Chúriká Jeobá tamó iʼwiri anachia

1. ¿Chúsiá ti newalé anachia, alí jépuká tamó iʼwírima? (1 Pedro 5:10).

JIPI jubá rawé we jilí ju alí echi Jeobá puéblowala newalé anachia. Japi riká, a keʼré japi jaré ko nayú bilé nayulí jitra japi ke saʼwiwáami ju, jarecho ko we risoa nili jiti mukuli bilé japi we galé alí jarecho ko sayéritami ju echi téemala jitra o echi gobiernos (Mat. 10:18, 36, 37). Nalí tákoré chuwé namuti jilírami ikí, bichíwisaré japi Jeobá tamó iʼwírima anachia (leeri 1 Pedro 5:10, TNM).

2. Japi ta cristianos ju, ¿chúsiá ti omeri anachia?

² Anachia aniwáami ju ke siné riwea Jeobá alí kanílika nóchilia echi japalí ti jilírami namuti ikí, japalí ti sayéritami ju o japalí ti nokinálisa echi namuti japi ke aʼlá ju. Ayénachó aniwáami ju kilí niraa buwea echi namuti aʼláala japi ikimea pe aminana. ¿Chúriká ti omeri anachia suwaba jepuná namuti? Ke ju jiti ta aboi we anáchami ju, nalí jiti Jeobá tamó iyá “echi jiwérala japi wabé jiwérami ju” (2 Cor. 4:7, TNM). Jenaʼí binelíwami binepo naó namuti japi Jeobá nee tamó iʼwírimia anachia alí binepo piri ta nokisáré jiti aʼlá néepo echi namuti.

RAʼICHIA JEOBÁ YÚA

3. ¿Chúsiá ti aní japi we semati ju raʼichia Jeobá yúa?

³ Jeobá ko nee bilé namuti we semati tamó iʼwírimia anachia echi jilírami namuti. Tákoré ti ke sébali aʼlá nokáami ju, echi ko isili japi ta oméripo echi yúa raʼichia (Heb. 4:16). Nalí, ¿chúsiá ti aní japi we semati ju raʼichia Jeobá yúa? Jiti ta omeri raʼichia Jeobá yúa chuwé hora japalí ti nakí, ruyea chuwé namuti, raʼichia sinúrika raʼicháliami niraa alí kumi ke japoná ti muchuwi, a keʼré we miká o echoná cárcel (Jon. 2:1, 2; Hech. 16:25, 26). Jeobá ko a tamó inami japi ta ané tákoré ti ke omeri aʼlá raʼíchika ruyea jiti ta we nati wiká namuti (Rom. 8:26, 27). ¿Kechi ko we semati ju raʼichia Jeobá yúa?

4. ¿Chúsiá aʼlá ju japi tánipo Jeobá japi tamó iʼwírima anachia?

⁴ Echoná Biblia, Jeobá ko tamó ané japi ta omeri tania chuwé namuti, nalí nísaré bi echi namuti japi echi nakí alí echi ko tamó kipú (1 Juan 5:14). ¿Achi aʼlá ju japi tánipo Jeobá japi tamó iʼwírima anachia? Ayena, jiti echi ko ju bilé namuti japi echi nakí. ¿Chúriká ti machí jepuná? Jiti echoná Biblia aní japalí ti anacha echi namuti jilírami, Jeobá ko néwariwéliti japi Satanás ikaléami ju (Prov. 27:11). Ayénachó aní japi Jeobá ko we inili iʼwírinalia echi japi ne sulachí jonsa nóchilia muchuwi echi (2 Crón. 16:9). Jiti la ti we aʼlá machí japi Jeobá ko echi riká isínali alí tamó iʼwírima anachia (Is. 30:18; 41:10; Luc. 11:13).

5. ¿Chúriká tamó iʼwiri Jeobá japalí ti raʼicha echi yúa? (Isaías 26:3).

