Brais Seara/Moment via Getty Images
¡SINIBÍ SAYEKA MOCHIBO!
Wakichéliami | ¿Piri aní echi Biblia?
“Echoná China jipi bamíali we ratá, ma bikiá bamíali ju japi ke me ukú alí ke siné echi riká ikili chabé” (The Guardian, 7 inárachi septiembre 2022).
“Echomí Gran Cuerno de África we risoa nili jiti ma malí bamíali ju japi ke me ukú” (Noticias ONU, 26 inárachi agosto 2022).
“Jaréanami echomí Europa tasi me ukú, 500 bamíali jonsa ke echi riká ikili” (BBC News, 23 inárachi agosto 2022).
Jaré pagótami japi we machí jena namuti jitra, aní japi ke me ukumea alí japi aminabi cha riká ikísima. ¿Achi ta buwésaré japi pe aminana aʼlá ku ikimea? ¿Piri aní echi Biblia?
Wakichéliami alí japi aní echi profecías
Echi Biblia anili japi jipi rawé echi riká ikimea:
“Wabé nokomea jeʼná kawí, ayena cho wikanáami jenaʼí wichimóbachi piréami pagótami ne wabé ʼlochema” (Lucas 21:11).
Japalí ke ukusaa tasi nirú koʼwáami alí wiká lochea piré. Alí echi profecías anili japi echi jitra wiká risoa nili alí suwí (Apocalipsis 6:6, 8).
¿Chúsiá jipi aminabi we wakichésimi?
Echi Biblia aní chúsiá jipi echi riká ikí:
“Oh, Jeobá, nijé ko we aʼlá machí japi echi rijoi ko tasi omeri binoy nulaká isiá, echi ko tasi kaníliami nima ke isísakó japi mi nulé” (Jeremías 10:23).
Jena ko aniwáami ju japi echi pagótami ke aʼlá piré jiti ke machí nulayá. Japi echi noká isimí japi ke ukumea o ke me nirúlima baʼwí.
Wiká científicos mayé japi noká echi pagótami isimí japi echi kawí aminabi ratabásima, jiti bela wakichea wilí.
Echi korúkami alí japi noká echi isélikami isimí japi ke me nirúlima okó, japi nirúlima contaminación o cha riká nee echi namuti japi nirú jenaʼí Wichimóbachi, jiti la jepuná isimí japi wakichema echi baʼwí.
Nalí echi Biblia aní japi pe aminana ma ke echi riká nima.
¿Achi siné kaachi ma ke echi riká nima?
Echi Biblia aní japi Jeobá isima japi jenaʼí Wichimóbachi ma ke wakichea wilimea. ¿Chúriká isima?
1.Onorúami “suwábama siʼnéami echi jaré [...] mapu ayénachó wikanáami suwábali jenaʼí wichimóbachi” (Apocalipsis 11:18). Onorúami suwábima echi pagótami japi chati ju alí korúkami jiti cha olá jena Wichimoba (2 Timoteo 3:1, 2).
2.“Japomí wakichea wilí, waʼlú baʼwí machínima, ipó ayé japoná ke ité baʼwí, waʼlú baʼwí mama” (Isaías 35:1, 6, 7). Onorúami isima japi ma ke wakichea wilimea nalí isima japi nirúlima baʼwí alí jenaʼí Wichimóbachi we baʼóami nima.
3.“Mujé tibú echi weʼé alí mi isimí japi we aʼlá nima jiti wiká namuti aʼláala rakema” (Salmo 65:9). Onorúami ko isima japi jenaʼí Wichimóbachi nirúlima wiká koʼwáami ayénachó baʼwí biʼwíami.