BINELÍWAMI 34
CANCIÓN sjj 3 Nijé mi wichii, Jeobá
Bichiwi japi Jeobá mi ku wikáwili
“Mujé ko tamí ku wikáwili japi ni ke aʼlá isili alí echi chati namuti” (SAL. 32:5).
JAPI TA JITRA BINEPO
Inepo jaré versículos japoná ruyé japi Jeobá tamó ku wikawi japalí ti omona nili alí riwé nokayá echi chati namuti, alí binepo chúsiá we natéami ju japi ta bichíwipo japi a echi riká isimí.
1, 2. ¿Piri isimí Jeobá japalí ti ne bichíwali omona nili echi jitra japi ta nokali, alí piri tamó iníliti machiyá jepuná? (Ayénachó iné echi dibujo).
ECHI silíami David we omona nílili echi namuti chati jitra japi chabé isili (Sal. 40:12; 51:3; raʼíchali japi ripá uchuwi). Nalí, japi riká echi ko ne sulachí jonsa omona nílili echi jitra, Jeobá ko ku wikáwili (2 Sam. 12:13). Japalí David machili japi Jeobá ku wikáwili, echi ko we kanílili alí ku kilí nílili (Sal. 32:1).
2 Japi riká David, tamujé ayénachó ku kilí nílipo machiyá japi Jeobá tamó ku wikawi. Tákoré ti nokali namuti chati, ati ku kilí nili machiyá japi Jeobá sinibí tamó ku wikawi japalí ti ne sulachí jonsa omona nili, japalí ta nawesa japi ta nokali alí ti iʼwérili noká ma ke checho nokayá echi chati namuti (Prov. 28:13; Hech. 26:20; 1 Juan 1:9). Alí ti ku kanili machiyá japalí Jeobá tamó ku wikawi, ma ke newalá echi namuti chati japi ta nokali alí ke tamó castigo iyama echi jitra (Ezeq. 33:16).
Echi silíami David osali wiká salmos japi ruyé japi Jeobá wikáwiami ju. (Iné echi párrafos 1 alí 2).
3, 4. ¿Chu inílili Jennifer? ¿Piri binepo jenaʼí binelíwami?
3 Tákoré echi riká ju, a keʼré japi isini kaachi ati jilí nirabo bichiwia japi Jeobá tamó ku wikáwili. Ma inepo japi echi riká inílili Jennifer. Echi ko taa ka jonsa binéritami nili Jeobá jitra, nalí japalí ma waʼlú pe nili chotásili isiá chati namuti. Ma jaré bamíali simírisa, echi ko riweli cha isiá alí katúwika raʼíchili Jeobá yúa alí pakoli. Jennifer jéaní: “Chabé ko ani wisabé niraa isié echi nasawíliami chati, we ni rikúe, we ni iyóami nili alí mea winomí nili wabé natéami tamí jitra. Nijé ko machiyé japi riká ni ma wikáwili tánili Jeobá alí ni ma riweli cha isiá, ani wikáwirami nima jiti Jesús ma mukuli tamí jitra. Nalí, ke ni sulachí jonsa bichiwie japi Jeobá tamí ku wikáwili”.
4 ¿Achi mujé ayénachó jilí niraa bichiwia japi Jeobá mi ku wikáwili echi chati namuti japi mi isili chabé? Newalá japi Jeobá ko nakí japi mi we bichíwima japi riká David, japi Jeobá we aʼláala ju alí ku wikáwiami. Jenaʼí binelíwami binepo chúsiá we natéami ju bichiwia japi Jeobá tamó ku wikáwili alí piri tamó iʼwírima echi riká nokayá.
CHÚSIÁ WE NATÉAMI JU BICHIWIA JAPI JEOBÁ TAMÓ KU WIKÁWILI
5. ¿Piri nakí Satanás japi natabo? Aní bilé ejemplo.
5 Ata we bichíwisaká japi Jeobá tamó ku wikáwili, ke ti rujipo echoná bilé Satanás misúalachi. Ata newalásaré japi echi ko chuwé namuti isima jiti ta riwepo nóchilia Jeobá. Japi riká, bilé echi misúala japi we nee ko ju, tamó natárimia japi echi namuti japi ta nokali we chati ju, jiti la Jeobá ke siné tamó ku wikáwima. Natabo echi rijoi Corinto bitéami japi isili echi nasawíliami chati, jiti la machibúrami nili echoná congregación jonsa (1 Cor. 5:1, 5, 13). Miná ko, echi ko omona nílili echi jitra alí riweli cha isiá. Nalí Satanás ko nakiyé japi echi hermanos ke ku wikáwima alí japi ke riwema japi ku roʼima echoná congregación. Echi riká ikílaká, Satanás isímili japi echi rijoi natama japi isili bilé namuti chati japi ke siné wikáwirami nima. Alí miná ko echi ko wabé omonama alí riwema nóchilia Jeobá. Jipi rawé, jiti ta riwepo nóchilia Jeobá, Satanás ko nakí japi ta natabo japi Jeobá ke siné omérima tamó wikawia echi chati namuti japi ta nokali. Nalí tamujé ko ma “galá machí mapurigá wabé ʼyékaka olá echi riablo” (2 Cor. 2:5-11).
