Ke riwepo eenia echi jitra japi ta bichiwi

1. ¿Chúsiá Pablo we kanilie natia echi namuti japi isili?

ECHI apóstol Pablo machiyé japi ma mulipi miʼlirúami nima. Nalí japalí natie suwaba echi namuti japi isili, echi ko we kanilie. ¿Chúsiá? Echi ko anili: “Mani ne sébali suwaba sunili [...] mapurigá bilé ʼmáami ma galá suní. Ne sinibí nijeni galá bichíili Riosi” (2 Tim. 4:6-8). Japalí jonsa cristiano nílili, Pablo ko aʼlá nátika isili, jiti la machili japi Jeobá we kanílili echi yúa. Japi riká Pablo, tamujé ayénachó aʼlá nátika nokinali alí ti kanílitinali Jeobá. Nalí, ¿chúriká ti omeri nokayá?

2. ¿Piri ruyá aní iyenia “echi jitra japi ta bichiwi”?

² Raʼichia echi binoy jitra alí jarecho cristianos, Pablo ko jéanili: “[Ati] eena echi jitra japi ta bichiwi, ke ko echi jitra japi ta iné” (2 Cor. 5:7, TNM). ¿Piri ruyá anili? Isini kaachi japalí echi Biblia aní japi bilé pagótami iyena, ke ruyá aní japi chúriká simí, nalí japi echi isiá bité. Japalí aniwá japi bilé pagótami iyena echi jitra japi iné, echi ko ruyá aní japi isimí namuti natasa bi echi jitra japi iné, kipú alí inili. Nalí japalí aniwá japi bilé ko iyena echi jitra japi bichiwi, echi ko ruyá aní japi kecho bijí isiá bilé namuti, bachá nata japi Jeobá nakí. Echi namuti japi isimí néwariwéliti japi bichiwi japi Onorúami echi iʼwírima alí japi nijewia japi Jeobá nulá wabé aʼlá ju echi jitra (Sal. 119:66; Heb. 11:6).

3. ¿Chúriká tamó iʼwiri eenia echi jitra japi ta bichiwi? (2 Corintios 4:18).

³ A bichíwali ju japi isini kaachi tamujé ko noká namuti nátika echi jitra japi ta iné, kipú alí inili. Nalí be, ati nokisáaká bilé namuti nátika bi echi bikiá namuti, a keʼré japi ta ke aʼlá ikiboa. ¿Chúsiá? Jiti echi namuti japi ta iné, kipú alí inili, ke sinibí bichíwali ju. Ayénachó ata echi bi nátika nokisáaká bilé namuti, a keʼré japi ke nokiboa japi Jeobá nakí o ke nijéwipo echi busuréliami japi echi nijí (Ecl. 11:9; Mat. 24:37-39). Nalí, ati éenisaká echi jitra japi ta bichiwi, a keʼré aʼlá namuti nokiboa japi “a galé echi Walubéala” (Efes. 5:10, TNM). Nijewia echi busuréliami japi Onorúami aní, tamó iʼwírima kilí nilia alí kanilia (Sal. 16:8, 9; Is. 48:17, 18). Alí, ke ti riwésaká eena echi jitra japi ta bichiwi, ati sinibí pirélipo (leeri 2 Corintios 4:18).

4. ¿Chúriká ti machiboa achi ta eena echi jitra japi ta bichiwi o japi ta iné?

⁴ ¿Chúriká ti machiboa achi ta eena echi jitra japi ta bichiwi o japi ta iné? Nárika nokiboa jepuná: “Japalí ni isima bilé namuti, ¿piri ni bachá nata? ¿Achi ni nata bi echi namuti japi ni iné o ani bichiwi Jeobá alí japi echi nulá?”. Jenaʼí binelíwami binepo bikiá namuti japoná ti néwariwélitipo achi ti bichíyami ju: japalí ti nata chu iyiri nóchali narepo, japalí ti nata jépuká yúa niwipo alí japalí echi organización tamó ané japi nokiboa. Japalí ti biné ibili echi namuti, natabo piri ti omeri nokayá jiti aʼlá nátika nokiboa.

