BINELÍWAMI 7
CANCIÓN sjj-S 15 Alabemos al primogénito de Jehová
Chúriká mi iʼwiri japi Jeobá tamó wikawi
“Mujé ne bichíwali wikáwiami ju” (SAL. 130:4).
JAPI TA JITRA BINEPO
Echoná Biblia nirú wiká ejemplos japi tamó iʼwiri aʼlá inamia alí we natéami niraa inea japi chúriká isimí Jeobá tamó wikawia ibili tamujé.
1. Japalí bilé pagótami tamó anesa japi tamó ku wikawi, ¿chúsiá we jilí ju machiyá piri ruyá anili?
ATI ku kilí nili japalí bilé japi ta omonáritili tamó anesa jepuná raʼíchali: “Mi ni ku wikawi”. Nalí be, ¿piri ruyá anili? ¿Achi aniyá anili japi a bijí aʼlá amigos ju? ¿O aniyá anili japi ma ke raʼichánali echi namuti jitra japi ikili, nalí japi ma ke aʼlá amigos nima japi riká chabé? Isini kaachi ke ti aʼlá machí piri ruyá anili bilé pagótami, jiti ke sinéami chopi riká inami japi aniwáami ju wikawia.
2. ¿Chúriká ruyé echi Biblia japi Jeobá wikáwiami ju? (Ayénachó iné echi nota).
2 ¡Nalí Jeobá ko ke echi riká ju! Ke nirú bilé pagótami japi wabé aʼlá wikáwiami ju japi riká echi. Bilé salmista aneli Jeobá: “Mujé ne bichíwali wikáwiami ju, alí echi riká mi isimí japi mi riwíwitami nima” (Sal. 130:4).a Ayena, Jeobá bi ju japi “ne bichíwali wikáwiami ju”. Jiti la, ata ne bichíwali wikáwiami nínalaká, ata binésaré Jeobá jitra. Echi Oserúami Hebreas isini kaachi nee bilé raʼíchali ruyemia japi Jeobá wikáwiami ju, nalí ke siné nee echi raʼíchali ruyemia japi echi pagótami wikáwiami ju.
3. ¿Chúsiá Jeobá ke chopi riká wikawi japi riká echi pagótami? (Isaías 55:6, 7).
3 Japalí Jeobá wikawi bilé pagótami, echi ko kárika ku wikawi japi echi isili alí checho ku we aʼlá amigo ju echi yúa. Sinéami ti waʼlú matétara iyá Jeobá jiti kárika tamó ku wikawi alí wisabé niraa (leeri Isaías 55:6, 7).
4. ¿Chúriká tamó iʼwiri Jeobá aʼlá inamia piri aniwáami ju ne bichíwali wikawia?
4 Jiti Jeobá we sinúrika wikáwiami ju echi pagótami yúa japi ke sébali aʼlá nokáami ju, tamujé aboi ko ke siné aʼlá inámipolí piri aniwáami ju ne bichíwali wikawia. Nalí Jeobá tamó iʼwiri aʼlá inamia néeka jaré ejemplos japi uchuwi echoná Biblia. Jenaʼí binelíwami binepo jaré echi. Echi riká inepo chúriká isimí Jeobá tamó wikawia echi chati namuti japi ta noká alí ayénachó jiti checho ku echi amígowala nipo. Binea jepuná ejemplos tamó iʼwírima aminabi we galea tamujé Onolá Jeobá, japi tamó wikawi sinúrika niraa.
JEOBÁ KO MINÁ TOO ECHI CHATI NAMUTI JAPI TA NOKALI
5. ¿Piri ikí japalí Jeobá tamó wikawi echi chati namuti japi ta nokali?
