JW Library, bilé aplicación japi suwaba olá japi jitra binepo

Japi nawesa echi japi Aʼlá Niseri 2020 #6, echi hermano Geoffrey Jackson anili: “Chabé ko ati natábolí japi ta ke oméripo nokayá suwaba jepuná [u olayá echi oselí japi ta Jeobá jitra binepo] néeka echi internet”. Ayénachó jéanili: “Jipi ko ati nárika noká: ‘¿Piri ti nokibóoré jipi ke nirúlisa JW Library?’. Jeobá tamó bineri ma chabé jonsa jiti ta machiboa japi ta nokisáré”.

¿Chúriká tamó bineri Jeobá? ¿Chúriká niwali echi aplicación JW Library? Alí, ¿piri newaléliwa jiti echi aplicación aminabi we aʼláriká nima?

Echi aplicación japi ne bachá machínali

Mayo inárachi 2013, echi hermanos Japi Aʼlá Niseri nuleli echi departamento japi riwewi Programación de MEPS japi niwama bilé aplicación alí olama echi Traducción del Nuevo Mundo. Paul Willies, japi nocha echoná departamento Programación de MEPS, jéanili: “Ke ti siné niwayé bilé aplicación jiti machínima japoná nirú suwaba echi aplicaciones. Jiti oméripo niwayá echi aplicación ati riweli jaré nóchali japi ta nokayé, ati napawika nóchili alí jarecho yúa japi nóchami ju echoná Betel. Ata we wisabé niraa raʼíchiki Jeobá yúa alí echi ko tamó iʼwírili: malí michá bi simírisa echi aplicación machínili echoná napawíliwami japi niwaliwa sinibí bamíali”.

Ayénachó niruili bilecho namuti jilírami: uchayá echoná JW Library wiká oselí alí wiká raʼicháliami niraa. Enero inárachi 2015 echi aplicación ma olali ne sojí suwaba echi oselí inglés niraa, alí japalí ma simírili usani michá ma ti omerie descargaria echi oselí wiká raʼicháliami niraa.

Echi hermanos ko aminabi we iʼwérika noká jiti echoná aplicación aminá che wiká namuti olama. Japi riká, echoná olá videos alí biléana japoná uchuwi suwaba japi ta newalé jiti ta machiboa japi ta binepo echoná napawíliwachi. Ayénachó echoná Bíbliachi ati omero leeria echi oselí japi olá echi Guía de estudio.

Uchásimi japi newalésimi

Sinibí michá simírikami 15 millones celulares, tabletas alí jarecho si namuti ju japi irapi echi aplicación JW Library; alí 8 millones japi irapi sinibí rawé. ¿Piri newaléliwa jiti echi aplicación we aʼlá nochama echoná wiká celulares, tabletas alí jarecho si namuti? Paul Willies jéaní: “Jepuná nóchali ko ke siné suwibama. Sinibí ti uchá echi namuti japi newalésimi alí ti iʼwérika noká jiti echi aplicación ke me jilí nima néeliwa. Jiti sinibí kulíwami namuti machini echoná celulares alí tabletas, ata we aʼlá nochásaré jiti echi aplicación anárika nima echi kulíwami namuti yúa japi buyaní. Alí jiti nirú wiká videos alí publicaciones echoná JW Library ata sinibí atéwisaré echi namuti, software interno riwéami”. Jipi rawé echi aplicación JW Library olá 200 mil oselí alí 600 mil simírikami audios alí videos wiká raʼicháliami niraa.

Jiti echi aplicación we aʼlá nochama ke bi néeliwa computadoras. Ayénachó ralisáré wiká programas jiti omérima néea echi computadoras. Alí ibili niraa echi programas natijí 1,500 dólares sinibí bamíali. Ayénachó echi Departamento de Programación de MEPS ralá computadoras, tabletas alí celulares japi kulí buyaní jiti machimea achi aʼlá nocha echi aplicación, suwaba echi natijí 10,000 dólares sinibí bamíali.

