LYASI LYA KUSAMBILILA LYA 7
LWIMBO 15 Mutasie Libeli Wakue Yehova!
Kweleela Kwakue Yehova Kuli Kwakuletela Faida ki?
“Wewe uli waeleela mu kisinka.”—MALUM. 130:4.
KIKATA KIINE
Tuli kumona mifuano ili mu Bibilia elia ilondolwele nzila imo iibeleele yakue Yehova ya kutweleela. Leli lyasi, lili kutukwasia tukile kumutasia pantu ali watweleela.
1. Kine muntu wakulanda nangue nakweleela, juu ya ki kili kyasangua kyakolele kwinika kyakebele kulanda?
“NAKWELEELA.” Pange uli waunvua bwino sana kine muntu wakulanda evio. Kabili ozo mulandu kunti wateekia sana mutima, asa kine umanine nangue wewe waakilanda ao waakikita kintu kyaakimukisia ozo muntu wakulanda nangue nakweleela! Inzi bulanzi, “Nakweleela” buli na mana ki? Eba, bobo bulanzi bulangiliile nangue muntu olia uwaakikisia akebele kulanda nangue burafiki bobe pamo nakue bwabwela kabili kuluma? Ao eba, akebele kulanda sie nangue tatonene kabili kulandila palua kekio kilubo? Musita bantu lubali balanda nangue nakweleela, bobo bulanzi buli bwasangua na mana ipusene-puseene.
2. Kweleela kwakue Yehova kulondolwelue syani mu Malembo? (Mona ni bulondolozi bwa pensina.)
2 Yehova ali watweleela fwe bantu basipwililikile mu nzila iibeleele sana kupusana ni vituli twaeleelana. Te kuli muntu ali kuvinda kweleela nga Yehova vyali waeleela. Kalemba wa Malumbo waalandile evi pa lwakue Yehova: “Wewe uli waeleela mu kisinka, evi bantu bakutiine.”a (Malum. 130:4) Kakiine, Yehova ali “waeleela mu kisinka.” Wene, i ali watubwila mana iine ya kweleela. Mu aali inge, ba kalemba ba Bibilia baabombiizie mulandu wa Kiebrania palua bulanzi kweleela. Kabili, ozo mulandu te ubombiiziwe ata limo evi kulondolwela palua kweleela kuli kwaeleela bantu.
3. Kweleela kwakue Yehova kupusene syani ni vituli twaeleela? (Isaya 55:6, 7)
3 Kine Yehova wamweleela muntu, ali wakuusa lizambi lyakue. Burafiki bolia bwaakiinooneka buli bwabwela kuluma kabili. Tuli twatasia sana pantu Yehova ali watweleela kakiine, kabili ali watweleela lingi.—Soma Isaya 55:6, 7.
4. Yehova ali watukwasia syani kunvua mana iine ya kweleela kwa kisinka?
4 Kine kweleela kwakue Yehova kupusene ni kweleela kwetu, eba, ale fwe bantu basipwililikile kunti twavinda syani kunvua mana iine ya kweleela kwa kisinka? Yehova abombiizie mifuano paleepale iweme sana evi kutukwasia kwinika kweleela kwakue vikuli kwasangua. Mu leli lyasi, tuli kumonako mifuano paleepale. Ezio mifuano ili kutulangilila Yehova vyali wafumia lizambi ni kubwezia burafiki bolia bwaakiinoonua na lizambi. Musita utuli kuya twamona ezio mifuano, tuli kukila kumutona ni kumutasia Baba wetu aweme, kabili wa luse, olia ali waeleela mu nzila ingi sana.