JAPALÍ TI NATA CHU IYIRI NÓCHALI NAREPO

5. Japalí ti narepo bilé nóchali, ¿achi ti natásaré bi chu kipu winomí mebo?

⁵ Ke chati ju japi ta nochánilipo olamia japi ta newalé alí iyamia tamujé téemala japi newalé (Ecl. 7:12; 1 Tim. 5:8). Jaréana nóchali ko wiká pe natétiwa, jiti la a sibari ralayá japi newalé alí ayénachó jaré jariweka muchuwa. Alí jaréana nóchali a keʼré kuabi natétiwa japi jitra ralimea bi japi newalé. Jiti la, japalí ti nata achi ti narepo bilé nóchali, aʼlá ju japi ta natabo chu kipu winomí mebo. We be nalí, bilé pagótami natásaká echi namuti bi, echi ko iyénima echi jitra japi iné.

6. ¿Chúriká ti néwariwéliti japi ta eena echi jitra japi ta bichiwi japalí ti nata achi ti narepo bilé nóchali? (Hebreos 13:5).

⁶ Ata éenisaká echi jitra japi ta bichiwi, ayénachó natabo achi echi nóchali isima japi ta riwepo Jeobá amígowala niya. Nárika nokiboa: “Echoná nóchali, ¿achi tamí anema japi ni isima namuti japi Jeobá kichí? ¿Achi ni ikírima simiyá napawíliwachi, nawesia alí binea echi Biblia? ¿Achi ni ikírima napawika asiyá nijé téemala yúa?” (Prov. 6:16-19; Filip. 1:10, TNM). Ami nátiaká japi ikimea bilé jepuná namuti, wabé aʼlá nima japi mi ke narema echi nóchali tákoré jilí ju aaya bilecho nóchali. Japi riká ta eena echi jitra japi ta bichiwi, echi namuti japi ta nokiboa néwariwélitima japi ta we bichiwi japi Jeobá tamó iyama japi ta newalé (Mat. 6:33, TNM; leeri Hebreos 13:5).

7, 8. ¿Chúriká néwariwélitili bilé hermano Sudamérica bitéami japi iyena echi jitra japi bichiwi? (Ayénachó iné echi foto).

⁷ Bilé hermano Sudamérica bitéami Javier riwéami,a we natéami niraa ineli iyenia echi jitra japi bichiwi. Echi ko jéaní: “Echoná empresa japoná ni nochie aa járili bilé nóchami jiti nochama japoná wabé wikabé natétima echi yúa japi ikí tamí natetie, jiti la nijé ko aniki japi ni nochama echoná jiti ni nátiki japi echi riká ni we kaníliami nima”. Nalí Javier ayénachó we inilie precursor nínalia. Echi ko aní: “Tamí aneri japi echi walúala tamí yúa raʼichama. Jiti la kecho bijí tamí yúa raʼíchiachi, ani bachá raʼíchiki Jeobá yúa alí ni iʼwírili tániki jiti ni bichiwie japi echi ko aʼlá machí piri wabé aʼlá ju tamí jitra. Nijé ko olánalie bilecho nóchali japi wabé aʼlá nima, nalí ke ni narénalie bilé nóchali japi isima japi ni ke ikírima nóchilia Jeobá”.

⁸ Javier jéaní: “Japalí echi walúala tamí yúa raʼíchiki, echi ko tamí aneki japi ni wisabé niraa wiká horas nochama riweili. Nalí nijé ko we simárika aneki japi ni ke omérima jiti ni simisáré napawíliwachi, nawisasia alí isiá jarecho namuti”. Javier ko ke nareli echi nóchali alí ma okuá tarali simírisa precursor nílili. Alí ma jaré michá simírisa, riwali bilé nóchali japoná ke wiká horas nochama. Echi ko jéaní: “Jeobá tamí kipuli alí tamí iyali bilé nóchali japoná ni ke wiká horas nochama jiti ni omérima precursor niya. We ni kanili echi nóchali jitra jiti ni a ikiri aminabi nóchilia Jeobá alí iʼwiria echi hermanos”.

