¿A nijíiré Onorúami echi raʼíchali kalabé japi aní echi Biblia?

1. ¿Jépuká níali ju echi Biblia natáala?

Echi pagótami ma kéayó sinibí pirélima jenaʼí Wichimóbachi, jepuná raʼíchali kalabé oserúa uchúi echoná Bíbliachi (Salmo 37:29). Echi Biblia olá 66 oselí. Onorúami ko néeli 40 pagótami nijéwami kiti osimea. Moisés ko osali echi bachá malí oselí, alí ma simírili 3,500 bamíali. Né jubá oselí ko osali echi julárami Juan, ma simírili 1,900 bamíali. Japi aní echi Biblia Onorúami natáala ju. Echi ko néeli echi binói jiwérala kiti anema echi osáami japi osimea riweili (2 Samuel 23:2). Echi ko osali echi Onorúami natáala alí ke ko echi abói natáala. Kiti bela Jeobá níali ju echi Biblia natáala. Leeri 2 Timoteo 3:16 alí 2 Pedro 1:20, 21.

Iné echi video ¿Jépuká níwala ju japi aní echi Biblia?

2. ¿Jépuká níwala ju japi aní echi Biblia?

Kiti echi Biblia Onorúami natáala ju alí aní né japi riká ikimea, ke wesi pagótami omero echi riká nokayá (Josué 23:14). Pe echi Onorúami bi, japi suwaba omérami ju, aní japi ikimea echi pagótami. Leeri Isaías 42:9 alí 46:10.

Bilé oselí japi echi Onorúami natáala olá we natéami ju. Echi Biblia wikaná niraa raʼicháliami niwárami ju, nirú billones japi riká echi. Tako bilé oselí we chabéwami ke, echi Biblia aní namuti japi jipi bineri echi ciencia. Suwaba japi ikí osali echi 40 osáami raʼicha bilepi binelíwami kitra.a Ayénachó japi aní echi Biblia, echi nakiwáami kitra, pe echi Onorúami né Bichíwali bi omero bineria jepuná, alí Onorúami, echi jiwérala kitra, kuʼiro echi pagótami japi olá karú ikiwáami kiti aʼlá pirélima. Jepuná namuti a machirti milloni pagótami japi echi Biblia né bichíwali Onorúami Raʼicháala ju. Leeri 1 Tesalonicenses 2:13.

Iné echi video ¿Chúsiá ta bichíwisaré japi echi Biblia né bichíwali aní?

3. ¿Piri kitra raʼicha echi Biblia?

Bilé raʼíchali kalabé japi raʼicha echi Biblia, echi ko ju japi Onorúami iyama wiká namuti kalabé echi pagótami. Echi Biblia ko aní japi né chokichí jonsa echi bacháwala rejoy wikáwili bilé Wichimóbachi baʼóami, ayénachó aní japi chúriká checho a ku we baʼóami nima jenaʼí Wichimóbachi. Leeri Apocalipsis 21:4, 5.

Echi Onorúami Raʼicháala ayénachó olá nulalíwami alí busuréliwami. Ayénachó echi Biblia raʼicha japi chúriká tibú Jeobá echi pagótami. Jepuná kitra ta biné chu iyiri ju Onorúami. Kiti bela echi Biblia mi kuʼiro machiria Onorúami alí mi ruyé chúriká mi oméroma Onorúami amígowala niya. Leeri Salmo 19:7, 11; Santiago 2:23, alí 4:8.

4. ¿Piri mi isíisaré kiti mi moʼama echi Biblia?

Japalí Jesús ruyee, echi ko aniyé echi versículos alí pe aʼlínala ko machírtili piri “aniwáami ju suwaba Riosi Raʼíchala”. Jepuná oselí, japi mi leeri, mi kuʼírima kiti mi moʼama echi Biblia. Leeri Lucas 24:27, 45.

Ata machí japi mi we kanílima machiyá echi raʼíchali kalabé japi Onorúami nawesa. We nalí, wiká pagótami tasi natéami niraa iné, alí jarecho ko naʼawa japalí kipusú. Kiti siwé. Mujé sinibí mi bitélima ami machisáaká Onorúami. Leeri Juan 17:3.