Binelíwami 10

Namuti japi Onorúami kichí

¿Chúriká mi inésaré echi namuti japi Onorúami aní japi chati ju? (1)

¿Chu iyiri nasawíliami chati ju? (2)

¿Piri ka natásaré echi Jesús najátami echi ikaléwami kitra? (3) ¿Echi jiraka riʼéliami ru? (3) ¿Echi chikówami ru? (3) ¿Echi chonaká nakówami ru? (4) ¿Echi sipabúwami ru? (5) ¿Echi rikulíwami ru? (6)

¿Piri ta nokisáré kiti ta ke nokiboa namuti chati? (7)

1. Echi japi nijewi ko Onorúami nakí japi aʼláala ju. We be nalí ayénachó a binésaré kichía japi chati ju (Salmo 97:10). Jepuná ko aniwáami ju japi ke nokisáré echi namuti japi Onorúami kichí. ¿Chu iyiri ju jaré echi?

2. Nasawíliami chati: Onorúami ko aní japi wabé chati ju nasawilia ke niwíkami nísiwa, pagótami iseni yúa, namuti jákami yúa, wénwala yúa, alí kúchuwala yúa, kecho rejoy chopi ka nasawía, kecho mukí chopi ka nasawía (Levítico 18:6; Romanos 1:26, 27; 1 Corintios 6:9, 10). Japalí bilé rejoy alí bilé mukí napawika pirélisa ke bilé niwiká, a ku rojásaré, niwísaré ma (Hebreos 13:4).

3. Ikaléwami, jiraka riʼéliami, chikówami: Onorúami Jeobá ke omero ikaleka raʼicha (Tito 1:2). Kiti bela echi pagótami japi kanílitinali Onorúami tasi kaléami nísaré (Proverbios 6:16-19; Colosenses 3:9, 10). Suwaba echi jiraka riʼéliami winomí kitra echi pagótami we korúami ayeni. Kiti bela echi Jesús najátami ke riʼé echi lotería tasi cho jiraka riʼé echi barajas (Efesios 5:3-5). Ke chikó, kecho ralá namuti japalí a machí japi chikórami ju, kecho tóami ju namuti ke risensia taka (Éxodo 20:15; Efesios 4:28).

4. Echi iyóliami alí chonaká nakówami: Echi japi iyóami ju alí ke ku aʼlá kilii nílisa, chonaká nakówami nímalé (Génesis 4:5-8). Echi japi obátami ju ko ke tasi oméroma Onorúami amígowala nilia (Salmo 11:5; Proverbios 22:24, 25). Ke aʼlá ju ku nimíkiwa japi riká ta oliiru (Proverbios 24:29; Romanos 12:17-21).

5. Echi sipabúwami: Jaré pagótami ko mayé japi echi sipabúami kuʼiri ku saʼwea echi nayúami. Jarecho ko sipabú abói sayérala kiti nayuma miʼá ma. Satanás ko jepuná namuti nee kiti ékima echi pagótami. Kiti bela echi japi Jesús najátami ju ko ke echi riká nokisáré (Deuteronomio 18:9-13). Pe Jeobá bi ta mulíwisaré kiti ta ke sipabúrami niba (Proverbios 18:10).

6. Rikulíwami: Táabi bajiwa echi japi ta rikútiwa japi riká cerveza alí jarecho bajíwami ke chati ju (Salmo 104:15; 1 Timoteo 5:23). We nalí Onorúami ko ke kalé japi wabé riká bajima, kecho japi tékima (1 Corintios 5:11-13; 1 Timoteo 3:8). Wabé bajíwaká nayúnimaré kipi ripokala alí risoa nílitima echi japi mujé yúa piré. Ayénachó we bajiwa mi isíilimaré namuti chati (Efesios 5:18).

7. Echi pagótami japi noká namuti japi Onorúami aní japi we chati ju tasi narema echi namuti kalabé japi nijima echi Onorúami Gobiérnowala (Gálatas 5:19-21). Mujé ami né bichíwali nakíaká Onorúami alí ami kanílitinalaká, ami oméroma riwea jepuná namuti (1 Juan 5:3). Biné kichía japi Onorúami aní japi chati ju (Romanos 12:9). Napawí echi pagótami yúa japi aʼláala ju (Hebreos 10:24). Japi aʼlá nijéwami ju Onorúami mi kuʼírima (Santiago 5:14). We nalí, japi né wabé mi kuʼírima ko ju amachíkika Onorúami (Filipenses 4:6, 7, 13).

[Iyóktami/Foto japi uchuwi echoná página 20, 21]

Onorúami kichí echi rikulíwami, echi chikówami, jiraka riʼéliami alí echi nakówami