Echi Wichimoba wabé cha riká wilí | ¿Piri aní echi Biblia?

“Echi Wichimoba aminabi we cha riká nílisimi: Echoná cuidades japoná we waʼlú ju bochí baʼwí. We ratá. We raramuka ukú. Ke me nirú baʼwí. Ma wiká namuti jákami suwili. Asalá, siwá alí jarecho si wakicheli. Japi ni aní a ne bichíwali ju. Echi ciencia ko ruyé japi ikí suwaba jepuná namuti, jiti ta ke aʼlá nee echi namuti japi nirú jenaʼí Wichimóbachi” (Japi nawésili António Guterres, secretario general de las Naciones Unidas, japalí nawésili echi informe del Grupo Intergubernamental de Expertos sobre el Cambio Climático jitra, japi buyali 4 inárachi abril bamíali 2022).

“Echi científicos anijó japi jarecho bamíali japi nima, 423 uchimi japoná nirú okó [echomí Estados Unidos], wakichema jiti we ratálima. Japi nirú jenaʼí Wichimóbachi mayeri echi pagótami japi suwábitami nima echi Wichimoba: ikota, waʼlú ukú, echi hielo baʼwí ku najiti, waʼlú moʼwé baʼwí echomí mar alí we ratá” (“Flooding Chaos in Yellowstone, a Sign of Crises to Come” [Japi ikí echomí Yellowstone newaré japi ikimea namuti jilírami], The New York Times, 15 inárachi junio bamíali 2022).

¿A ku kariwérami nima jena Wichimoba? A echi riká nísakó, ¿jépuká kariwema? Leeri japi aní echi Biblia.

Echi Biblia ma anili japi ikimea jena Wichimoba

Echi Biblia aní japi Onorúami “Waminá suwábama siʼnéami echi jaré chati oláami pagótami mapu ayénachó wikanáami suwábali jenaʼí wichimóbachi” (Apocalipsis 11:18). Japi aní jenaʼí echi Biblia, tamó bineri bikiá namuti:

1. 1. Japi noká echi pagótami isimí jiti cha riká wilimea jena Wichimoba.

2. 2. Ma mulipi ma ke cha riká wilimea jena Wichimoba.

3. 3. Onorúami kariwema jena Wichimoba, ke echi pagótami.

Pe aminana jenaʼí Wichimóbachi we baʼóami nima

Echi Biblia aní japi “echi Wichimoba ko ke siné suwábitami nima” (Eclesiastés 1:4). Sinibí pirélima pagótami echoná.

• “Echi japi aʼlá nokáami ju ko kawí iyárami nima, alí sinibí pirélima echoná” (Salmo 37:29).

Echi wichimoba ku kariwérami nima alí we baʼóami nima.

• “Echomí desierto japi we wakichea wilí ku kanílima, alí echoná desierto kanílika siwamea japi riká echi azafrán” (Isaías 35:1).