Echi religiones ke bichíwali, noká japi echi pagótami ke mulíwima Onorúami

Onorúami ko we galéami ju alí echi religiones ko aní japi bineri echi jitra. Nalí, ¿chúsiá we chati namuti nokáami ju? Jiti echi religiones ko ke bichíwali binériami ju. Japi riká bineri alí noká, isimí japi echi pagótami we cha riká raʼichama Onorúami jitra. ¿Chúriká noká? ¿Chu níliti Onorúami? Alí, ¿chu isima echi?

1. ¿Piri namuti ke bichíwali bineri echi religiones Onorúami jitra?

Echi religiones japi ke bichíwali ju “chopi aboni bichíili echi wabé ʼyékalawami” (Romanos 1:25). Japi riká, wiká ko ke bineri echi pagótami Onorúami riwalá, nalí echi Biblia aní japi ta néesaré echi Onorúami riwalá (Romanos 10:13, 14, TNM). Japalí ikisaa karú ikiwáami, jaré japi binériami ju echoná tiyópachi, aní japi Onorúami echi riká nakí. Nalí ke bichíwali ju, Onorúami ko ke iyiri ju japalí ikisaa echi chati namuti (leeri Santiago 1:13). Jiti echi religiones echi riká bineri, wiká pagótami ma ke mulíwinali Onorúami.

2. ¿Piri namuti noká echi religiones japi Onorúami ke galé?

Echi religiones japi ke bichíwali ju ke galé echi pagótami japi riká Jeobá. Echi Biblia aní japi “ne simírami wisabé wabé chati sitíi olali” (Apocalipsis 18:5). Echi religiones iʼwiri echi política, ayénachó iʼwiri japalí nirú guerras alí riwé japi wiká pagótami suwimea. Jaré japi binériami ju echoná tiyópachi, we simárika piré jiti winomí tani echi pagótami japi simía echoná religión. Japi noká newaré japi ke machí Onorúami, jiti la ke omero aniyá japi Onorúami nijewi (leeri 1 Juan 4:8).

3. ¿Chu nili Onorúami inea japi noká echi religiones japi ke bichíwali ju?

Ami we iyoa níliaká inea japi noká echi religiones japi ke bichíwali ju, ¡Jeobá ko wabé rasíruka iyó! Echi ko we galé echi pagótami, nalí be, we kichí echi japi binériami ju echoná tiyópachi jiti ke aʼlá bineri echi jitra alí risoa olá echi pagótami. Onorúami ko aní japi suwábima echi religiones japi ke bichíwali ju alí japi ma “ke siné auché riwirúami níima” (Apocalipsis 18:21). Ma mulipi suwábitami nima echi religiones japi ke bichíwali ju (Apocalipsis 18:8).

AMINABI NATABO JAPI TA BINÉ

4. Onorúami ko ke galé suwaba religiones

Wiká pagótami ko mayé japi Onorúami ko nee suwaba religiones jiti echi mulíwima. ¿Nalí a bichíwali keʼré japi aní? Leérisi Lucas 13:24 alí raʼichasi jepuná jitra:

• Japi riká aní echi Biblia, ¿chu iyiri buwérili simásaré jiti ta sinibí pirélipo?

Inesi echi video alí raʼichasi jepuná jitra:

VIDEO: ¿A galé Onorúami suwaba echi religiones? (fragmento) (3:22)

• ¿Achi aní echi Biblia japi Onorúami galé suwaba religiones?

5. Echi religiones ke bichíwali ke galéami ju japi riká Onorúami

Echi religiones japi ke bichíwali ju noká wiká namuti chati japi Onorúami ke galé. Japi riká, echi ko si iʼwiri japalí nirú echi guerras. Jiti ta machiboa japi riká noká, inesi echi VIDEO alí raʼichasi jepuná jitra:

VIDEO: Japi nokali echi Iglesias japalí niruili Segunda Guerra Mundial (2:22)

• ¿Piri nokali wiká Iglesias japalí niruili Segunda Guerra Mundial?

• Japi echi nokali, ¿piri mi nata echi jitra?

Leérisi Juan 13:34, 35 alí 17:16. Alí raʼichasi jepuná jitra:

• ¿Chu níliré Jeobá japalí echi religiones iʼwiri nirúachi guerras?

• Wiká echi chati namuti japi ikí, echi religiones iyiri ju alí newaré japi ke galéami ju. ¿Mujé piri namuti chati iné japi noká echi religiones?

6. Onorúami ko iʼwírinali echi pagótami japi echi religiones ikaleka binérili

Leérisi Apocalipsis 18:4a alí raʼichasi jepuná jitra:

• Onorúami ko iʼwírinali echi pagótami japi echi religiones ikaleka binérili, ¿mujé ko piri mi nata echi jitra?

7. Kiti riwé binea Onorúami jitra

¿Achi mi animea japi Onorúami iyiri ju japi cha riká noká echi religiones? Natá japi bilé onolá busuré iyá echi ranala, nalí echi ko ke nijéwisa biléana simí echoná bitichí jonsa alí isimí wiká namuti chati. Echi onolá ko ke galé japi isimí echi ranala. Jiti la, ¿achi aʼlá ju japi ta aniboa japi echi onolá iyiri ju japi isimí echi ranala?

• Jiti cha riká noká echi religiones, ¿achi ta aniboa japi Jeobá iyiri ju alí riwepo binea echi jitra?

JAPI MI BINELI

Jiti echi religiones ikaleka bineri Onorúami jitra alí wiká chati namuti noká, ma mulipi Onorúami ko suwábima.

Piri mi animea

• Japi noká alí japi bineri echi religiones japi ke bichíwali ju, ¿piri mi nata echi jitra?

• ¿Piri nata Jeobá echi religiones jitra japi ke bichíwali ju?

• ¿Chu olama Onorúami echi religiones japi ke bichíwali ju?

JITI MI CHE BINEMA

Ne sojí suwaba religiones Onorúami ko ke galé, ¿chúsiá? Ma inepo okuá namuti.

“¿Achi suwaba religiones tamó iʼwiri jiti mulíwipo Onorúami?” (Oselí japi nirú echoná jw.org)

¿Chúsiá Jeobá nakí japi ta napawika nóchilipo echi alí ke tamujé ibili niraa?

“¿Achi natéami ju japi ni bilé religión yúa napawima?” (Oselí japi nirú echoná jw.org)

Bilé sacerdote ke kanili inea japi nokayé echi religión japoná simiyé, nalí ke siweli binea Onorúami jitra.

“Bilé sacerdote riwé simiyá echoná Iglesia” (¡Busuréwiami!, febrero 2015)

Ma chabé jonsa echi religiones ikaleka bineri alí aní japi Onorúami ke galé echi pagótami alí risoa olá. Jenaʼí mi binema bikiá namuti japi ikaleka aní.

“Namuti japi ikaleka aniwá Onorúami jitra” (Echi Nawésami, 1 inárachi noviembre 2013)