“Natasi jépuká timí nijéwima”

1. Jiti ne bichíwali kaníliami nipo, ¿piri ta nokisáré, alí chúsiá? (Isaías 48:17, 18).

TAMUJÉ Onolá Jeobá we tamó galé alí nakí japi ta kanila pirélipo jipi alí pe aminana (Ecl. 3:12, 13). Echi ko tamó niwali jiti ta we machiboa nokayá jaré namuti. Nalí ke tamó niwali jiti ta nuláami nipo o jiti aniboa piri aʼlá ju alí piri ke aʼlá ju (Ecl. 8:9; Jer. 10:23). Jeobá ko machí japi ta ne bichíwali kaníliami nipo ata nóchilisaká alí nijéwisaká echi (leeri Isaías 48:17, 18).

2. ¿Piri nakí Satanás japi ta natabo, alí piri isili Jeobá?

² Satanás ko nakí japi ta natabo japi we kaníliami nipo ke ti nijéwisaká Jeobá alí ti aboi nulásaká (Gén. 3:4, 5). Jiti la, Jeobá ko riweli japi echi rijoi nulema echi pagótami, nalí ata ritiwá japi echi pagótami ke aʼlá nuláami ju. Nalí be, echoná Biblia raʼicha wiká pagótami jitra japi we kaníliami nili nijewia Jeobá, alí echi japi wabé kaníliami ko nili Jesucristo. Jiti la bachá binepo jaré namuti japi jitra binoy nátili nijéwinalia Jeobá. Miná ko binepo chúsiá ti Jeobá bi nijéwisaré. Alí upá ko newalabo suwaba echi namuti japi ta jitra aboi nátili nijéwinalia Jeobá.

CHÚSIÁ JESÚS NÁTILI NIJÉWINALIA JEOBÁ

3. ¿Piri anili Satanás japi iyama Jesús, alí piri isili Jesús?

³ Japalí Jesús biteili jenaʼí Wichimóbachi, siné kaachi echi ko binoy nátili jépuká nijéwinali. Ma simírisa jaré rawé japalí pakoli, Satanás ko aneli Jesús japi iyama suwaba echi gobiernos a binoy nijéwisaká. Nalí Jesús ko aneli: “¡Miná ku simiká, Satanás! Jiti oserúa chukú: ‘We aʼlá bichiwi Jeobá. Echi ko bilepi bi ju japi mi nijéwisaréʼ” (Mat. 4:8-10, TNM). ¿Chúsiá Jesús echi riká isili? Ma inepo jaré namuti.

4, 5. ¿Chu iyiri ju jaré namuti japi jitra Jesús nátili nijéwinalia Jeobá?

⁴ Echi namuti japi jitra Jesús nátili nijéwinalia echi Onolá ko ju jiti we galé ne sulachí jonsa (Juan 14:31). Ayénachó, Jesús nijewi Jeobá jiti machí japi echi riká isiá wabé aʼlá ju (Juan 8:28, 29; Apoc. 4:11). Echi ko machí japi Jeobá ju japi tamó iwítili, japi we nijíami ju alí japi ta omeri bichiwia echi (Sal. 33:4; 36:9; Sant. 1:17). Jeobá sinibí bichíwali raʼíchili Jesús yúa, alí suwaba japi Jesús olali echi Onolá iyali (Juan 1:14). Nalí echi Satanás ko isili japi sinéami tamujé suwiboa, ikaleka raʼíchiami ju alí binoy bi jitra nata (Juan 8:44). Jesús ko we aʼlá machí chu iyiri ju Jeobá alí ayénachó Satanás, jiti la ke siné nátili nijéwimia Satanás alí sayeria Jeobá (Filip. 2:5-8, TNM).

⁵ Bilecho namuti japi jitra Jesús nátili nijéwinalia Jeobá ko ju, natia suwaba echi namuti aʼláala japi ikimea a nijéwami nísaká (Heb. 12:2, TNM). Echi ko machiyé japi sinibí nijéwami nísaká, iʼwírima jiti biʼwárami nima echi Onolá riwalá alí jiti echi pagótami checho ku sébali aʼlá nokáami nima alí ma ke tasi suwimea.

CHÚSIÁ TI JEOBÁ BI NIJÉWISARÉ

6, 7. ¿Chúsiá wiká pagótami ke nijewi Jeobá, alí chúsiá ti Jeobá bi nijéwisaré?

