LYASI LYA KUSAMBILILA LYA 15
LWIMBO 30 Leeza Wane, Mwinane ni Baba Wane
“Kumupalama Leeza Kuli Bwino” Kuli Fwefue!
“Pa lwane, kumupalama Leeza kuli bwino kuli nene.”—MALUM. 73:28.
KIKATA KIINE
Mu leli lyasi, tuli kusambilila vya kumupalama Yehova, ni faida itwakaba kupata kine twakita evio.
1-2. (a) Tupalile kukita ki evi twaluke ni burafiki bwa pepi pamo ni muntu unge? (b) Tuli kusambilila ki mu leli lyasi?
WEWE ukwete ni rafiki wa pepi? Eba, wewe waakikita ki evi mwaluke ba rafiki? Pange wakiba wapisia musita pamo nakue, waakimana bwino maavia akue, ni kumana bintu byali watona ni belia byasizi kutona. Kabili, pange waakiinika nangue ali ni mibele iweme elia yutonene kupala. Waakifikiila kumutona.
2 Kukuzia burafiki bwa pepi pamo ni muntu kuli kwalomba musita pamo ni kwikwinda. Kilombele kukita enka evio evi kukuzia burafiki bwa pepi pamo ni Yehova. Mu leli lyasi, tuli kusambilila vya kumupalama Leeza wetu ni faida itwakaba kupata kine twakita evio. Lonu, tumonenke juu ya ki kili bwino kumupalama Rafiki wetu aweme sana, Yehova.
3. Juu ya ki tupalile kuwaza sana palua faida ya kumupalama Yehova? Londolola.
3 Kulanda kisinka, tumanine nangue kumupalama Yehova i kintu kili bwino. Inzi, kine twawaza sana palua kumupalama Yehova vikuli bwino, kekio kili kutusonsenzia tukile kumupalama wene. (Malum. 63:6-8) Kwa mufuano, tumanine nangue ni kintu kya mana kuli fwefue kulia bwino, kubelezia mubili, kutuuzia, ni kumina menda engi. Kya bulanda, bengi tebezi kwipeela sana evi kukita bebio bintu, kabili kekio kilangiliile nangue bali bapuulula bukose bwabo. Inzi, kine twawaza sana palua bebio bintu, bili byalengia bukose bwetu buye bwaweme, kekio kili kulengia tukile kutona kwibiikila ntantiko ya kutwalilila kubikita. Enka evio, tumanine nangue kumupalama Rafiki wetu Yehova kuli bwino kuli fwefue, inzi kuwaza sana palua faida ya kukita evio, kunti kwatusonsezia tutwalilile kukila kumupalama.—Malum. 119:27-30.
4. Kalemba wa Malumbo 73:28 waalandile ki?
4 Soma Malumbo 73:28. Kalemba wa Malumbo a 73 abanga wali Mulawi, olia abanga wamubombela Yehova mu ekalu. Abanga wabomba miilo ya kulizia ni kwimba miziki. Kimwenekele nangue waakitile myaka ingi wali mukumubombela Yehova mu bukisinka. Inzi, abanga wapalile kwilangulusia ye mwine pamo ni bange nangue “kumupalama Leeza” kubanga kwali bwino kuli wene ni kuli bene. Ni faida ki ili yafuma mu kumupalama Yehova?
“KUMUPALAMA LEEZA” KULI KWATULETELA NSANSA
5. (a) Juu ya ki kumupalama sana Yehova kuli kwatuletela nsansa? (b) Mulangue wakue Yehova uli wakukwasia ni kukusunga mu nzila ki? (Tuswalo ni Mafunde 2:6-16)
5 Vituli kuya twakila kumupalama Yehova, i vitwakaba kukila kwaluka ni nsansa. (Malum. 65:4) Kuli bintu bingi byalengia tulande evio. Kwa mufuano, tuli twapata faida kupitila kukonka mulangue utuli twapata mu Mulandu wakue, Bibilia. Ozo mulangue uli watusunga kufuma ku bintu bya kutukisia, ni kutukwasia evi te kunti tukite bilubo bikata. (Soma Tuswalo ni Mafunde 2:6-16.) Kekio i kili kyalengia Bibilia ilande evi: “Ali ni nsansa ni muntu olia ali wapata mulangue, ni muntu olia ali wapata buvinde bwa kwinika.”—Tus Maf. 3:13.
