We kanila alí iʼwérili nokiboa nawesia japi riká isili Jesús

1. ¿Piri namuti isimí japi echi testigo Jeobá sinúrika nima jarecho religiones yúa?

ECHI testigo Jeobá machirúami ju japi riká we jiwérika nokáami nawesia alí kanila niraa. Jepuná isimí japi we sinúrika nima jarecho religiones yúa japi aní japi cristianos ju (Tito 2:14, TNM). Tákoré echi riká ju, isini kaachi ke ti kaníliporé o ke ti iníliporé simánalia nawisamia. A keʼré japi ta inílipo japi riká bilé anciano we nóchami japi anili: “Isini kaachi ko ke ni inili siminalia nawisamia”.

2. ¿Chúsiá isini kaachi jilí ju kanila nawesia?

² A keʼré japi ta wabé kanili nokayá jarecho nóchali nawesia yúa. ¿Chúsiá? Jiti japalí ti niwá salones, iʼwiri japalí cha ikisaa o iʼwérili iyá jarecho hermanos, ati sapú iné echi namuti japi ta nokali, jiti la ti we kanili. Alí japalí ti nocha echi hermanos yúa ata we kanili alí ti galé anakupi niraa, ayénachó ta machí japi jarecho we natéami niraa iné echi nóchali japi ta noká. Nalí ke ti kaníliporé japalí ti ma wiká bamíali olá nawesia biléana alí kuabi ju echi pagótami japi a kipú, o jaré ko naʼawi tamujé yúa japalí ta nawesa. Alí ti machí japi aminabi mulipi nílisiachi echi Jeobá rawéwala, echi pagótami aminabi tamó sayérima (Mat. 10:22). ¿Piri tamó iʼwírima jiti ta ke riwepo nawesia o jiti iʼwérili nokiboa aminabi nawesia?

3. ¿Piri tamó bineri Lucas 13:6-9 Jesús jitra?

³ Binea japi riká isili Jesús, tamó iʼwírima iʼwérili nokayá nawesia alí we kanila. Japalí jenaʼí Wichimóbachi biteili, echi ko iʼwérili isili nawesia, alí japalí ma sunima riweili nawesia aminabi echi riká isili (leeri Lucas 13:6-9). Jesús anili japi binoy ko ju japi riká bilé rijoi japi bikiá bamíali tibuli bilé chuná, nalí echi chuná ko ke siné rakeli. Echi riká cho, echi ko bikiá bamíali iyénili nawesia echi judíos, nalí pe kuabi echi discípulowala nílili. Nalí be, japi riká echi rijoi isili wiká namuti jiti echi chuná rakema, echi riká cho Jesús ke siweli nalí iʼwérili isili nawesia.

4. ¿Chu iyiri ju echi naó namuti japi ta binepo japi riká isili Jesús?

⁴ Jepuná binelíwami raʼichabo chúriká Jesús néwariwélitili japi iʼwérili isili nawesia echi jubá usani michá japalí biteili jenaʼí Wichimóbachi (Luc. 10:1, TNM). Alí binepo naó namuti japi chúriká ti omeri nokayá japi riká Jesús isili: 1) echi ko we natéami niraa ineli isiá japi Jeobá nakí, 2) we natéami niraa ineli echi profecías, 3) bichíwili japi Jeobá echi iʼwírima alí 4) sinibí nátili japi a nirúlima pagótami japi kipuma.

WE NATÉAMI NIRAA INELI ISIÁ JAPI JEOBÁ NAKÍ

5. ¿Chúriká néwariwélitili Jesús japi we natéami niraa ineli isiá japi Jeobá nakí?

