“Jeobá ju japi nikó tamujé jitra”

Kecho chotásiachi echi bamíali 2000, echi Gobierno francés anili japi echi testigo Jeobá natétisa riweili bilé impuesto echi winomí jitra japi echi sucursal echoná Francia nareli japi riká donaciones echi bamíali 1993 aminá 1996 chéami. Echi tribunales Francia nirúami alí echi tribunal de apelaciones, anili japi ta natétisa riweili. Jiti la, echi Gobierno chapili echoná banco aminá 4 millones de euros (aminá 6 millones de dólares) japi echi sucursal níwala nili. Jiti bela, ati nátili japi ti simisaa riweili echoná Tribunal Europeo. Nalí kecho simíaya japoná chunéliwa, tamó aneli japi tamujé alí echi abogados echi Gobierno Francia jitra simabo raʼichamia bilé funcionaria yúa echi Tribunal Europeo jiti akaréwipo echi namuti.

Jiti akaréwipo echi namuti, ati nátili japi tamó anema japi iyabo jaré winomí japi echi Gobierno francés tamó tánili. Nalí tamujé machiyé japi iyasa bilepi bi euro nima riweili japi riká ko ke nijewia japi aní echi Biblia. Echi hermanos iyali echi winomí iʼwírimia echi Onorúami Gobiérnowala, jiti la echi winomí ke tasi echi Gobierno níwala nisa riweili (Mat. 22:21). Nalí tamujé ko a nijéwili alí ti simíaki raʼichamia echi yúa jiti ta riwíwili echi Tribunal.

Ata napawili echoná bilé sala echoná Tribunal japi we semati nili. Echi napawíliwami ke aʼlá chotásili, echi funcionaria chotásili aniyá japi aʼlá nima riweili japi echi testigo Jeobá natétima jaré echi winomí jitra japi nareli. Ke sayiná tamujé inílili nárinalia: “¿Ami machí japi echi Gobierno ma chapili aminá 4 millones alí nasipa euros tamujé níwala japi ta olayé echoná banco?”.

Japalí echi abogados echi Gobierno jitra anili japi a bichíwali ju, echi funcionaria ko we iyoli echi yúa alí aneli japi we chati nili japi isili echi Gobierno francés. Alí we sapuka sunili echi napawíliwami. Echalí ni machiki japi Jeobá isili jepuná namuti japi tamujé ke tasi nátili japi echi riká ikimea. ¡Ati we kanílika ku simíaki echi namuti jitra japi ikili echoná!

30 inárachi julio 2011, sinéami echi oyériami echoná Tribunal Europeo anili japi aʼlá ju japi tamujé aniyé. Jiti la anili japi ta ke natétisa riweili echi impuesto alí nuleli echi Gobierno japi tamó ku iyama echi winomí japi chapili, ¡alí che wikabé! Japi ikili echalí, iʼwírili jiti echi hermanos omérima kilí nawesia echoná Francia jipi rawé chéami. Jepuná bilepi náriwami japi ta nátili naria, a nili japi riká echi rité japi jitra basibúrami nili echi Goliat moʼola alí japi isili japi ta niyúripo. Nalí, ¿chúsiá ta niyúrili? Jiti japi riká aneli David echi Goliat, “Jeobá ju japi nikó tamujé jitra” (1 Sam. 17:45-47).

Nalí ke echalí bi nili japalí ta niyúrili. Tákoré jaré políticos alí nuláami religiosos japi we jiwérami ju tamó sayeri, echi tribunales we natéami japi nirú echoná 70 países alí wiká tribunales internacionales, ma nulali 1,225 kaachi japi echi testigo Jeobá riwíwitami nima; japi riká japi echi Gobierno tamó inema japi riká bilé religión, tamó riwema kilí nawesia, japi ke simabo echi omáwali japi niwá echi países alí ke cho narea echi la.

¿Chúsiá ni simili echoná Europa nimía echi testigo Jeobá japalí ni nochia asali echoná central mundial echi testigo Jeobá echoná Nueva York (Estados Unidos)?

NIJÉ WÉNWALA MISIONEROS NILI NE SULACHÍ JONSA

Nijé wénwala, George alí Lucille, simíali echi clase 12 echi Escuela Galaad alí nóchilia mochili Jeobá echoná Etiopía japalí ni ochérili bamíali 1956. Tamí rewali Felipe, japi riká echi nawésami Felipe bachá siglo bitéami (Hech. 21:8). Biléala bamíali, echi Gobierno ma ke riweli japi echi Testigos nawisama. Tákoré ni taa towí nili, we aʼlá ni newalá japalí nijé téemala ichípika binéi echi Biblia. ¡Echalí ni natie japi we semati nili! Nalí be, bamíali 1960 echi Gobierno anili japi ta riwesa riweili echi país.