YEHOVA ALI WAFUMIA LIZAMBI
5. Ni kiki kili kyakitika musita Yehova lwali watweleela mazambi?
5 Lingi mu Bibilia, mazambi ali apalaniiwa na bifunda bifinine. Likolo Daudi waalandile evi palua mazambi akue: “Bilubo byane bitulameene pa mutue wane; nga kifunda kifinine, bivulile sana, nsivinda kubitwama.” (Malum. 38:4) Inzi, Yehova ali waeleela mazambi a baalia bali bakita bintu bibipile, kisia, balapila. (Malum. 25:18; 32:5) Mu Kiebrania, bulanzi bupilibwilue na mulandu, “kweleela,” buli na mana ya “kulendula” ao “kutwama.” Kunti twamutontonkania Yehova kuya wali nga mwalalume ali ni maka, olia ali mukufumia kifunda kya lizambi pa bikoope byetu, ni kukipoza kule.
“Waaeleele” (Malum. 32:5)
6. Yehova ali wapoza syani mazambi etu?
6 Bibilia ibombiizie mufuano unge olia ulangiliile Yehova vyali wapoza kule sana mazambi etu. Malumbo 103:12 ali alanda evi: “Nga evelia vili kulepa kuli pakati ka kutula-koba ni kuzika-koba, i vyali wabiika kule ni bilubo byetu.” Kufuma kutula-koba, mpaka kuzika-koba, palepele sana. Kutula koba ni kuzika koba, te kwizi kusaakaanapo ata limo. Kekio kilangiliile nangue Yehova ali watwama mazambi etu ni kuapoza kule sana, kupusana ni vituli twatontonkania. Kekio kyatusininkiziizia nangue Yehova ali watweleela kakiine!
“Nga evelia vili kuleepa kuli pakati ka kutula koba ni kuzika koba” (Malum. 103:12)
7. Bibilia ili yalondolola syani Yehova vyali wakita palua mazambi etu? (Mika 7:18, 19)
7 Ata sie kine, mu nzila ya mufuano, Yehova ali watwama mazambi etu ni kuapoza kule, eba ali watwalilila kualanguluka? Ata, te evio. Likolo Hezekia waalembele pa lwakue Yehova nangue: “Wewe waakipoza mazambi ane onse ku musana kobe.” Ao nga vilandile bulondolozi bwa pensina, “wewe waakifumia mazambi ane onse kufuma pa menso obe.” (Is. 38:9, 17; bulondolozi bwa pensina.) Kekio kilangiliile nangue Yehova ali watwama mazambi a baalia bali balapila ni kuapoza kule ni menso akue. Bobo bulanzi kunti bwalandua kabili evi: “Wewe waakyalula [mazambi ane] nga evelia asyaakitikilepo.” Yehova akonkomeene kabili bobo bulanzi kupitila kubombia mulandu unge. Ozo mulandu uli mu lilembo lya Mika 7:18, 19. (Soma.) Leli lilembo, lilangiliile nangue Yehova ali wapoza mazambi etu mu semu ya pansi ya lyezi. Mu nsita ya kale, kine muntu waponiizia kintu pansi pa lyezi, kekio kintu te kibanga kyapatika kabili.
“Wewe waakipoza mazambi ane onse ku musana kobe” (Is. 38:17)
“Wewe wakaba kupoza mazambi abo onse pansi pa lyezi” (Mik. 7:19)
8. Kufikiila papa, twasambilila ki?
8 Kupitila ezi milandu ili mu Bibilia, twasambilila nangue, kine Yehova watweleela, ali wapoza kule mazambi etu. Pa kako, te tupalile kutwalilila kwimona kuya twali ni kilubo. Daudi waalandile evi: “Bali ni nsansa ni baalia beleelue bikitua byabo bityonene muzilo, kabili baalia bavimbiilue mazambi; ali ni nsansa ni muntu asipendelue ata kanini na Yehova kuya wali ni lizambi.” (Bar. 4:6-8, NWT) Koko i kweleela kwa kisinka!
