BINELÍWAMI 26
CANCIÓN sjj-S 123 Seamos leales y sumisos al orden teocrático
Ke niráami nii japalí nirú namuti japi mi ke machí
“Ke ti omeri suwaba aʼlá inamia japi riká ju echi Suwaba Omériami” (JOB 37:23).
JAPI TA JITRA BINEPO
Tákoré ti ke machí suwaba namuti japi ikimea, ke ti siwepo japalí jilírami namuti ikisaa, ati natásaká echi namuti japi ta a machí alí ti bichíwisaká Jeobá.
1. ¿Chúriká tamó niwali Jeobá, alí chúsiá?
JEOBÁ we simárika tamó niwali. Japi riká, echi ko tamó niwali jiti oméripo natia, binea namuti alí inamia chúriká ti nokiboa japi ta biné. ¿Chúsiá echi riká tamó niwali? Jiti echi ko nakí japi ta aʼlá nátika nokiboa japi riká ti ma bineli echoná Biblia japalí ti echi nóchilia muchuwi (Prov. 2:1-5; Rom. 12:1).
2. a) ¿Piri ta machisáré? (Job 37:23, 24; ayénachó iné echi dibujo). b) ¿Chúriká tamó iʼwiri machiyá japi nirú wiká namuti japi ta ke machí?
2 Tákoré Jeobá tamó niwali jiti ta oméripo binea namuti, nalí a nirú wiká namuti japi ta ke machí (leeri Job 37:23, 24). Ma binepo Job jitra. Jeobá ko nárili jaré namuti japi néwariwélitili japi niruili wiká namuti japi Job ke machili. Jepuná iʼwírili jiti aʼlá ku natama alí jiti inámima japi ke niráami nísaré (Job 42:3-6). Machiyá japi nirú wiká namuti japi ta ke machí, ayénachó tamó iʼwírima. ¿Chúriká? Tamó iʼwírima bichiwia japi Jeobá sinibí tamó ruyema echi namuti japi ta newalé machiyá jiti aʼlá nátika nokiboa (Prov. 2:6).
Japi riká Job, ayénachó we aʼlá ju tamujé jitra machiyá japi nirú wiká namuti japi ta ke machí. (Iné echi párrafo 2).
3. ¿Piri ta binepo jena binelíwami?
3 Jenaʼí binelíwami binepo jaré namuti japi ta ke machí alí chúsiá jepuná isini kaachi we jilí ju tamujé jitra. Ayénachó binepo chúsiá aʼlá ju ke machiyá jaré namuti. Japi ta binepo tamó iʼwírima aminabi we bichiwia japi Jeobá, japi wabé machíami ju, sinibí tamó ruyema japi ta newalé machiyá (Job 37:16).
KE TI MACHÍ CHU KABÚ SUWÁBITAMI NIMA ECHI CHATI NAMUTI
4. Japi riká aní Mateo 24:36, ¿piri ta ke machí?
4 (Leeri Mateo 24:36). Ke ti machí chu kabú suwábitami nima echi chati namuti. Ayénachó Jesús, japalí iyénili jenaʼí Wichimóbachi, echi ko ke machiyé “chu kilíbuko echirigá ikimea”.a Miná ko aneli echi apóstoles japi Jeobá bi ju japi omeri aniyá chu kabú echi riká ikimea (Hech. 1:6, 7). Jeobá ko ma machí echi rawé japalí suwábitami nima echi chati namuti, alí tamujé ko ke omeri machiyá.
5. ¿Chúsiá jilí ju tamujé jitra ke machiyá chu kabú suwábitami nima echi chati namuti?