Japalí ta simíali pirélisia echoná Wichita (Kansas, Estados Unidos), nijé wénwala aminabi nawisánali japi riká misioneros. We aʼlá nijéwami nili Jeobá alí echi riká tamí binérili alí nijé ochilá Judy alí nijé bonilá Leslie, japi ayénachó ochérili echoná Etiopía. Ani pakoki japalí ni 13 bamíbami nili, alí ma simírisa bikiá bamíali, ata simíali nochamia echoná Arequipa (Perú), jiti echoná newalelie nawésami.

Bamíali 1974, japalí ni 18 bamíbami nili, echi sucursal echoná Perú tamó júali, nijé alí jarecho naó hermanos japi riká precursores especiales, jiti nawisabo ripá echi cordillera central de los Andes japoná ke siné nawésili. Tamujé nawésili japoná pireili echi pagótami japi quechua alí aimara ju. Ata néeli bilé troca japoná ayénachó ta kochili, japi echi Arca riwéami nili, jiti nili japi riká bilé cajón. Ani we simá nili japalí ni newalá japi ta néeli echi Biblia binérimia echi pagótami japi Jeobá ma kéʼayó isima japi echi pagótami ma ke risoa riká pirélima, suwábima echi nawilí alí echi mukuwáami (Apoc. 21:3, 4). Wiká ko we kanílika tamó kipuli.

ANI BAYÉRAMI NILI NOCHAMIA ECHONÁ CENTRAL MUNDIAL

Bamíali 1977, Albert Schroeder japi Aʼlá Nisériami nili, simili echoná Perú. Echi ko tamí aneli japi ni tánima simiyá nochamia echoná central mundial, alí echi riká ni isiki. Miná ko, 17 inárachi junio 1977, ani chotásiki nochia echoná Betel echomí Brooklyn, alí naó bamíali ani nóchili echoná departamentos japi biʼwáami ju alí atéwiami.

Junio 1978, ani machiki Elizabeth Avallone japalí niruili bilé asamblea internacional echoná Nueva Orleans (Luisiana). Echi ko biteili binoy wénwala yúa japi we aʼlá nijéwami nili Jeobá. Elizabeth naó bamíali nóchili japi riká precursora regular, alí echi ko we natéami niraa ineli echi riká bitea. Ati niwili 20 inárachi octubre 1979, alí okuaka chotásili nochia echoná Betel.

Ati bachá nóchili echoná bilé congregación español niraa echomí Brooklyn. Echi hermanos japi napawíe echoná, we galéami nili tamujé yúa. Ma simírisa jaré bamíali, ata simíali nochasia jaréana bikiá congregaciones alí echi hermanos ayénachó we aʼlá tamó nareli alí tamó iʼwírili jiti nochabo echoná Betel. Ata we natéami niraa iné echi iʼwérili japi echi tamó iyali, ayénachó ti waʼlú matétara iyá echi amigos alí téemala japi tamó iʼwírili tibúa tamujé wénwala japalí echi ko ma ochérami nili.

ANI CHOTÁSIKI NOCHIA ECHONÁ DEPARTAMENTO LEGAL

Enero 1982 ani chotásiki nochia echoná Departamento de Asuntos Legales Betel jitra. Ma simírisa bikiá bamíali, tamí aneli achi ni siminali echoná escuela de derecho jiti licencia olama japi riká abogado. Japalí ni binea asali, ani machiki japi wiká namuti japi echi pagótami omeri nokayá jenaʼí Estados Unidos alí jaréanachó países ko ju, jiti echi testigo Jeobá niyúrili echoná tribunales de justicia. Ati we aʼlá bineli jepuná namuti we natéami jitra echoná escuela.

Bamíali 1986, japalí ni 30 bamíbami nili, tamí wilari japi riká superintendente echoná Departamento de Asuntos Legales. Jiti ni a bijí remalí nili, ke ni aʼlá machiyé japi we jilírami nima jepuná. Ani we kanílili, nalí ayénachó we ni majaki.

Bamíali 1988 ma ni abogado nílili, nalí ke ni machiyé japi simiyá echoná escuela isili japi ni ke me bichíwima Jeobá. Simiyá echoná universidad isímiré japi bilé we niráami nima alí natama japi we natéami ju jarecho yúa japi ke simili echoná. Nalí Elizabeth tamí iʼwírili jiti ni checho ku binema echi Biblia japi riká ni isíami nili kecho simiyá escuela de derecho. Tákoré ke sapú nili, kilipi niraa ani checho ku aʼlá bichíyami nílili. Jipi ani aʼlá machí japi machiyá wiká namuti ke me natéami ju, nalí wabé natéami ju Jeobá amígowala niya, we galea echi alí binoy puéblowala.

