¡SINIBÍ SAYEKA MOCHIBO!
Echi religión alí echi guerra echomí Ucrania: ¿Piri aní echi Biblia echi jitra?
Leeri japi anijoli echi oʼwéala líderes religiosos echi guerra jitra echomí Ucrania:
“Echi patriarca Kirill, japi walúala ju echoná Iglesia ortodoxa rusa, ke namú aní echi chati namuti jitra japi isimí Rusia [...]. Japi anijoli alí japi nokali echi Iglesias Ucrania sayeria, jepuná isili japi Putin natama japi aʼlá ju echi guerra japi echi isimí” (EUobserver, 7 inárachi marzo 2022).
“Echi patriarca Kirill [...] anili japi isimí Rusia sayeria Ucrania, bilé guerra ju jiti sayeri echi pecado. Jepuná jitra newaré japi echi ko aʼlá niraa iné japi isimí Rusia sayeria Ucrania” (AP News, 8 inárachi marzo 2022).
“Echi walúala nuláami echoná Iglesia ortodoxa ucraniana, Epifanio I de Kiev, kulí lunes jiwérali iyali echi pagótami jiti nakoma echi rusos yúa. Ayénachó anili japi ke pecado ju koʼisá echi sontarsi rusos” (The Jerusalen Post, 16 inárachi marzo 2022).
“Ata iʼwiri echi sontarsi Ucrania nirúami alí ayénachó sinéami japi tamujé iʼwiri. Ati we natéami niraa iné japi riká timí iʼwérili noká tibúa Ucrania alí ti tani Onorúami emi jitra” (Japi katúwika anijoli echi Iglesias alí Organizaciones Religiosas echomí Ucrania,a 24 inárachi febrero 2022).
¿Piri mi nata? ¿Achi aʼlá ju japi echi Iglesias japi aní japi nijewi Cristo jiwérali iyama echi pagótami jiti simama nakosia? ¿Piri aní echi Biblia echi jitra?
Echi religión chabé jonsa iʼwírili echi guerras
Ma chabé jonsa, wiká Iglesias japi aní japi iʼwérili noká jiti kilí pirélipo, echi ko nalí iʼwírili alí aboi simíali nakosia echoná guerra. Echi testigo Jeobá ma chabé jonsa anili japi echi Iglesias we ikaleka raʼicha. Leeri japi anili jaré publicaciones echi jitra:
Echi artículo riwéami “Las cruzadas: ‘trágica ilusión’”, ruyé japi echi Iglesia católica romana iyiri nili japalí wiká pagótami miʼali jiti anili japi Onorúami alí Cristo echi riká nulali.
Echi artículo riwéami “La Iglesia Católica y África”, ruyeli japi echi religión ke omérili chewia jiti echi tribus ke nakoma alí jiti ke wiká miʼlirúami nima.
Echi artículos riwéami “¿Tiene la culpa la religión?”, “El papel de la religión en las guerras” alí “La religión toma partido”, ruyé japi okuanáchina niruili clérigos católicos, ortodoxos alí protestantes iʼwiria echi guerras.
¿Achi aʼlá ju japi echi Iglesias cristianas iʼwírima echi guerras?
Jesús ko anili: “Ne wabé galé echi [...] pagótami achigórigá mapurigami galé mujé binói niráa” (Mateo 22:39). “Ne galá kalesi echi jaré ʼyemi asayela” (Mateo 5:44-47).
Natá jepuná: Bilé Iglesia anisáaká japi galé echi pagótami japi riká Jesús nulali, ¿achi aʼlá ju japi echi jiwérali iyama echi pagótami jiti simama guerra? Jiti mi machimea, leeri echi artículos “Los cristianos verdaderos y la guerra” alí “¿Es posible amar a un enemigo?”.
Jesús ko anili: “Nijé Gobiérnowala ko, ke jenaʼí wichimóbachi nirúami ju. Nijé Gobiérnowala jenaʼí wichimóbachi nirúami níliaká, japi tamí iʼwiri ko ma nakómili jiti ni ke chapirúami nima” (Juan 18:36, TNM) “Siʼnéami echi jaré mapu ripiyá jiti nakówako, abóniko ayénachó ripiyá jiti miʼlirúami níima” (Mateo 26:47-52).
Natá jepuná: Japi riká Jesús aneli echi discípulowala japi ke néema echi ripiyá echi iʼwírimia, ¿achi mi mayé japi aʼlá ju japi echi riká nokiboa bilecho namuti jitra? Jiti mi machimea japi nokali echi cristianos bachá siglo piréami nijéwimia japi Cristo anili, leeri echi artículo “El cristianismo y la guerra: ¿son compatibles?”.
¿Chu ikimea echi religiones japi iʼwiri echi guerra?
Echi Biblia aní japi Onorúami ke galé echi religiones japi anijó japi nijewi japi Jesús binérili nalí ke bichíwali echi riká noká (Mateo 7:21-23; Tito 1:16).
Echi Biblia echoná Apocalipsis aní japi Onorúami iyiri niraa iné echi religiones jiti echi nokali japi echi pagótami kowirúami nima (Apocalipsis 18:21, 24). Ami machináliaká chúsiá echi riká aní, leeri echi artículo “¿Qué es Babilonia la Grande?”.
Jesús ko anili japi Onorúami suwábima suwaba echi religiones jiti wiká chati namuti nokali, japi riká bilé rojá japi ke aʼlá rakéami ju “miná ripunárami níima, aʼlí biché echoʼná naʼírali pátami níima” (Mateo 7:15-20). Ami machináliaká chúriká ikimea jepuná, leeri echi artículo “¡Se acerca el fin de la religión falsa!”.
Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a Jepuná ko ju 15 Iglesias japi katúwika anijoli, japi riká Iglesia ortodoxa, Iglesia católica romana, Iglesia católica griega, denominaciones protestantes alí evangélicas, alí grupos judíos alí musulmanes.