5 Echi jitra japi anili Jesús, ke ti machí chu kilipi ti buwepo japalí chéami suwábitami nima echi chati namuti. Jiti la ma ti ke buwénaliré o ati siwea níliré, alí wabé echi riká ti iníliré japalí ti ma wiká bamibi nóchilia Jeobá. O a keʼré japi ta jilí niraa anachia japi tamujé téemala o jarecho pagótami tamó kaweli aniká japi kecho suwábitami ju echi chati namuti (2 Ped. 3:3, 4, TNM). Alí a keʼré japi natabo: “Nijé aʼlá machílaká echi rawé japalí suwábitami nima echi chati namuti, ke ni me jilí nirama kilí buwea alí anachia japi jarecho tamí kaweli”.
6. ¿Chúriká tamó iʼwiri ke machiyá chu kabú suwábitami nima echi chati namuti?
6 Jiti Jeobá ke tamó ruyé chu kabú suwábitami nima echi chati namuti, echi ko tamó iʼwiri néwariwélitia Jeobá japi ta echi nóchili jiti ta we galé alí ti echi bichiwi. Ati sinibí nóchinali Jeobá, ke ko echi rawé chéami japalí suwábitami nima echi chati namuti. Ke ti natánali bi chu kabú nawama “echi Jeobá rawéwala”, nalí ti natánali echi aʼláala namuti japi ikimea echalí. Natia japi isima Onorúami, tamó iʼwírima aminabi muliwia echi alí iʼwérili nokayá kanílitia echi (2 Ped. 3:11, 12, TNM).
7. ¿Piri ju japi ta a machí?
7 We natéami ju japi natabo echi namuti japi ta a machí. ¿Alí piri ju japi ta machí? Japi 1914 jonsa chotásili echi jubáami rawé. Echoná Biblia Jeobá anili wiká profecías japi néwariwéliti japi echalí bamíali chotásili echi jubá rawé alí japi tamó ané chúriká pirélima riweili echi pagótami echi jubáami rawé. Jiti la ti we aʼlá machí japi “ma mulipi nawama echi Jeobá rawéwala” (Sof. 1:14). Ayénachó ti machí japi Jeobá ko nakí japi ta nawésipo sinéami echi pagótami japi ikí ti omeri, echi aʼláala raʼíchali echi Onorúami Gobiérnowala jitra (Mat. 24:14). Alí ti nawesa jepuná raʼíchali echoná 240 países alí jaréanachó, alí simírikami 1,000 raʼicháliami. Jiti la, ke ti newalé machiyá chu kabú suwábitami nima echi chati namuti jiti iʼwérili nokiboa nawesia.
KE TI MACHÍ CHÚRIKÁ JEOBÁ TAMÓ IʼWÍRIMA
8. ¿Piri ju “echi namuti japi isimí echi Onorúami ne bichíwali”? (Eclesiastés 11:5).
8 Echi Biblia ko aní japi tamujé ke machí “echi namuti japi isimí echi Onorúami ne bichíwali” (leeri Eclesiastés 11:5). Alí, ¿piri ju “echi namuti japi isimí”? Echi ko ju suwaba japi Jeobá isimí japi ikimea o japi riwé japi ikimea, isimia japi binoy nakí. Natabo jepuná: jipi rawé chéami echi científicos kecho aʼlá machí chúriká ocheri bilé taa muchi echi iyela ropálachi. Echi riká cho, tamujé ke sinibí machiboa chúsiá Jeobá riwé japi ikimea jaré namuti o piri isima tamó iʼwírimia (Sal. 37:5).
9. ¿Chúsiá jilí nímiré tamujé jitra ke machiyá chúriká tamó iʼwírima Jeobá?
9 ¿Chúsiá jilí nímiré tamujé jitra ke machiyá chúriká tamó iʼwírima Jeobá? Jiti a keʼré japi ta ke machiyá nílipo piri ta nokiboa o ke bilé namuti nokibóaré, japi riká ke ti riwénaliporé olayá jaré namuti jiti aminabi nawisabo o ke ti simánaliporé biléanachó japoná newaléliwa publicadores. Ayénachó a keʼré japi ta natabo japi Jeobá ke kanila atí tamujé yúa jiti ta ke omeri nokayá japi ta nokinali, tákoré ti iʼwérili noká echi nóchilia. O ati iʼwérili nokayéeré nawesia, nalí ke ti bilé pagótami bineri echi Biblia jitra. Ayénachó we ti iʼwérili nokayéeré nochia echoná proyecto de construcción, nalí ikí wiká jilírami namuti. Jiti la, ati iníliporé japi Jeobá ke tamujé iʼwiri alí ke kanila atí tamujé yúa.
