BINELÍWAMI 33
CANCIÓN sjj-S 4 “Jehová es mi Pastor”
Bichiwi japi Jeobá a mi galé
“Ni mi paali tamí yúa we galeka” (JER. 31:3).
JAPI TA JITRA BINEPO
Chúsiá we natéami ju japi ta we bichíwipo japi Jeobá a tamó galé alí piri tamó iʼwírima jiti aminabi we bichíwipo japi echi riká ju.
1. ¿Chúsiá mi katúwika raʼíchili Jeobá yúa? (Ayénachó iné echi imagen).
¿AMI newalá echi rawé japalí mi katúwika raʼíchili Jeobá yúa? Echi riká mi isili jiti mi we galeli Jeobá alí mi we aʼlá machili echi. Jiti la mujé ko aneli japi mi bachá isima japi echi nakí alí japi mi sinibí we galema ne sulachí jonsa, japi mi iwí jonsa, japi mi nata alí mujé jiwérala jitra (Mar. 12:30). Echalí jonsa, mujé ko aminabi we galeli Jeobá. Jiti la, bilé mi nárisaká “¿Achi mi ne bichíwali we galé Jeobá?”, mujé ko sapú animea: “¡Ayena! Ke nirú bilecho japi ni echi yena galé”.
¿Achi mi newalá chu yena mi galeli Jeobá japalí mi katúwili echi yúa alí pakoli? (Iné echi párrafo 1).
2, 3. ¿Piri nakí Jeobá japi mi we bichíwima? (Jeremías 31:3). ¿Piri binepo jena binelíwami?
2 Nalí, ¿piri mi animea bilé mi nárisaká “¿Achi mi bichiwi japi Jeobá a mi galé?”? Echalí a keʼré japi mi ke sapú animea japi ayena, jiti mi natámiré japi mi ke aʼlá isíami ju alí mi ke galérami nísaré echi jitra. Bilé hermana japi inílili japi ke galéliwa echi wénwala jitra, jéanili: “Ani machí japi ni we galé Jeobá. Nalí wisabé niraa nijé ko nárika isimí achi echi tamí galé”. Nalí, ¿piri mi iʼwírima machiyá japi Jeobá ne bichíwali mi galé?
3 Jeobá ko nakí japi mi we bichíwima japi echi ko a mi galé (leeri Jeremías 31:3). Echi ko nakili japi mi aminabi binema echi jitra alí japi mi echi amígowala nima. Alí, japalí mi katúwika isili echi yúa alí mi pakoli, echi ko mi aneli japi mi we galema alí ke siné mi riwema. Jeobá echi riká isimí sinéami echi nijéwami yúa alí ayénachó mujé yúa. Jiti la, mujé ko we natéami ju Jeobá jitra (Mal. 3:17). Jeobá ko nakí japi mi we bichíwima japi echi a mi galé, japi mi inílima japi riká echi apóstol Pablo japi osali: “Jiti ni we bichiwi japi echi mukuwáami, ke cho echi ángeles, ke cho echi isélikami, ke cho echi namuti jipi nirúami o japi nirúlima pe aminana, ke cho japi jiwérami ju, ke cho we ripá o we rilé asiyá, ke cho bilecho namuti japi ikí nirú omérima isiá japi Onorúami riwema tamó galea” (Rom. 8:38, 39, TNM). Jenaʼí binelíwami binepo chúsiá we natéami ju japi ta bichíwipo japi Jeobá a tamó galé alí piri tamó iʼwírima jiti aminabi bichíwipo japi a echi riká ju.
CHÚSIÁ WE NATÉAMI JU BICHIWIA JAPI JEOBÁ A TAMÓ GALÉ
4. ¿Chu iyiri ju bilé echi Satanás misúala japi wabé nee, alí piri ta nokisáré jiti ke rujipo echoná?
