Abanga Waeleela Mazaambi Alia Aakitilue mu Musita Waapitile

Kunti twaeleelua sie mazaambi etu kupitila ngeleelo ya kilubula mulandu elia yaafumiizie Yesu kupitila mulopa wakue. (Baef. 1:7) Inzi, Bibilia yalanda eevi: “Leeza, mu kusipikizia kwakue abanga waeleela mazaambi alia aakitilue mu musita waapitile,” i kulanda, ntanzi Yesu tanafumie kilubula mulandu. (Bar. 3:25, NWT.) Eba, kunti kyakitika siani Yehova aye waeleela mazambi ntanzi kilubula mulandu tekinafumiiwe, ni wenka ozo musita atwalilile kuya wali Leeza wa nsaambu?

Kukoonkana ni mawazo akue Yehova, kilubula mulandu kili nga evelia kyalipilue musita olia waapinguile kufumia “luvyalo” lwa kupususia bantu bali ni kiketekelo. (Kut. 3:15; 22:18) Leeza abanga wasininkiziizie kakiine nangue, pa musita olia waabiikile, Muana wakue lyonga wakaba kwitonena kufumia kilubula mulandu. (Bag. 4:4; Baeb. 10:7-10) Yesu lwabanga wali pa kyalo, Yehova waamupeele buviinde bwa kweleela mazaambi ntanzi tanafumie kilubula mulandu. Yesu abanga waeleela mazaambi a baalia babanga bali ni kiketekelo, paantu abanga wamanine nangue ngeleelo ya kilubula mulandu elia yali wakaba kufumia yakavimba mazaambi abo.—Mat. 9:2-6.