Tamó iʼwiri jiti ke me wiká suwábipo echi winomí

Matétarabá echi aplicación JW Library, ma ti ke wiká winomí suwabi niwayá, imprimiria alí júulia echi oselí. Ma inepo japi ikili echi folleto yúa Examinando las Escrituras diariamente. Bamíali 2013 imprimíritami nili 12 millones echi folletos, nalí echi bamíali 2020, 5 millones bi imprimíritami nili tákoré niruili simírikami 700 mil publicadores omáana wichimóbachi. ¿Chúsiá? Jiti wiká hermanos jipi ko leeri echi texto diario echoná aplicación JW Library.a

“¡Jepuná aplicación we natéami ju japi riká oro!”

Echi aplicación JW Library ami iʼwírima néea wiká namuti. Geneviève, japi bité echomí Canadá, nati japi echi aplicación iʼwírili jiti we aʼlá binéami nima. Echi ko jéaní: “We ni jilí nirae ani buyánika leérisaká wiká libros jiti ni binema, nalí be, japi ni bi isimí ko ju rajea echi tableta alí ni echoná olá suwaba japi ni newalé jiti ni binema sinibí biʼá. Binea sinibí rawé tamí iʼwiri jiti ni aminabi bichíwima Jeobá alí we mulíwima echi”.

Jepuná aplicación ko we aʼlá tamó iʼwírili jipi pandemia COVID-19 nirúachi. Charlyn, japi bité echomí Estados Unidos jéaní: “Jiti nirú COVID-19 omáana wichimóbachi, ma bilé bamíali ju japalí ni jonsa ke bilé publicación iné oselí niraa. Nalí, echoná JW Library ata iné suwaba echi namuti japi ta newalé binemia. Ani waʼlú matétarabá iyá Jeobá jepuná we semati chiliwéliami jitra”.

Wiká ko nata japi riká Faye, japi bité echomí Filipinas. Echi ko jéaní: “Jepuná aplicación we aʼlá ju, echi ko olá suwaba namuti japi tamí iʼwiri muliwia Jeobá. Ani nee japalí ni kipú echi namuti japi tamí iʼwérili iyá japalí ni isimí jaré namuti echoná bitichí, binea japi ta binepo echoná napawíliwachi alí leeria echi Biblia. Ayénachó japalí ni ke bilé iyiri namuti isimí, ani ineni videos. Alí japalí ni buwea wilí ani biné echi Biblia alí jarecho si oselí. ¡Jepuná aplicación we natéami ju japi riká oro!”.

Jepuná aplicación ayénachó we aʼlá tamó iʼwiri japalí ti nawesa. Echomí Camerún, bilé hermana we galeli bilé texto japi leérili bilé hermana japi echi yúa iyénili nawesia. Pe aminana echi ko ayénachó leérinali, nalí ke newalali chu iyiri nili. Echi ko jéaní: “We aʼlá nili jiti ni newalali jaré raʼíchali japi anili echi texto. Echoná aplicación japoná chukú echi lupita osaki echi raʼíchali alí ni riwaki. Matétarabá echi aplicación jitra ani ku ritiwá echi textos japi ni ma ke néwalayé”.

Matétarabá echi winomí jitra japi timí sinéami nijí echoná donate.jw.org, ata omeri aminabi aʼlárika niwasia echi aplicación JW Library. Echi riká echi hermanos omáana wichimóbachi piréami a omérima néea. Matétarabá jiti timí we kanílika nijí.

Japi uchásimi echoná JW Library

1. 

   Octubre 2013: Machínili echi aplicación alí uchaari echi Traducción del Nuevo Mundo inglés niraa.

2. 

   Enero 2015: Uchaari che wiká publicaciones inglés niraa alí pe aminana wiká raʼicháliami niraa.

3. 

   Noviembre 2015: Uchaari echi namuti jiti tamujé oméripo subrayaria.

4. 

   Mayo 2016: Uchaari japoná aní “Reuniones”.

5. 

   Mayo 2017: Uchaari japoná tamujé omeri osayá echi notas.

6. 

   Diciembre 2017: Uchaari echi Biblia de estudio inglés niraa.

7. 

   Marzo 2019: Uchaari japoná ta omeri descargaria audios, inea videos echoná internet alí inea echi oselí echoná Guía de estudio.

8. 

   Enero 2021: Uchaari wiká namuti kulíwami jiti ta néepo echi oselí We mi kanílika bitélima.