4 Ata bichíwisaká japi Jeobá a tamó galé, ke rujipo Satanás misúalachi (Efes. 6:11). ¿Chu iyiri ju bilé echi misúala japi Satanás nee jiti ta riwepo nijewia Jeobá? Echi ko iʼwérili isimí jiti bichíwipo japi Jeobá ke tamó galé. Kiti siné wikawabo japi Satanás we cha isíami ju. Echi Biblia aní japi ju japi riká bilé mawiyá (1 Ped. 5:8, 9). Ne sojí sinibí, echi mawiyá chapí echi boʼwá japalí ke jiwérami ju alí awénili uchuti. Echi riká cho Satanás wisabé iʼwérili isimí jiti riwepo nijewia Jeobá japalí ti ke jiwera nili, japalí ti risiyá nili o japalí ti siwea nili echi namuti jitra japi ta chabé ikili, echi jilírami namuti japi ikí jipi o jiti ta nata japi ikimea pe aminana (Prov. 24:10). Jiti ta ke rujipo Satanás misúalachi alí jiti ke niyúrima, ata iʼwérili nokisáré sayeria echi Diablo alí ti iʼwérili nokisáré bichiwia japi Jeobá a tamó galé (Sant. 4:7).
5. ¿Chúsiá we natéami ju japi ta inílipo japi Jeobá tamó galé alí natéami niraa iné?
5 Ata bichíwisaká japi Jeobá a tamó galé, ati aminabi mulíwipo echi. ¿Chúsiá? Jiti Jeobá ko tamó niwali jiti ta galepo alí jiti ta inílipo japi ta galéliwa. Japalí bilé néwariwéliti japi tamó galé, tamujé ko ayénachó galé echi. Jiti la, japalí ti aminabi inílisa japi Jeobá tamó galé alí tamó natéami niraa iné, ati aminabi galepo echi (1 Juan 4:19). Alí ti aminabi we galesa Jeobá, echi ko aminabi tamó galema, jiti echoná Biblia aní: “Mulubéanasi Riosi yuwa, aʼlí Riosi ayénachó mulubéanama ʼyemi yuwa” (Sant. 4:8). Jipi ko binepo, piri tamó iʼwírima ibili niraa aminabi we bichiwia japi Jeobá tamó galé.
¿PIRI MI IʼWÍRIMA BICHIWIA JAPI JEOBÁ A MI GALÉ?
6. ¿Piri mi omeri tania Jeobá ami jilí niráaká bichiwia japi echi mi galé?
6 Tani Jeobá japi mi iʼwírima inamia chúsiá echi mi galé (Luc. 18:1; Rom. 12:12). Isini kaachi sinepi rawé a keʼré japi mi newalema wisabé niraa anea Jeobá japi mi iʼwírima binoy inea japi riká echi mi iné. Ami jilí niráaká bichiwia japi Jeobá mi galé, newalá japi Jeobá ko ne walubéala ju mujé sulala yúa (1 Juan 3:19, 20, TNM). Echi ko we aʼlá mi machí alí iné echi we aʼlá cualidades japi mi olá alí japi mujé ke iné (1 Sam. 16:7; 2 Crón. 6:30). Jiti la, ruyé Jeobá japi mi inili alí tani japi mi iʼwírima aminabi we bichiwia japi echi mi galé (Sal. 62:8). Miná ko ma raʼichasa echi yúa, jipi ko isí japi mi tánili. Jenaʼí binepo jaré namuti japi mi omeri isiá.
7, 8. ¿Chúriká tamó iʼwiri echi Salmos bichiwia japi Jeobá a tamó galé?