YEHOVA ALI WAKUSA LIZAMBI
9. Bibilia ili yatukwasia syani kwinika Yehova vyali waeleela kakiine?
9 Yehova wabombia kabili milandu inge ya mufuano evi kutukwasia kwinika vyali wakusa mazambi a baalia bali balapila kupitila ngeleelo ya kilubula-mulandu. Yehova walondololua nga muntu ali mukufula ni kusukunkania azo mazambi. Kekio kili kyalengia muntu olia waakikita lizambi aswesiiwe. (Malum. 51:7; Is. 4:4; Yer. 33:8) Yehova mwine walondolola vikili kyaaluka kine wene wafula lizambi lya muntu ni kulisukunkania. Walanda evi: “Anzia kine mazambi enu ali nga rangi yakasi ili yabeeka, akaalulua asue nga kibue; ata sie kine ali nga ngubo yakasi sana, akaaluka nga masako a mukooko.” (Is. 1:18) Kili kyasangua kyakolele sana kufumia rangi yakasi ku ngubo. Inzi, kupitila ezio milandu ya mufuano, Yehova watusininkiziizia nangue mazambi etu kunti afulua ni kusweta sana evi te kunti amoneke kabili.
“Anzia kine mazambi enu ali nga rangi ya kasi ili yabeka, akaalulua asue nga kibue” (Is. 1:18)
10. Ni mulandu ki unge ubombiizie Yehova evi kulondololwela kweleela kwakue vikuli kwasangua?
10 Nga vitwaakimona mu lyasi lyaakipita, mazambi apalaniiziwe na madeni. (Mat. 6:12; Luk. 11:4) Pa kako, kila musita utuli twamukitila Yehova lizambi, kili nga evelia fwe bali mukukila kwiingizia mu lideni. Tupalile kumulipa kintu kikata sana! Inzi, musita Yehova lwali watweleela, kili nga evelia wene ali wavuta lideni lelia litwaakiba twapalile kulombua evi tulipe. Yehova tezi kutulomba tulipe palua mazambi etu alia aakitweleela. Nga evelia sie muntu vyali waunvua nsansa kine madeni akue avutua, ni fwefue tuli twaunvua sana nsansa Yehova lwali watweleela mazambi!
“Tweleeleko madeni etu” (Mat. 6:12, NWT)
11. Musita Bibilia luili yalanda nangue mazambi etu ali avutua, kekio kili na mana ki? (Miilo 3:19)
11 Yehova tezi kufumia sie madeni ao mazambi etu; ali wavuta azo mazambi. (Soma Miilo ya Batumua 3:19.) Kine lideni lyafiikua, kili nga evelia muntu wasika kisiko pa mpendua ya nfalanga yupalile kulipa. Ata sie kine pasikua kisiko, ezio mpendua ili kusyala sie yamwenekele. Inzi, kuvuta kintu kwibeleele. Evi tunvue mana ya ezi milandu ibombiiziwe mu nzila ya mufuano, tupalile kulanguluka nangue wino elia ibanga yabombia bantu mu musita wa kale yaali yasambika ao kufumiiwa sie lubilo na menda. Muntu kunti wakwata kivutio kitomene ni kuvuta myandiko ilembelue. Pa kako, musita “mazambi luaavutilue,” i kulanda, aazeziiziwe kakiine. Menso teavinda kumona kabili bisiko bya myandiko elia yaalembuanga lwa ntanzi. Myandiko teikilipo kabili. Kakiine, kekio kyasansamusia mutima wetu pantu Yehova tezi kufiika sie mazambi etu, inzi kabili ali wavuta kakiine azo mazambi!—Malum. 51:9.
“Evi mazambi enu avutue” (Miil Bat. 3:19, NWT)
12. Twasambilila ki kupitila bulanzi, lilezi litikeeme?
12 Yehova abombiizie mulandu unge evi kulondolola vyali wavuta mazambi etu. Walanda evi: “Nakaba kuvuta bilubo byobe nga evelia na lilezi, ni mazambi obe nga evelia na lilezi litikeeme.” (Is. 44:22) Musita Yehova lwali waeleela, kili nga evelia ali wabombia lilezi litikeeme ni kufiika bilubo byetu, evi te kunti bimoneke kabili.