⁶ Jipi rawé, wiká pagótami ke nijewi Jeobá jiti ke machí echi. Ke bineli japi Jeobá we simá isíami ju alí suwaba echi namuti japi Jeobá isimí echi jitra. Echi riká ikili echi pagótami Atenas piréami japi Pablo nawésili (Hech. 17:19, 20, 30, 34).

⁷ Pablo ko ruyeli japi echi Onorúami ju “mapu siʼnéami tamujé tamí ʼya máputa pirélabo jenaʼí wichimóbachi, ayénachó máputa galá iwipo” alí “suwaba namuti”. Miná ko anili japi “Riosi jítita piré jenaʼí wichimóbachi” alí “jítita ʼyena”. Ayénachó ruyeli japi Onorúami “niwáli ne siʼnéami pagótami mapu ikí nirú jenaʼí wichimóbachi”. Jiti la ti Jeobá bi nijéwisaré, jiti echi ko ju japi tamó niwali (Hech. 17:25, 26, 28).

8. ¿Piri namuti ke siné isima Jeobá, alí chúriká néwariwéliti japi we tamó galé?

⁸ Jeobá ko ne Walubéala ju alí niwali suwaba namuti. Jiti la, echi ko a omeri iʼwérili anea echi pagótami japi nijéwima. ¡Nalí echi ko ke siné echi riká isima! Echi ko nalí nakí japi wikabé pagótami echi amígowala nima sinibí (1 Tim. 2:3, 4). Jiti la, wiká namuti jitra néwariwéliti japi a bité alí japi we tamó galé. Ayénachó tamó bineri jiti ta ruyepo jarecho pagótami echi aʼláala namuti japi echi isima sinéami echi jitra alí chúriká isima (Mat. 10:11-13; 28:19, 20). Alí echi ko nee echi congregaciones alí jawi superintendentes jiti we aʼlá tamó tibuma (Hech. 20:28).

9. ¿Chúriká néwariwéliti Jeobá japi we galéami ju?

⁹ Jeobá ko néwariwéliti japi we galéami ju, echi namuti jitra japi isimí echi pagótami yúa japi ke bichíwinali echi. Chabé jonsa, wiká millones pagótami nokayá piré japi riká aboi nakí. Nalí jiti Jeobá ko we aʼláala ju, echi ko iyá sinéami pagótami japi newalé jiti pirélima alí kanílika niraa (Mat. 5:44, 45; Hech. 14:16, 17). Jeobá jitra, echi pagótami ko omeri niwía, olayá kuuchi, amigos alí kanilia olayá echi namuti japi jitra nóchili (Sal. 127:3; Ecl. 2:24). Jiti la ti we aʼlá machí japi tamujé Onolá Jeobá, we galé sinéami echi pagótami (Éx. 34:6). Jipi ko ma inepo jaré namuti japi ta jitra nátili nijéwinalia Jeobá alí inepo chúriká Jeobá tamó iʼwiri.

CHÚSIÁ TI NÁTILI NIJÉWINALIA JEOBÁ

10. a) ¿Chu iyiri ju echi namuti wabé natéami japi ta jitra nijewi Jeobá? (Mateo 22:37). b) ¿Chúriká Jeobá we kilí buwéami nili mujé yúa? (Salmo 103:13, 14).

¹⁰ Japi riká Jesús, echi namuti japi ta jitra nijéwinali Jeobá ko ju, jiti ta we galé ne sulachí jonsa (leeri Mateo 22:37, TNM). Japalí ti aminabi machí Jeobá, ati aminabi we galé japi riká isíami ju echi. Japi riká, Jeobá ko we kilí buwéami ju tamujé yúa. Japalí echi israelitas ke nijéwiami nili, echi ko aneli: “Périkó, riwesi cha nokayá” (Jer. 18:11). Jeobá ko newalá japi ta ke sébali aʼlá nokáami ju (leeri Salmo 103:13, 14). Japalí mi nata japi Jeobá we kilí buwéami ju alí japi jarecho si namuti we simá isimí, ¿wechi mi ke we inili nijéwinalia sinibí?

11. ¿Chu iyiri ju jaré namuti japi ta jitra nátili nijéwinalia Jeobá?