7 Bichiwi japi Jeobá aní. Onorúami ko néeli echi espíritu santo iʼwírimia echi pagótami japi Biblia osali jiti aʼlárika osimea japi chu isíami ju echi. Japi riká, iné jepuná we semati raʼíchali japi osali David: “Jeobá ko mulipi atí echi yúa japi we omona nili ne sulachí jonsa; alí iʼwiri echi japi risoa nílika muchuwi” (Sal. 34:18). Echi riká mi iníliaká, a keʼré japi mi nata japi ke bilé mi inami alí japi ke bilé omeri mi iʼwiria. Nalí Jeobá ko aní japi sinibí mulipi asimea mi yúa, jiti echi ko machí japi echalí ju japalí mi wabé newalé iʼwírili. Echoná bilecho salmo, David ko osali: “Napabú nijé ikowala echoná mujé níwala bótechi namuti wichila jitra niwárami” (Sal. 56:8). Chabé echi pagótami japi we biléana járiami nili, néeli echi bote baʼwí roʼá tomea jiti ke komíwima jiti we natéami nili. Echi riká cho, japalí mi we risoa nili echi namuti jilírami jitra japi mi ikí, Jeobá ayénachó we risoa nili. Jepuná ko ju japi riká ko echi ko napabúa mujé ikowala jiti we mi natéami niraa iné. David ayénachó jéaneli Jeobá: “Mujé aʼlá machí suwaba japi ni isimí” (Sal. 139:3). Jeobá ko aʼlá machí suwaba echi namuti japi mi isimí, alí echi ko iné echi namuti aʼláala japi mi isimí (Heb. 6:10). ¿Chúsiá echi riká isimí? Jiti echi ko we natéami niraa iné suwaba echi namuti japi mi isimí echi kanílitimia.a
8 Echi versículos jitra japi we semati aní, ju japi riká ko Jeobá jériká mi anea: “Ani nakí japi mi machimea japi ni we mi galé alí ni we natéami niraa mi iné”. Nalí, japi riká ti ma bineki, Satanás ko nakí japi mi bichíwima japi Jeobá ke mi galé. Jiti la, ami jilí niráaká bichiwia japi Jeobá mi galé, mujé ko omeri jériká nárika isiá: “¿Jépuká ni bichíwima: echi Satanás japi ikaléami ju o echi Onorúami japi sinibí ne bichíwali aní?” (Juan 8:44; Sal. 31:5).
9. ¿Piri ané Jeobá echi japi binoy galé? (Éxodo 20:5, 6).
9 Natá japi chu inili Jeobá echi jitra japi binoy galé. Japi riká, natá japi Jeobá aneli Moisés alí echi israelitas (leeri Éxodo 20:5, 6). Onorúami ko aní japi ke siné riwema galea echi japi binoy galé. Jiti sinibí galéami ju, echi ko ke siné riwema galea japi binoy galé (Neh. 1:5). Jiti la, ami isini kaachi jilí niráaká bichiwia japi Jeobá mi galé, nárika isí: “¿Achi nijé galé Jeobá?”. Miná ko natá jepuná: mujé we mi galéaká echi alí mi iʼwérili isíaká echi kanílitia, bichiwi japi echi ko ayénachó we mi galé (Dan. 9:4; 1 Cor. 8:3). Ami we bichíwiaká japi mi galé Jeobá, we bichiwi japi echi ko ayénachó we mi galé alí ke siné mi riwema.
10, 11. ¿Chúriká nakí Jeobá japi mi inema japi echi isili nijía binoy Nolá Jesús? (Gálatas 2:20).
10 Natá jépuká jitra Jeobá nijili binoy Nolá. Jeobá ko iyali echi pagótami bilé chiliwéliami wabé natéami japalí júali binoy Nolá Jesús jiti mukumea tamujé jitra (Juan 3:16, TNM). Nalí ke bi júali echi Nolá jiti mukumea sinéami pagótami jitra, nalí ayénachó mi jitra. Natá echi apóstol Pablo jitra. Japalí kecho cristiano nili, echi ko isili wiká namuti we chati alí miná ko aminabi iʼwérili isili aʼlá isiá (Rom. 7:24, 25; 1 Tim. 1:12-14). Tákoré echi riká nili, Pablo ko ariká ineli japi Jeobá isili nijía binoy Nolá japi riká bilé chiliwéliami japi echi iyali binoy jitra (leeri Gálatas 2:20, TNM). Natá japi Jeobá ko néeli echi níwala espíritu jiti Pablo osimea echi raʼíchali, alí echoná Biblia uchuwi jiti tamó binérima echi namuti (Rom. 15:4). Jeobá ko nakí japi mujé ayénachó inema echi chiliwéliami japi riká mi jitra nijila. Echi riká mi inésaká, ami aminabi we bichíwima japi Jeobá a mi galé.
