A kichísaré bichíwiliami japi ke bichíwali ju

Satanás alí echi demonios ke nakí japi mi Onorúami nóchima alí kecho nakí japi mi binema echi kitra. Echi ko nakí japi ke wesi Onorúami amígowala nima. ¿Churiká noká? Bilé namuti japi nee, echi ko ju, echi bichíwiliami japi ke bichíwali ju (2 Corintios 11:13-15). Bilé bichíwiliami ke aʼlá ju japalí ke bineri japi aní echi Biblia. Echi bichíwiliami japi ke bichíwali ju echi ko ju japi riká echi winomí japi ke bichíwali ju. Echi ko bela ke larú japi riká né bichíwali, we nalí kepi bichíwali ju pa. Echi ko wiká karú ikiwáami mi iyama.

Echi bichíwiliami japi kaléami ju echi ko ke kalé Jeobá, kiti echi Onorúami ko we kalé echi bichíwali. Japalí Jesusi biteili jenaʼí Wichimóbachi, echi pagótami japi binérili Onorúami kitra echi ko miʼlinaili Jesusi. Echi ko a mayeli japi echi riká nóchilia Onorúami kitra. Echi ko jeaniyé: ‘Pe bilepi bi ta olá onó, Onorúamiʼ. ¿A echi riká nátali Jesusi? Ke. Echi ko jéaneli: “¡Tamujé ta birepi niraa, echi walubéala Riosi chópita oné!” (Juan 8:41, 44). Jipi ayénachó wiká pagótami a mayé japi a nochi Onorúami, pe na jónali ke machí japi né bichíwali nochi Satanás alí demonios (1 Corintios 10:20).

Echi riká japi riká bilé ichí muyáami nijí sunú chati, echi bichíwiliami japi ke bichíwali ju isimí japi echi pagótami nokimea namuti chati. Jenaʼí Wichimóbachi né wabé nirú echi karú ikiwáami kiti echi pagótami noká namuti chati. Nirú nakówami, chikówami, risoa oliwáami, miʼalíami a nirú tábiami alí jarecho chati namuti. Wiká pagótami japi noká echi namuti chati a olayé larú bilé bichíwiliami, pe na jónali jepuná bichíwiliami ke kuʼiri nokayá echi aʼláala. Ke riwésaká nokayá echi namuti chati ke omero Onorúami amígowala nilia (Mateo 7:17, 18).

Echi bichíwiliami japi ke aʼlá ju, bineri echi pagótami japi bichíwisaré echi namuti japi riká echi kursi. Onorúami ko aní japi ke raʼíchisaré echi kursi alí jarecho namuti ke bilecho. Echi riká nísaré, ¿ami kanílima japalí bilé rikamti ke mi yúa raʼichasa alí raʼichasa mujé chuʼalá nalí yúa? ¿A mujé amígowala nímiré echi pagótami? Ke bela ba. Jeobá ko nakí kiti mi echi yúa raʼichama. We nalí ke nakí japi mi yúa raʼichama echi santo alí kursi, kiti echi ko ke olá piréliwami (Éxodo 20:4, 5).

Echi bichíwiliami japi ke bichíwali ju bineri japi a omero miʼayá echi pagótami japalí nirúachi weli nakówami. Jesusi ko anili japi echi Onorúami amígowala ju ko nakiká nokimea anakupi niraa. Ke ta miʼliboa echi pagótami japi ta nakí (Juan 13:35). Kecho aʼlá ju koʼwiwaa echi pagótami cha nokáami. Japalí echi Jesusi sayérala simíali chapisia, echi ko ke riweli japi nikúuroma echi najátami (Mateo 26:51, 52).

Echi bichíwiliami japi ke bichíwali ju echi ko bineri japi echi pagótami chati japi risóanilima echoná naírli. Na jónali echi Biblia ko a bineri kiti a nokiwáaká echi chati namuti a natétiwa echi mukuwáami kitra (Romanos 6:23). Onorúami Jeobá ko ju we nakíami. ¿A né sinibí cha olámiré echi pagótami? Ke tasi. Echoná Wichimóbachi we baʼóachi a nirúlima pe bilepi bichíwiliami. Echi bichíwiliami japi a kalé Onorúami (Apocalipsis 15:4). Suwaba echi jaré bichíwiliami japi bineri echi Satanás ikaléala echi ko keʼnéwakimea.