5 Echi Biblia aní japi echi chati namuti japi ta nokali ko ju, japi riká echi muruka we betéami. Echi silíami David echi riká anili: “Echi namuti japi ni ke aʼlá isimí nijé moʼólachi atí; echi ko ju japi riká bilé muruka we betéami nijé jitra” (Sal. 38:4). We be nalí, echoná Salmo 25:18 alí 32:5 aní japi Jeobá ko wikawi echi japi omona nili echi chati namuti jitra japi isili alí riwé echi riká isiá. Echi raʼíchali “wikawia” japi oserúa chukú jepuná versículos, hebreo niraa aniwáami ju “ayawia” o “toyá”. Jepuná ko tamó natari japi Jeobá ko ju japi riká bilé rijoi we jiwérami japi tamó iyé echi muruka we betéami japi ta aperi alí miná too.
“Wikawi [“ayawi”, “miná too”] ” (Sal. 25:18).
6. ¿Kumi too Jeobá echi chati namuti japi ta nokali?
6 ¿Alí kumi too Jeobá echi chati namuti japi ta nokali? Echoná Salmo 103:12 ata ritiwá bilecho ejemplo japi tamó iʼwiri aʼlá inamia. Echoná aní: “Japi riká we miká ju japoná jonsa machina echi rayénali alí japoná ku bokowí, echi riká cho Jeobá we miká riwé echi chati namuti japi ta nokali”. Japoná jonsa machina echi rayénali alí japoná ku bokowí, we miká ju anakupi niraa. Jiti la japi riká aní jepuná versículo, Jeobá ko kárika tamó wikawi echi chati namuti japi ta nokali. ¡We ti kilí nili machiyá jepuná!
“Japi riká we miká ju japoná jonsa machina echi rayénali alí japoná ku bokowí” (Sal. 103:12).
7. ¿Chúriká ruyé echi Biblia japi isimí Jeobá echi chati namuti yúa japi ta nokali? (Miqueas 7:18, 19).
7 Japalí Jeobá we miká too echi chati namuti japi ta nokali, ¿achi ripí echi yúa? Ke tasi, jiti echi silíami Ezequías jériká aneli Jeobá: “Ami upaka pali suwaba echi chati namuti japi ni isili” o, japi riká aní echi nota, “Mujé ko ma ke iné echi chati namuti japi ni isili” (Is. 38:9, 17; nota). Jiti la, japalí ti omona nili echi chati namuti jitra japi ta nokali alí ti riwé echi riká nokayá, Jeobá isimí japi riká ko chapiyá echi alí miká paya japoná ma ke siné inema. Jepuná versículo ayénachó omeri jériká traducíriwa: “Mujé ko isili japi riká ko ni ke siné chati isila”. Echi Biblia ayénachó we aʼlá ruyé jepuná jitra, néeka bilecho ejemplo echoná Miqueas 7:18, 19 (leeri). Echoná aní japi Jeobá ko awá suwaba echi chati namuti japi ta nokali echoná mar we rokóachi. Chabé, japalí bilé namuti wichiyé echoná mar we rokóachi, echi pagótami ma ke siné omerie ku machibúa.
“Ami upaka pali suwaba echi chati namuti japi ni isili” (Is. 38:17).
“Ma ke newalama suwaba echi chati namuti japi ta noká, japi riká ko awaya echoná mar we rokóachi” (Miq. 7:19).
8. ¿Piri ta ma bineli?
8 Jepuná ejemplos jitra, ata bineli japalí Jeobá tamó wikawi ko ju, japi riká ko miná toyá echi chati namuti japi ta nokali alí echi riká tamó iyé echi muruka we betéami. Japi riká anili David: “We kaníliami ju echi japi wikawárami nili echi chati namuti jitra japi nokali alí echi chati namuti japi nokali kárika pólitami nili; kaníliami ju echi rijoi japi Jeobá wikáwili alí ma ke checho ku newalama echi chati namuti japi isili” (Rom. 4:6-8, TNM). ¡Jeobá ko ne bichíwali wikáwiami ju!
JEOBÁ KO ISIMÍ JAPI MA KE ITÉLIMA ECHI CHATI NAMUTI JAPI TA NOKALI
9. ¿Chúriká tamó iʼwiri echi Biblia aʼlá inamia japi Jeobá kárika tamó wikawi?
