BINELÍWAMI 10
CANCIÓN sjj-S 31 Camina siempre con Jehová
Binepo natia japi riká Jeobá alí Jesús
“Jiti Cristo risoa olárami nili japalí biteili japi riká pagótami, emi ayénachó natasi japi riká echi” (1 PED. 4:1, TNM).
JAPI TA JITRA BINEPO
Piri namuti we natéami bineli echi apóstol Pedro echi jitra japi riká nátili Jesús alí tamujé piri ta biné echi jitra.
1, 2. a) ¿Piri si ruyá aní galea Jeobá? b) ¿Chúriká néwariwélitili Jesús japi galeli Jeobá suwaba binoy natáala jitra?
JESÚS ko ruyeli chu iyiri ju echi nulalíwami wabé natéami japi Onorúami iyali echoná Moisés Nulalila, japalí anili: “We galé Jeobá echi mujé Onorúamiwala ne sulachí jonsa, japi mi iwí jonsa, mujé natáala jonsa alí suwaba mujé jiwérala jitra” (Luc. 10:27, TNM). Jiti la ti galésaré Jeobá suwaba jitra japi ta olá alí japi riká ti ju. Jepuná ko ayénachó ju japi ta nokinali, japi ta inili alí tamujé jiwérala jitra. Ayénachó ruyá aní japi chúriká ti nee tamujé natáala, o piri ta nata. A bichíwali ju japi ta ke oméripo sébali aʼlá inamia japi riká nata Jeobá. Nalí japi tamó iʼwírima ko ju binea “mapurigá echi Walubela Jesucristo ʼnata”. ¿Chúsiá? Jiti Jesús ko sébali aʼlá nátili japi riká nata echi Onolá (1 Cor. 2:16).
2 Jesús ko galeli Jeobá suwaba binoy natáala jitra. Echi ko machiyé piri namuti ju japi nakiyé Onorúami japi echi isima alí ne echi riká isínilie tákoré echi ko machiyé japi risoa ikimea. Jiti we natéami niraa ineli kanílitia echi Onolá, echi ko ke riweli japi jarecho namuti wabé natéami nima.
3. ¿Piri bineli echi apóstol Pedro Jesús jitra, alí piri aneli echi cristianos? (1 Pedro 4:1).
3 Pedro alí echi jaréala apóstoles napawika simárili echi Jesús yúa alí bineli chúriká nátili. Japalí Pedro osali echi bacháwala carta japi binoy rewalá olá, echi ko iʼwérili iyali echi cristianos jiti natama japi riká Cristo (leeri 1 Pedro 4:1, TNM). Japalí Pedro osali jepuná, néeli bilé raʼíchali japi riká nokayé echi sontarsi japi toyé suwaba japi newalema japi jitra nakoma. Echi riká cho echi cristianos natásaká japi riká Jesús, echi ko mochima japi riká ko ma suwaba namuti olayá japi jitra nakoma. Echi riká ke nokimea echi chati namuti japi nokinali alí japi riká noká echi pagótami ke nijéwami (2 Cor. 10:3-5; Efes. 6:12).
4. ¿Piri ta binepo jena binelíwami?
4 Jena binelíwami binepo chúriká nátami nili Jesús alí chúriká ti omeri nokayá japi riká echi. Ata binepo chúriká ti omeri 1) binea natia japi riká Jeobá, 2) ke niráami niya alí 3) we aʼlá nátami niya.
BINEPO NATIA JAPI RIKÁ JEOBÁ
5. Ruyé siné kaachi japalí Pedro néwariwélitili japi ke nátili japi riká Jeobá.
5 Ma inepo siné kaachi japalí Pedro néwariwélitili japi ke nátili japi riká Jeobá. Jesús ko aneli echi apóstoles japi simea echoná Jerusalén japoná echi líderes religiosos echi chapimea alí risoa olama japalí chéami miʼá (Mat. 16:21). Pedro ko aʼlá machiyé japi Jesús nili echi Mesías japi niyúbima riweili echi Onorúami puéblowala, echi jitra echi ko nátiliré japi Jeobá ko ke riwema japi miʼárami nima Jesús (Mat. 16:16). Jiti la Pedro biléana toká jéaneli Jesús: “Ketasi arigá ʼwérali ju mápumi echirigá olárami níima” (Mat. 16:22). Jesús alí Pedro ke chopi riká nátili, jiti Pedro ko ke nátili japi riká Jeobá.