6. ¿Piri tamó iʼwírima jiti ma ke omona nílipo echi chati namuti jitra japi ta nokali?
6 Ata we bichíwisaká japi Jeobá tamó ku wikáwili, ma ke omona nílipo echi jitra japi ta nokali. Ke chati ju japi ta omona nílipo japalí ti chati namuti nokisaa (Sal. 51:17). ¿Chúsiá? Jiti echi tamó iʼwiri jiti aʼlá ku nokiboa (2 Cor. 7:10, 11). Nalí, ati we omona nílisaká echi namuti jitra japi ta nokali tákoré ti ma riweli echi riká nokayá, a keʼré japi ta siwepo alí ma ke iʼwérili nokinálipo aʼlá nokayá. Nalí, ati we bichíwisaká japi Jeobá tamó ku wikáwili, ati ma ke cha níliporé echi jitra. Echi riká we ti bichíwipo japi Jeobá kanili tamujé yúa alí ti ku kanílika nóchilipo echi (Col. 1:10, 11; 2 Tim. 1:3). Jipi ko inepo piri tamó iʼwírima ibili niraa tamujé we bichiwia japi Jeobá a tamó ku wikáwili.
¿PIRI MI IʼWÍRIMA BICHIWIA JAPI JEOBÁ MI KU WIKÁWILI?
7, 8. ¿Piri anili Jeobá binoy jitra echoná Éxodo 34:6, 7, alí chúriká tamó iʼwiri jepuná?
7 Natá piri anili Jeobá binoy jitra. Japi riká, natá japi aneli Moisés echoná kawírali Sinaí (leeri Éxodo 34:6, 7). Tákoré Jeobá olá wiká cualidades we semati, echi ko nalí aneli Moisés japi echi ko ju bilé Onorúami we aʼláala alí simá isíami. Jiti la, ¿achi mi mayé japi Jeobá ke ku wikáwima bilé pagótami japi galé echi alí riwé cha isiá? Jeobá ke ku wikáwisaká echi pagótami, echi ko we cha isíami nímili alí ke simá isíami, nalí Jeobá ke siné echi riká isima.
8 Japalí Jeobá aní japi we aʼláala ju alí simá isíami, ata bichíwisaré jiti echi ko ne sinibí bichíwali aní (Sal. 31:5). Jiti la, ami jilí niráaká bichiwia japi Jeobá mi ku wikáwili, natá jepuná: ami we bichíwisaká japi Jeobá we aʼláala ju, simá isíami alí japi ku wikawi sinéami, ami bichíwisaré japi Jeobá ayénachó mi ku wikawi.
9. ¿Piri tamó bineri Salmo 32:5 japi chúriká Jeobá tamó ku wikawi?
9 Natá japi echoná Biblia Jeobá tamó bineri japi chúriká ku wikawi. Japi riká, David ko aneli Jeobá: “Mujé ko tamí ku wikáwili japi ni ke aʼlá isili alí echi chati namuti” (leeri Salmo 32:5). Echi raʼíchali hebrea japi jenaʼí versículo traducíriwa japi riká “wikawia”, ayénachó aniwáami ju “ayawia” o “toyá”. Jiti la, japalí Jeobá wikáwili David, jepuná ko nili japi riká ko iyea echi namuti we betéami japi David aperia inárili alí miná tóola. Echi jitra, David ko ma ku kilí nílili alí we kanílili (Sal. 32:2-4). Tamujé ayénachó ne sulachí jonsa omona nílisaká echi jitra japi ta nokali, ayénachó ta inílipo japi riká David. Ma ke natéami ju japi aminabi natabo echi namuti japi ta nokali jiti ma ke ité; Jeobá ko ma ayáwili alí miná tóoli.
10, 11. Japi riká aní Salmo 86:5, ¿piri ta biné Jeobá jitra?