¹¹ Bilecho namuti we natéami japi ta jitra nátili nijéwinalia Jeobá ko ju, jiti ta machí japi echi riká nokayá we aʼlá ju (Mat. 4:10). Ayénachó ti iné echi aʼláala namuti japi ikí japalí ta nijewi Jeobá, japi riká japi ta iʼwiri jiti echi Jeobá riwalá biʼwárami nima, ayénachó japi ta néwariwéliti japi Satanás we ikaléami ju alí ti kaníliti echi Jeobá sulala. Alí ata nijéwisaká Jeobá jipi, pe aminana ata sinibí nijéwipo jiti ta sinibí pirélipo (Juan 17:3).

12, 13. ¿Piri ta biné Jane alí Pam jitra?

¹² Kuuchi ka jonsa, ati omeri we galea Jeobá alí ke riwea echi riká nokayá tákoré wiká bamíali simiri. Echi riká ikili okuá hermanas Jane alí Pam riwéami.a Bilé ko 11 bamíbami nili alí biléala ko 10, japalí chotásili binea echi Biblia. Tákoré echi wénwala ke binénili echi Biblia, a nakíwili japi echi kúchuwala binema echi Biblia echi testigo Jeobá yúa, ke riwésaká simíaya echoná iglesia echi téemala yúa. Jane ko jéaní: “Japi tamí binérili echi Testigos echi Biblia jitra, tamí iʼwírili jiti ni ke isima echi chati namuti japi nokayé nijé compañérowala, japi riká néea echi drogas alí isiá echi nasawíliami chati”.

¹³ Japalí ma pe weli nili, okuánika publicadoras nílili. Alí ma jaré bamíali simírisa, okuánika precursoras nílili alí ayénachó tibúe echi wénwala japi ma ochérami nili. Natia suwaba echi namuti japi isili Jeobá echi jitra, Jane ko jéaní: “Ani bineki japi Jeobá ko we aʼlá tibú japi echi amígowala ju, japi riká aní 2 Timoteo 2:19: ‘Riosi galá machí mapu chigá ju Binói níwala pagótamiʼ”. Ayena, Jeobá ko we aʼlá tibú japi echi galé alí nijewi.

14. ¿Chúriká iʼwíripo jiti biʼwárami nima echi Jeobá riwalá? (Ayénachó iné echi fotos).

¹⁴ Ata iʼwérili nokinali jiti kárika biʼwárami nima echi Onorúami riwalá. ¿Chúriká? Natabo jepuná: mujé ko olá bilé amigo japi we aʼláala ju alí we simá isíami. Siné kaachi mujé ko kipú japi bilé cha riká raʼicha mujé amígowala jitra; echi ko aní japi we cha isíami ju alí ikaléami. ¿Piri mi isima? Mujé ko sapú animea japi ke bichíwali ju. Echi riká cho, japalí ti kipú japi bilé ikaleka raʼicha Jeobá jitra, tamujé ko sapú aní japi ke bichíwali ju alí ti iʼwérili noká ruyea echi namuti japi ne bichíwali ju (Sal. 34:1; Is. 43:10). Japi ta aní alí japi ta noká néwariwéliti japi ta nijéwinali Jeobá ne sulachí jonsa.

15. Jiti Pablo sinúrika ku biteili aminabi nóchilimia Jeobá, ¿piri namuti aʼláala nareli? (Filipenses 3:7, 8).

¹⁵ Ati we kanílika aní japi sinúrika ku pirélipo jiti ta kanílitinali Jeobá alí ti aminabi nóchinali echi. Bilé japi echi riká isili ko ju echi apóstol Pablo. Tákoré echi ko we natéami nili echoná religión judía, we kanílika riweli jepuná religión najátimia Cristo alí nóchilimia Jeobá (Gál. 1:14). Jiti echi riká isili, echi ko we kanila biteili alí ayénachó bayérami nili jiti nulama Cristo yúa echoná ripá rewegachi. Pablo ko ke siné nátili japi ke aʼlá nili japi isili nóchilia Jeobá, alí tamujé ayénachó ke echi riká cho natabo (leeri Filipenses 3:7, 8, TNM).

16. ¿Piri ta biné echi hermana Julia jitra? (Ayénachó iné echi fotos).