6. ¿Chúriká néwariwélitili Jesús japi nata japi riká Jeobá?
6 Jesús ko nátili japi riká echi Onolá Jeobá, jiti la aneli Pedro: “¡Miná waná simigá! Mujé tamí we kumé mapujítimi chopi raʼicha mapurigá echi Satanasi riwéami riablo niráa. Mujé ketasi ʼnata mapurigá Riosi ʼnata, chópimi ʼnata mapurigá echi auché jaré pagótami ʼnata” (Mat. 16:23). Jesús ko aʼlá machiyé japi isimia japi riká Jeobá nakí, echi ko jilika bitélima riweili jiti risoa olárami nima alí miʼlirúami. Jiti la ke kipuli echi busuréliami japi anili Pedro, tákoré Pedro echi riká aníliré jiti iʼwírinali Jesús. Echalí Pedro ko machili japi echi ko binésaré natia japi riká Jeobá. Jepuná ejemplo jitra, ata biné japi tamujé ayénachó binésaré natia japi riká Jeobá.
7. ¿Chúriká néwariwélitili Pedro japi iʼwérili isié natia japi riká Jeobá? (Iné echi dibujo).
7 Pe aminana, Pedro néwariwélitili japi iʼwérili isié natia japi riká Jeobá. Onorúami ko anili japi ma chotásima narea echoná binoy puéblowala pagótami japi ke judíos nili. Jiti la júali Pedro nawésimia Cornelio, japi nima riweili bilé echi bacháwala cristianos japi ke judíos nili. A bichíwali ju japi echi judíos ke napawíe jarecho pagótami yúa japi ke judíos nili, jiti la Pedro we jilí nirali narea echi nóchali. Nalí japalí echi ko inámili piri ju japi Jeobá nakili, echi ko sapú sinúrika ku nátili. Japalí Cornelio aneli Pedro japi echi inesia simea, echi ko sapú simili (Hech. 10:28, 29). Nawésili Cornelio alí sinéami japi echi yúa pireili, alí echi ko pakoli (Hech. 10:21-23, 34, 35, 44-48).
Pedro ko bakiyá inari Cornelio bitélachi. (Iné echi párrafo 7).
8. ¿Chúriká ti néwariwéliti japi ta nata japi riká Jeobá? (1 Pedro 3:8).
8 Ma jaré bamíbali simírisa, Pedro ko iyali jepuná busuréliami echi cristianos: “Sinéami chopi riká natasi” (leeri 1 Pedro 3:8, TNM). Jiti sinéami echi testigo Jeobá chopi riká nátami nipo, ati natásaré japi riká Jeobá nata, japi oserúa uchuwi echoná Biblia. Japi riká, Jesús ko aneli echi najátowala japi bachá we natéami niraa inema echi Onorúami Gobiérnowala (Mat. 6:33, TNM). Nátika jepuná japi anili Jesús, jipi ko natabo japi bilé hermano echoná congregación chotásimi nóchilia Jeobá tiempo completo niraa. Echi riká isísaká, ¿achi ti anepo japi riká Pedro aneli Jesús? ¡Ke tasi! Tamujé ko nalí anepo japi we aʼlá isimí alí japi tamujé si iʼwíripo.
KE NIRÁAMI NIPO
9, 10. ¿Piri namuti we natéami binérili Jesús echi discípulos?
9 Echalí rokojó japalí miʼlirúami nima riweili, Jesús ko binérili Pedro alí echi jaréala apóstoles japi ke niráami nima. Echi ko júali Pedro alí Juan jiti aʼlárika wilama japoná echi okema echi discípulos yúa kecho bijí mukuyá. A keʼré japi Pedro alí Juan manali baʼwí bilé bitólichi alí jaré toallas o chiní, jiti echi pagótami japi siyé pabákima ronólachi kecho bijí koʼyá. Nalí, ¿jépuká pabákima riweili echi pagótami ronólachi?