9. ¿Piri mi biné echi jitra japi isili Trésor?

⁹ ¿Piri ta nokiboa ati machisáaká japi echi nóchali japi ta olá isimí japi ta ke ikíripo eenia echi jitra japi ta bichiwi? Inepo japi isili Trésor, bilé hermano Congo bitéami. Echi ko aní: “Ani olali echi nóchali japi ni nakiyé. Ani bisiá niraa simírikami mei winomí echi yúa japi ni meli bachá alí echi pagótami we tamí riwiwie”. Nalí Trésor wisabé niraa ke simiyé napawíliwachi jiti wiká horas nochasa riweili. Ayénachó iʼwérili anelie japi ikaleka raʼichama jiti jarecho ke machimea echi ke aʼlá namuti japi nokayé echoná empresa. Echi ko riwénalie echi nóchali, nalí majaa nilie natia japi ke riwimea bilecho nóchali. ¿Piri iʼwírili? Trésor ko aní: “Japi aní Habacuc 3:17-19 tamí iʼwírili inamia japi Jeobá tamí tibuma tákoré ni riwesa echi nóchali”. Ayénachó aní: “Wiká patrones nata japi we aʼlá natétisaká, echi pagótami nokimea chuwé namuti alí we nochama, tákoré echi isima japi ke ikírima napawika simaria echi téemala yúa alí nóchilia Jeobá. Ani we kanili jiti ni ke riweli Jeobá amígowala niya alí iʼwiria nijé téemala. Bilé bamíali simírisa Jeobá tamí iʼwírili jiti ni riwimea bilé nóchali japoná ni mema japi ni jitra ralimea japi ni newalé alí aminabi we ikírimia nóchilia echi. Japalí ti bachá noká japi Jeobá nakí, a keʼré japi ta isini kaachi kuabi winomí olabo, nalí Jeobá ko sinibí tamó tibuma”. Ati bichíwisaká echi busuréliami japi Jeobá aní alí echi namuti japi isima, ke ti riwepo eenia echi jitra japi ta bichiwi alí Jeobá tamó iyama wiká namuti aʼláala.

JAPALÍ TI NATA JÉPUKÁ YÚA NIWIPO

10. Japalí bilé nata jépuká yúa niwima, ¿chúriká néwariwélitima japi iyena echi jitra japi iné?

¹⁰ Jeobá niwali echi niwíkami, jiti la ke chati ju japi ta niwínilipo. Japalí bilé hermana niwínali, a keʼré japi inema chúriká ju echi hermano, chúriká isimí echi yúa, achi baʼóami ju, piri aní jarecho echi jitra, chúriká nee echi winomí alí achi iʼwiri echi téemala.b Tákoré jepuná namuti we natéami ju, echi hermana inésaká bi echi namuti, a keʼré japi iyénima echi jitra japi iné.

11. Japalí ta nata jépuká yúa niwipo, ¿chúriká ti néwariwéliti japi ta eena echi jitra japi ta bichiwi? (1 Corintios 7:39).