11 Ati waʼlú matétara iyá Jeobá jiti echi ko nijili binoy Nolá jiti mukumea tamujé jitra. Nalí Jesús ko ke bi nawali jenaʼí Wichimóbachi echi namuti jitra, ayénachó nawali jiti binérima echi bichíwali echi Onolá jitra (Juan 18:37). Bilé echi namuti bichíwali ko ju japi Jeobá inili echi kúchuwala jitra.
JESÚS BINÉRILI JAPI CHU YENA TAMÓ GALÉ JEOBÁ
12. ¿Chúsiá ti omeri bichiwia japi Jesús anili Jeobá jitra ne bichíwali ju?
12 Japalí Jesús iyénili jenaʼí Wichimóbachi, we kanílika binérili japi chúriká ju Jeobá (Luc. 10:22). Alí ti omeri bichiwia japi Jesús anili echi Onolá jitra ne bichíwali ju. Ke bilé ité japi wabé aʼlá machí Jeobá japi riká Jesús, jiti echi ko ma wiká millones bamíali biteili echi Onolá yúa echoná ripá rewegachi (Col. 1:15). Jesús ko we aʼlá machí chu yena binoy galé echi Onolá, ayénachó ineli chúriká echi Onolá néwariwélitili japi we galé echi ángeles japi nijéwami ju alí sinéami echi kúchuwala we nijéwami japi piré jenaʼí Wichimóbachi. Jenaʼí inepo chúriká japi Jesús binérili tamó iʼwiri aminabi bichiwia japi Jeobá a tamó galé.
13. ¿Chúriká nakí Jesús japi ta inepo Jeobá?
13 Jesús ko ineli Jeobá japi riká bilé Onolá we galéami alí nakí japi tamujé echi riká cho nokiboa. Jiti la, echoná Biblia wisabé niraa aneli Jeobá “Onó”. Alí japalí raʼíchili echi discípulos yúa, wisabé néeli echi raʼíchali “ʼyemi Onolá” alí “kétamo Onó ripá riwigachi atíami” (Mat. 5:16; 6:26). Kecho nawáachi Jesús jenaʼí Wichimóbachi, echi pagótami nijéwami aneli Jeobá “Suwaba Omériami”, “Walubéala”, “Walúala suwaba namuti Niwáami” alí che jaré riwalá. Nalí Jesús ko ne sojí sinibí aneli Jeobá “Onó”. Jepuná raʼíchali néwariwéliti japi Jeobá ko nakí japi sinéami japi nijéwami ju, we mulipi ka nílima echi yúa, japi riká bilé taa towí japi mulipi ka nili echi Onolá yúa japi we galéami ju. Ma inepo okuá ejemplos japoná Jesús néeli echi raʼíchali “Onó” animea Jeobá jitra.
14. ¿Chúriká néwariwélitili Jesús japi tamujé ibili niraa we natéami ju Jeobá jitra? (Mateo 10:29-31; ayénachó iné echi dibujo).
14 Bachá, inepo echi raʼíchali japi Jesús anili echoná Mateo 10:29-31 (leeri). Echoná anili japi echi Onolá aʼlá machí japalí bilé taa chuluwí mukusaa. Jeobá we aʼlá inéaká japi ikí bilé taa chuluwí japi ke echi nijéwami ju alí ke echi galé, ¿kechi ko mi mayé japi wabé natéami niraa iné ibili niraa echi pagótami japi echi galé alí nijewi? Jesús ayénachó anili japi tamujé Onolá aʼlá machí japi chu kipu kupá ti olá ibili tamujé. Jiti Jeobá we natéami niraa iné echi kuuchi namuti japi ti olá, ati we bichíwisaré japi echi ko we natéami niraa iné ibili tamujé. Echi raʼíchali jitra japi Jesús anili, ati machí japi Jesús ko nakí japi ta bichíwipo japi Jeobá a tamujé galé.