¹⁶ Ata iʼwérili nokisáaká nóchilia Jeobá, ati wiká namuti aʼláala narepo jipi alí pe aminana. Ma inepo bilé hermana jitra Julia riwéami. Taa ka jonsa echi ko wikarae echoná iglesia jarecho yúa. Jiti Julia simárika wikaráami nili, bilé we machíami ópera wikaráami, we baʼórili alí aneli japi binérima. Kecho wilí simírisa, Julia ko ma we machirúami nili alí wikarali japoná wikarae jarecho japi we machirúami nili. Nalí japalí binea asali echoná bilé escuela japoná binériwa wikaraa, bilé compañero raʼíchili Onorúami jitra alí ruyeli japi echi Onorúami riwalá ko Jeobá ju. Miná ko Julia chotásili binea echi Biblia osá niraa sinibí tarali. Alí pe aminana echi ko nátili japi ma ke wikarama jiti omérima nóchilia Jeobá. Isiá jepuná namuti we jilí nili. Echi ko jéaní: “Wiká pagótami tamí anéi chúsiá ni echi riká isimí riwea wikaraa, nalí nijé ko ma nátili nijéwimia Jeobá”. Jipi ma 30 bamíali simírisa, ¿piri nata Julia echi jitra japi isili? Echi ko aní: “We ni kanili alí ni we bichiwi japi pe aminana Jeobá ko tamí iyama suwaba japi ni nakí” (Sal. 145:16).

AMINABI NIJEWI JEOBÁ

17. a) ¿Piri nokisáré echi pagótami japi kecho bijí nijewi Jeobá, alí chúsiá? b) ¿Piri ta machí japi ta ma nijewi Jeobá?

¹⁷ Ma mulipi ju japalí suwábitami nima suwaba echi namuti chati. Echi apóstol Pablo ko osali: “Jiti, ma ‘ne mulipi kaachiʼ, ‘echi japi nawama sibama, alí ke wilí sika nawamaʼ” (Heb. 10:37, TNM). ¿Piri aniwáami ju jepuná? Japi ma ke wiká rawé ripí jiti echi pagótami natama achi nijéwima Jeobá, jiti la sapú echi riká nokisáré (1 Cor. 7:29). Alí tamujé japi ta ma nijewi Jeobá, ata machí japi ikiboa namuti jilírami, nalí japi ke wilí rojorama.

18. ¿Piri nakí Jeobá alí Jesús japi ta nokiboa?

¹⁸ Jesús ko iʼwérili iyali echi pagótami jiti echi discípulowala nima alí ke riwema echi najatia (Mat. 16:24). Jiti la, ati ma wiká bamíali nóchiliaká Jeobá, kiti siwepo. A bichíwali ju japi ta aminabi iʼwérili nokisáré nóchilia Jeobá, alí isini kaachi jepuná we jilí ju. Nalí be, ¿kechi ko a bichíwali ju japi jipi jonsa ma ti we kanili alí ti naré wiká namuti aʼláala jiti ta nijewi Jeobá? (Sal. 35:27).

19. ¿Piri ta biné Gene jitra?

¹⁹ Jaré ko mayé japi riwésaré nokayá wiká namuti nijéwimia Jeobá. Mujé japi mi remalí ju, ¿achi mi mayé japi mi ke kaníliami nima ami nijéwisaká Jeobá? Bilé remalí Gene riwéami jéaní: “Ani natie japi echi testigo Jeobá ke omeri nokayá wiká namuti. Wiká kúruwi japi ni yúa ochériki ani inéi japi riká ko we kaníliami ka, jiti echi ko a omerie simíaya echoná fiestas, olayá novias o riʼea videojuegos japi buyaní nakóayami, alí nijé ko bi simiyé napawíliwachi alí nawesia”. Jiti echi riká natie, ¿piri isili Gene? Echi ko jéaní: “Ani chotásiki isiá echi chati namuti japi riká jarecho. Nalí, ke ni bichíwali kaníliami ke. Miná ko ni chotásiki ku néwalayá japi ni bineki echoná Biblia alí natia chúsiá we aʼlá ju nijéwilia. Jiti la ni nátiki ku nijewia Jeobá ne sulachí jonsa. Ani inili japi echalí jonsa Jeobá ko tamí kipú suwaba japi ni ané alí tamí iʼwiri”.

20. ¿Piri ta nokinali?

²⁰ Bilé salmista wikaránili Jeobá: “We kaníliami ju echi rijoi japi mujé chapí alí japi mi bayé jiti bitélima echoná mujé níwala patios” (Sal. 65:4). Japi riká Josué, tamujé ayénachó we kanílika jériká aniboa: “Nalí nijé alí japi ni yúa bité, ata Jeobá nijéwipo” (Jos. 24:15).