Aʼlá namuti japi ikí japalí iʼwíriwa jarecho

Nijé onolá ko binériami nili echoná Iglesia Unida de Canadá. Jiti la sinibí oméachi biʼá tamí júuli alí nijé rejimala si, bilé escuela japoná binériwa echi kuuchi Biblia jitra. Miná ko ma biʼá a las 11:00, ati okuánika simíaye nijé onolá yúa echoná iglesia. Alí ma aʼlí ko, ati okuánika simíaye nijé iyela yúa echoná salón. Tamujé ko inéi japi okuánika religiones ke chopi iyiri nili.

Nijé iyela ko ruyéi japi binéi echi Bob Hutcheson alí echi upila Marion, japi we aʼlá amigos nili echi yúa, alí echi ayénachó testigos Jeobá nili. Bamíali 1958, Bob alí Marion tamí yúrili bikiánika echi kúchuwala yúa echi asamblea internacional riwéami “Voluntad Divina”, japi rojorali osá naó rawé alí japi nili echomí Nueva York. Jipi ko ni a machí japi a jilí niráliré tamí yuria echi yúa, nalí we ni natéami niraa iné japi nokali tamí jitra jiti ni we kanílika newalá echalí.

ECHI HERMANOS TAMÍ IʼWÍRILI AMINABI WE NÓCHILIA JEOBÁ

Japalí ni remalí ke, ata pireili japoná tibúliwa echi namuti jákami alí nijé ko we kanilie tibúa. Jiti la ni nátiki japi ni binema jiti ni nima veterinario. Nijé iyela ruyeli bilé anciano japi ni isínilie alí echi ko raʼíchili tamí yúa. Echi anciano simárika raʼíchika tamí aneki japi ta ma “waminánomí rawé” piré alí tamí náriki achi ni bijí Jeobá amígowala nima wiká bamíali simisáaká echoná universidad (2 Tim. 3:1). Ani nátika ripiki japi tamí aneki alí ni nátiki japi ni ma ke simea.

Nalí ani nátiki piri ni isima ma sunisa binea echi escuela secundaria. Sábado alí oméachi ko, ani simiyé nawisasia tákoré nijé ko ke me kanilie echi riká isiá alí ni natie japi nijé ko ke siné nima precursor. Nijé onolá alí nijé ratelá, japi ke Testigos nili, nakiyé japi ni nochama bilé waʼlú empresa japi we machirúami nili echomí Toronto. Nijé ratelá olayé bilé nóchali we natéami echoná empresa, jiti la nijé ayénachó echoná nóchiki.

Echoná Toronto ani we napawíe echi pagótami yúa japi ke testigo Jeobá nili alí ni wiká horas nochie. Jiti la ni ma ke me ikirie simiyá echoná napawíliwachi alí nawisasia. Echalí ani biteili nijé ochítuwala yúa japi ke Testigo nili. Nalí miná ko mukuli, jiti la ni simiki biléanachó bitélisia.

Bob alí Marion, japi tamí yúrili asamblea bamíali 1958, echi ko nili japi riká nijé wénwala. Tamí bayeli jiti ni echi yúa bitélima alí tamí iʼwírili jiti ni aminabi Jeobá amígowala nima. Bamíali 1960 ani pakoki John yúa, bilé japi Bob alí Marion ranala nili. Japi riká John precursor nílili, nijé ayénachó chotásiki aminabi nawesia. Echi hermanos ineli japi ni aminabi we aʼlá isísimi, jiti la tamí wilali japi riká superintendente echi napawíliwachi japi jipi rawé ko ju Nokiboa japi riká isili Cristo.

BILÉ UPILA WE AʼLÁALA ALÍ BILÉ KULÍWAMI NÓCHALI

Bamíali 1966, ani niwiki Randi Berge yúa, bilé precursora japi we kanilie nawesia alí siminalie iʼwírisia japoná newaléliwa nawésami. Echi superintendente circuito tamó iʼwírili alí iʼwérili iyali jiti simabo iʼwírisia echomí Orillia (Ontario). ¡Ati kariweki suwaba echi namuti alí ti simíaki!