¹¹ Jeobá ko we kanili echi hermanos alí hermanas yúa, japi iʼwérili noká nijewia echi busuréliami japi echi aní, japalí nata jépuká yúa niwima. Bilé echi busuréliami ko ju, japi buwésaré ma aʼlá nátami nimia alí wiká pe bamíbami nimia, jiti olama novio o novia ma (1 Cor. 7:36, TNM). Bilecho ko ju japi inésaré achi echi pagótami japi yúa niwínali, olá echi cualidades japi Jeobá aní japi olásaré echi kunala o upila ma (Prov. 31:10-13, 26-28; Efes. 5:33; 1 Tim. 5:8). Alí bilé japi ke Testigo ju korúaká bilé hermana o hermano, echi ko nijéwisaré echi busuréliami japi aní japi niwísaré bilé yúa japi nijewi japi aní echi Biblia alí japi ma pakótami ju, japi riká aní 1 Corintios 7:39 (leeri). Jepuná hermanos alí hermanas ke riwé eena echi jitra japi bichiwi, jiti we aʼlá machí japi Jeobá echi iʼwírima kilí nilia alí we kanilia (Sal. 55:22).

12. ¿Piri mi biné Rosa jitra?

¹² Inepo japi ikili Rosa, bilé precursora Colombia bitéami. Echoná japoná nochie machili bilé rijoi japi ke Testigo nili alí japi echi korúe, alí Rosa ayénachó korúa nilie echi. Echi ko aní: “Ani natie japi we aʼláala rijoi nili, jiti isié jaré nóchali iʼwírimia echi pagótami japoná echi biteili alí we aʼlá biteili. We simá isié tamí yúa. Echi ko nili japi riká nijé nakiyé japi nima nijé kunala, nalí echi ko ke Testigo nili. We ni jilí niraki anea japi ni ke niwima echi yúa, jiti nijé ko a niwínalie echi yúa. Echalí ani bineli ka nilie alí ni niwínalie, nalí ke ni machili bilé japi a Testigo ju”. We be nalí, Rosa ko ke bi nátili echi namuti japi inéi, nalí nátili achi echi isima japi aminabi aʼlá Jeobá amígawala nima. Jiti la echi ko ma ke raʼíchili echi rijoi yúa alí iʼwérili isili aminabi nóchilia Jeobá. Miná ko Rosa bayeri echoná Escuela japi biné echi Nawésami Raʼíchali Kalabé, alí jipi ko precursora especial ju. Echi ko jéaní: “Jeobá ko tamí iʼwírili jiti ni we kaníliami nima”. A bichíwali ju japi we jilí ju aʼlá nokayá japalí ti we inili nokinalia bilecho namuti. Nalí nijewia japi Jeobá aní, sinibí we tamó iʼwiri.

JAPALÍ ECHI ORGANIZACIÓN TAMÓ ANÉ JAPI NOKIBOA

13. Japalí echi organización tamó ané japi nokiboa, ¿chúriká néwariwéliti bilé japi iyena echi jitra japi iné?

¹³ Wisabé niraa echi organización tamó ané chúriká ti nóchilipo Jeobá, néeka echi ancianos, superintendentes de circuito, echi sucursal alí echi Japi Aʼlá Niseri. Nalí, ¿piri ikimea ke ti inámisaká echi namuti japi tamó ané japi nokiboa? A keʼré japi natabo bi echi namuti japi ke aʼlá ikimea alí inepo bi echi namuti japi ke aʼlá noká echi hermanos japi tamó ané japi nokiboa. Nalí be, ati echi riká nokisáaká, iyénipo echi jitra japi ta iné.

14. ¿Piri tamó iʼwírima eenia echi jitra japi ta bichiwi japalí echi organización tamó ané japi nokiboa? (Hebreos 13:17).

¹⁴ Tamujé ko we aʼlá bichiwi japi Jeobá ju japi nulé echi organización japi nokiboa alí japi echi ko suwaba machí japi ta ikí. Jiti la ti sapú nijewi japi echi aní alí we kanílika (leeri Hebreos 13:17, TNM). Ati machí japi ta nijéwami nísaká, ati iʼwíripo jiti echi congregación napawika nima (Efes. 4:2, 3). Alí tákoré echi hermanos japi tamó nulé japi nokiboa ke sébali aʼlá nokáami ju, ati machí japi Jeobá ko tamó iʼwírima ati nijéwisaká (1 Sam. 15:22). Ayénachó, Jeobá inésaká japi nirú jaré namuti japi aʼlá ku nokisáré, echi ko isima japi echi riká ikimea nalí japalí echi aʼlá iné (Miq. 7:7).