10 Sinibí echi pioni nokayé jepuná nóchali. Nalí echalí Jesús nili japi pabákili echi apóstoles ronola. ¡Echi ko ke mayeli japi Jesús iyema binoy níwala chiní japi moba uchá iyénili, japi bulema echi toalla binoy umílachi, japi roʼama baʼwí echoná bitólichi alí pabákima echi ronola! (Juan 13:4, 5). Jesús ko wilí isíliré pabakia echi 12 apóstoles ronola, ayénachó pabákili echi Judas ronola, tákoré miná ko cha isima riweili. ¡Jesús ko ke niráami nili! Miná ko kilí niraa ruyeli echi apóstoles: “¿Achi timí inami japi ni isili emi jitra? Emi ko tamí ané Binériami alí Walubéala, alí a bichíwali ju japi riká timí aní, jiti ni a echi ju. Jiti la, japi riká nijé japi ni ju echi Walubéala alí Binériami emi pabákili ronola, emi ayénachó pabákisaré ronola anakupi niraa” (Juan 13:12-14, TNM).
Ke niráami niya ayénachó ju japi riká ti nata tamujé aboi jitra alí jarecho jitra.
11. ¿Chúriká néwariwélitili Pedro japi ma bineli ke niráami niya? (1 Pedro 5:5; ayénachó iné echi dibujo).
11 Pedro ko bineli Jesús jitra ke niráami niya. Pe aminana japalí Jesús ma ku simili ripá rewegachi, Pedro ko saʼweli bilé rijoi japi ke omériami nili iyenia japalí ochérili jonsa (Hech. 1:8, 9; 3:2, 6-8). Jepuná japi ikili wiká pagótami machili alí mulíwili japoná Pedro asali (Hech. 3:11). Nalí, ¿piri isíliré Pedro? Newalabo japoná echi ochérili aʼlá niraa ineli we natéami niraa niya. ¿Achi nakili Pedro japi jarecho simárika raʼichama echi jitra? Ke tasi, echi ko ke niráami nili alí walubéala aneli Jeobá alí Jesús. Echi ko anili: “Tamujé ne galá bichíi Jesucristo Raʼíchala, echijiti jeʼná rijói ma ku saʼwárami níili” (Hech. 3:12-16). Pe aminana, Pedro ko osélili echi cristianos japi we natéami ju ke niráami niya. Echi raʼíchali japi néeli tamó newalari japalí Jesús buleli bilé toalla binoy umílachi alí pabákili echi apóstoles ronola (leeri 1 Pedro 5:5, TNM).
Pedro ke niráami nili alí anili japi Jeobá alí Jesús echi iʼwírili isiá echi milagro. Tamujé ayénachó néwariwélitipo japi ta ke niráami ju japalí ti iʼwiri jarecho, ke ko jiti ta nakí japi jarecho tamó inema o simárika raʼichama tamujé jitra. (Iné echi párrafos 11 alí 12).
12. Japi riká Pedro, ¿piri tamó iʼwírima ke niráami niya?
12 Japi riká Pedro, tamujé ayénachó omeri binea ke niráami niya. Bilé namuti japi tamó iʼwírima ko ju, néwalayá japi ke niráami niya ke bi ju japi ta aní, nalí ayénachó ju japi riká ti nata tamujé aboi jitra alí jarecho jitra. Echi aniwáami ju echi raʼíchali “ke niráami” japi Pedro néeli echoná 1 Pedro 5:5. Tamujé ko noká aʼláala namuti jiti ta we galé Jeobá alí echi pagótami, ke ko jiti jarecho simárika raʼichama tamujé jitra. Ati we kanílika nóchilisaká Jeobá alí echi hermanos, alí ti ke natéami niraa inésaká japi jarecho tamó inema, ata néwariwélitipo japi ta ke niráami ju (Mat. 6:1-4).
WE AʼLÁ NÁTAMI NIPO
13. ¿Piri si ruyá aní aʼlá nátami niya?
13 ¿Piri si ruyá aní aʼlá nátami niya? (1 Ped. 4:7). Echi ko ruyá aní japi ta bachá we aʼlá natabo piri nata Jeobá bilé namuti jitra japi ta nokiboa. Ayénachó ju japi ta sinibí natabo japi wabé natéami ju Jeobá amígowala niya. Ati we aʼlá nátami nísaká, ke ti natabo japi ta we natéami ju alí japi ta suwaba namuti machí. Ayénachó ati sinibí iʼwírili tánipo Jeobá kecho bijí nokayá bilé namuti.
