Onorúami ju wabé walubé amigo japi mi oméroma olayá

A Onorúami amígowala níliwaká né wabé natéami ju. Onorúami mi binérimalé churiká kaníliami niba alí kiti ke majabo; mi kuʼíromalé kiti mi ke olama bichíwiliami japi ke bichíwali ju alí kiti mi ma ke che cha isiá bitélima. Mi kipúmalé japalí mi raʼicha echi yúa. Mi kuʼíromalé kiti mi aʼlá kilíi kanílima alí ami mayeka isima mujé binói niraa (Salmo 71:5; Filipenses 4:6, 7). Onorúami mi kuʼíroma japalí mi ikisaa karú ikiwáami we jilírami (Salmo 18:18). Onorúami ko a oméromalé mi ayá sinibí bitéliwami (Romanos 6:23).

Japalí mi Onorúami muliwi, ami muliwi Onorúami amígowala. Echi Onorúami amígowala ayénachó a oméroma mujé amígowalaká. Japi riká mujé rejimálawala nima. Né we kanílimalé mi binertia Onorúami kitra alí mi kuʼíromalé, alí kilíi mi kanílitimalé.

Tasi mi chigó iyiri ju japi riká Onorúami. Ami nínalaká Onorúami amígowala, ami machisáré bilé namuti we natéami: Onorúami ko wabé natéami ju, tamujé ko ke me. Echi ko olá wikabé bamíali, sinibí isimí suwaba we aʼlá alí we jiwérami ju, tamujé ke tasi. Echi bineli bi ju japi nulésaré echi pagótami. Kiti bela ami Onorúami amígowala nínalaká, ami kipúsaré echi alí isí japi mi tániwa. Sinibí mi a olámalé namuti we kalabé ami nijéwisaká Onorúami (Santiago 1:25).