10 (Leeri Salmo 86:5). David ko anili japi Jeobá “sinibí wikáwiami” ju. ¿Chúsiá Jeobá we aʼláala ju echi yúa japi omona nili echi namuti jitra japi nokali? Echi versículo aní: “Mujé ko we galé sinéami japi nijéwami ju”. Japi riká ti bineli echoná binelíwami 33, Jeobá ko sinibí we galé alí ke riwé echi japi nijéwami ju. Jiti la, echi ko a wikawi echi japi omona nili echi namuti jitra japi nokali alí riwé cha nokayá (Is. 55:7). Ami we jilí niráaká bichiwia japi Jeobá mi ku wikáwili, aʼlá nima japi mi jériká natama: “Ani machí japi Jeobá sinibí wikawi sinéami echi japi riwé cha nokayá alí wikáwili tani. Jiti la ni a omeri bichiwia japi Jeobá ayénachó tamí ku wikáwili”.
11 Echi Biblia ayénachó aní japi Jeobá we aʼlá machí chúriká ti niwárami ju, echi ko machí japi ta ke sébali aʼlá nokáami ju alí jepuná we tamó ku kaníliti (Sal. 139:1, 2). Binepo jepuná jitra inea bilecho salmo japi David osali, japi tamó iʼwírima we bichiwia japi Jeobá tamó wikáwinali.
PIRI NEWALÁ JEOBÁ TAMUJÉ JITRA
12, 13. Japi riká aní Salmo 103:14, ¿piri newalá Jeobá alí piri isimí?
12 (Leeri Salmo 103:14). David anili bilé namuti japi jitra Jeobá ko ku wikawi echi japi ne sulachí jonsa omona nili echi jitra japi isili alí riwé echi riká isiá. Aní japi Jeobá ko “sinibí newalá japi ta saté jitra niwárami ju”. Jepuná ko aniwáami ju japi echi ko machí japi ta ke sébali aʼlá nokáami ju alí japi ta isini kaachi ke aʼlá nokiboa. Aminabi binepo echi jitra japi anili David alí piri aniwáami ju.
13 David anili japi Jeobá aʼlá machí chúriká ti niwárami ju. Echi ko niwali Adán echi saté jitra. Jiti la, echi ko machí chúriká niwárami ju echi pagótami alí piri newalé. Japi riká, echi ko machí japi newalé koʼyá, ochiyá alí iwía. Alí nirúlisaká bilé pagótami japi sébali aʼlá isíami ju, ayénachó newalema echi bikiá namuti (Gén. 2:7). Nalí ke echi bi ju, jiti japalí jonsa Adán alí Eva ke aʼlá nokali, sinéami japi ta echi kúchuwala ju ke ti sébali aʼlá nokáami ju alí ti iʼwérili nokisáré ke nokayá japi chati ju. David ke bi anili japi Jeobá machí japi ta ke sébali aʼlá nokáami ju, nalí ayénachó japi echi ko newalá echi jitra. Echi raʼíchali “newalá” hebreo niraa, ayénachó ruyá aní japi Jeobá ko aʼlá inami japi isini kaachi ke aʼlá nokiboa, nalí ati omona nílisaká ne sulachí jonsa echi jitra japi ta nokali, Jeobá ko we aʼláala nima tamujé yúa alí tamó ku wikáwima (Sal. 78:38, 39).
14. a) ¿Piri tamó bineri Salmo 103:12 japi chúriká isimí Jeobá tamó ku wikawia? b) ¿Chúriká néwariwéliti echi ejemplo David jitra japi Jeobá ko sébali aʼlá wikáwiami ju? (Ayénachó iné echi recuadro “Jeobá ko tamó ku wikawi alí ma ke siné newalá japi ta nokali”).
14 ¿Piri che namuti tamó bineri japi aní Salmo 103 japi chúriká Jeobá tamó ku wikawi? (Leeri Salmo 103:12). David anili japalí Jeobá tamó ku wikawi, echi ko we miká riwé echi chati namuti japi ta nokali japoná ti jonsa muchuwi, “japoná jonsa machina echi rayénali alí japoná ku bokowí”. ¿Piri ta biné jepuná jitra? Japoná jonsa machina echi rayénali alí japoná ku bokowí, we miká ju anakupi niraa. Jepuná ko aniwáami ju japalí Jeobá tamó ku wikawi echi chati namuti japi ta nokali, echi ko ju japi riká ko we miká toyá japoná ti jonsa muchuwi. Jiti la, ke bilé namuti isima japi echi ko checho ku natama japi ta nokali alí ke tamó ku newalárima (Ezeq. 18:21, 22; Hech. 3:19).
