BINELÍWAMI 17
CANCIÓN sjj 99 Wikabé hermanos japi nijéwami ju
Ke ti siné awénili muchuwi
“Ni mi iʼwírimalí” (IS. 41:10).
JAPI TA JITRA BINEPO
Naó namuti japi chúriká Jeobá tamó iʼwiri.
1, 2. a) ¿Chúsiá ta machí japi ta ke awénili muchuwi? b) ¿Piri ta binepo jenaʼí binelíwami?
JAPALÍ ta ikí namuti we jilírami, a keʼré japi ta inílipo japi riká ko awénili muchuwa echoná okórili alí ti ke ritiwá echi buwé japoná ti ku machínipo. Nalí ke ti awénili muchuwi, jiti tamujé Onolá Jeobá we aʼlá machí japi ta risoa nili alí anili japi tamó iʼwírima. Jeobá ko we simárika ané echi japi nijéwami ju: “Ni mi iʼwírimalí” (Is. 41:10).
2 Jenaʼí binelíwami binepo naó namuti japi chúriká Jeobá tamó iʼwiri: 1) tamó bineri, 2) tamó iyá japi ta newalé, 3) tamó tibú alí 4) tamó iʼwérili iyá japalí ta omona nili. Tákoré ikisaa chuwé namuti jilírami, Jeobá ko tamó ané japi ke siné tamó riwema alí sinibí tamó newalama. Jiti la ke ti siné awénili muchuwi.
JEOBÁ TAMÓ BINERI
3, 4. ¿Chúriká tamó bineri Jeobá? (Salmo 48:14).
3 (Leeri Salmo 48:14). Jeobá ko aʼlá machí japi tamujé newalé iʼwírili jiti aʼlá pirélipo. Jiti la, echi ko tamó bineri néeka echi Biblia (Sal. 119:105). Echi binoy Raʼicháala jitra, echi ko tamó iʼwiri jiti aʼlá nátika nokiboa, jiti ta olabo echi cualidades japi tamó iʼwiri kaníliami niya alí jiti ta buwea pirélipo japi pe aminana sinibí pirélipo.a Japi riká, Jeobá ko tamó bineri jiti wikáwiami nipo alí ke iyoka ripía japalí jaré tamó omonáritisa, japi wachíniga niraa nokáami nipo alí we galea anakupi niraa ne sulachí jonsa (Sal. 37:8; Heb. 13:18; 1 Ped. 1:22). Nokayá jepuná namuti tamó iʼwiri jiti we aʼláala wénwala nipo, we aʼláala kunala o upila ma, alí jiti we aʼláala amigos nipo.
4 Jeobá ayénachó isili japi echoná Biblia oserúa ripima echi pagótami jitra japi ayénachó ikili namuti jilírami alí japi inílili japi riká tamujé (1 Cor. 10:13; Sant. 5:17). Japalí ti biné alí ti noká japi ta leeri, ati biné okuá namuti we natéami. Bachá, japi ke tamujé bi ju japi ikí namuti jilírami; jarecho ayénachó risoa ikili alí anáchili jiti Jeobá iʼwírili (1 Ped. 5:9). Alí okuá, ata biné chúriká anáchami nipo echi namuti jilírami (Rom. 15:4).
5. ¿Jépuká nee Jeobá tamó iʼwírimia?
5 Jeobá ayénachó tamó iʼwiri echi hermanos jitra.b Japi riká echi superintendentes de circuito japi sii echoná congregaciones. Echi nawésali jitra echi ko tamó iʼwérili iyá alí tamó iʼwiri jiti ta napawíkami nipo (Hech. 15:40-16:5). Echi ancianos ayénachó iʼwérili noká iʼwiria ibili niraa echi hermanos jiti ke riwema Jeobá amígowala niya (1 Ped. 5:2, 3). Alí echi wénwala iʼwiri echi kúchuwala jiti we galema Jeobá, jiti we aʼlá nátika nokimea alí jiti nokimea echi namuti japi echi iʼwírima Jeobá amígowala niya (Prov. 22:6). Alí echi hermanas we aʼlá nátami ko iʼwiri echi iwé japi ke me machíami ju, iyayá busuréliami, jiwérili alí echi namuti jitra japi aboi noká (Tito 2:3-5).