Jiti Jeobá we aʼlá machí japalí bilé taa chuluwí mukusaa, ¿kechi ko mi mayé japi mujé wabé natéami ju echi yúa jiti mi echi nijewi alí galé? (Iné echi párrafo 14).
15. Japi riká aní Juan 6:44, ¿piri mi biné Jeobá jitra?
15 Sinecho kaachi japalí Jesús anili jepuná raʼíchali “Onolá” chukú echoná Juan 6:44 (leeri, TNM). Japi riká mi ma ineli, Jeobá ko we simárika mi iʼwírili jiti mi echi amígowala nima. ¿Chúsiá echi riká isili? Jiti echi ko ineli japi mi olá we aʼlá cualidades (Hech. 13:48). Japalí Jesús anili echi raʼíchali japi oserúa chukú echoná Juan 6:44, echi ko ruyá aníliré japi Jeobá anili echoná Jeremías 31:3. Echoná Jeobá ko aneli echi puéblowala: “Ni mi paali tamí yúa we galeka” (ayénachó iné japi aní Oseas 11:4). Natá jepuná: tamujé Onolá Jeobá ke riwé mi galea, jepuná aniwáami ju japi echi ko iné japi mi olá we aʼlá cualidades tákoré mujé ko ke iné.
16. a) ¿Piri mi bineri Jesús, alí chúsiá mi bichíwisaré japi echi aní? b) ¿Piri tamó iʼwírima we bichiwia japi Jeobá ju echi Onó japi ta newalé? (Iné echi recuadro “Echi Onó japi ta sinéami newalé”).
16 Jesús ko mi bineri japi Jeobá ke bi echi Onolá ju, nalí ayénachó mujé Onolá. Echi ko nakí japi mi we bichíwima japi Jeobá mi galé alí mi we natéami niraa iné. Jiti la, isini kaachi ami jilí nirasa bichiwia japi Jeobá mi galé, ku natá japi Jesús anili alí bichiwi echi, jiti echi ko sinibí ne bichíwali aní alí echi ju japi wabé aʼlá machí tamujé Onolá Jeobá (1 Ped. 2:22).
IʼWÉRILI ISÍ AMINABI BICHIWIA JAPI JEOBÁ A MI GALÉ
17. ¿Chúsiá ti aminabi we bichíwisaré japi Jeobá a tamó galé?
17 Japi riká ti ma bineli, Satanás ko we chati ju alí iʼwérili isima jiti riwepo nijewia Jeobá. Bilé echi namuti japi echi nee ko ju, isiá japi natabo japi Jeobá ke tamó galé. ¡Kiti riwepo japi niyúrima! (Job 27:5). Jiti la, iʼwérili nokiboa aminabi we bichiwia japi Jeobá a tamó galé.
18. ¿Piri mi iʼwírima aminabi we bichiwia japi Jeobá a mi galé?
18 Jenaʼí binelíwami ata bineli jaré namuti japi mi iʼwírima we bichiwia japi Jeobá mi galé. Japi riká, tani Jeobá japi mi iʼwírima binoy inea japi riká echi mi iné alí natá echi textos japi néwariwéliti japi chu inili Jeobá echi jitra japi nijéwami ju. Ayénachó aʼlá nima japi mi ke wikawama japi echi ko ke siné riwema galea echi japi binoy galé. Alí sinibí newalá japi echi ko nijili binoy Nolá mujé jitra. Alí japi riká anili Jesús, Jeobá ju mujé Onolá. Echi riká mi isísaká, miná ko japalí bilé mi nárisa “¿Achi mi we bichiwi japi Jeobá a mi galé?”, mujé ko sapú animea: “¡Ayénaʼá! Alí ni iʼwérili isimí sinibí rawé néwariwélitia japi nijé we galé echi”.
CANCIÓN sjj 154 Wabé galéami nipo