Churiká oméroma machiyá Onorúami

Ami oméroma machiyá Jeobá leérika echi Biblia. Wabé chabéi ko, Onorúami ko chapili jaré pagótami kiti osimea echi natáala. Echi osirúami machiwáami ju japi riká echi Biblia. Jipi ko a omérowa machiyá Onorúami leérika echi Biblia. Jepuná ko olá echi Jeobá Raʼicháala, japi aní echi, kiti bela ayénachó machiwá japi riká echi Onorúami Raʼicháala. Ami oméroma bichiwia japi aní echi Biblia kiti Jeobá ko ke tasi bilé siné kaléami ju. “Mapu kiti Riosi ke tasi bilé kaléami ju.” (Hebreos 6:18.) Echi riká bela ju, echi Onorúami Raʼicháala olá echi bichíwali (Juan 17:17).

Echi Biblia ju bilé chiliwéala wabé natéami japi tamo nareli Onorúami kitra. Japi riká ju bilé oserúami japalí osii bilé onolá echi binói kúchuwala. Ata aneliwa japi isima Onorúami echoná Wichimóbachi biléana né wabé kalabé japoná pirélipa, japoná we baʼóachi nima. Ata aneliwa japi Onorúami isili chabéi, echi japi isimí jipi alí japi isima pe aminana mi echi kúchuwala kitra japi nijewi Onorúami. Ayénachó ta a kuʼíriwa karewia chati namuti japi ta olá alí kiti ta a riwiboa echi kanilíwami (2 Timoteo 3:16, 17).

Echi testigo Jeobá ko Onorúami amígowala ju; mi kuʼíromalé námitia japi echi Biblia bineri. Pe mi anesa bi ré kiti mi binénali echi Biblia. Ke mi bilé bujeba japalí mi binéripa (Mateo 10:8). Ayénachó mi a oméroma simía japoná napawíliwa. Jepuná ko ju biléana japi jeriká riwéi Japoná biné echi Testigo Jeobá. Ami simisáaká japoná napawíliwa ami we iyá binema Onorúami kitra.

Ami oméroma machiyá Onorúami nátaka isiá echi namuti kitra japi echi niwali. Japi riká jepunani, echi Biblia aní: “Riosi, echi mapu niwali echoná ripá rewegachi, jenaʼí wichimóbachi ayénachó” (Hechos 14:15). Japalí Jeobá niwali ‘ripá siyónamiʼ ayénachó niwali echi Rayénali. Alí biché, ¿piri mi binériwa jepuná Onorúami kitra? Ami binériwa kiti Jeobá ko a olá we jiwériwami. Pe echi bi a oméroli niwayá namuti rikamti né wabé jiwérami japi riká echi Rayénali. Ayénachó a néwariwéliti kiti Jeobá ko we nátami ju, kiti a néwalelíwa machiwáami niwalía echi Rayénali japi kítara ratabátiwa alí rajeliwa, alí ke siné choʼí.

Echi Jeobá niwáala a néwariwéliti kiti mi we nakiwáami ju. Natá suwaba wikaná kayamti rakala japi nirú echoná Wichimóbachi. Jeobá ko a omérosa riweili nijía pe bilepi rakala we chakó ke bilé oké, we nalí be, a ta áarami ju wikaná kayamti rakala, tasi chopi iyiri ju, jaré we akáami ju, jarecho ke me akáami ju, jaré weli ju, jarecho kúuchi ju. Echi riká a newaré kiti mi we nakiwáami ju Jeobá kitra alí ayénachó we aʼlá pagótami ju alí ayénachó nijí wiká namuti kalabé (2 Corintios 9:10).