9 Inepo jarecho ejemplos japi Bíbliachi uchuwi, japi tamó iʼwiri aʼlá inamia chúriká echi Jesús mukúala jitra, Jeobá ko wikawi echi pagótami japi ne bichíwali omona nili echi chati namuti jitra japi nokali. Japi riká, echi Biblia aní japi Jeobá ko pasó alí biʼwá echi chati namuti, alí echi riká ku biʼwá echi cha isíami (Sal. 51:7; Is. 4:4; Jer. 33:8). Jeobá binoy aní chu ikí japalí tamó wikawi: “Tákoré echi namuti chati japi timí nokali japi riká sitákami escarlata ju, echi ko we rosákami ku ripima japi riká ipalí; tákoré we sitákami ju japi riká echi chiní carmesí, echi ko nima japi riká echi boʼwá boʼwala” (Is. 1:18). Echi ko aniwáami ju japi Jeobá a omeri kárika ku wikawia echi chati namuti japi ta nokali, japi riká ko biʼwayá echoná chiní rosákami, echi sitákami escarlata o carmesí.
“Tákoré echi namuti chati japi timí nokali japi riká sitákami escarlata ju, echi ko we rosákami ku ripima japi riká ipalí” (Is. 1:18).
10. ¿Piri bilecho ejemplo tamó iʼwiri inamia japi Jeobá we aʼlá wikáwiami ju?
10 Japi riká ti ma bineli echoná biléala binelíwami, echi namuti chati japi ta noká ko ju japi riká ko wikayá (Mat. 6:12, TNM; Luc. 11:4, TNM). Jiti la, sinibí japalí ti noká namuti chati ko ju, japi riká ko ti aminabi wiká wikea Jeobá. Nalí japalí Jeobá tamó wikawi, echi ko ju japi riká ko tamó anea japi ta ma ke wiké echi alí japi ta ma ke natétisaré. Jeobá ko ma tamó wikáwili echi chati namuti japi ta nokali chabé, jiti la ma ke tamó iʼwérili ané japi ta natétipo echi jitra. ¡We ti kanili machiyá japi Jeobá echi riká isimí tamó wikawia!
“Tamó wikawi japi ta wiká” (Mat. 6:12, TNM).
11. Japalí echi Biblia aní japi kárika biʼwárami ju echi chati namuti japi ta noká, ¿piri ruyá aní? (Hechos 3:19).
11 Jeobá ke bi aní japi ta ma ke natétisaré echi chati namuti jitra japi ta nokali, nalí ayénachó kárika biʼwá japi riká ko biʼwayá bilé namuti japi oserúa chukú echoná oselichi (leeri Hechos 3:19, TNM). Natabo jepuná ejemplo: bilé pagótami japi mi wiké, bawerá japi oserúa chukú echoná oselí japoná aní japi mi ikí wiké echi. Tákoré ma bawerárami ju, a bijí newaré japi mi ikí wiké. Nalí echoná Hechos ke aní japi bawerárami ju echi chati namuti japi ta noká, nalí japi kárika biʼwárami ju. Chabé echi tinta japi jitra osayé echi pagótami, ke jilí nili sapú ku biʼwayá bilé chiní samíami jitra. Jiti la, japalí ma biʼwárami nili japi bilé wikeli, kárika biʼwárami nili alí ma ke bilé omerie inea japi oserúa chukuli. Jepuná ko nili japi riká ko ke siné wikala. ¡Ati waʼlú matétara iyá Jeobá jiti we aʼlá tamó wikawi japi riká ko kárika biʼwayá echi chati namuti japi ta noká! (Sal. 51:9).
“Jiti biʼwárami nima echi chati namuti japi timí nokali” (Hech. 3:19, TNM).
12. ¿Piri ta biné echi ejemplo jitra japi chukú echoná Isaías 44:22?