6. Ni kiki kyaalengiizie kalemba wa malumbo azezie nsansa yakue?
6 Kulanda kisinka, nsita inge ata sie ba rafiki bakue Yehova bali baaluka ni bulanda. Kalemba wa Malumbo a 73 waazeziizie nsansa yakue musita lwaatendekele kuwaza palua bintu bisipalile. Waatendekele kuwaza nangue babifi babanga bali ni bwikazi buweme ata sie kine te babanga bakonka mafunde akue Leeza. Pa kako, waatendekele kubonvwila bwivu. Waawazile ovio nangue, lyonse babifi babanga bali banonsi, babanga bali ni bukose buweme, kabili nangue bene te babanga bateseka ata kanini. (Malum. 73:3-7, 12) Ozo kalemba wa malumbo waaemene sana, ni kutendeka kwiipuzia kine kwikwinda kwakue evi kumubombela Yehova kubanga kwali kwa mana. Musita lwabanga wali ni bulanda, waalandile evi: “Kakiine, nsuungile mutima wane waswetele kya mpuni ni kusamba minue yane mu kusiba na kilubo.”—Malum. 73:13.
7. Musita utuli ni bulanda, ni kiki kitupalile kukita? (Mona ni kazeeti.)
7 Ata sie kine kalemba wa malumbo abanga wali ni bulanda sana, waakitile kintu kimo evi kwalulula mawazo akue. ‘Waaingiile pa nkeende ikata itakatifu yakue Leeza.’ Lwaafikile papo, Yehova waaolwele mawazo akue. (Malum. 73:17-19) Musita utuli ni bulanda, Yehova, Rafiki wetu aweme sana, ali wainika. Kine twapepa kuli wene evi atutungulule, kabili kine twaitabila atukwasie kupitila Mulandu wakue pamo ni kilonghaano, twakaba kupata maka a kutwalilila kumubombela ata sie kine tuli ni bulanda. Ata sie kine tuli mukwema sana, Yehova wakaba kutupeela maka ni kututeekia mutima.—Malum. 94:19.a
Mulawi olia waalembele Lilembo lya Malumbo a 73, emeene “pa nkeende ikata itakatifu yakue Leeza” (Mona lifungu lya 7)
“KUMUPALAMA LEEZA” KULI KWAWAMIA BWIKAZI BWETU NI KUTUPEELA KISWAPILO
8. Kumupalama Leeza kuli bwino kuli fwefue mu nzila ki inge ya mana?
8 Kumupalama Leeza kuli bwino kuli fwefue mu nzila inge ibili ya mana. Ya kwanza, kuli kwalengia tuye twali ni bwikazi buweme. Ya bubili, kuli kwatupeela kiswapilo kilumine palua musita uli waiza. (Yer. 29:11) Ale tulandilenke sana palua ezio faida ibili.
9. Juu ya ki kumupalama Yehova kuli kwalengia tuye twali ni nsansa?
9 Kumupalama Yehova kuli kwalengia tuye twali ni bwikazi buweme. Bantu bengi lonu bali bawaza nague Leeza taliko. Pa kako, te bamanine kilengiizie fwe bantu tuye twali panu pa kyalo, kabili bazumiine nangue musita uli waiza, pa kyalo te pakaba kuya pali muntu ata umo. Inzi, kupitila kusambilila Mulandu Wakue Leeza, fwefue tusininkiziizie nangue wene “kwali, kabili nangue . . . ali walambula baalia bali bamukeba.” (Baeb. 11:6) Yehova waatubumbile evi tuye twamubombela. Pa kako, kine twakita evio, tuli twaaluka ni nsansa ya kiine.—Mal Miz. 10:12, 13.
10. Yehova abalaile ki baalia bamuswapiile? (Malumbo 37:29)
10 Bantu bengi te bali na kiswapilo palua musita uli waiza. Bali baupa sie, kuvyala baana, ni kuteania bintu bya kubakwasia musita ubasikaba kuya bali ni miilo. Te bamanine bintu bilaile Leeza palua musita uli waiza. Inzi, fwe babombi bakue Yehova tumuswapiile wene pantu ni Rafiki wetu. (Malum. 25:3-5; 1 Tim. 6:17) Kabili, tuswapiile bintu byatulaile. Kuli bintu bingi bituswapiile, kubiika mukati kumupupa Yehova lonse mu Paradiso.—Soma Malumbo 37:29.
