¿A checho ku pirélimiré japi ma suwili?

1. ¿Chu iyiri ju echi raʼíchali kalabé japi nirú echi suwíkami kitra?

Japalí Jesús nawali Betania anelíachi mulipi ayé Jerusalén, echi amígowala Lázaro ma naó rawé mukuká boʼili. Jesús ko simili japoná tóoiru, Marta alí María, echi Lázaro najirémala, Jesús yúa simíali. We sapú wiká pagótami najátili. ¿Kecha a we kanili Marta alí María japalí Jesús ku wilásili Lázaro? Leeri Juan 11:21-24, 38-44.

Marta ko ma machiyé echi buyelíami japi olá echi suwíkami, alí japi Jeobá ku jawásima echi suwíkami kiti checho a ku pirélima jenaʼí Wichimóbachi. Leeri Job 14:14, 15.

2. ¿Chúriká bití echi suwíkami?

Echi pagótami weʼé kitra niwárami nili (Génesis 2:7; 3:19). Tasi ta aliwéami ju. Japalí suwisaa echi pagótami tasi chuʼí najiti. Japalí ta suwí, echi mochokóala ayénachó mukú, ma ke che iyiri nata. Kiti bela Lázaro ko ke iyiri raʼíchali japi isiili, kiti echi suwíkami tasi iyiri namuti noká, kecho iyiri nata. Leeri Eclesiastés 9:5, 6, 10.

¿Onorúami a risoa olániliré ikósika echi pagótami? Echi Biblia né machiná niraa bineri japi echi suwíkami ke néwaníli, kiti bela tasi nirú biléana japoná ikósiwa echi pagótami, jepuná ko chijunti Onorúami. Pe nátaka bi japi echi pagótami risoa riká ikosi, we iyóriti Onorúami. Leeri Jeremías 7:31.

Iné echi video ¿A checho ku pirélimiré japi ma suwili?

3. ¿A omérimiré raʼicha echi suwíkami tamujé yúa?

Echi suwíkami ko ke omero raʼicha alí kecho kipúa (Salmo 115:17). We be nalí echi ángeles chati a omero raʼicha echi pagótami yúa alí mayérika noká japi echi chuʼí ju (2 Pedro 2:4). Jeobá ko aní japi ke raʼichánilisaré echi chuʼí yúa. Leeri Deuteronomio 18:10, 11.

4. ¿Jépuká checho a ku pirélima?

Wiká milloni pagótami japi suwika bití checho a ku pirélima jenaʼí Wichimóbachi. Ayénachó japi nokali namuti chati, kiti ke machili Onorúami nuláala, ayénachó ku jawásitami nima. Leeri Hechos 24:15.

Echi japi ku jawásitami nima, ku binéritami nima echi bichíwali Onorúami kitra alí nijéwika néwariwélitima japi a bichíwiami ju Jesús (Apocalipsis 20:11-13). A nokisáaká japi aʼlá ju, kanílika pirélima sinibí jenaʼí Wichimóbachi. Leeri Juan 5:28, 29.

5. ¿Piri ta biné Onorúami kitra japalí ta biné echi jawásiliami kitra?

Echi suwíkami ko ku jawásitami nima kiti Onorúami júali binói Nolá alí mukuli tamujé kitra. Jepuná ko néwariwéliti japi ta we nakirúami ju Jeobá kitra alí japi echi ko we aʼláala ju. Kiti bela, echoná Romanos 6:23 jeaní: “Echi chati nokaami mukuka ku nateti, japi Jeobá nijí ko sinibí bitéliwami ju japi isili Jesús kitra” (TNM). Japalí ku jawásitami nisa echi suwíkami, ¿jépuká mi kanílisa nili inea? Leeri Juan 3:16.