⁵ Echi Biblia aní japi ta raʼichásaré Jeobá yúa echi namuti jitra japi ta we nata alí aní japi “echi kilíwami japi Onorúami tamó iyá, japi we jiwérami ju pe chuwé natáliami si, tibuma [tamujé] sulala alí natáala” (Filip. 4:7, TNM). ¡Ati waʼlú matétara iyá echi namuti jitra! Jiti echi pagótami japi ke nijewi Jeobá noká jaré namuti ma ke natamia echi jilírami namuti japi ikí alí ku kilí nílimia. Nalí, tákoré a pe kilí nili, japi Jeobá isimí wabé aʼlá ju echi yúa jiti tamó iʼwiri jiti ta ne bichíwali kilí nílipo japalí ta echi yúa raʼicha (ayénachó iné japi aní Mateo 12:43-45). Tamujé ko we bichiwi Jeobá, echi ko tamó iʼwiri jiti ke me natabo echi jilírami namuti japi ta ikí alí jiti ne bichíwali kilí nílipo (leeri Isaías 26:3). ¿Chúriká isimí? Echi ko tamó iʼwiri néwalayá textos Bíbliachi uchúwami japi néwariwéliti japi Jeobá we tamó galé alí tamó iʼwírinali (Sal. 62:1, 2).

6. ¿Piri ta anésaré Jeobá japalí ti raʼicha echi yúa? (Ayénachó iné echi foto).

⁶ Japi ta omeri nokayá. Japalí ti ikisaa namuti we jilírami, ruyepo Jeobá suwaba japi ta inili alí tánipo japi tamó iʼwírima kilí nilia alí jiti aʼlá machiká nokiboa (Sal. 55:22; Prov. 2:10, 11). Ke bi anepo japi tamó iʼwírima anachia, nalí ayénachó matétara iyabo (Filip. 4:6, TNM). Ayénachó aʼlá inepo chúriká tamó iʼwiri japalí ti ikí echi namuti jilírami alí sinibí matétara iyabo. Kiti riwepo japi echi namuti jilírami japi ta ikí isima japi ta ke inepo echi namuti aʼláala japi Jeobá tamó iyá (Sal. 16:5, 6).

ECHI BIBLIA

7. ¿Chúriká tamó iʼwiri binea echi Biblia jiti anachabo?

⁷ Jeobá ko tamó iyali echi binoy raʼicháala jiti tamó iʼwírima anachia. Echoná nirú wiká textos japi tamó newalari japi echi tamó iʼwiri. Japi riká, Mateo 6:8 aní: “Kétamo Onó galá machí mapu piri namuti newalé, mapalítamo ke cho táni”. Jesús anili jepuná raʼíchali alí echi ko we aʼlá machí chúriká ju binoy Onolá. Jiti la japalí ta risoa nili, ati we bichíwisaré japi Jeobá aʼlá machí japi ta newalé alí sinibí tamó iʼwírima. Echoná Biblia nirú wiká we semati raʼíchali japi tamó iʼwérili iyá jiti anachabo (Sal. 94:19).

8. a) Aní bilé busuréliami japi chukú echoná Biblia japi tamó iʼwiri anachia. b) ¿Piri tamó iʼwírima néwalayá echi busuréliami japalí ta newalesa?

⁸ Echi Biblia ayénachó olá busuréliami japi tamó iʼwiri anachia. Echi busuréliami tamó bineri namuti we natéami japi tamó iʼwiri aʼlá nátika nokayá (Prov. 2:6, 7). Japi riká, echi Biblia tamó ané japi ke me natabo echi namuti japi ikimea pe aminana, nalí japi ta sinibí rawé bichíwipo Jeobá (Mat. 6:34). Ati sinibí rawé leériami nísaká echi Biblia alí natásaká japi aní echoná, ke ti me jilí nirabo néwalayá echi busuréliami japi tamó iʼwírima japalí ti ikisaa namuti jilírami.

9. ¿Chúriká tamó iʼwiri binea echi pagótami jitra japi chabé pireili?

⁹ Echi Biblia ayénachó ruyé echi pagótami jitra japi chabé pireili japi nili japi riká tamujé, japi bichíwili Jeobá alí iʼwíritami nili echi jitra (Heb. 11:32-34; Sant. 5:17). Japalí ti biné jepuná pagótami jitra, tamujé ayénachó aminabi we bichiwi japi Jeobá ju “japi riká bilé namuti japoná ti aʼlá tibuta mochibo alí echi ju tamó jiwérala, japi sinibí tamó iʼwiri japalí ta ikí namuti jilírami” (Sal. 46:1). Ati we aʼlá binésaká echi pagótami jitra japi we bichíyami nili Jeobá alí we anáchami, jepuná tamó iʼwérili iyama jiti echi riká cho nokiboa (Sant. 5:10, 11).

10. ¿Piri ta nokisáré jiti echi Biblia we aʼlá tamó iʼwírima?