12 Echoná Isaías 44:22, Jeobá ko nee bilecho ejemplo tamó ruyemia japi chúriká tamó wikawi. Jériká aní: “Ani isima japi ma ke itélima echi namuti japi mi ke aʼlá isili japi riká ko naʼomia bilé nolí jitra, alí echi we chati namuti japi mi isili japi riká ko naʼomia echi waʼlú nolí jitra”. Japalí Jeobá tamó wikawi, echi ko ju japi riká ko naʼomia echi chati namuti japi ta noká bilé waʼlú nolí chókami jitra, jiti echi riká ke bilé omérima inea.
“Ani isima japi ma ke itélima echi namuti japi mi ke aʼlá isili japi riká ko naʼomia bilé nolí jitra” (Is. 44:22).
13. ¿Chumi inili machiyá japi Jeobá tamó wikawi echi chati namuti japi ta nokali?
13 ¿Piri ta biné jepuná ejemplos jitra? Japalí Jeobá tamó wikawi, tamujé ko ke inílisaré japi Jeobá sinibí newalama echi chati namuti japi ta nokali. Jiti Jesús ma mukuká natétili, tamujé ko ma ke natétisaré echi chati namuti jitra japi ta nokali, Jeobá ko kárika tamó wikawi alí echi ko ju japi riká ko ke siné nokala. Japalí ti omona nili echi chati namuti jitra japi ta nokali alí ti riwé echi riká nokayá, Jeobá ko ne bichíwali tamó wikawi.
JEOBÁ KO ANÍ JAPI TA CHECHO KU ECHI AMÍGOWALA NIPO
Jiti Jeobá tamó wikawi, ati omeri echi amígowala niya. (Iné echi párrafo 14).
14. ¿Chúsiá ti omeri bichiwia japi Jeobá ne bichíwali tamó wikawi? (Ayénachó iné echi imágenes).
14 Japalí Jeobá tamó wikawi, ati omeri bichiwia japi echi ko checho ku tamujé amígowala ju. Machiyá jepuná tamó iʼwiri ma ke omona nilia echi chati namuti jitra japi ta nokali alí jiti ke majabo japi Jeobá iyoa ripima tamujé yúa o japi tamó castigo iyama. ¡Echi ko ke siné echi riká isima! ¿Chúsiá ti we bichiwi jepuná? Jiti Jeobá binoy echi riká aneli echi profeta Jeremías: “Nijé ko wikáwima echi chati namuti japi timí nokali alí ma ni ke newalama echi chati namuti japi nokali” (Jer. 31:34). Echi apóstol Pablo raʼíchili jepuná versículo jitra japalí anili: “Nijeni ketásirapé siné auchecho ku ʼnatama echi jaré aboni chati sitíi olalila jiti” (Heb. 8:12). ¿Piri aniwáami ju jepuná raʼíchali?
“Ma ni ke newalama echi chati namuti japi nokali” (Jer. 31:34).
15. ¿Piri ruyá aní Jeobá japalí aní japi ma ke newalama echi chati namuti japi ta nokali?
15 Echoná Biblia, echi raʼíchali néwalayá ke sinibí ju checho ku natia echi namuti japi chabé ikili. Isini kaachi ko ju japalí bilé isimí bilé namuti. Japi riká, japalí echi cha isíami mukuyá chukuli Jesús yúa, echi ko aneli: “Jesús, newalá tamí jitra japalí mi ma nulasa” (Luc. 23:42, 43, TNM). Echi ko ke bi aneli Jesús japi pe aminana ku newalama echi jitra. Alí Jesús ko anili japi isima bilé namuti echi jitra, japi echi ko ku owínima. Jiti la, japalí Jeobá aní japi ma ke newalama echi chati namuti japi ta nokali, aniwáami ju japi ma tamó ku wikáwili alí japi pe aminana ma ke tamó castigo iyama echi namuti jitra.