⁵ Jesús ko we natéami niraa ineli nawesia “echi aʼláala raʼíchali Onorúami Gobiérnowala jitra”, jiti machiyé japi Onorúami nakiyé japi echi riká isima (Luc. 4:43, TNM). Nawesia wabé natéami nili echi jitra. Alí echi upáwala jaré michá japalí iyénili nawesia, echi ko simili nawisasia echoná ibili ciudades alí ayénachó japoná rijowi (Luc. 13:22). Ayénachó binérili jarecho jiti simama nawisasia japi riká echi (Luc. 10:1, TNM).

6. Echi nóchali japi ta noká, ¿chúriká iʼwiri jiti aminabi nawisárami nima? (Ayénachó iné echi foto).

⁶ Jipi rawé nawesia echi raʼíchali aʼláala ko ju echi nóchali wabé natéami japi Jeobá alí Jesús nakí japi ta nokiboa (Mat. 24:14; 28:19, 20). Suwaba echi nóchali japi ta noká nóchilia Jeobá, iʼwiri jiti aminabi nawisárami nima. Japi riká, ati niwá salones jiti echi pagótami japi ta nawesi simama binesia Jeobá jitra echoná. Alí echi nóchali japi nokiwá echoná Betel alí jaréanachó, ayénachó iʼwiri jiti aminabi nawisárami nima. Alí japalí ta iʼwiri japalí cha ikisaa, ke ti bi iʼwiri echi hermanos iyayá japi newalé, nalí ayénachó ti iʼwiri jiti checho ku omérima nóchilia Jeobá japi riká nawesia. Sinibí newalabo japi nawesia ko ju echi nóchali wabé natéami japi Jeobá nakí japi ta nokiboa. Ati echi riká natásaká, ati aminabi iʼwérili nokiboa nawesia. Bilé anciano Hungría bitéami János riwéami jéaní: “Sinibí ni nata japi nawesia echi ju echi nóchali wabé natéami japi ni olá jarecho nóchali yúa”.

7. ¿Chúsiá Jeobá nakí japi ta aminabi nawisabo? (1 Timoteo 2:3, 4).

⁷ Bilé namuti japi tamó iʼwírima aminabi iʼwérili nokayá nawesia ko ju, inea echi pagótami japi riká Jeobá iné. Echi ko nakí japi wiká pagótami kipuma echi aʼláala raʼíchali alí nokimea japi riká biné (leeri 1 Timoteo 2:3, 4, TNM). Jiti jepuná raʼíchali aʼláala iʼwiri japi echi pagótami niyúbima, Jeobá ko tamó iʼwiri jiti ke jilí nirabo nawesia. Japi riká, tamó iyali echi folleto Galebo echi pagótami japi we aʼlá tamó iʼwiri chotasia raʼichia echi pagótami yúa, alí jiti echi riká pe aminana chotásima binea echi Biblia alí Jesús discípulowala nima. Tákoré jipi ko ke binénali, a keʼré japi pe aminana binema kecho suníachi gran tribulación. Echi namuti japi ta ané jipi, a keʼré japi pe aminana newalama alí chotásinalima nijewia Jeobá. Jiti la, we natéami ju japi ta aminabi nawisabo.

WE NATÉAMI NIRAA INELI ECHI PROFECÍAS

8. ¿Chúriká iʼwírili Jesús machiyá echi profecías?

⁸ Jesús ko machili chúriká ikimea echi profecías japi anili echi Biblia, jiti la machili japi echi ko nawisama bikiá bamíali aminá nasipa (Dan. 9:26, 27). Alí jiti ma oserúa chukuli echoná Biblia, echi ko machili japi chúriká miʼlirúami nima alí chu kabú (Luc. 18:31-34). Machiyá echi profecías, iʼwírili Jesús jiti aminabi iʼwérili isima we kanila nawesia japi Onorúami nuleli.

9. ¿Chúriká tamó iʼwiri binea echi profecías?