10. Ke machiyá chúriká isima Jeobá, ¿chúriká tamó iʼwiri?
10 Ke machiyá chúriká isima Jeobá, tamó iʼwiri olayá cualidades japi riká ke niráami niya alí tamó newalari japi Jeobá nalí wabé machíami ju tamujé yúa alí japi echi ko wabé aʼlá machí piri aʼlá ju tamujé jitra (Is. 55:8, 9). Ayénachó tamó bineri japi ta bichíwisaká Jeobá, aʼlá machínima suwaba echi namuti japi ta noká. Echi pagótami aʼlá tamó kipúsaká japalí ta nawesa o aʼlá machínisaká echi nóchali japi ta noká, ati natabo japi Jeobá tamó iʼwírili (Sal. 127:1; 1 Cor. 3:7). Nalí, ke aʼlá machínisaká echi namuti japi riká ti nakí, tamó ku kilí níliti machiyá japi Jeobá ko suwaba iné alí suwaba aʼlá machí (Is. 26:12). Ati noká echi namuti japi ta a omeri alí ti bichiwi japi Jeobá sinibí tamó iʼwírima. Tákoré Jeobá ke isimí milagros tamó ruyemia piri ta nokisáré japi riká isili chabé, ati bichiwi japi echi ko tamó iʼwírima machiyá japi ta nokisáré (Hech. 16:6-10).
11. ¿Piri namuti ta a machí?
11 Natia echi namuti japi ta a machí tamó iʼwiri. ¿Alí piri ju japi ta a machí? Japi Jeobá ko we galéami ju, wachíniga isíami alí we machíami. Ayénachó ti machí japi echi ko we natéami niraa iné japi ta noká echi jitra alí echi hermanos. Alí ti machí japi Jeobá sinibí iyá namuti aʼláala echi japi ke riwé nijewia (Heb. 11:6).
KE TI MACHÍ JAPI IKIMEA BAʼALÍNALA RAWÉ
12. Japi riká aní Santiago 4:13, 14, ¿piri ta ke machí?
12 (Leeri Santiago 4:13, 14). Tamujé ko ke machí piri ta ikiboa baʼalínala rawé, “jiti sinéami karú ikí isini kaachi alí ke wesi machí chu kabú echi ikimea” (Ecl. 9:11). Echi jitra ke ti omeri machiyá achi ti oméripo nokayá japi ta nátili o achi ta bijí pirélipo jiti ta nokiboa echi namuti.
13. ¿Chúsiá we jilí nímiré tamujé jitra ke machiyá japi ikimea baʼalínala rawé?
13 Ke machiyá japi ikimea baʼalínala rawé, a we jilí nímiré tamujé jitra. ¿Chúsiá? Jiti a keʼré japi ma ke kaníliami nipo natia bi eenia echi namuti japi ikiméaré. Ayénachó echi namuti japi chuwétali ikí o japalí ta karúa ikisaa, isímiré japi ta risoa nílipo o ke machiyá nílipo japi ta nokiboa. O ke ikisáaká echi namuti japi ta nátili japi ikimea, a keʼré japi ta siwea nílipo (Prov. 13:12).
14. ¿Piri ta ke newalé machiyá jiti kaníliami nipo, alí piri ta nokisáré? (Ayénachó iné echi fotos).