14. Ruyé siné kaachi japalí Pedro ke iʼwírili tánili Jeobá.
14 Echalí rokojó kecho mukumea Jesús, jériká aneli echi discípulos: “Jipi rokó, sinéami emi ke aʼlá nokimea tamí jitra”. Alí Pedro we bichíwika jériká anili: “Tákoré sinéami ke aʼlá nokisaa mi jitra, ¡nijé ke siné echi riká isima!”. Echalí rokojó Jesús iyali jepuná busuréliami echi discípulos: “Busureka mochisi alí sinibí Onorúami yúa raʼichasi” (Mat. 26:31, 33, 41, TNM). Pedro a nijéwilaká echi busuréliami, ke majámili aniyá japi Jesús discípulowala nili. Nalí jiti ke nijéwili, echi ko anili japi ke machili Jesús alí mina ko we risoa nílili (Mat. 26:69-75).
15. Kecho mukuyá, ¿piri namuti iʼwírili Jesús jiti aʼlá nátika isima?
15 Jesús ko sinibí iʼwírili tánili Jeobá. Tákoré echi ko sébali aʼlá isíami nili, wisabé niraa raʼíchili Jeobá yúa japalí kecho miʼlirúami nili. Jepuná iʼwírili jiti isima japi echi Onolá nakili (Mat. 26:39, 42, 44; Juan 18:4, 5). Pedro ko ineli japi Jesús sinibí iʼwírili tánili Jeobá alí ke siné wikáwiliré jepuná namuti.
16. ¿Chúriká néwariwélitili Pedro japi aʼlá nátami nílili? (1 Pedro 4:7).
16 Pe aminana, Pedro ko bineli sinibí iʼwírili tania Jeobá. Japalí ma ku owínili, Jesús ko aneli Pedro alí echi jaréala apóstoles japi narema espíritu santo jiti nawisama. Nalí aneli japi buwema echoná Jerusalén (Luc. 24:49; Hech. 1:4, 5, TNM). ¿Piri isili Pedro japalí buwéi? Echi Biblia ko aní japi Pedro alí jaréala cristianos sinibí raʼichie Jeobá yúa (Hech. 1:13, 14). Alí japalí osali echi bacháwala carta, aneli echi cristianos japi aʼlá nátami nima alí japi sinibí iʼwírili tánima Jeobá (leeri 1 Pedro 4:7). Pedro ko bineli sinibí iʼwírili tania Jeobá, jiti la bilé cristiano we aʼlá nátami nílili alí we aʼlá iʼwírili echi congregación (Gál. 2:9).
17. Tákoré ti ke jilí niraa nokayá jaré namuti, ¿piri ta nokisáré? (Ayénachó iné echi foto).
17 Jiti ta we aʼlá nátami nipo, ati sinibí iʼwírili tánisaré Jeobá. Ati machí japi ta sinibí iʼwírili tánisaré, tákoré ti nokiboa namuti japi ta ke jilí niraa nokayá. Alí wabé natéami ju iʼwírili tania Jeobá japalí ti nokiboa namuti we natéami, jiti ta bichiwi japi echi ko we aʼlá machí piri aʼlá ju tamujé jitra.
Pedro ko bineli sinibí iʼwírili tania Jeobá. Tamujé ayénachó we aʼlá nátami nipo ati sinibí iʼwírili tánisaká Jeobá, alí wabé japalí ti nokiboa namuti we natéami. (Iné echi párrafo 17).a
18. Japi riká Pedro, ¿piri ta omeri nokayá?
18 Ati waʼlú matétara iyá Jeobá jiti echi ko tamó niwali japi riká binoy (Gén. 1:26). Ati machí japi ta ke omeri sébali aʼlá nokayá japi riká Jeobá (Is. 55:9). Nalí japi riká Pedro, ati omeri binea natia japi riká Jeobá, ke niráami niya alí we aʼlá nátami.
CANCIÓN sjj-S 30 Mi Amigo, mi Padre, mi Dios
a JAPI RUYÉ JAPI MACHINA ECHONÁ FOTO: Bilé hermana raʼicha Jeobá yúa japalí buwea atí japi náritami nima japoná simili nóchali aasia.