Churiká riwiboa echi bichíwiliami japi né bichíwali ju

Ami Onorúami amígowala nínalaká, ami isísaré japi mi binériwa echi bichíwiliami kitra japi Onorúami kalé. Jesusi ko anili “echi japi né bichíwali a bichíwiami ju ko” a né “bichíwali” nijéwima riweili Onorúami (Juan 4:23, 24, Nuevo Mundo). Pe bilepi bichíwiliami nirú japi a kalé Onorúami (Efesios 4:4-6). Echi bichíwiliami japi né bichíwali ju too echi sinibí bitéliwami, alí echi bichíwiliami japi ke bichíwali ju ko too echi mukuwáami (Mateo 7:13, 14).

Ami omero machiyá chi iyiri ju echi bichíwiliami né bichíwali ami inésaká echi binói najátiwala. Japi riká Jeobá we aʼláala ju, echi japi né bichíwali binói bichíwiami ju ayénachó pagótami aʼláala nísaré. Echi riká japi riká bilé aʼláala ichí nijí we aʼláala sunú, a chigórigácho ju echi bichíwiliami japi né bichíwali ju ayénachó a machiina pagótami aʼláala (Mateo 7:15-20).

Echi Jeobá amígowala ko we aʼlá riwiika isimí echi Biblia. A machí japi echi Biblia ko Onorúami Raʼicháala ju. Kiti bela, riwé japi echi Biblia anema churiká pirélima, alí ayénachó karéwima echi namuti japi ke aʼlá ju alí echi ko a machí kiti echi Biblia a nikúuroma kiti né aʼlá machimea Onorúami (2 Timoteo 3:16). Ayénachó, a isí né japi riká mi bineri jarecho.

Echi Jeobá amígowala nakiká noká anakupi niraa. Jesusi ko saʼweli echi nayúami alí binérili echi pagótami Onorúami kitra, echi riká néwariwélitili kiti we nakili echi pagótami. Echi japi olá echi bichíwiliami né bichíwali ayénachó nakí jarecho pagótami. Japi riká Jesusi, we aʼlá nakí echi japi risóati ju alí pagótami japi omáana Wichimóbachi piré. Jesusi ko anili japi echi pagótami a machimea riweili jepuká ju kipi najátawala a riwisáaká japi a olá echi nakiwáami abói niraa (Juan 13:35).

Echi Onorúami amígowala a riwíi echi Onorúami riwalá: Jeobá. A bilé pagótami ke néenalami nísaká mujé riwalá, ¿a mujé amígowala wabé nakiwáami nímiré? Ke bela ba. Japalí ta a olá bilé amigo ata riwaká noká japi riká echi rewéi alí we aʼlá ta raʼicha echi kitra jarecho yúa. Kiti bela, echi japi Onorúami amígowala nínalikó néesaré echi Binói riwalá alí raʼicha echi kitra jarecho pagótami yúa. Jeobá ko nakí kiti mujé echi riká isima (Mateo 6:9; Romanos 10:13, 14).

Japi riká Jesusi, echi japi Onorúami amígowala ju ko ayénachó bineri echi pagótami echi Onorúami Gobiérnowala kitra. Echi Onorúami Gobiérnowala japi ripá rewegachi nirúami ju, niwama echi kawí bilé Wichimóbachi we baʼóami. Echi japi Onorúami amígowala ju ko bineri jarecho pagótami echi namuti kalabé Onorúami Gobiérnowala kitra (Mateo 24:14).

Echi testigo Jeobá a jiwerli noká Onorúami amígowala nínala. Riwíi echi Biblia alí a nakiká noká anakupi niraa. Ayénachó nee alí riwíi echi Onorúami riwalá alí a bineri jarecho pagótami echi Onorúami Gobiérnowala. Echi riká noká echi testigo Jeobá kiti a olá echi bichíwiliami japi né bichíwali ju.