¹⁰ Japi ta omeri nokayá. Leéripo echi Biblia sinibí rawé alí osiboa versículos japi ta mayé japi tamó iʼwírima. Wiká hermanos ayénachó sinibí rawé leeri echi folleto Examinemos las Escrituras todos los días, jiti inili japi iʼwérili iyá suwaba rawé. Echi riká isili bilé hermana María riwéami.a Echi ko aní japi echi okuánika wénwala nayuli cáncer jitra alí japi tibuli okuánika japalí chéami suwili. ¿Piri iʼwírili jiti María anachama echi jilírami namuti? Echi ko jéaní: “Sinibí rawé ni leerie echi folleto Examinemos alí ni natie japi ni biné. Jepuná tamí iʼwírili natia Jeobá jitra alí echi namuti we baʼóami japi aní echoná Biblia alí ke bi natia echi namuti jilírami japi ni ikiyé” (Sal. 61:2).

ECHI HERMANOS

11. Machiyá japi jarecho hermanos anacha namuti we jilírami, ¿chúriká tamó iʼwiri?

¹¹ Jeobá ko tamó iyá wiká hermanos omáana Wichimóbachi piréami tamó iʼwírimia anachia. Machiyá japi sinéami echi hermanos ikí namuti jilírami alí anacha, tamó iʼwiri ke siwea (1 Ped. 5:9, TNM). ¿Chúsiá? Jiti, japalí ta iné japi echi hermanos ikí chopi iyiri namuti jilírami alí anacha, tamó iʼwiri machiyá japi tamujé ayénachó oméripo anachia chuwé namuti jilírami (Hech. 14:22, TNM).

12. ¿Piri ta oméripo nokayá anakupi niraa? (2 Corintios 1:3, 4).

¹² Echi hermanos ayénachó tamó iʼwérili iyá sinúrika niraa. Echi riká ikili echi apóstol Pablo. Japalí erta asali, wiká hermanos iʼwírili sinúrika niraa. Alí japalí osali echi cartas, Pablo ko raʼíchili echi jitra alí waʼlú matétara iyali jiti ku kanílitili alí iʼwérili iyali (Filip. 2:25, 29, 30; Col. 4:10, 11, TNM). Jipi rawé, echi hermanos ayénachó ke tamó awénili riwé alí tamó iʼwiri anachia, alí tamujé ayénachó omeri echi riká nokayá echi jitra, japalí echi newalesa (leeri 2 Corintios 1:3, 4).

13. ¿Piri iʼwírili bilé hermana Maya riwéami jiti anachama?

¹³ Ma inepo japi ikili bilé hermana Rusia bitéami, Maya riwéami. Bamíali 2020, jaré policías moʼili echi bitélachi alí chibi riká riweli aa echi namuti japi echi nakili. Miná ko, Maya torúami nili japoná chunéliwa jiti ruyeli jarecho echi namuti jitra japi bichiwi. ¿Chúriká iʼwírili echi hermanos? Echi ko jéaní: “Siné kaachi japalí ni ma ke omeria nilie anachia, echi hermanos tamí raʼíchili teléfono néeka, tamí osélili cartas alí mensajes alí tamí aneli japi we tamí galé”. Ayénachó anili: “Nijé ko we aʼlá machiyé japi echi hermanos alí hermanas we tamí galé alí japi ju japi riká nijé téemala. Nalí bamíali 2020 jonsa, ani aʼlá machiki jepuná jiti nijé binoy ineli japi a echi riká nili”.

14. ¿Piri ta nokisáré jiti narepo echi iʼwírili japi tamó iyá echi hermanos? (Ayénachó iné echi foto).

¹⁴ Japi ta omeri nokayá. Japalí ti ikí namuti jilírami, ke ti riwésaré napawía echi hermanos yúa japi ju japi riká tamujé téemala. Newalabo japi ta omeri iʼwírili tania echi ancianos japi ju “japi riká bilé risochí japi tibú echi iká jitra, bilé risochí japi tibú echi we jiwérami ukí jitra” (Is. 32:2). Ayénachó, kiti wikawabo japi echi hermanos ayénachó ikí namuti jilírami. Ati nokisáaká namuti aʼláala iʼwírimia echi hermanos japi newalé, ke ti me jilí nirabo kanílika anachia echi namuti jilírami japi ta aboi ikí (Hech. 20:35, TNM).

JAPI TA BUWEA PIRÉ

15. ¿Chúriká iʼwírili Jesús echi namuti japi buwea biteili, alí chúriká tamujé iʼwiri? (Hebreos 12:2).

