutiina kantu. Yehova atukentele, kabili ali mukumona maavia atuli mukusaakaana nao, kabili eteaniiziesie kutukwasia kusipikizia maavia. Kansi, tumone mifuano ibili ili mu Bibilia ilangiliile nangue Yehova ‘abakentele baalia bali bamutiina weene.’​—Soma Malumbo 33:18-20.

YEHOVA ALI WATUKWASIA KINE TWAIUNVUA KUYA TWALI BUNKE

3. Paange kunti twaiunvua kuya twali bunke musita ki?

³ Anzia kine tukwete balupua ni bankazi bengi mu kilonghaano, nsita inge kunti twaiunvua kuya twali bunke. Kwa mufuano, balumendo ni bakaziana kunti baiunvua kuya bali bunke musita ubali mukulondolola pamo ni banafunzi benabo ku masomo palua bintu bibazumiine. Kabili kunti baiunvua kuya bali bunke kine bakuukila mu kilonghaano kya leenu. Bange pakati keetu, kunti baiunvua ovio ao kutioka mutima kupitila kutontonkania nangue tupalile kuluisia ezio aali ku maka etu fwe beene. Kunti twatiina kubabuila bange aali yeetu paantu tuli mukutontonkania nangue paange tebaviinda kunvua. Kabili, nsita inge paange kunti twatendeka kutontonkania nangue te kuli muntu ali mukutwemena. Nsita inge tuli twaiunvua bila twali na muntu wa kutukwasia kabili twaemene, atasie kine ni kiki kilengiizie twiunvue kuya twali bunke. Yehova teezi kutona ata kaniini tuye twaiunvua evio. Juu ya ki kunti twalanda evio?

4. Juu ya ki kabika Eliya waalandile nangue “Neene i asieleposie bunke”?

⁴ Tontonkania mufuano wakue Eliya, mwalalume wa kiketekelo. Yezebeli abanga wapinguile kumwipaya, pakaako, waakitile nsiku ikilile pa 40 wabutukile juu ya kusuunga bukose bwakue. (1 Mak. 19:1-9) Kupuako, lwaaisaangile wali bunke mu lipala waamulandile eevi Yehova: “Neene i [kabika] asieleposie bunke.” (1 Mak. 19:10) Kubanga kwali ni bakabika bange mu kyalo. Kwa mufuano, Obadia waasuungile bakabika 100, eevi te kunti bepaiwe na Yezebeli. (1 Mak. 18:7, 13) Ale juu ya ki Eliya waaiunvuile kuya wali bunke saana? Eba, waali watontonkania nangue baalia bakabika baasuungilue na Obadia, baali basyafuile bonse mu ozo musita? Eba, paange waaisaangile kuya wali bunke paantu te kwaali muntu unge waatendekele kumubombela Yehova pamo nakue, anzia kine Yehova waalangiliile ku Lupili lwa Karmeli nangue weene i Leeza wakisinka? Eba, waali waamwene nangue te kuli muntu amanine buavia bwakue? Ao eba, waali watontonkania nangue te kuli muntu ali mukumwemena? Bibilia te ilondoluele mpunda yonse palua aali yaaiunvuile Eliya. Inzi, kintu kitumanine kakiine ni keeki: Yehova waali wamanine kintu kyaali kyamulengele Eliya eyunvue kuya wali bunke, kabili waali wamanine buino vya kumukwasia.

