¿Achi bijí piré japi ma suwili?

¿Achi mukuli bilé japi mi we galé? Japalí echi riká ikili ami nátaliré: “¿Achi bijí piré japi ma suwili? ¿Achi ni ku inema nijé téemala japi ma suwili?”. Jena binelíwami alí biléala ata binepo japi aní echi Biblia.

1. ¿Achi bijí piré japi ma suwili?

Jesús ko anili japalí bilé mukusaa a ju japi riká kochiká boʼiyá. ¿Chúsiá Jesús echi riká anili? Jiti japalí bilé we kochiyá boʼí ke newa nili japi ikí. Echi riká cho ju japalí bilé mukusaa, echi ko ma ke biléana okó alí ke cho risoa nili. Echoná Biblia aní: “Echi suwíami ko ke bilé yiri machí” (leeri Eclesiastés 9:5).

2. ¿Chúsiá we natéami ju machiyá japi ta ikí japalí ta suwí?

Sinéami pagótami ke suwinali alí wiká pagótami majawá echi japi ma suwili. Mujé a mi echi riká cho níliaká, japi aní echi Biblia mi iʼwírima jiti mi ma ke majama. Jesús ko anili japi machiyá echi bichíwali tamó iʼwírima (Juan 8:32). Wiká religiones ko bineri japalí bilé mukusaa echi aliwala ko a bijí bité, nalí echi Biblia aní japi echi suwíami ko ma ke newa nili, ke risoa nili alí ayénachó japi ke tamó risoa olama. Jiti bela, ke newalé japi ti omáwili niwílipo, amachíkipo alí jarecho si namuti nokiboa echi jitra.

Jaré ko aní japi a omeri raʼichia echi suwíami yúa. Nalí japi riká ti ma bineli echoná Biblia, echi suwíami ko ke bilé iyiri machí. Alí japi mayé ko japi raʼicha echi suwíami yúa echi ko demonios yúa raʼicha noká, jiti echi ju japi mayeri echi pagótami japi a bijí bité echi suwíami. Jiti bela, machiyá echi bichíwali japi ikí echi suwíami, tamó iʼwiri jiti echi demonios ke tamujé ékima. Jeobá ko tamujé ané japi ta ke raʼichásaré echi suwíami yúa jiti echi demonios ke tamujé cha olama (leeri Deuteronomio 18:10-12).

3. Japi ikí japalí bilé mukusaa

Omáana Wichimóbachi echi pagótami ke chopi riká aní japi ta ikí japalí ta suwí. Nalí pe bilepi bi japi aní bichíwali ju.

• Japoná mi bité, ¿piri aní echi pagótami japi ikí echi suwíami?

VIDEO: ¿A checho ku pirélimiré japi ma suwili? (fragmento) (1:19)

Leérisi Eclesiastés 3:20 alí raʼichasi jepuná jitra:

• Japi riká aní na versículo, ¿chu ikí japalí bilé mukusaa?

• Japalí bilé mukusaa, ¿a bijí bité echi aliwala?

Echi Biblia raʼicha echi Lázaro jitra japi Jesús amígowala nili alí japi mukuli. Ma binepo piri anili Jesús japi ikili Lázaro japalí mukuli. Leérisi Juan 11:11-14 alí raʼichasi jepuná jitra:

• ¿Chúriká anili Jesús japi bití echi suwíami?

• Japi riká anili Jesús echi suwíami jitra, ¿piri ta biné?

• ¿Achi mi mayé japi echi Biblia we aʼlá ruyé japi ikí echi suwíami?

4. Machiyá japi ikí echi suwíami tamujé iʼwiri

Japalí ti ma aʼlá machí japi ikí echi suwíami ma ti ke majawá. Leérisi Eclesiastés 9:10 alí raʼichasi jepuná jitra:

• ¿Achi omero tamujé risoa olayá echi suwíami?

Wiká ko mayé japi omáwali niwílisaré echi suwíami jiti kanílima alí ke tamó cha olama. Nalí japalí ta biné echi Biblia tamó iʼwiri jiti ta ma ke bichíwipo echi namuti. Leérisi Isaías 8:19 alí Apocalipsis 4:11, alí raʼichasi jepuná jitra:

• ¿Chu níliré Jeobá japalí bilé pagótami omáwali niwili echi mukúami alí iʼwírili tani?

5. Machiyá japi ikí echi suwíami tamujé ku kaníliti

Wiká ko anéliwa japalí suwisaa we risoa nílima echi chati namuti jitra japi nokali. Nalí, we ti kanili machiyá japi ke bilé risoa nílima japalí mukusaa tákoré wiká chati namuti nokali. Leérisi Romanos 6:7 alí raʼichasi jepuná jitra:

• Echoná Biblia aní japalí bilé mukusaa ma ke che newaláriwa echi chati namuti japi isili. Jiti bela, ¿achi mi mayé japi echi suwíami risoa nili echi chati namuti jitra japi nokali?

Japalí ti aminabi biné Jeobá jitra, ati machí japi echi ko ke siné risoa olá echi suwíami. Leérisi Deuteronomio 32:4 alí 1 Juan 4:8, alí raʼichasi jepuná jitra:

• Japi riká aní jenaʼí versículos echi Onorúami jitra, ¿achi mi mayé japi echi ko risoa olama echi pagótami japi ma suwili?

• ¿Achi tamujé ku kaníliti machiyá echi bichíwali japi ikí echi suwíami? ¿Chúsiá?

JAPI MI BINELI

Japalí bilé mukusaa ma ke newa nili, ke bilé iyiri namuti machí alí ke cho risoa olá jarecho.

Piri mi animea

• ¿Achi bijí piré japi ma suwili?

• ¿Chúriká tamó iʼwiri machiyá japi ikí echi suwíami?

• ¿Chúsiá tamujé ku kaníliti machiyá japi ikí echi suwíami?

JITI MI CHE BINEMA

Ami binema piri aniwáami ju echi raʼíchali “aliwá” echoná Biblia.

“¿Piri aniwáami ju ‘aliwáʼ?” (Oselí japi nirú echoná jw.org)

Iné achi Onorúami castigo iyá echi pagótami chati japalí ma suwisaa.

¿Achi bichíwali ju japi nirú echi infierno? (3:07)

¿Achi ti majásaré echi suwíami?

¿Achi ne bichíwali nirú echi suwíami aliwala? Alí, ¿achi omero tamó risoa olayá? (Folleto)

Leeri chúriká bilé rijoi ku kanili machisaa japi ikí echi suwíami.

“We ni kaníliki jiti echoná Biblia ani riwaki japi ni machinalie” (Echi Nawésami, 1 inárachi febrero 2015)