¹⁵ Echi namuti aʼláala japi Jeobá nijima pe aminana, tamó iʼwiri anachia (Rom. 15:13). Newalabo japi Jesús anáchili echi namuti we jilírami japi ikili japalí biteili jenaʼí Wichimóbachi, jiti echi ko nátili echi namuti aʼláala japi buwea biteili (leeri Hebreos 12:2, TNM). Jesús ko machiyé, japi we nijéwiami nísaká, iʼwírima jiti riwíwitami nima Jeobá riwalá alí echi riká néwariwélitima japi suwaba echi namuti japi Satanás anili Jeobá jitra, ke bichíwali nili. Ayénachó, echi ko we kanílika buweli japi ku napawima echi Onolá yúa echoná ripá rewegachi alí japi silíami nima alí chotásima nulayá echi 144,000 ungidos yúa. Echi riká cho, natia japi ta sinibí pirélipo echoná Wichimóbachi we baʼóachi japi Onorúami nijima, tamó iʼwírima anachia chuwé namuti jilírami japi ta ikí jenaʼí Wichimóbachi japoná nulá Satanás.

16. Echi namuti japi buwea biteili bilé hermana, ¿chúriká iʼwírili anachia, alí piri mi biné echi jitra japi echi aní?

¹⁶ Inepo japi echi Wichimóbachi we baʼóami japi buwea biteili, iʼwírili anachia bilé hermana Rusia bitéami Ana riwéami. Japalí echi kunala chapirúami nili alí torúami nili echoná cárcel, echi ko anili: “Japi tamí iʼwírili ke siwea ko nili, raʼichia Jeobá yúa alí natia echi namuti aʼláala japi ni buwea bité. Ani machí japi jepuná namuti jilírami ke wilí rojorama. Jeobá ko niyúrima echi sayérala alí tamujé ayénachó”.

17. ¿Chúriká néwariwéliti japi ta natéami niraa iné japi ta buwea piré? (Ayénachó iné echi foto).

¹⁷ Japi ta omeri nokayá. Ikíripo natia echi namuti aʼláala japi Jeobá aní japi isima. Natabo japi ta ma piré echoná Wichimóbachi we baʼóachi tamujé téemala yúa alí amigos, alí japi sinéami we kaníliami ju. Echi riká nokayá, tamó iʼwírima natia japi echi namuti jilírami japi ta ikí jipi ke wilí rojorama alí ke me jilí nirabo anachia (2 Cor. 4:17, TNM). Ayénachó iʼwérili nokiboa ruyea jarecho pagótami echi namuti japi ta bichiwi. Natabo japi echi pagótami japi ke nijewi Jeobá we jilí niraa piré ke bilé namuti buwea. Echi ko olá wiká karú ikiwáami, nalí ke machí echi namuti aʼláala japi Jeobá isima. A keʼré japi ta ruyesa kuabi namuti japi Jeobá isima, iʼwírima jiti aminabi machinálima.

18. ¿Chúsiá ti bichiwi japi a ikimea japi Jeobá anili?

¹⁸ Ma anachasa suwaba echi namuti jilírami, Job ko jéaneli Jeobá: “Jipi ko ni machí japi mi omeri isiá chuwé namuti alí japi ke bilé namuti japi mi nati isimia jilí nima mujé jitra” (Job 42:2). Job ko bineli japi ke bilé namuti omeri chewia japi Jeobá isima japi echi aní. Machiyá jepuná tamó iyá iʼwérili jiti anachabo. Inepo bilé ejemplo. Natabo bilé mukí jitra japi nayúami ju alí we siwea nili jiti simili wiká doctores yúa alí ke bilé omérili saʼwea. Siné rawé, echi mukí ritiwá bilé doctor japi we machíami ju alí echi doctor ruyé piri ju japi nayú alí chúriká isima ku saʼwea. Tákoré echi mukí a bijí nayúami ju, echi ko ma kilí atí alí ke me jilí niraa anachia jiti machí japi ku saʼwimea. Echi riká cho, ati anachabo echi namuti jilírami jiti ta machí japi a ne bichíwali we baʼóami nima jenaʼí Wichimóbachi.

19. ¿Piri ta newalé jiti anachabo?

¹⁹ Japi riká ti ma bineli, jiti tamó iʼwírima anachia, Jeobá tamó iyá echi Biblia, echi hermanos, japi ta buwea piré alí riwé japi ta echi yúa raʼichabo. Ati iʼwérili nokisáaká néea suwaba jepuná namuti japi Jeobá tamó iyá, echi ko tamó iʼwírima anachia chuwé namuti jilírami japalí chéami ma suwábitami nisa Satanás alí suwaba echi namuti chati (Filip. 4:13, TNM).