5. Yehova waamusininkiziizie siani Eliya nangue tabanga wali bunke?

⁵ Yehova waamukwasiizie Eliya mu nzila ingi. Waamukinkiziizie Eliya alondolole. Yehova waamwipuziizie eevi mara ibili: “Uli mukukita ki paanu?” (1 Mak. 19:9, 13) Lyonse, Yehova waali wamutuilizia Eliya musita lwaali walanda vyaali waiunvuile. Yehova waamukwasiizie Eliya kupitila kumulangilila kubapo Kwakue, kabili nangue Weene ali ni maka saana. Kabili, waamusininkiziizie nangue kubanga kwakilisie ni Baisraeli bengi baali bamupupa Weene. (1 Mak. 19:11, 12, 18) Kakiine Eliya waaiunvuile buino saana kisia kumubuila Yehova bintu bibanga byali ku mutima wakue, ni kisia kunvua Yehova vyaamwasukile. Yehova waamupeele Eliya miilo ingi ya mana. Yehova waamulandile amubiike mafuta Hazaeli eevi aaluke likolo wa Siria, Yehu aaluke likolo wa ku Israeli, ni Elisha aaluke kabika. (1 Mak. 19:15, 16) Yehova lwaamupeele Eliya miilo ezio, waamukwasiizie apooze maano akue ku bintu biweeme. Kabili, Leeza waamupeele Eliya kibuza wa peepi, Elisha. Weewe, kunti wakwasiiwa siani kuli Yehova kine waiunvua kuya wali bunke?

6. Kunti wapepa palua ki kine waiunvua kuya wali bunke? (Malum. 62:8)

⁶ Yehova wakukupa upepe kuli weene. Amwene maavia auli mukusaakaana nao, kabili wakusininkiziizia nangue wakaba kutuilizia mapepo obe nsita yonse. (1 Bat. 5:17) Ali watona kubatuilizia bantu bakue bali bamupupa. (Tus Maf. 15:8) Kine waiunvua kuya wali bunke, kunti wapepa palua ki? Mubuile Yehova vyuli mukwiunvua, nga vyaakitile Eliya. (Soma Malumbo 62:8.) Mubuile bintu bili mukukwemia ni vibili mukulengia wiunvue. Muloombe Yehova akukwasie kumana beelia byupalile kukita kine waiunvua kuya wali bunke ao kine waiunvua kukisua. Kwa mufuano, kine waiunvua kuya wali bunke ao waunvua muenzo musita banafunzi benobe lubakwipuzia palua bintu byuzumiine, muloombe Yehova akupeele mibeele ya kusipa yukabiile eevi uviinde kulondolola. Kabili, kunti wamuloomba Yehova akupeele mulangue eevi ulondolole bintu byuzumiine wakengeele. (Luk. 21:14, 15) Kine wiunvuile kuya watiokele mutima, muloombe Yehova akukwasie eevi ulande pamo ni Mukristu akosele kimupasi palua maavia azo. Kunti wamuloomba Yehova amukwasie olia muntu uuli kubuila maavia obe eevi onvue aali yobe. Mubuile Yehova bintu byonse bili ku mutima obe. Inika vyali mukwasuka mapepo obe, kabili itabila kukwasiiwa na bange, kine wakita evio teukaba kwiunvua saana kuya wali bunke.

7. Weewe, wasambilila ki kupitila mufuano wakue Mauricio?

⁷ Yehova waatupeele fwe bonse miilo ya mana ya kukita. Uye wasininkiziizie nangue Yehova ali wamona ni kutasia miilo yonse yuli wakita mu kilonghaano ni mu miilo ya kusimikila. (Malum. 110:3) Kuya wali ni bingi bya kukita mu ezio miilo, kunti kwakukwasia siani kine waiunvua kuya wali bunke? Mona mufuano wakue lupua umo mulumendo ali wakuutua Mauricio.b Musita uniini kisia Mauricio kubatiziiwa, kibuza wakue wa peepi saana waatendekele kulekela kisinka. Mauricio walanda eevi: “Musita unaamwene weene wamusia Yehova, naatiokele mutima. Naatendekele kwiipuzia kine kunti nafikilizia bulayo bwane bwa kumubombela Yehova ni kusiala nali mu lupua lwakue. Naaiunvuile kuya nali bunke, kabili naatontonkaniizie nangue te kuli muntu ali kuviinda kunvua aali yane.” Ni kiki kyaamukwasiizie Mauricio? Walanda eevi: “Naaongeziizie mute wane mu miilo ya kusimikila. Keekio kyaankwasiizie ndekele kutontonkaniasie palwane ne muine ni vinaali naiunvua. Naaunvuile nsaansa, kabili nsyaali naiunvua kuya nali bunke saana musita unaali nabomba pamo ni bange mu miilo ya kusimikila.” Kakiine, anzia kine loonu tetuviinda kusimikila pamo ni balupua ni bankazi betu twali pamo, tuli twakoseleziiwa kupitila kusimikila pamo naabo twabombia mukanda ao telefone. Ni kiki kinge kyaamukwasiizie Mauricio? Waongezia eevi: “Kabili, naatwaliliile kuya nali ni bingi bya kukita mu kilonghaano. Naaikwindile saana kuya nateania ni kupisia biputulua bya basambi mu kulonghaana. Ezio miilo yaankwasiizie kwiunvua kuya nali wa mana kuli Yehova ni ku bange.”