6. Jeobá ko isimí wiká namuti tamó iʼwírimia, ¿nalí piri ta nokisáré tamujé jiti iʼwíritami nipo?
6 Jeobá ko ma isili wiká namuti tamó iʼwírimia. Jiti la, ¿piri ta nokisáré tamujé jiti ta iʼwíritami nipo alí néwariwélitipo japi ta waʼlú matétara iyá? Proverbios 3:5, 6 aní: “Bichiwi Jeobá ne sulachí jonsa alí ke japi riká mi binoy nata”. Alí, ¿piri isima Jeobá? “Echi isima japi mi we aʼlá wachía niraa bitélima”. Jepuná ko aniwáami ju japi tamó iʼwírima jiti ta ke me ikiboa namuti jilírami alí we kanílika pirélipo. ¡Ata waʼlú matétara iyá Jeobá jiti we tamó galé alí ibili niraa tamó busuré iyá! (Sal. 32:8).
JEOBÁ TAMÓ IYÁ JAPI TA NEWALÉ
7. ¿Chúriká tamó iʼwiri Jeobá japi riká aní Filipenses 4:19).
7 (Leeri Filipenses 4:19). Jeobá ke bi tamó bineri echi Biblia jitra, ayénachó tamó iʼwiri jiti ta olabo japi ta newalé, japi riká echi koʼwáami, japi napachabo alí japoná pirélipo (Mat. 6:33; 2 Tes. 3:12). Tákoré aʼlá ju japi ta natabo echi namuti jitra japi ta newalé, Jeobá ko tamó ané japi ta ke we rasíruka natabo echi namuti jitra (iné echi bachá nota de estudio japi chukú echoná Mateo 6:25, TNM). ¿Chúsiá? Jiti tamujé Onolá Jeobá anili japi ke siné riwema echi japi nijéwami ju (Mat. 6:8; Heb. 13:5). Ati we bichiwi japi echi ko isima japi riká anili alí tamó iyama echi namuti japi ta newalé.
8. ¿Chúriká Jeobá iʼwírili David?
8 Natabo chúriká Jeobá iʼwírili David japalí majaa júmili echi silíami Saúl jitra japalí miʼlinalie. Echalí Jeobá ko iyali echi alí echi sontársiwala suwaba japi newaleli jiti ke suwimea. Natia echi jitra, David ko jériká osali: “Ani remalí nili alí jipi ko ni ma ochérami ju, nalí ke ni siné ineli bilé wachíniga isíami japi bineli riwérami ju alí ke cho echi kúchuwala koʼwáami aa járiami” (Sal. 37:25). A keʼré japi mujé ayénachó ineli chúriká Jeobá mi iyali japi mi newaleli o ayénachó echi hermanos.
9. Jipi rawé, ¿chúriká iʼwiri Jeobá echi puéblowala japalí karúa ikisaa? (Ayénachó iné echi fotos).
9 Jeobá ayénachó iyá echi namuti japi newalé echi puéblowala japalí karúa ikisaa. Japi riká, echi cristianos wikanami piréami iʼwírili echi hermanos Jerusalén piréami, japalí lowia pireili (Hech. 11:27-30; Rom. 15:25, 26). Jipi rawé echi Onorúami puéblowala ayénachó we nijíami ju. Japalí karúa ikisaa, Jeobá ko nee echi nijéwami iyamia koʼwáami, baʼwí, chiní japi napachama alí ówili, echi japi piré japoná cha ikili. Ayénachó nirú hermanos japi ku atewi echi kalí alí echi salones japi najuli. Alí sapú noká wiká namuti jiti iʼwérili iyama echi hermanos japi omona nili jiti echi kalila najuli o jiti bilé echi téemala mukuli.c
¿Chúriká Jeobá tamó iʼwérili iyá japalí ti karúa ikisaa? (Iné echi párrafo 9).e
10, 11. ¿Piri mi biné Boris jitra?