14 Japalí ti anacha chuwé namuti jilírami, ata néwariwéliti japi ta nijewi Jeobá jiti ta we galé echi. Echoná Biblia ati iné jaré ejemplos japi néwariwéliti japi ta ke buwésaré japi Jeobá tamó tibuma suwaba echi namuti chati jitra alí japi ke oserúa uchali japi ta ikiboa pe aminana. Jeobá ko machí japi tamujé ko ke newalé machiyá ibili namuti japi ta ikiboa pe aminana jiti kaníliami nipo, nalí japi ta echi iʼwírili tánipo alí nijéwipo (Jer. 10:23). Japalí ta sinibí iʼwírili tani Jeobá japalí ta nokiboa bilé namuti, echi ko ju japi riká ko aniyá: “Riosi echirigá nakisáagá, tamujeta ayena abijí pirélabo baʼalí rawé. Aʼlí [...] jeʼná jerigá olabo, auché jaré karúmati olábiré omá” (Sant. 4:15).
Japi wabé aʼlá ju tamujé jitra, echi ko ju iʼwírili tania Jeobá alí nijewia japi echi tamó ané. (Iné echi párrafos 14 alí 15).b
15. ¿Piri ta a machí japi ikimea pe aminana?
15 Tákoré ti ke machí piri ikimea baʼalínala rawé, ati machí japi Jeobá ko anili japi ta sinibí pirélipo pe aminana jenaʼí Wichimóbachi o jaré echomí ripá rewegachi. Ata machí japi Jeobá ko ke ikaleka raʼicha alí japi ke nirú bilé namuti japi chéwima japi Jeobá isima japi echi anili (Tito 1:2). Jeobá bi ju japi omeri jériká aniyá: “Nijé ju japi ni aní ne chokichí jonsa japi ikimea, alí ni aní ma chabé jonsa japi kecho ikísimi”. Suwaba namuti japi Jeobá anili chabé, ma ikili alí jarecho aminabi ikísima (Is. 46:10). Ati we bichiwi japi ke bilé namuti isima japi Jeobá riwema tamó galea (Rom. 8:35-39). Echi ko tamó iʼwírima jiti we machíami nipo, tamó ku kanílitima alí tamó jiwérili iyama jiti oméripo anachia chuwé namuti jilírami. Ati we bichiwi japi echi ko tamó iʼwírima alí tamó iyama wiká namuti aʼláala (Jer. 17:7, 8).
KE TI OMERI AʼLÁ INAMIA JAPI JEOBÁ WE AʼLÁ TAMÓ MACHÍ
16. ¿Piri machí Jeobá tamujé jitra, alí chumi inili machiyá jepuná? (Salmo 139:1-6).
16 (Leeri Salmo 139:1-6). Jiti Jeobá tamó niwali, echi ko we aʼlá tamó machí. Japi riká, echi ko machí japi ta nata alí japi ta inili. Machí japi ta aní alí chúsiá echi riká ti aní. Ayénachó machí japi ta noká alí chúsiá ti noká echi namuti. Echi silíami David ko anili japi Jeobá sinibí tamó tibú alí iʼwiri. ¿Chumi inili machiyá japi echi Onorúami Suwaba Omériami, japi Walubéala ju alí japi niwali suwaba namuti, we mi natéami niraa iné? Ke mi inamia níliré japi riká David japi anili: “Jepuná namuti ke ni omeri aʼlá inamia. Wabé ripá wilíami ju alí ke ni omeri seaya” (Salmo 139:6).
17. ¿Chúsiá ti we jilí niráboré natia japi Jeobá we aʼlá tamó machí?
17 A keʼré japi echi namuti japi ta bichíyami nili, japi riká ti wéelitami nili o japoná ti ochérili, isima japi ta jilí nirabo inea Jeobá japi riká bilé onó we galéami alí japi we tamó natéami niraa iné. O a keʼré japi ta we omona nílipo echi chati namuti jitra japi ta nokali chabé alí natabo japi Jeobá ke tamó machinali alí we miká atí tamujé yúa. David echi riká cho inílili isini kaachi (Sal. 38:18, 21). O a keʼré japi bilé iʼwérili isimí riwea bilé chati namuti japi riká ju binoy, nalí we jilí niraa riwea, jiti la echi ko nárika isímiré: “Onorúami we aʼlá tamí machiyáaká, ¿chúsiá tamí ané japi ni riwema echi namuti japi ni we jilí niraa riwea?”.