Inea japi riká isié Randi tamí iʼwírili. Jiti la japalí ni kulí nawaki Orillia, ani precursor niki alí ni iʼwérili isiki aminabi aʼlá binériami niya. We ni kaníliki bineria alí iʼwiria echi pagótami néeka echi Biblia. Ayénachó we ni kaníliki iʼwiria bilé niwíkami Orillia piréami jiti nijéwima Jeobá alí pakoma.

KULÍWAMI RAʼICHÁLIAMI ALÍ KULÍWAMI NÁTILI

Siné kaachi japalí ni simiki Toronto, ani machiki Arnold MacNamara, bilé hermano japi nochie echoná Betel. Echi ko tamí nárili achi ti nínalia precursores especiales. Nijé ko we sapuka aneki: “¡Ayénaʼá! Nalí Quebec bi, nijé ko ke siminali”. Ani machiki japi ni nili japi riká echi canadienses japi raʼicha inglés alí japi ke galeli echi canadienses japi raʼicha francés. Echalí echi pagótami Quebec piréami naʼawie echi gobierno yúa jiti ma ke napawika nínali echi Canadá yúa.

Arnold tamí aneki japi echi sucursal júula bi echi precursores especiales echomí Quebec. Jiti la ni sapú aniki japi a simea. Nijé ko machiyé japi Randi a siminali echomí. Alí pe aminana ni machiki japi ta nokali wabé aʼlá nili.

Malí tarali ati bineki echi raʼicháliami francés, alí ma sunisa ati juláari bilecho niwíkami yúa echomí ciudad Rimouski, japi ju 540 kilómetros echomí noreste de Montreal. Echalí nijé ko kecho aʼlá machiyé raʼichia francés, jiti la japalí ni leériki jaré anuncios echoná napawíliwachi nijé ko jéaniki: “Biléala asamblea a nolínima wiká pagótami avestruces”. Nijé ko anináliami ke “pagótami austriacos”.

Echoná Rimouski ke ti echi niwíkami bi yúa pireili, ayénachó naó hermanas yúa japi we nóchami nili alí echi niwíkami Huberdeau alí echi okuá ranala yúa. Echi niwíkami Huberdeau rentárili bilé kalí japi olali 7 cuartos alí sinéami ka ti napawika natetie; alí ti rewayé “Casa Blanca” jiti echi kalí ko rosákami ke alí olayé columnas. Echoná ti piréi 12 o 14 pagótami. Japi riká Randi alí nijé ati precursores especiales ke, ati nawesie biʼá jonsa aminá rokojó chéami. Ati we kanilie jiti sinibí nirúe hermanos japi tamó yúa simíaye nawisasia tákoré we rulaa wiliyé.

Ati we galéi echi precursores we nóchami, jiti la ti nílili japi riká téemala. Ati naʼayé echoná wichí alí ti sukalie, ayénachó ati olayé bilé rawé japalí ti niwayé empanada “pierogis” riwéami japi ta pachana acheli japi ta raʼili koʼyá. Alí wisabé sábados rokojó ati napawika wikarae alí awiyé ipúa echi música japi siméi bilé hermano.

Echoná Rimouski aminabi wiká muwésili japi binénilie, jiti la ma malí bamíali simírisa, ati we kaníliki inea japi jaré binéami ma pakoli alí echi congregación olali 35 publicadores.

Echoná Quebec ati bineki chúriká aminá aʼlá binériami nipo. Ata ineli japi Jeobá sinibí tamó iʼwírili alí japi sinibí tamó iyali echi namuti japi ta newaleli. Ayénachó ati we aʼlá machiki echi pagótami francés raʼíchami alí ti we galeli japi riká raʼicha alí japi nokáami nili. Jepuná tamó iʼwírili galea jarecho pagótami jaréana piréami (2 Cor. 6:13).