YEHOVA ALI WATUKWASIA KINE TUTIOKELE MUTIMA NA MAAVIA AKOLELE

8. Maavia akolele kunti atulengia twiunvue siani?

⁸ Tuswapiile kusaakaana ni maavia mu enu nsiku ya mpeleezio. (2 Tim. 3:1) Inzi, musita ni aali ya maavia atuli kusaakaana nao kunti byalengia tumone kuya kyali kyeni. Paange bila twaswapiile kunti twaaluka ni buavia bwa kupata nfalanga. Paange, doktere kunti watupiima ni kutubuila nangue tuli ni buluele bukolele saana, ao paange kunti twafuilua na muntu ututonene. Mu nsita nga ezio, paange kunti twaiunvua kuya twatiokele mutima ni kutitikilua saana, asa kine maavia azo ali mukuiza akoonkeene, ao paange twapata maavia engi pa musita umo. Inzi, languluka nangue Yehova amwene aali yeetu, kabili kupitila kukwasiiwa na weene kunti twaviinda kuluisia buino kila buavia.

9. Londolola maavia paleepale aapatile Yobu.

⁹ Tontonkania Yehova vyaamukwasiizie Yobu, mwalalume wa kiketekelo. Waapatile maavia engi akolele mu musita uniini, kabili a kutiona mutima. Mu busiku bumo, Yobu waapatile mpunda palua bintu byaaviizie saana kabili bya kutiona mutima byaakitikile. Bebio bintu byaalengiizie ba nama kwibua ao kwipaiwa, ni babombi bakue kufua, kabili kikilile kubiipa ni keeki, baana bakue batonua baafuile. (Yob. 1:13-19) Kisia musita uniini, musita lwabanga wakilisie ni bulanda bukata, Yobu waapatilue na buluele bwaviizie, kabili buli bwaalulula mubili. (Yob. 2:7) Aali yakue Yobu ibanga yaaviizie saana, ni keekio kyaalengiizie alande eevi: “Nasuula buikazi bwane; nsitonene kutwalilila kuya naikeele.”​—Yob. 7:16.

10. Yehova waamukwasiizie siani Yobu asipikizie maavia abanga wali nao? (Mona foto ili ku ntendeko ya kazeeti.)

¹⁰ Yehova waali wamukentele Yobu. Paantu Yehova waali wamutonene Yobu, waamupeele bintu byaali wakabiile eevi aviinde kusipikizia buino maavia akue. Yehova waalandile ni Yobu ni kumulangulusia palua mulangue Wakue usili na mpela, kabili waamulangulusiizie vyali waemena bibumbua Byakue kwa ntono. Waalandile palua ba nama ba kutiinia. (Yob. 38:1, 2; 39:9, 13, 19, 27; 40:15; 41:1, 2) Kabili, Yehova waamubombiizie Elihu, mwalalume mulumendo wa kiketekelo eevi amukoselezie Yobu ni kumuteekia mutima. Elihu waamusininkiziizie Yobu nangue, lyonse Yehova ali wapaala bantu bakue bali bamupupa juu ya kusipikizia kwabo. Inzi kabili, Yehova wamusoonseziizie Elihu amupeele Yobu masoke paleepale a ntono. Elihu waamukwasiizie Yobu eevi alekele kutontonkania saana palwakue muine. Waakitile evio, kupitila kumulangulusia nangue fwefue tuli ba bulebule saana kine twaipalania kuli Yehova, Kabumba wa myulu ni kyalo. (Yob. 37:14) Kabili Yehova waamupeele Yobu miilo ya kukita. Waamulandile abapepele babibuza bakue batatu baakitile lizaambi. (Yob. 42:8-10) Yehova ali watukwasia siani leenu musita utuli twasaakaana ni maavia akolele?