10 Jeobá ko we nijíami ju alí ayénachó iyá japi newalé echi japi kecho bijí nijéwami ju echi. Tamujé echi riká cho noká alí ti iʼwérili noká simá nokáami niya echi yúa japi ke bichíyami ju (Gál. 6:10). Jiti ta echi riká noká, ata iʼwiri jiti we aʼlá raʼichárami nima Jeobá jitra. Ma inepo japi ikili bilé rijoi Boris riwéami, japi walúala nuláami nili echoná bilé escuela echomí Ucrania. Echi ko ke testigo Jeobá ju, nalí sinibí we simá isíami nili alí riwíwili echi Testigos yúa japi binéami nili echoná escuela. Japalí chotásili echi guerra, echi ko másili biléanamí japoná ke me niruili guerra alí echi hermanos iʼwírili. Miná ko, echi ko simili Conmemoración. Japalí echi ko nata suwaba echi namuti japi echi hermanos nokali echi jitra, Boris ko jéanili: “Echi testigo Jeobá we aʼlá tamí iʼwírili alí tamí tibuli, jiti la ni waʼlú matétara iyá echi jitra”.
11 Sinéami ta omeri nokayá japi riká tamujé Onolá Jeobá japalí ti iʼwiri echi japi newalé, tákoré ke Testigos ju (Luc. 6:31, 36). Ata bichiwi japi ta noká echi jitra, iʼwírima jiti aminabi binénilima Jeobá jitra alí nóchilima Jeobá tamujé yúa (1 Ped. 2:12). Nalí ke echi riká ikisáaká, tamujé ko we kanílipo jiti ta iʼwiri jarecho (Hech. 20:35).
JEOBÁ TAMÓ TIBÚ
12. ¿Piri anili Jeobá japi isima echi puéblowala jitra? (Salmo 91:1, 2, 14).
12 (Leeri Salmo 91:1, 2, 14). Jeobá ko anili japi tibuma echi puéblowala jiti ke riwema echi amígowala niya. Ke siné riwema japi Satanás isima japi ta riwepo nijewia Jeobá japi riká echi nakí (Juan 17:15). Alí japalí chotásisa echi gran tribulación, ati we aʼlá machí japi Jeobá ko tibuma echi puéblowala jiti ke riwema echi amígowala niya alí jiti ke namú ikimea (Apoc. 7:9, 14).
13. ¿Chúriká tibú Jeobá ibili echi japi nijéwami ju?
13 ¿Alí chúriká tibú Jeobá ibili echi japi nijéwami ju? Echi ko tamó iyá echi Biblia jiti tamó iʼwírima machiyá piri aʼlá ju alí piri ke aʼlá ju (Heb. 5:14). Japalí ti noká japi ta biné echoná Biblia, echi ko ju japi riká ko ti néea bilé escudo japi tamó tibú jiti ke namú ikiboa alí jiti ke riwepo echi amígowala niya (Sal. 91:4). Jeobá ayénachó tamó tibú néeka echi hermanos (Is. 32:1, 2). Japalí ti napawí echi pagótami yúa japi galé Jeobá alí nijewi echi, ati jiwérili naré alí tamó iʼwiri jiti ke nokiboa japi chati ju (Prov. 13:20).
14. a) ¿Chúsiá Jeobá isini kaachi ke tamó iyé echi chati namuti japi ta ikí? b) ¿Piri ta biné japi aní Salmo 9:10? (Ayénachó iné echi nota).