“Nakaba kuvuta bilubo byenu nga evelia na lilezi” (Is. 44:22)
13. Musita Yehova lwali waeleela mazambi etu, te tupalile kwiunvua syani?
13 Kekio kili na mana ki kuli fwefue? Musita Yehova lwali waeleela mazambi etu, te tupalile kutwalilila kwiunvua kuya twali ni kilubo palua mazambi etu mu bwikazi bwetu. Kupitila milopa yakue Yesu Kristu, madeni etu ali afiikua kakiine. Ata sie mpunda palua azo madeni teizi kutoosiiwa kabili. Evio i vili byasangua kweleela kwakue Yehova kine twalapila mazambi.
YEHOVA ALI WABWEZIA BURAFIKI BUWEME
Musita Baba wetu wa ku muulu lwali watweleela, tuli twaaluka ni burafiki buweme pamo nakue (Mona lifungu lya 14)
14. Juu ya ki kunti twamuswapila Yehova musita lwali walanda nangue watweleela? (Mona ni ma foto.)
14 Kweleela kwa kisinka kolia kuli kwafuma kuli Yehova, kuli kwatulengia twaluke ni burafiki buweme pamo nakue. Kuli kwatukwasia evi te kunti tutwalilile kwimona nangue tuli ni bilubo. Te tupalile kunvua mwenzo nangue Yehova asyele sie wafiitilue mukati, kabili nangue ali mukukeba nzila ya kutulapiziiziamo. Te tupalile kunvua mwenzo ata kanini nangue Yehova kunti wakita evio. Juu ya ki kunti twamuswapila Yehova musita lwali walanda nangue watweleela? Kabika Yeremia waazimbwile milandu yakue Yehova palua kako. Waalandile evi: “Nakaba kweleela kilubo kyabo, kabili nsikaba kulanguluka kabili lizambi lyabo.” (Yer. 31:34) Musita mutumua Paulo lwabanga walandila palua ezio milandu, waabombiizie bulanzi bupaleene ni bobo. Waalandile evi: “Nsikalanguluka ata kanini [bilubo] byabo.” (Baeb. 8:12) Inzi, eba kekio kili na mana ki?
“Nsikaba kulanguluka kabili lizambi lyabo” (Yer. 31:34)
15. Musita Yehova lwali walanda nangue tezi kulanguluka kabili mazambi etu, ali wakeba kulanda ki?
15 Mu Bibilia mulandu, “languluka,” tewizi kulandila sie lyonse palua muntu ali mukubwela kutontonkania palua kintu kelia kyaakitikile musita waapitile. Inzi, ozo mulandu kunti walangilila kabili nangue ilombele muntu akitepo ni kintu kimo. Olia mubifi waali wakonkomeenue pa kimuti ku mbali yakue Yesu, waamulombele evi Yesu: “We Yesu, nakulomba ukandanguluke paukeza wali Likolo.” (Luk. 23:42, 43) Taali wakeba kulanda sie nangue Yesu akamulanguluke pa ozo musita. Kyasuko kyakue Yesu kyaalangiliile nangue wene wakakitapo kintu kimo, i kulanda, wakamutuntumuna ozo mubifi. Pa kako, musita Yehova lwali walanda nangue tezi kulanguluka kabili mazambi etu, ali wakeba kulanda nangue takaba kutukita kantu. Takaba kutulapizia pa musita uli waiza juu ya mazambi etu alia aakyeleela kale.
16. Bibilia ili yalondolola syani uru utuli twaaluka nao musita Yehova lwali watweleela kakiine?
16 Musita Yehova lwali watweleela, tuli twaaluka ni uru. Bibilia ili yabombia mulandu unge wa mufuano evi kutukwasia kunvwisia ozo uru. Ili yalanda nangue pantu te tupwililikile, tuli “bazia ba bibalo [ao, ba mazambi].” Inzi, tuli mukutasia pantu tuli twaeleelua na Yehova. Tuli nga bazia ‘balubwilue, ao bakakwilue kufuma mu bibalo.’ (Bar. 6:17, 18; Nfy. 1:5) Kakiine, kine twainika nangue Yehova waakitweleela, tuli kunvua nsansa sana nga elia ili yaunvua muzia olia waakikakulua.