11. Bibilia ili yatukwasia siani musita utuli twasaakaana ni maavia?

¹¹ Yehova teezi kutulanzia nga evelia vyaalandile ni Yobu, inzi Weene ali walanda ni fwefue kupitila Mulandu Wakue, Bibilia. (Bar. 15:4) Ali watuteekia mutima kupitila kutupeela kiswapilo palua musita uli mukuiza. Tontonkania kaniini palua malanga paleepale afumine mu Bibilia ali kuviinda kutukwasia musita utuli twasaakaana ni maavia. Mu Maleembo, Yehova watusininkiziizia nangue te kuli kintu ata kimo, kubiika mukati ni maavia akolele, ‘kyakaba kuviinda kutupusania kufuma ku ntono yakue.’ (Bar. 8:38, 39) Kabili, ali watusininkiziizia nangue “ali peepi ni baalia bali bamukuutila” kupitila lipepo. (Malum. 145:18) Yehova ali watubuila nangue kine twamuswapila, kunti twaviinda kusipikizia kila buavia, kabili kunti twaaluka ni nsaansa ilingiliile musita utuli mu buavia. (1 Bakor. 10:13; Yak. 1:2, 12) Kabili, Mulandu Wakue Leeza watulangulusia nangue maavia etu ni a musita uniini, kabili ni afupi kine twaapalania ni mpaalo ya loonse yali wakatupeela. (2 Bakor. 4:16-18) Yehova ali watupeela kiswapilo kilangiliile nangue wakaba kubafumiapo baalia bali batuleetela maavia etu onse, i kulanda, Sataana Kibanda pamo ni baalia bonse bakoonkele nzila yakue ibiipile. (Malum. 37:10) Eba, ubiikiliile ni maleembo a Bibilia ali ateekia mutima a kukukwasia kusipikizia maavia musita uli waiza?

12. Yehova atonene fwefue tukite ki eevi tunoonkele mu Mulandu wakue?

¹² Yehova atonene tuye twaipaangila musita wa kuya twasoma Bibilia lingi, kabili tuye twatontonkania saana palua bintu bituli twasoma. Musita utuli twabombia beelia bituli twasambilila, kiketekelo kyetu kili kyakila kukosa, kabili tuli twakila kumupalama Baba weetu wa ku muulu. Keekio kili kyatukwasia kupata maka a kusipikizia maavia. Kabili, Yehova ali wabapeela mupasi utakatiifu baalia bali baswapila Mulandu wakue. Ozo mupasi kunti watupeela “maka akata” a kusipikizia kila buavia.​—2 Bakor. 4:7-10.

13. Kyakulia kya kimupasi kili kyafumiiwa na “muzia wa kisinka ni wa maano” kunti kyatukwasia siani kusipikizia maavia?

¹³ Kupitila kukwasiwa na Yehova, “muzia wa kisinka ni wa maano” ali mukufumia maasi engi, ma viideo engi, ni miziki. Bebio bintu kunti byatukwasia kukosia kiketekelo kyetu ni kusiala twali peepi ni Yehova. (Mat. 24:45) Tupalile kubombia buino saana kila kintu kili kyatupeela Yehova. Mu buleenu, nkazi umo ali waikala ku États-Unis waakitasia palua bebio byakulia byonse bya kimupasi. Waakilanda eevi: “Mu miaka 40 inaakikita namubombela Yehova, kiketekelo kyane kyakyeziiwa lingi.” Babu wakue, waaipailue na shofere waali wakolelue, baviazi bakue baaluele saana ni kufikiila kufua, kabili ni weene waaluele buluele bwa kapoopo mara ibili. Ni kiki kyaamukwasiizie kusipikizia? Waakilanda eevi: “Lyonse, Yehova wakiba wangemena. Kyakulia kya kimupasi kili kyateania Yehova kupitila muzia wa kisinka ni wa maano, kyaakinkwasia kusipikizia. Kupitila keekio kyakulia, ndi naiunvua nga Yobu, olia waalandile eevi: ‘Neene nsikaba kulekela bukisinka bwane!’”​—Yob. 27:5.