15, 16. ¿Piri iʼwírili Kevin jiti iyénima echi jitra japi bichiwi? (Ayénachó iné echi foto).

¹⁵ Ma inepo chúsiá we natéami ju eenia echi jitra japi ta bichiwi. Echoná Perú ke bi raʼicháliwa español, ayénachó nirú wiká pagótami japi raʼicha jarecho raʼicháliami. Bilé echi raʼicháliami ko ju quechua. Wiká bamíali echi hermanos iʼwérili nokali aaya echi pagótami japi raʼicha echi raʼicháliami. Nalí jipi ko sinucho riká nokimea riweili aaya echi pagótami jiti echi riká nijéwima echi nulalíwami echoná país nirúami (Rom. 13:1). Echi namuti jitra, jaré ko nárika nokali chúriká riwimea echi pagótami quechua raʼíchiami. Echi hermanos ko nijéwili echi kulíwami namuti japi aneri alí Jeobá ko iʼwírili jiti riwimea wiká pagótami japi raʼicha echi raʼicháliami.

¹⁶ Kevin, bilé anciano japi atí echoná bilé congregación japi raʼicha quechua, ke machili achi aʼlá nima nijewia echi kulíwami namuti japi aneri. Echi ko jéaní: “Ani nárika isié ‘¿Alí jipi ko chúriká ti nokiboa aaya echi pagótami japi raʼicha quechua?ʼ”. ¿Piri isili Kevin? Echi ko aní: “Ani nátiki japi aní Proverbios 3:5. Ayénachó ni nátiki Moisés jitra. Jeobá ko aneli japi machibuma echi israelitas Egipto jonsa alí yúrima echomí mar Rojo japoná echi egipcios sibama riweili. Nalí Moisés ko nijéwili alí Jeobá ko echi iʼwírili jiti isima bilé milagro” (Éx. 14:1, 2, 9-11, 21, 22). Kevin ko isili echi kulíwami namuti japi aneri, ¿alí piri namuti aʼláala ikili? Echi ko jéaní: “Ke ti siné nátili japi Jeobá echi riká tamó iʼwírima. Chabé ko ati we miká simíaye wichí jaka nawisasia alí ti bi yúa raʼichie bilé o okuá pagótami japi raʼicha echi raʼicháliami, nalí jipi ko ti simía japoná piré wiká pagótami japi raʼicha quechua. Alí ti wabé wikabé yúa raʼicha alí ti bineri wiká pagótami echi Biblia jitra. Ayénachó wabé wikabé pagótami simía echoná napawíliwachi”. Jiti la ti machí japi ta éenisaká echi jitra japi ta bichiwi, Jeobá ko sinibí tamó iʼwírima.

17. ¿Piri ta bineli jena binelíwami?

¹⁷ Jenaʼí binelíwami ati bineli bikiá namuti japoná ti néwariwélitipo japi ta eena echi jitra japi ta bichiwi. Alí ti echi riká cho nokisáré japalí nokiboa jarecho namuti, japi riká japalí ti nata piri namuti nokiboa kanila simárimia, piri namuti binepo alí chúriká nokiboa weelia echi kuuchi. Sinibí japalí ti nokiboa bilé namuti, ati natásaré achi tamó iʼwírima aminabi we aʼlá Jeobá amígowala niya, echi busuréliami japi Jeobá aní alí japi echi tamó tibuma. Alí ayénachó ke ti natásaré bi echi namuti jitra japi ta iné. Ati echi riká nokisáaká, “tamujé ko sinibí nijéwipo Jeobá japi tamujé Onorúamiwala ju” (Miq. 4:5).