14 Chabé, isini kaachi Jeobá ko tibuli echi japi nijéwami ju jiti ke suwimea o jiti ke cha ikimea, nalí ke sinibí echi riká isili. Echi Biblia aní japi “sinéami karú ikí isini kaachi alí ke wesi machí chu kabú echi ikimea” (Ecl. 9:11). Ayénachó, japi riká chabé alí jipi, Jeobá ko isini kaachi riweli japi echi nijéwami ju najátarami nima alí ayénachó suwimea. ¿Chúsiá? Jiti néwariwélitima japi Satanás ikaléami ju (Job 2:4-6; Mat. 23:34, TNM). Jeobá ko ke sinibí tamó iyema echi chati namuti japi ta ikí, nalí ati we aʼlá bichiwi japi echi ko ke siné riwema japi echi galé (Sal. 9:10).d
JEOBÁ TAMÓ IʼWÉRILI IYÁ
15. ¿Chúriká tamó ku kaníliti Jeobá echi Biblia jitra, echi hermanos alí japalí ti echi yúa raʼicha? (2 Corintios 1:3, 4).
15 (Leeri 2 Corintios 1:3, 4). Sinéami isini kaachi ata risoa nili o we ti omona nili. A keʼré japi ta jipi echi riká ti inili alí jepuná isímiré japi ta awénili ka nílipo. Tákoré ti mayé japi ke bilé machí chuti inili, Jeobá ko we aʼlá machí alí echi ko tamó ku kaníliti japalí ta ikí namuti we jilírami. ¿Chúriká isimí? Echi ko nee echi Biblia, echi hermanos alí tamó ané japi ta echi yúa raʼichabo. Japalí ta echi yúa raʼicha, echi ko isimí japi ta ku kilí nílipo (Filip. 4:6, 7). Japalí ti leeri echi Biblia, ata machí japi echi we tamó galé, ata biné echi busuréliami jitra alí ti ku kilí nili jiti ta machí japi ikimea pe aminana. Alí japalí ta muchuwi echi hermanos yúa echoná napawíliwachi, echi ko we simá nokáami ju tamujé yúa alí tamó iʼwérili iyá néeka echi Biblia.
16. ¿Piri mi biné Nathan alí Priscilla jitra?
16 Jiti inepo chúriká Jeobá tamó iʼwérili iyá néeka echi binoy Raʼicháala, ma inepo japi ikili Nathan alí Priscilla, japi piré echomí Estados Unidos. Ma jaré bamíali ju japalí echi ko simíali biléana japoná newaléliwa nawésami. Nathan ko jéaní: “Ati we bichiwie japi Jeobá tamó iʼwírima”. Nalí japalí sili echoná kulíwami congregación, echi ko nayuli alí ma ke olali winomí. Ke mayeli japi echi riká ikimea. Miná ko, echi ko ku simíali aboi pirélachi alí echoná ayénachó ke olali winomí. Echi ko jéaní: “Ani nárika isié chúsiá Onorúami ke tamó iʼwírili japi riká tamujé buweli. Alí ni chotásiki natia achi ni ke aʼlá isili bilé namuti”. Miná ko, echi okuánika machili japi Jeobá ke awénili riweli. Nathan ko jéaní: “Japalí ti ikiyé echi namuti jilírami, leeria echi Biblia nili japi riká ko kipúa bilé amigo japi tamó iʼwérili iyá alí we aʼlá busuréliami. Ati bineki ke we natia echi namuti jilírami japi ta ikiyé, nalí natia chúriká Jeobá tamujé iʼwirie anachia. Alí jepuná tamó iʼwiri aʼlá machiyá piri nokiboa jiti anachabo echi namuti jilírami japi ikimea”.
17. ¿Chúriká iʼwérili nareli bilé hermana Helga riwéami? (Ayénachó iné echi imágenes).