⁹ Machiyá echi profecías tamó iʼwírima jiti aminabi iʼwérili nokiboa nawesia. Tamujé ko machí japi ma mulipi suwábitami nima echi chati namuti. Ayénachó ti iné echi namuti japi ikísimi alí japi chúriká nokáami ju echi pagótami. Echi jitra ati machí japi echi riká ikísimi japi riká anili echi Biblia japi ikimea riweili jipi jubáami rawé. Alí ati machí japi chúriká nokimea anakupi sayeria echalí jubáami rawé echi silíami sur nuláami (japi ju Reino Unido alí Estados Unidos) echi silíami norte nuláami yúa (japi ju Rusia alí echi iʼwíriami) (Dan. 11:40). Ayénachó ati machí japi echi profecías japi ruyé Daniel 2:43-45 japi raʼicha bilé waʼlú estatua ronola jitra, ruyá aní Reino Unido alí Estados Unidos. Binea echi profecías Bíbliachi uchúwami, tamó iʼwírima aminabi bichiwia japi echi Onorúami Gobiérnowala suwábima echi gobiernos jenaʼí Wichimóbachi nirúami. Suwaba jepuná profecías tamó iʼwiri machiyá japi ma mulipi suwábitami nima echi chati namuti alí tamó iʼwiri jiti aminabi iʼwérili nokiboa nawesia.

10. ¿Chúriká ayénachó tamó iʼwiri echi profecías Bíbliachi uchúwami jiti aminabi iʼwérili nokiboa nawesia?

¹⁰ Echi profecías tamó iʼwiri jiti aminabi iʼwérili nokiboa nawesia. Bilé hermana Carrie riwéami japi bité echomí República Dominicana, jéaní: “Japalí ni nata echi namuti aʼláala jitra japi Jeobá tamó iyama pe aminana, ani inili japi ni jarecho ruyésaré. Alí japalí ni iné echi karú ikiwáami japi ikí echi pagótami, ani nata japi Jeobá ke bi tamí ané japi tamí iyama echi namuti aʼláala, nalí ayénachó echi pagótami”. Echi profecías tamó newalari japi Jeobá tamó iʼwiri nokayá jepuná nóchali, alí jepuná ko tamó iʼwérili iyá jiti aminabi iʼwérili nokiboa nawesia. Bilé hermana Leila riwéami Hungría bitéami jéaní: “Isaías 11:6-9 tamí bineri japi Jeobá ko omeri iʼwiria chuwé pagótami jiti riwema cha isiá. Alí echi tamí iʼwérili iyá jiti ni nawésima sinéami pagótami tákoré ni nata japi ke tamí kipuma”. Alí bilé hermano Zambia bitéami Christopher riwéami, jéaní: “Marcos 13:10 aní japi echi raʼíchali aʼláala nawisárami nima omáana Wichimóbachi alí nijé ko we natéami niraa iné iʼwiria jiti ikimea jepuná profecía”. ¿Alí mujé ru? ¿Chu iyiri profecías mi iʼwiri jiti mi aminabi iʼwérili isima nawesia?

BICHÍWILI JAPI JEOBÁ ECHI IʼWÍRIMA

11. ¿Chúsiá Jesús newaleli bichiwia Jeobá aminabi kanila nawisamia? (Lucas 12:49, 53).

¹¹ Jesús ko bichíwili japi Jeobá echi iʼwírima jiti aminabi kanila nawisama. Tákoré Jesús riwíwili echi pagótami japi nawesie, echi ko machiyé japi echi raʼíchali aʼláala isima japi echi pagótami naʼáwima alí sayérima echi (leeri Lucas 12:49, 53, TNM). Ayénachó echi tiyópachi binériami we kichili Jesús echi namuti jitra japi nawesie, jiti la wisabé niraa miʼlinalie (Juan 8:59; 10:31, 39). Tákoré echi riká nokali, Jesús ko ke riweli nawesia jiti echi ko machili japi Jeobá echi iʼwírima. Echi ko anili: “Nijé ko ke bineli atí, nalí nijé Onolá japi tamí júali tamí yúa atí” (Juan 8:16, TNM). Ayénachó anili: “Ketasi tamí biʼneli ariweli, mapujiti Nijeni sinibí olá mapurigá Binói nakí” (Juan 8:29).