ATI IʼWÉRILI NOKÁ RAʼICHIA ECHI WÉALA JÁWAMI YÚA JITI TAMÓ RIWEMA NAWESIA

Japi riká ni ma abogado nili, ani iʼwérili isiki iʼwiria echoná servicios legales echoná Betel alí nimía echi Jeobá níwala organización echoná tribunales. Iʼwiria echi Jeobá níwala organización japi we sapuka wiká muwésili a we aʼlá nili, nalí ayénachó jilí nili. Japi riká, echalí bamíali 1990 echi departamento japoná ni nocha anérami nili japi echi animea japi ma ke ralinema echi publicaciones. Echalí jonsa, echi Testigos ma ke taa winomí echi publicaciones jitra. Jepuná isili japi ma ke me nirúlima nóchali echoná Betel alí echoná congregaciones, alí jepuná isimí japi ma ke natétipo impuestos. Jaré ko nátili japi jepuná isima japi ma ke me nirúlima winomí nawisamia, nalí ke echi riká ikili. Bamíali 1990 jonsa, wiká muwésili echi testigo Jeobá alí jipi echi pagótami omeri olayá publicaciones alí jarecho si namuti ke natétika. Ani iné japi pe echi Jeobá jiwérala jitra alí japi echi aní néeka echi pioni aʼlá nijéwami, ata omeri nokayá jepuná alí jarecho namuti kulíwami japi newalé echi organización (Éx. 15:2; Mat. 24:45).

Japalí ta niyuri echoná tribunales, ke ju jiti ta we aʼlá aboi nimili, nalí jiti ta simá nokáami ju. Ne sojí sinibí echi japi oyériami ju iné chúriká ju echi Jeobá puéblowala, japi riká ikili bamíali 1998, japalí bikiá hermanos japi Aʼlá Nisériami ju alí echi jubila, simíali jaré asambleas especiales echomí Cuba. Echi ko we simá nokáami nili alí we riwíwiami, jepuná we iʼwírili jiti echi nuláami inema japi tamujé ko neutrales ju.

Nalí isini kaachi ati bi omeri ku akarewia bilé namuti japi ke aʼlá ju, simíaya echoná tribunales (Filip. 1:7). Japi riká, wiká bamíali echi nuláami echomí Europa alí Corea del Sur nirúami, aniyé japi ke ti risensia olá jiti aboi aniboa achi ta sontarsi nínali o ke. Jiti la, ne sojí 18,000 hermanos echomí Europa alí simírikami 19,000 echoná Corea del Sur, erta muchuwáari echoná cárcel.

7 inárachi julio 2011, japalí echi hermano Bayatyan oyéritami nili jiti echi país Armenia aniyé japi nísaré sontarsi, echi Tribunal Europeo de Derechos Humanos nuleli suwaba echi países echoná Europa, japi riwema japi echi pagótami iyárami nima jarecho nóchali jiti ke sontarsi nima. 28 inárachi junio 2018, echi riká cho isili echi Tribunal Constitucional echomí Corea del Sur. Echi riká ikili jiti sinéami echi hermanos remalí we nijéwami nili alí ke sontarsi nílili.

Suwaba echi sucursales omáana wichimóbachi, we jiwérika nochásimi nimía echi Jeobá organizaciónwala. We ti kanili iʼwiria echi hermanos japi sayéritami ju echi weli jáwami jitra. Tákoré ti a niyuri o ke ma, japi ta noká iʼwiri jiti nawisabo echi weli jáwami alí echi isélikami (Mat. 10:18). Echi oyériami, echi weli jáwami, echi japi ruyé echi noticias alí wiká pagótami, leeri echi textos Bíbliachi uchúwami japi ta uchá echoná oselí alí kipú japi ta ruyé japoná chunéliwa, jiti echi nóchali ju japi nokisáré. Alí echi pagótami japi aʼlá suléami ju, biné jépuká ju echi testigo Jeobá alí piri namuti bichiwi, jiti la jaré echi testigo Jeobá nílili.

¡MATÉTARABÁ, JEOBÁ!

Echi jubá 40 bamíali, ani nóchili echoná sucursales japi nirú omáana wichimóbachi alí nimili echi Testigos echoná wiká we natéami tribunales alí weli jáwami yúa. Ani we galé alí we natéami niraa iné echi hermanos japi ni yúa nocha echoná Departamento de Asuntos Legales japi wilí echoná central mundial alí omáana wichimóbachi. We ni kanili echi nóchali jitra japi ni isimí.

Elizabeth ko we tamí galé alí tamí iʼwírili echi jubá 45 bamíali, tákoré isini kaachi ata ikili jaré namuti jilírami. Ani we natéami niraa iné nijé upila jiti echi riká isíami ju, tákoré nayúami ju echi sistema inmunológico jitra japi isimí japi ke me jiwera nílima.

Suwaba jepuná bamíali, ati ineki japi Jeobá ju japi tamó iyá echi jiwérala alí tamó iʼwiri jiti niyúripo, alí ke ju jiti ta we machíami ju. Japi riká anili David, Jeobá iyá echi jiwérala binoy puéblowala (Sal. 28:8). Ata machí japi “Jeobá ju japi nikó tamujé jitra”.