JAPI MACHINALI ECHI KÚRUWI ALÍ IWÉ
¿Chúriká tamí iʼwiri japi aní echi Biblia? Bachá parte: Aa echi namuti japi we natéami ju
“Nijé leérnali echi Biblia, nalí waʼlú ju” (Briana, 15 bamíbami).
¿Echi riká cho mi nata? Leeri jepuná.
¿Chúsiá we natéami ju leeria echi Biblia?
¿Ami mayé japi we nóchili ju leeria echi Biblia? Ami natámiré japi echi Biblia bilé libro ju japi mil páginas simírikami olá, alí japi kuuchi bi letra olá alí ke olá iyóktami. ¡Ke ju japi riká echi televisión alí videos!
Nalí be, natá jepuná: Ami riwisáaká bilé cofre japoná nirú namuti we natéami, ¿kecha a bichíwali ju japi mi irápinali?
Echi Biblia ko ju japi riká echi cofre. Echoná mi riwimea wiká namuti we natéami japi mi iʼwírima:
Aʼlá isíami niya
Kanílitia mujé wénwala
Aʼlá amigos olayá
Kilí bitelia
¿Chúriká bilé libro japi we chabéwami ju tamó iʼwiri? Jiti echi Biblia ko ju echi Onorúami natáala (2 Timoteo 3:16). Echi ko aniwáami ju japi Onorúami tamó iyá echi busuréliami japi chukú echoná Bíbliachi.
Echi Biblia ko ju japi riká bilé cofre, echoná mi riwimea wiká namuti we natéami japi mi iʼwírima
¿Chúriká ti omeri leeria echi Biblia?
1. Ati omeri leeria suwaba echi Biblia. Echi riká mi machimea piri namuti jitra raʼicha echi Biblia. Nalí, ¿chúriká mi omero isiá? Ma inepo okuá ejemplos:
Ami omeri leeria echi 66 libros japi uchuwi echoná Biblia Génesis jonsa aminá Apocalipsis.
Ami omeri leeria echi Biblia orden cronológico niraa, jepuná ko aniwáami ju japi mi leérima echi oselí ineka echi namuti japi riká ikili.
Japi riká mi omero isía: Echoná apéndice A7 echoná Biblia Traducción del Nuevo Mundo, ami riwimea japi chúriká ikili ibili echi namuti japalí Jesús biteili jenaʼí Wichimóbachi.
2. Ami omeri leeria jaré versículos japi uchuwi echoná Biblia japi mi iʼwírima machiyá japi mi isísaré. Japi riká:
¿Ami kanílisa nili olayá we aʼlá amigos? Echi riká nísaká leeri japi nokali David alí Jonatán (1 Samuel, capítulos 18-20). Alí miná ko leeri echi artículo “Cómo encontrar amigos de verdad” jiti mi machimea chúriká mi olama bilé we aʼlá amigo.
¿Ami kanílisa nili machiyá piri mi iʼwírima jiti mi ke isima chati namuti? Echi riká nísaká leeri piri iʼwírili José jiti ke isima chati namuti (Génesis, capítulo 39). Alí miná ko leeri echi artículos “Cómo resistir las tentaciones” alí “Acusado falsamente”, japoná mi binema namuti we natéami japi mi isísaré.
¿Ami kanílisa nili machiyá chúriká mi iʼwírima echi oración? Leeri japi ikili Nehemías (Nehemías, capítulo 2). Alí miná ko leeri echi artículo “Jeobá contestó su oración”, japoná mi binema namuti we natéami japi mi isísaré.
Japi riká mi omero isiá: Japalí mi leérisa echi Biblia aa japoná mi kilí asá leérima.
3. Japalí mi leeri bilé versículo we aʼlá natá japi chúriká mi iʼwírima. Ma sunisa leeria jipi ko nárika isí jepuná:
¿Chúsiá nakili Jeobá japi oserúami nima jepuná raʼíchali?
¿Piri tamí bineri Jeobá jitra alí japi echi isimí?
Japi ni leérili, ¿chúriká tamí iʼwírima?
Japi riká mi omero isiá: Natá piri mi isínali. Osá japalí mi jonsa chotásima leeria echi Biblia néeka echi “Programa japi leéripo echi Biblia”, jepuná chukú echoná página Internet.