Ya Ine, Nsiku 30 Muezi wa 10
Kukoonkana ni buyantanzi butusyakitile, kansi tutwalilile kwenda twakoonkele lwendo lwenka loolu.—Baf. 3:16, NWT.
Yehova taviinda kutontonkania nangue uli wa bule kine weewe waandua kufikilizia mupaango upitile buviinde bobe. (2 Bakor. 8:12) Kine kintu kimo kyavulunghania mupaango obe mona kine keekio kyakusambiliziapo lisomo ki. Languluka bintu biwakifikilizia kale. Bibilia ili yalanda nangue “Leeza teezi kubula nsaambu eevi alabe miilo imwabomba.” (Baeb. 6:10, NWT) Pakaako, ni weewe te upalile kulaba beelia biwakifikilizia kale. Tontonkania palua mipaango yobe elia iwakifikilizia kale, nga evelia kukosia bukibuza bobe pamo ni Yehova, kusimikilako bantu bange, ao kubatiziiwa. Kunti watwalilila kwikwinda kukita buyantanzi eevi kufikilizia mupaango obe wa leenu, nga evelia viwaikwindile pa kufikilizia mipaango yaapitile. Weewe, kunti wafikilizia mupaango obe kupitila kukwasiiwa na Yehova. Musita luutwaliliile kwikwinda eevi ufikilizie mupaango obe wa kimupasi, ikwinde kumona Yehova vyali mukuya wakukwasia ni kukupaala. (2 Bakor. 4:7) Kine te utopele, weewe wakaba kupata mpaalo ingi saana.—Bag. 6:9. w23.05 31 lifu. 16-18
Ya Tano, Nsiku 31 Muezi wa 10
Pantu Tawe mwine amitonene. Amitonene pantu muntonene, kabili pantu mwitabiile nangue naafumine kuli Leeza.—Yoan 16:27.
Yehova ali wabalangilila bantu bakue mu nzila paleepale nangue abatonene ni kubetabila. Maleembo alangiliile nangue Yehova waamulandile Yesu mara ibili nangue weene i Muana wakue olia watonene, kabili olia waitabiile. (Mat. 3:17; 17:5) Eba, ni weewe utonene kunvua Yehova wakusininkiziizia nangue akwitabiile? Tetuviinda kunvua lizui lyakue Yehova lyafuma ku muulu, inzi ali walanda ni fwefue kupitila Mulandu wakue. Kunti “twaunvua” lizui lyakue Yehova lya kulangilila nangue atwitabiile kupitila kusoma milandu yakue Yesu, elia ili mu bitabu bya nsimiko. Yesu waalangiliile mu nzila ipuililikile mibeele yakue Baba wakue. Pakaako, musita utuli twasoma milandu yakue, elia ilangiliile nangue abanga wabetabiile basambi bakue ba kisinka ata sie kine te babanga bapuililikile, tuli kumona nga evelia Yehova ali mukutulanda ni fwefue enka ezio milandu. (Yoan. 15:9, 15) Anzia evio, kupatua na maavia te kulangiliile nangue Leeza takitwitabiile. Kintu kitupalile kumana ni keeki: maavia ali atupeela fuasi ya kulangilila nangue tumutonene saana Leeza, kabili nangue tumuswapiile.—Yak. 1:12. w24.03 28 lifu. 10-11
Ya Sita, Busiku 01 Muezi wa 11
Kupitila kanua ka baana baniini ni ka baana ba kasi, waafumiizie bulumba.—Mat. 21:16, NWT.
Kine uli muviazi, bakwasie baana bobe bakili banike baye bateania byasuko bipalile kukoonkana ni miaka yabo. Nsita inge musita wa lisambililo, bintu bikata nga evelia maavia a mu kyupo, ao bintu bilandiile palua lwendo, bili byalondololua. Anzia evio, kunti kwasaangua lifungu limo ao mafungu abili, alia ali kuviinda kwasukapo mwanike. Kabili bakwasie baana bobe bamane juu ya ki paange tebaviinda kusinikua kila musita ubali kuya kulendula maboko abo. Kubabuila evio, kunti kwabakwasia te kunti batioke mutima kine bamona kwasinikuasie bange kuliko kusinikua beene. (1 Tim. 6:18) Fwe bonse kunti twaviinda kuteania byasuko bya kukuula, beelia bili kumuleetela Yehova mukinzi, ni kukinkizia Bakristu beneetu. (Tus Maf. 25:11) Nsita imo-imo lutukebele kulanda mu kifupi palua bintu bitwaimweneene, tupalile kutiina kulanda bingi saana juu yeetu fwe beene. (Tus Maf. 27:2; 2 Bakor. 10:18) Inzi twikwinde kupooza maano kuli Yehova, ku Mulandu wakue, ni ku bantu bakue bonse.—Nfy. 4:11. w23.04 24-25 lifu. 17-18