12. ¿Chúriká iʼwírili Jesús echi discípulos jiti aminabi nawisama japalí sayéritami nisa?

¹² Jesús ko newalárili echi discípulos japi a omérima bichiwia japi Jeobá echi iʼwírima. Japi riká echi ko machili japi najátarami nima riweili, echi ko wisabé niraa aneli japi Jeobá sinibí echi iʼwírima (Mat. 10:18-20; Luc. 12:11, 12). Aneli japi aʼlá tibuka o sayeka nokimea (Mat. 10:16; Luc. 10:3). Ayénachó aneli japi echi pagótami ke kipúnalaká echi raʼíchali aʼláala, ke iʼwérili anésaré (Luc. 10:10, 11). Alí ruyeli japi najátarami nísaká, miná júmisima (Mat. 10:23). Tákoré Jesús bichíwili Jeobá alí we inílili nawisánilia, echi ko ke simili japoná cha ikimea (Juan 11:53, 54).

13. ¿Chúsiá ta bichíwisaré japi Jeobá tamó iʼwírima?

¹³ Jipi rawé tamujé ayénachó sayéritami ju, jiti la ti newalé japi Jeobá tamó iʼwírima kanila nawesia (Apoc. 12:17). ¿Alí chúsiá ta bichiwi japi Jeobá tamó iʼwírima ibili niraa? Jiti echoná Juan capítulo 17 Jesús ko aneli Jeobá japi tibuma echi najátowala, alí Jeobá ko a kipuli. Echi libro de Hechos ruyé chúriká Jeobá iʼwírili echi apóstoles jiti aminabi kanílika nawisama tákoré sayéritami nili. Jesús ayénachó tánili Jeobá japi tibuma echi japi a bichíwima japi nawésili echi apóstoles. Alí echi ayénachó tamujé ibili niraa ruyá aní. Jiti la ti bichíwisaré japi Jeobá aminabi tamó tibuma jiti Jesús ma echi riká tánili Jeobá. Jeobá ko tamó iʼwírima japi riká iʼwírili echi apóstoles (Juan 17:11, 15, 20).

14. ¿Chúsiá ti bichíwisaré japi ke riwepo kanílika nawesia tákoré ikí namuti jilírami? (Ayénachó iné echi foto).

¹⁴ Japalí aminabi mulipi nílisimi echi jubá rawé, a keʼré japi we jilí nima kanílika nawesia. Nalí Jesús ko anili japi sinibí tamó iʼwírima japalí ta newalesa (Luc. 21:12-15). Japi riká nokali Jesús alí echi discípulos, tamujé ayénachó riwé japi echi pagótami aboi natama achi kipuma o ke, alí ke ti naʼawi echi yúa. Echoná países japoná ke riwéliwa japi nawisama, echi hermanos ko aminabi nawesa echi aʼláala raʼíchali, echi riká noká jiti echi ko we bichiwi Jeobá alí ke ko aboi niraa. Echalí bachá siglo Jeobá iyali jiwérili japi echi nijéwami nili jiti “sébali nawésama echi galabé Riosi Raʼíchala”, jipi rawé ayénachó tamó iyá jiwérali jiti nawisabo japalí chéami echi aní (2 Tim. 4:17). Sinibí newalabo japi ta bichíwisaká Jeobá, ke ti siné riwepo kanila nawesia.

SINIBÍ NÁTILI JAPI A NIRÚLIMA PAGÓTAMI JAPI KIPUMA

15. ¿Piri néwariwéliti japi Jesús ko sinibí nátili japi nirúlima pagótami japi a kipúnilima?