‘Mwaalubwilue kufuma mu bibalo, ao mazambi’ (Bar. 6:18)
17. Tuli twakosiiwa syani musita utuli twaeleelua? (Isaya 53:5)
17 Soma Isaya 53:5. Bibilia ili yalanda nangue pantu fwefue tuli ba mazambi, tuli nga bantu bali ni bulwele buli bwaipaana. Pantu Yehova waafumiizie kilubula-mulandu kupitila Mwana wakue, Bibilia ili yalanda mu nzila ya mufuano nangue fwefue twakosiiziwe. (1 Pet. 2:24) Musita utuli twakita lizambi, tuli twainoona burafiki bwetu pamo ni Yehova. Inzi, kupitila kilubula-mulandu, wene kunti watweleela ni kekio kunti kyalengia tubwele kwaluka kabili ni burafiki bwa pepi pamo nakue. Muntu olia ali wakosiiwa bulwele bwaviizie, ali waunvua sana nsansa. Enka evio ni fwefue, tuli twaunvua sana nsansa musita burafiki bwetu pamo ni Yehova lubuli bwakosiiwa ni kufikiila kwitabilua kabili na wene.
“Juu ya bilonda byakue, twaakosiiziwe” (Is. 53:5)
KWELEELA KWAKUE YEHOVA KULI KWATUKWASIA KULANGULUKA KI?
18. Twasambilila ki kupitila milandu ya mufuano itwafuma mukutoosia mu Bibilia palua kweleela kwakue Yehova? (Mona ni kisanduku kilandile, “Yehova Ali Watweleela Syani?”)
18 Twasambilila ki kupitila milandu ya mufuano itwafuma mukutoosia mu Bibilia palua kweleela kwakue Yehova? Musita lwali waeleela, wene ali waeleela kakiine, kabili lonse. Kekio, kili kyatukwasia kwaluka ni burafiki buweme pamo ni Baba wetu wa ku muulu. Mu wenka ozo musita, tuli twalanguluka nangue kweleela kwa kisinka ni bupe kufuma kuli Yehova. Ali watukitila evio juu ya kusonseziiwa na ntono yakue, kabili ali watulangilila sie buwame busipalilue fwe bantu ba mazambi. Te tuli na nsambu ya kulomba evi tupeelue bobo bupe.—Bar. 3:24.
19. (a) Tupalile kutasia palua ki? (Baroma 4:8) (b) Twakaba kulondolwela ki mu lyasi likonkelepo?
19 Soma Baroma 4:8. Kakiine, kila umo wetu apalile kumutasia sana Yehova, pantu wene ali “waeleela mu kisinka”! (Malum. 130:4) Anzia evio, kuli ni kintu kya mana kitupalile kukita kine tutonene kweleelua na Yehova. Yesu waalandile evi: ‘Kine te mwabeleela bantu bilubo byabo, ni Sinue ao Baba wenu, takamyeleela bilubo byenu.’ (Mat. 6:14, 15) Kansi, tupalile kumupala Yehova kupitila kuya twabeleela bange. Lyasi likonkelepo, lyakaba kutulangilila vya kukita evio.
LWIMBO 46 Sante, we Yehova
a Malembo a kale a Kiebrania abombiizie bulanzi “kweleela,” bolia bulangiliile nangue, koko i kweleela sie bunke kwa kisinka, ata sie kine kuli ni misango inge ya kweleela. Mpilibulo ingi ya Bibilia teizi kulangilila koko kupusana kwa mana, inzi Bibilia Mpilibulo ya Kyalo kya Lenu, yene ili yapusania. Kekio kili kyalengia iye yaibeleele sana kukonkana ni vipilibwilue lilembo lya Malumbo 130:4.