15. ¿Piri mi omeri isiá ami bijí omona níliaká echi namuti jitra japi mi isili chabé?
15 Ami bijí omona níliaká echi chati namuti jitra japi mi isili chabé, natia japi aní Salmo 103 mi iʼwírima bichiwia japi Jeobá mi ku wikáwili. Nárika isí: “Jeobá néwalayáaká japi ni ke sébali aʼlá isíami ju alí tamí ku wikáwiaká jiti ni omona nili echi jitra japi ni isili alí ma ni ke che echi riká isimí, ¿kechi ko nijé ayénachó newalásaré? Alí, Jeobá ma ke nátiaká echi chati namuti japi ni isili chabé alí ma ke tamí ku newaláriaká, ¿kechi ko nijé ayénachó ma ke natásaré echi namuti?”. Jeobá ko ma ke nata echi namuti japi mi ku wikáwili, jiti la mujé echi riká cho isísaré (Sal. 130:3). Japalí mi ma we bichíwisa japi Jeobá mi ku wikáwili, ke mi omona nílima echi chati namuti jitra japi mi isili alí mi ku kanílika nóchilima Jeobá.
16. ¿Chúsiá ke aʼlá ju japi mi we natama echi chati namuti japi mi isili chabé? (Ayénachó iné echi dibujo).
16 Newalá japi aminabi natia echi namuti japi ta nokali chabé ko ju, japi riká ko melia o ulichia bilé carro alí we néea echi espejo upaka ku inemia. Tákoré aʼlá ju japi mi isini kaachi inema echi espejo jiti mi machimea piri nirú upaka, ke aʼlá ju japi mi we inema jiti mi ke cha ikimea, mujé nalí inésaré japi nirú bacháami. Echi riká cho, aʼlá ju japi mi isini kaachi ku natama echi namuti japi mi ke aʼlá isili chabé jiti mi binema echi jitra alí jiti mi iʼwérili isima ke echi riká ku isiá. Nalí ami wabé natásaká echi jitra, ami we omona nílima alí ke mi kanílika nóchilima Jeobá. Wabé aʼlá ju japi mi natama aminabi aʼlá nóchilia Jeobá alí japi Jeobá isima pe aminana, japalí ma kanílika pirélipo alí echi chati namuti japi ikili chabé “ma ke tasi newalárami nima” (Is. 65:17; Prov. 4:25).
Japi riká bilé carro méliami ke we néesaré echi espejo upaka inemia nalí japi nirú bacháami, echi riká cho tamujé inésaré japi ikimea pe aminana, ke ko echi namuti japi ta chabé nokali. (Iné echi párrafo 16).
AMINABI IʼWÉRILI ISÍ BICHIWIA JAPI JEOBÁ MI KU WIKÁWILI
17. ¿Chúsiá ti aminabi iʼwérili nokisáré we bichiwia japi Jeobá a tamó galé alí tamó ku wikawi?
17 Sinéami ta iʼwérili nokisáré aminabi we bichiwia japi Jeobá a tamó galé alí sinibí tamó ku wikawi (1 Juan 3:19, TNM). ¿Chúsiá? Jiti Satanás aminabi iʼwérili isima japi ta natabo japi Jeobá ke tamó galé alí ke siné tamó ku wikawi. Echi ko nakí japi ta riwepo nóchilia Jeobá alí aminabi iʼwérili isima echi riká isiá jiti machí japi teeli bi bitélima (Apoc. 12:12, TNM). ¡Kiti riwepo japi Satanás niyúrima!
18. ¿Piri mi isísaré jiti mi we bichíwima japi Jeobá mi galé alí mi ku wikáwili?
18 Echoná binelíwami 33, ata ineli piri mi iʼwírima we bichiwia japi Jeobá mi galé. Alí jena binelíwami ata ineli piri mi isísaré jiti mi we bichíwima japi Jeobá a mi ku wikáwili. Japi riká, natá piri anili Jeobá binoy jitra alí japi aní echi Biblia japi chúriká ku wikawi. Alí kiti wikawá japi Jeobá sinibí newalá japi ta ke sébali aʼlá nokáami ju alí we aʼláala ju tamujé yúa. Ayénachó kiti wikawá japi Jeobá sébali aʼlá ku wikawi. Ami isísaká suwaba jepuná namuti, mujé ko animea japi riká David: “¡Matétarabá Jeobá, jiti ‘mujé ko tamí ku wikáwili japi ni ke aʼlá isili alí echi chati namutiʼ!” (Sal. 32:5).
CANCIÓN sjj 1 Jeobá simá isíami ju