18. ¿Chúsiá ti iʼwérili nokisáré bichiwia japi Jeobá wabé aʼlá tamó machí tamujé aboi yúa? (Ayénachó iné echi imágenes).
18 Ata iʼwérili nokisáré bichiwia japi Jeobá wabé aʼlá tamó machí tamujé aboi yúa alí iné echi aʼláala namuti japi ta iyiri ju tákoré tamujé aboi ke ritiwá. Echi ko iné echi namuti japi ta ke aʼlá noká, nalí ayénachó aʼlá inami chuti inili alí chúsiá ti echi riká inili, alí machí japi ta noká alí chúsiá ti echi riká noká, alí ariká we tamó galé (Rom. 7:15). Japalí ti aʼlá inami japi Jeobá we aʼlá machí japi ta oméripo aʼlá nokayá, jepuná tamó iʼwérili iyá jiti ta ke riwepo echi nijewia alí we kanílika nóchilia.
Tákoré ti ke machí wiká namuti, japi ta a machí ko ju japi Jeobá anili japi ta we kanílika pirélipo, alí echi tamó iʼwérili iyá anachamia echi jilírami namuti. (Iné echi párrafos 18 alí 19).c
19. ¿Piri ta a machí Jeobá jitra?
19 Ata we aʼlá machí alí bichiwi japi Jeobá ko wabé galéami ju (1 Juan 4:8). Ati machí japi echi nulalíwami japi echi tamó iyá, néwariwéliti japi we tamó galé alí nakí japi ta kanila pirélipo. Ayénachó ti machí japi echi ko nakí japi ta sinibí pirélipo, jiti la nijili binoy Nolá Jesús. Jiti echi riká isili, ati bichiwi japi oméripo kanílitia Jeobá tákoré ti ke sébali aʼlá nokáami ju (Rom. 7:24, 25). Alí ti machí japi “Onorúami walúala ju tamujé sulala yúa alí suwaba machí” (1 Juan 3:19, 20, TNM). Jeobá ko we aʼlá tamó machí alí echi ko bichiwi japi ta a oméripo nokayá japi echi nakí.
20. ¿Piri tamó iʼwírima ke we natia echi namuti japi ta ke machí?
20 Japi riká ti ma bineli, Jeobá ko tamó ané echi namuti japi ta newalé machiyá. Machiyá jepuná tamó iʼwiri ke we natia echi namuti japi ta ke machí, nalí natia echi namuti japi a natéami ju. Echi riká ti néwariwéliti japi ta we bichiwi Jeobá, echi japi wabé machíami ju tamujé yúa (Job 36:4). Tákoré jipi ko nirú wiká namuti japi ta ke machí, ati we kanili machiyá japi pe aminana ke ti riwepo binea wiká namuti Jeobá jitra ne sinibisi (Ecl. 3:11).
CANCIÓN sjj 104 Jeobá ko nijí espíritu santo
a Jesús ju japi bachá inárima nikosia Satanás yúa alí japi echi iʼwiri. Jiti la a keʼré japi jipi echi ko ma machí chu kabú chotásima echi Armagedón alí chu kabú ma kárika niyúrima echi sayérala (Apoc. 6:2; 19:11-16).
b JAPI RUYÉ JAPI MACHINA ECHONÁ FOTOS: Bilé onolá alí echi ranala jariwé namuti echoná mochila japi newalema japalí karúa ikisaa.
c JAPI RUYÉ JAPI MACHINA ECHONÁ IMÁGENES: Bilé hermano japi ikí namuti we jilírami, natia atí japi we kanila bitélima echoná Wichimóbachi we baʼóachi.