17 Japi riká ti ma ineli, echi hermanos ayénachó tamó iʼwérili iyá. Ma inepo japi ikili Helga, japi bité echomí Hungría. Wiká bamíali jonsa, echi ko ikili wiká namuti jilírami, jiti la we risoa nili alí siwea nílili. Nalí jipi ko japalí ku nata japi ikili, echi ko machí japi Jeobá iʼwérili iyali echi congregación jitra. Echi ko aní: “Jeobá sinibí tamí iʼwírili japalí nijé ko ma ke omerie anachia alí isiá suwaba namuti, japi riká echi nóchali, tibúa nijé ranala japi nayúami nili alí jarecho namuti. Suwaba echi 30 bamíali Jeobá tamí iʼwérili iyali. Ke siné tamí bineli riweli. Wisabé niraa tamí iʼwérili iyali echi semati raʼíchali jitra japi tamí aneli echi hermanos. ¡Wisabé echi tamí osélili bilé mensaje, bilé tarjeta o simárika tamí aneli japalí ni we newaleli!”.
¿Chúriká Jeobá mi néema iʼwérili iyamia jarecho? (Iné echi párrafo 17).
18. ¿Chúriká ti omeri iʼwérili iyayá jarecho?
18 Tamujé ko oméripo iʼwérili iyayá jarecho japi riká isimí Jeobá. ¿Chúriká ti oméripo nokayá? Japalí ti kilí niraa kipú, simárika raʼicha alí iʼwiri japalí echi newalé (Prov. 3:27). Alí ke ti bi echi riká noká echi hermanos yúa, ayénachó sinéami echi yúa japi risoa nili tákoré kecho bijí nijewi Jeobá. A ikiyáaká namuti we jilírami, japi riká japalí nayulú o japalí mukusaa bilé japi echi galé, tamujé ko simía inesia, ati kipú japi inili alí ti iʼwérili iyá néeka echi Biblia. Japalí ti noká japi riká Jeobá, tamujé ko oméripo iʼwiria echi hermanos jiti anachama echi namuti jilírami alí ayénachó iʼwíripo jarecho pagótami japi kecho machí Jeobá jiti machinálima echi jitra (Mat. 5:16).
JEOBÁ KE SINÉ TAMÓ AWÉNILI RIWEMA
19. ¿Piri isimí Jeobá tamujé jitra, alí chúriká nokiboa japi riká echi?
19 Jeobá ko we natéami niraa iné sinéami japi echi galé alí ke awénili riwé japalí ikí namuti jilírami. We tamó galé alí tamó tibú japi riká bilé onolá isimí echi ranala yúa. Echi ko tamó bineri, tamó iyá japi ta newalé, tamó tibú alí tamó iʼwérili iyá japalí ti omona nili. Alí tamujé ayénachó omeri echi riká nokayá japalí ti iʼwérili iyá jarecho japi ikí namuti jilírami. Tákoré ti ikiyé chuwé namuti jilírami, tamujé ko omeri bichiwia japi Jeobá ke siné tamó riwema, jiti echi ko jériká anili: “Kiti majá, nijé mi yúa atí” (Is. 41:10). ¡We ti ku kilí nili machiyá japi Jeobá ke siné tamó awénili riwé!
CANCIÓN sjj 100 Kanila narepo jarecho tamó bitélachi
a Iné echi artículo riwéami “Tomemos decisiones que honren a Dios”, echoná oselí La Atalaya 15 inárachi abril bamíali 2011.
b Iné echi artículo riwéami “Sinibí nijewi japi Jeobá aní” echoná oselí Echi Nawésami febrero bamíali 2024, párrafos 11 aminá 14.
c Ami riwimea jarecho si namuti japi ta kulí nokali iʼwiria, ami bakisáaká echoná jw.org alí mi áasaká “labores de socorro”.
d Iné echi sección riwéami “Preguntas de los lectores” echoná oselí La Atalaya febrero bamíali 2017.
e JAPI RUYÉ JAPI MACHINA ECHONÁ FOTOS: Echi hermanos Malaui piréami, naré iʼwérili alí namuti japi newalé japalí risoa ikili.