11. Kumupalama Leeza kuli bwino kuli fwefue mu nzila ki inge, kabili kuli kwalengia wene onvue syani?
11 Kumupalama Leeza kuli bwino kuli fwefue mu nzila inge ingi. Kwa mufuano, Yehova alaile kutweleela mazambi kine twalapila. (Is. 1:18) Pa kako, zamiri yetu teizi kutwalilila kuya yatwemia juu ya mazambi atwaakitile lwa kale, alia atwaalapiile. (Malum. 32:1-5) Kabili, tuli twaaluka ni nsansa pantu tuli twamusansamusia Yehova. (Tus Maf. 23:15) Kakiine, kuli mpaalo inge ingi ituli twapata pantu tuli ni burafiki bwa pepi pamo ni Leeza. Lonu, tumone bintu bitupalile kukita evi tutwalilile kumupalama Leeza.
VYA KUKITA EVI KUTWALILILA “KUMUPALAMA LEEZA”
12. Wewe upalile kutwalilila kukita ki evi umupalame sana Leeza?
12 Kine uli Mukristu abatiziiwe, teusyakitile bintu bingi sana evi kwaluka rafiki wakue Yehova. Waakisambilila bisinka bingi pa lwakue Yehova Leeza ni pa lwakue Kristu Yesu, waakilapila mazambi obe a kale, waakilangilila nangue uli ni kiketekelo kikata muli Leeza, kabili waakiikwinda kutendeka kukita bintu kukonkana ni kutona kwakue. Inzi, evi umupalame sana Leeza, upalile kutwalilila kukita bebio bintu.—Bakol. 2:6.
13. Tupalile kukita bintu ki bitatu evi tutwalilile kumupalama sana Yehova?
13 Tupalile kukita ki evi tumupalame sana Yehova? Kya kwanza, tupalile kutwalilila kusoma ni kusambilila Bibilia. Musita utuli twakita evio, te tupalile kupeleela sie pa masambilizio a musinzi pa lwakue Leeza. Kuliko kukita evio, tupalile kwinika belia byatonene tukite, kabili tupalile kukonka mafunde alia ali mu Mulandu wakue. (Baef. 5:15-17) Kya bubili, tupalile kulumia kiketekelo kyetu kupitila kuwaza sana palua bintu bingi bilangiliile nangue atutonene. Ni kya butatu, tupalile kutwalilila kusuula bintu bibipile belia bili byamuzikisia Yehova, kabili te tupalile kukita burafiki pamo ni baalia bali bakita bebio bintu.—Malum. 1:1; 101:3.
14. Nga vilandile 1 Bakorinto 10:31, ni bintu ki paleepale bitupalile kukita kila busiku evi kumusansamusia Yehova? (Mona ni ma foto.)
14 Soma 1 Bakorinto 10:31. Lyonse, tupalile kuya twakita bintu belia bili byamusansamusia Yehova. Te tupalile kupeleela sie pa miilo ya kusimikila pamo ni kulonghaana. Bikitua biweme bibiikile mukati bintu bituli twakita kila busiku. Kwa mufuano, kine tuli ba kisinka mu bintu byonse, kabili kine tuli twabapeelako bange bintu belia bitukwete, tuli twamusansamusia Yehova. (2 Bakor. 8:21; 9:7) Kabili, Yehova atonene tuye twamwene bukose bolia bwaatupeele kuya bwali bwa mana sana. Pa kako, tuli twalia ni kumina bwalua kwa kiasi, kabili tuli twakita bintu bya kulengia bukose bwetu buye bwaweme. Kwikwinda konse kutuli twakita evi kumusansamusia Yehova, ata sie mu tuntu tunini, kuli kwalengia ni wene atutone sana.—Luk. 16:10.