14. Yehova ali wabombia siani balupua ni bankazi betu eevi kutukwasia kusipikizia maavia etu? (1 Batesalonika 4:9)

¹⁴ Yehova ali wababeelezia bantu bakue eevi baye balangililana ntono ni kukoseleziana mu nsita ya maavia. (2 Bakor. 1:3, 4; soma 1 Batesalonika 4:9.) Nga evelia vyaakitile Elihu, balupua ni bankazi bali basaangua batonene kutukwasia eevi tusiale twali ba kisinka musita utuli twasaakaana ni maavia. (Miil Bat. 14:22) Kwa mufuano, mona balupua ni bankazi ba mu kilonghaano kyakue Diane vibaamukoseleziizie, ni kumukwasia kusiala walumine kimupasi musita mulume wakue lwaakwetue na buluele bwaviizie saana. Waalandile eevi: “Kibanga kyakolele. Inzi, mu ezio miezi yaali yaaviizie, twaamwene maboko akue Yehova a ntono kabili alumine. Kilonghaano kyetu kyaakitile bintu bingi eevi kutukwasia. Twaali twapokelela bantu bakuiza kutumona, bakutukuuta ku telefone ni kutukumbatila mu nzila itwaali twakabiile eevi tuviinde kutwalilila kusipikizia. Paantu nsiizi kwenzia motoka, balupua ni bankazi baali basininkizia nangue ndi kuya ku kulonghaana, ni kuya mu kusimikila musita undi ni buviinde bwa kukita evio.” Kakiine, tuli ni nsaansa ikata ya kuya twali mu lupua loolo lwa kimupasi luli ni ntono!

TULI TWAMUTASIA YEHOVA PAANTU ALI WATWEMENA KWA NTONO

15. Juu ya ki tusininkiziizie nangue kunti twaviinda kusipikizia maavia?

¹⁵ Fwe bonse twakaba kupata maavia mu nzila paleepale. Anzia evio, nga vitwafuma mukusambilila, tetukaba kuya twali bunke musita utwakaba kusaakaana ni buavia. Nga evelia vili vyakita baba ali ni ntono, Yehova ali wasaangua watukentele. Weene ali peepi ni fwefue, kabili aleengelesie kututuilizia musita utuli twamupapaata eevi atukwasie, kabili atonene kutukwasia. (Is. 43:2) Tuli ni kisinka nangue kunti twaviinda kusipikizia maavia, paantu weene ateaniizie mu buwaame kila kintu kitukabiile eevi tuviinde kusipikizia. Weene, atupeele bupe bwa lipepo, Bibilia, byakulia bingi bya kimupasi, pamo ni balupua ni bankazi bali ni ntono eevi kutukwasia musita utukabiile kukwasiiwa.

16. Kunti twakita siani eevi Yehova atwalilile kuya watwemena kwa ntono?

¹⁶ Kakiine, tuli mukutasia saana paantu tuli ni Baba weetu wa ku muulu atukentele! ‘Mitima yeetu ili mukusekelela muli weene.’ (Malum. 33:21) Kine twabombia buino saana kila kintu kyali watupeela eevi kutukwasia, tuli kulangilila nangue tuli twamutasia Yehova paantu ali watwemena kwa ntono. Kabili, ni fwefue tuli ni bintu bitupalile kukita eevi Leeza atwalilile kutwemena. Mu nzila inge, kine twatwalilila kwikwinda saana kumunakila Yehova, ni kukita bintu biweeme pa menso akue, wakaba kuya watukentele loonse!​—1 Pet. 3:12.