¹⁵ Jesús ko sinibí nátili japi nirúlima pagótami japi a kipuma echi raʼíchali aʼláala, alí echi riká natia iʼwírili jiti iʼwérili isima nawesia alí we kanílika. Ma suníachi echi bamíali 30 d.C. Jesús ko ineli japi niruili wiká pagótami japi a kipúnali, jiti la echi ko anili japi ju japi riká biléana ichirúami japi ma aʼlá ju japi ʼwima (Juan 4:35). Miná ko japalí ma sojí bilé bamíali simírili, Jesús ko aneli echi discípulos: “Echi ʼwíwachi ko wiká ju” (Mat. 9:37, 38, TNM). Miná ko checho jériká aneli: “Echi ʼwíwachi ko wiká ju [...]. Jiti bela tánisi echi Níwami echi ʼwíwachi jiti julama jarecho nóchami jiti nikúurima ʼwía” (Luc. 10:2, TNM). Jesús ko sinibí nátili japi nirúlima wiká pagótami japi a kipúnilima echi raʼíchali aʼláala, alí japalí jaré a kipúe echi ko we kanilie (Luc. 10:21).

16. ¿Chu iyiri ejemplos néeli Jesús binérimia echi discípulos jiti aʼlá niraa inema japi nawésili? (Lucas 13:18-21; ayénachó iné echi foto).

¹⁶ Jesús ko binérili echi discípulos jiti aʼlá niraa inema japi nawésili, jepuná iʼwírima riweili we jiwérika nokayá nawesia alí we kanila. Ma inepo okuá ejemplos japi ruyeli (leeri Lucas 13:18-21, TNM). Echi ko anili japi echi aʼláala raʼíchali ju japi riká bilé mostaza rakala japi waʼlú ocheri japi riká bilé rojá. Jepuná jitra echi ko ruyá anili japi wiká pagótami kipuma echi raʼíchali aʼláala alí japi ke bilé chéwima japi echi riká ikimea. Ayénachó anili japi echi aʼláala raʼíchali ju japi riká levadura. Jepuná jitra echi ko ruyá anili japi echi aʼláala raʼíchali nawisárami nima omáana Wichimóbachi alí iʼwírima echi pagótami jiti riwema cha nokayá tákoré ke sapú newaré japi aʼlá nokísimi. Echi ejemplos jitra Jesús ko iʼwírili machiyá echi discípulos japi echi raʼíchali aʼláala iʼwírima wiká pagótami.

17. ¿Chúsiá ti iʼwérili nokisáré nawesia alí we kanila?

¹⁷ Japi tamó iʼwírima aminabi iʼwérili nokayá nawesia alí we kanílika ko ju, inea chúriká echi raʼíchali aʼláala iʼwírisimi wiká pagótami. Sinibí bamíali millones pagótami japi aminabi machinali, simía echoná Conmemoración alí biné echi Biblia tamujé yúa. Alí wiká miles ju japi chotásimi nawesia tamujé yúa alí pakó. ¿Chu kipu pagótami nirúiré japi a bijí machinali echi raʼíchali aʼláala? Ke ti machí. Nalí japi ta a machí ko ju, japi Jeobá ko napabúsimi wiká pagótami japi niyúbitami nima echoná gran tribulación japi ma mulipi chotásima (Apoc. 7:9, 14). Jeobá, japi níwala ju echi ʼwíwachi, a machí japi chu kipu pagótami a bijí kipuma, jiti bela ke ti siwésaré nawesia.

18. ¿Piri ta nakí japi inema echi pagótami?

¹⁸ Echi ne bichíwali Jesús discípulowala sinibí nawesa echi raʼíchali aʼláala. Japalí echi pagótami ineli japi echi apóstoles ke majaka nawésili alí we kanílika, echi ko machili japi “chabénala echi Jesusi yuwa ʼyénami níili” (Hech. 4:13). Tamujé ayénachó nakí japi echi pagótami inema japi ta iʼwérili noká nawesia alí we kanílika japi riká isili Jesús.