16. Japi riká aní echi Biblia, ¿chuti inili japalí Jeobá tamó wikawi?
16 Ma inepo bilecho ejemplo japi nee echi Biblia tamó iʼwírimia aʼlá inamia chuti inili japalí Jeobá tamó wikawi. Jiti ta sinéami ke sébali aʼlá nokáami ju, tamujé ko ju japi riká pioni echi chati nokiwáami jitra. Nalí, japalí Jeobá tamó wikawi ko ju, japi riká ko sutachia echi cadenas alí echi riká niyúbitami ju echi chati nokiwáami jitra (Rom. 6:17, 18, TNM; Apoc. 1:5, TNM). Jiti la, machiyá japi Jeobá tamó wikawi, we tamó kaníliti japi riká bilé pioni japalí riwé pioni niya.
“Sutanárami nili echi cha nokiwáami jitra” (Rom. 6:18, TNM).
17. ¿Chúsiá ti aní japi Jeobá “tamó saʼwé” japalí tamó wikawi? (Isaías 53:5).
17 (Leeri Isaías 53:5). Echoná upá ejemplo japi ta inepo, echi Biblia aní japi ke sébali aʼlá nokáami niya ju japi riká ko ti olayá bilé nayulí japi ke saʼwiwáami ju. Nalí Jeobá ma tamó saʼweli japalí nijili binoy Nolá jiti mukumea tamujé jitra alí echi riká tamujé checho ku echi amígowala nipo (1 Ped. 2:24, TNM). Japalí bilé we nayúami checho ku saʼwí, echi ko we kanili. Echi riká cho inili tamujé japalí Jeobá tamó wikawi o “tamó saʼwé” jiti echi riká checho ku echi amígowala nipo.
“Matétarabá jiti chiwali ati ku saʼwérami nili” (Is. 53:5).
CHÚRIKÁ TAMÓ IʼWIRI JAPI JEOBÁ TAMÓ WIKAWI
18. ¿Piri ta bineli echi ejemplos jitra japi uchuwi echoná Biblia? (Ayénachó iné echi recuadro “Chúriká Jeobá tamó wikawi”).
18 ¿Piri ta bineli echi ejemplos jitra japi uchuwi echoná Biblia? Japalí Jeobá tamó wikawi, echi ko ju japi riká ko tamujé ke siné nokala echi chati namuti alí ati omeri bichiwia japi pe aminana ke tamó castigo iyama echi namuti jitra. Jepuná tamó iʼwiri jiti ta we aʼlá Jeobá amígowala nipo. Nalí be, ati newalásaré japalí Jeobá tamó wikawi, echi ko ju bilé chiliwéliami japi tamó iyá jiti we tamó galé alí ke ko jiti tamujé aʼlá nokáami ju (Rom. 3:24).
19. a) ¿Chúsiá ti waʼlú matétara iyá Jeobá? (Romanos 4:8). b) ¿Piri ta binepo biléala binelíwami?
19 (Leeri Romanos 4:8). ¡Ati waʼlú matétara iyá Jeobá jiti “ne bichíwali wikáwiami ju” japi riká aní Salmo 130:4! We be nalí, ati nakiyáaká japi Jeobá tamó wikáwima, ati nijéwisaré japi Jesús anili: “Ketásitamo ku wikawásagá echi auché jaré pagótami mapalí aboni ʼyemi mi chati olama, aʼlí kétamo Onó ketasi cho ʼyemi mi ku wikawama mapurigá ʼyémi aboni we chati olali” (Mat. 6:14, 15). Jiti la, we natéami ju japi ta wikáwiami nipo japi riká Jeobá. Echoná biléala binelíwami binepo chúriká ti omeri echi riká nokayá.
CANCIÓN sjj-S 46 Gracias, Jehová
a Japi riká oserúa chukú jepuná versículo hebreo niraa, ruyá aní japi Jeobá bi ju japi ne bichíwali alí kárika aʼlá ku wikawi echi chati namuti japi ta noká. Jarecho Biblias ke aʼlá ruyé jepuná namuti we natéami japi aní na versículo.