Kwenzia bwino motoka, kwiemena kupitila kubelezia mubili ni kulia bwino, pamo ni kupeelako bange bintu bitukwete, i nzila paleepale ya kumusansamusiiziamo Yehova (Mona lifungu lya 14)
15. Yehova ali watona tuye twabakitila syani bange?
15 Yehova ali wabakitila bantu bonse bintu biweme, ibe bali bamubombela ao abe. (Mat. 5:45) Atonene ni fwefue tuye twabakitila bange enka evio. Kwa mufuano, te tupalile kuya ‘twabaana bantu bintu bibipile, inzi tuye twaikeele nabo mu muteekatima ni mu mutende.’ (Tit. 3:2) Pa kako, te tupalile kuwaza nangue fwefue tuli ba mana kuliko bantu baalia basizi kumubombela Yehova. (2 Tim. 2:23-25) Kabili, tuli twamupalama sana Yehova kupitila kubakitila lyonse bantu bange bintu biweme.
KUNTI TWAVINDA “KUMUPALAMA LEEZA” ATA SIE KINE TWALUVIA
16. Kisia nsita imo evi, Kalemba wa Malumbo a 73 waatendekele kuwaza syani?
16 Wewe kunti wakita syani kine watendeka kuwaza nangue pange Yehova takili pepi ni wewe juu ya bilubo biwaakitile? Nga vitwamonanga, kalemba wa Malumbo a 73 ni wene waawazile enka evio. Waalandile evi: “Makasa ane aali asyakeba kuzeza; ntanfu yane ibanga yali pepi ni kutelela.” (Malum. 73:2) Kupitila bulanzi bwakue ye mwine, mutima wakue ‘waalulile,’ kabili ‘waabulilue mano,’ waalukile “nga kinama kisili na mano” ntanzi yakue Yehova. (Malum. 73:21, 22) Inzi, eba wene waawazile nangue Yehova waamusiile juu ya bilubo byaakitile lwa kale?
17. (a) Ata sie kine abanga watyokele sana mutima, kalemba wa malumbo waakitile ki? (b) Kunti twasambilila lisomo ki kupitila mufuano wakue? (Mona ni ma foto.)
17 Ata sie kine kalemba wa malumbo waawazile nangue Yehova waamusiile, waawazile sie evio kwa musita unini. Kimwenekele nangue ata sie musita lwabanga watyokele sana mutima, waainikile nangue abanga wapalile kumupalama Leeza. Twalanda evio pantu waalandile evi: “Inzi lonu, ntwaliliile kuya nali pamo ni wewe [Yehova]; waakinkwata ku kuboko kwane kwa kulio. Uli wantungulula na masoke obe, ni kisia papo wakaba kuntungulula ku bulumba.” (Malum. 73:23, 24) Ni fwefue tupalile kumulomba Yehova atupeele maka musita ututyokele mutima. (Malum. 73:26; 94:18) Ata sie kine twakita bilubo bikata, kunti twabwela kuli Yehova twaswapiile nangue wene ‘aleengele kweleela.’ (Malum. 86:5) Tupalile kumupalama Yehova, asa musita ututyokele mutima.—Malum. 103:13, 14.
Kine kiketekelo kyetu kyanaka, tupalile kumupalama Yehova kupitila kupepa kuli wene ni kulonghaana lyonse (Mona lifungu lya 17)
TWALILILA “KUMUPALAMA LEEZA” LONSE
18. Juu ya ki kumupalama Yehova te kuli na mpela?
18 Kumupalama Yehova ni kusambilila pa lwakue te kuli na mpela. Bibilia ili yalanda nangue nzila yakue Yehova, mulangue wakue pamo ni kumana kwakue ‘bikolele kutoosia!’—Bar. 11:33.
19. Lilembo lya Malumbo lyatusininkiziizia ki ?
19 Lilembo lya Malumbo 79:13 lyalanda evi: “Fwefue, bantu bobe ba mu libumba lyobe, twakaba twakutasia lonse; kabili twakaba twapunda sifa yobe mu kila luvyalo.” Musita luutwaliliile kuya wamupalama Leeza, ni wewe uye waswapiile nangue wene wakaba kukupaala, kabili kunti wafikiila kulanda wasininkiziizie nangue: “Leeza i mwamba wa mutima wane, kabili wene i semu yane lonse.”—Malum. 73:26.
LWIMBO 32 Uye Wali ku Lubali Lwakue Yehova Leeza!
a Bantu baalia bali batwalilila kuya baema ao kuya bali ni bulanda kwa musita ulepele sana, bapalile kumonana ni doktere evi abatunze. Evi upate mpunda ingi, mona Lupungu Lwakue Kamwenenena, nimero 01 2023.