Pe aminana echi sucursal tamó nárili achi ta simanilia Tracadie, bilé pueblo japi nili costa este echomí Nueva Brunswick. Ke ti mayeli japi echomí tamó julama. Kulí ti firmárili bilé contrato réntarimia bilé kalí alí ni maestro nili echoná bilé escuela japoná ni nochie jaré rawé ibili tarali. Ayénachó jaré japi ta binerie echi Biblia kulí chotásili publicadores niya alí ti nochie niwayá bilé salón. Jiti la ti we jilí niraki machiyá japi ta nokiboa.

We ti raʼíchiki Jeobá yúa echi namuti jitra. Ati simíaki inesia Tracadie alí ti ineli japi echoná we sinúrika ju Rimouski yúa, nalí ti aniki japi a simabo jiti Jeobá ju japi tamó júula echoná. Ati buweki japi Jeobá tamó iʼwírima alí echi ko a tamó iʼwírili (Mal. 3:10). Japi riká Randi we aʼlá Jeobá amígowala nili alí we kaníliami, jepuná isili japi ke me jilí nima simíaya echomí Tracadie.

Echoná Tracadie niruili bilepi anciano Robert Ross riwéami. Echi alí echi upila Linda, simíali nóchilisia Jeobá echoná Tracadie japi riká precursores alí japalí ma ranélili, echi ko echoná ripili. Tákoré we nochie tibúa echi ranala, echi ko sinibí tamó bayeli koʼasia echi bitélachi alí we kaníliami nili nóchilia Jeobá.

WE TI KANILA NÓCHIKI JAPONÁ TA JULÁARI

Ma okuá bamíali simírili japalí ti jonsa chotásili precursores ka echoná Tracadie, japalí tamó bayeli japi ta nochabo japi riká circuito. Kichao bamíali ti járili echoná congregaciones japoná inglés raʼíchami nili, alí miná ko ati juláari bilé circuito japi francés raʼíchami nili echomí Quebec. Echoná echi superintendente de distrito japi riwéami nili Léonce Crépeault, tamí anéi japi ni we aʼlá isié japalí ni nawesie.a Nalí achó tamí narie: “¿Piri mi isísaré jiti echi nawésali iʼwírima jarecho?”. Matétarabá jiti echi riká tamí aneli, echalí jonsa ani we aʼlá nawesa alí japi ni aní iʼwiri jarecho.

Ani we kanila newalá echi Asamblea Internacional japi riwéami nili “Fe Victoriosa”, echomí Montreal echi bamíali 1978. Ani nochie echoná departamento japoná ti niwayé koʼwáami alí ata buweli japi nolínima 80,000 pagótami. Nalí echalí sinúrika nima riweili echi nóchali, echi namuti japi ta newaleli niwamia koʼwáami alí japi riká niwáliwa echi koʼwáami. Ati olayé 20 camiones japi pachana ruláami ke japi riká refrigerador, japoná ti jariweli echi koʼwáami jiti ke chokólima, nalí isini kaachi ke aʼlá nochie. Ayénachó ke cho ti omériki moʼiyá echoná estadio japoná niwabo echi koʼwáami. Echi riká ikili jiti bilé rawé kecho séachi echi asamblea, echoná wiká riʼekia járili. Japalí ti ma omériki moʼiyá ma nasipa rokojó nili alí ma ti rajeka wilasa riweili echi hornos japoná niwabo echi koʼwáami. Ati we risíami suniki, nalí ni bineki wiká namuti echi hermanos jitra japi ni yúa nochie, japi echi ko we kaníliami nili alí we aʼlá Jeobá amígowala nili. Japi ikili tamó iʼwírili we napawika niya, alí ani bijí olá amigos echalí piréami. We semati nili simiyá echi asamblea echomí Quebec, japoná chabé echi bamíali 1940 alí 1950 tamó sayérala we kichika tamó najátili.

Ayénachó ni bineki jarecho superintendentes jitra echoná weli asamblea japi niruili echomí Montreal. Bilé echi hermano ko nili David Splane, japi jipi ko ju Aʼlá Nisériami, echalí echi ko superintendente de asamblea nili. Pe aminana japalí niruili bilecho asamblea, nijé achó superintendente de asamblea nili alí David we tamí iʼwírili.

Ati nóchiki 36 bamíali japi riká circuito, alí miná ko echi bamíali 2011 tamí aneli japi ni binériami nima echoná Escuela japi biné echi Ancianos. Randi alí nijé ati ochiki 75 sinúrika cámachi pe okuá bamíali bi simírisa. Waʼlú nóchali nili nalí ti we kanílili. Ma sunisa echi tarali, echi ancianos we kanilie jiti echi ko inéi japi echi Japi Aʼlá Niseri nakí japi we aʼlá nóchilima Jeobá.

Miná ko tamí aneki japi ni binériami nima echoná Escuela japi biné echi Nawésami Raʼíchali Kalabé. Isini kaachi echi binéami we risiyá nili inea suwaba echi namuti japi nokiméaré, japi riká echi ko sinibí rawé binema kichao horas, bikiá horas nokimea niwayá tareas alí naó o malí asignaciones niwama ibili tarali. Biléala binériami alí nijé si, ati anéi japi Jeobá iʼwírima jiti a omérima echi riká nokayá. Ke ni siné wikawama japi echi hermanos we kanilie japalí inéi japi Jeobá sinibí iʼwírili nokayá wiká namuti japi echi ke mayeli.

AʼLÁ NAMUTI JAPI IKÍ JAPALÍ IʼWÍRIWA JARECHO

Nijé iyela ko we natéami niraa ineli ibili echi binéami, jepuná iʼwírili jiti echi binéami Jeobá amígowala nima alí ayenacho iʼwírili jiti nijé onolá we galea nílima japi bineri echi testigo Jeobá. Bikiá rawé ma simírisa japalí mukuli nijé iyela, nijé onolá isili bilé namuti japi ta ke mayeli: echi ko nawali japoná biné echi testigo Jeobá alí kipuli echi nawésali. Echalí jonsa, echi ko sinibí simili napawíliwachi alí 26 bamíali echi riká isili. Tákoré echi ko ke siné pakoli, echi ancianos tamí aneki japi echi nili japi sinibí bachá nawayé echoná salón.

Japi isili nijé iyela we tamí iʼwírili alí nijé rejimala si. Jiti la echi bikiánika nijé rejimala alí echi kunala, we aʼlá nóchili Jeobá alí okuá nijé rejimala muchuwi nochia sucursal, bilé ko atí echomí Portugal alí bilecho ko echomí Haití.

Randi alí nijé, jipi ko ti ju precursores especiales echomí Hamilton (Ontario). Japalí ti circuito ke, ati we kanilie simíaya echi hermanos yúa revisitas niwasia alí binérisia echi pagótami. Nalí jipi ko ti we kanili aboi bineria echi pagótami alí inea chúriká aminabi mulíwisimi Jeobá. Ayénachó, ati omeri aminabi we aʼlá machiyá echi hermanos echoná congregación alí we tamó iʼwérili iyá inea chúriká Jeobá sinibí iʼwiri echi japi nijéwami ju.

Japalí ti nata sinéami echi hermanos jitra japi iʼwérili nokali tamó iʼwiria, ati we kanili alí waʼlú matétarabá iyá. Jiti la tamujé ayénachó iʼwérili noká iʼwiria jarecho, iʼwérili iyaya alí iʼwiria jiti aminabi nóchilima Jeobá (2 Cor. 7:6, 7). Japi riká, nijé ko machí jaré hermanos japi echi iyela alí okuá echi ranala precursores nili. Nijé ko náriki echi onolá achi ayénachó nátili precursor nimia, nalí echi ko tamí aneki japi ma bikiá iʼwiri precursores niya. Alí miná ko ni náriki: “¿Kechi ko mi mayé japi Jeobá nalí wabé aʼlá iʼwírima?”. Ani iʼwérili iyaki jiti ayénachó precursor nima japi riká echi téemala alí japalí ma usani michá simírili, echi ayénachó ma precursor nili.

Randi alí nijé si, ati bijí raʼíchipo “echi japi pirélima pe aminana” echi namuti aʼláala japi Jeobá niwali, alí ti nakí japi echi ayénachó we kanílima nóchilia Jeobá japi riká ti nokali tamujé (Sal. 71:17, 18).