Jeobá ko newalá echi japi ke omeri kipúa

Jeobá nakí japi sinéami binema binoy jitra alí echi Gobiérnowala (1 Timoteo 2:3, 4). Jiti bela, echi testigo Jeobá niwá Biblias alí jarecho namuti jiti binema echi pagótami, alí ayénachó echi japi ke omeri kipúa. Tamujé níwala organización niwá wiká miles videos simírikami 100 raʼicháliami señas niraa.a ¿Chúriká niwáliwa alí nijíliwa echi videos? ¿Chúriká niwáliwa jena nóchali jipi?

¿Chúriká niwáliwa echi videos raʼicháliami señas niraa?

Omáana Wichimóbachi nirú traductores sinúrika raʼíchami señas. Japalí niwásaré bilé publicación señas niraa, ibili equipo bachá we aʼlá biné. Alí echi riká niwama echi traducción raʼicháliami señas niraa. Alí ma jubá niwá echi video. Jipi ko nirú 60 equipos japi sinibí traduciri echi namuti japi jitra binema echi Biblia. Alí jarecho 40 equipos isini kaachi echi riká noká.

Chabé, we natéami nili niwayá jena videos señas niraa. Echi cámaras alí jarecho namuti japi néeliwa, we natéami nili. Alí echi traductores simíaye japoná niwáliwa grabación. Isini kaachi ti niwali bilé kalí japoná grabáripo alí isini kaachi ko atewia. Jiti bilé equipo traducírima raʼicháliami señas, natéami nili simírikami 30,000 dólares.b

Jiti aʼlá néema echi winomí, tamujé níwala organización iʼwérika isimí jiti echi traducción we aʼlá nima alí ke me natema winomí. Jipi tamujé nee equipos kulíwami, japi ke me natéami ju alí ke me jilírami ju néeliwa. Japi riká, jipi ke newaléliwa japoná niwáliwa grabación. Ibili equipo omeri grabaria echoná oficina néea bilé pared siyónami. Japalí buyaní jaré hermanos echoná video, ibili omeri grabaria aboni pirélachi o echoná oficina.

Ayénachó ti niwá jaré programas jiti iʼwíripo echi equipos japi niwá echi videos. Matétarabá jepuná, niwayá jena videos raʼicháliami señas, ke me wilí rojorá. Wiká hermanos matétara nijí jepuná jitra. Bilé hermano Alexánder riwéami aní: “We ni kanili jiti sinibí buyaní videos señas niraa. Sinibí rawé ni iné bilé video”.

Jipi, jiti olabo bilé equipo de traducción raʼicháliami señas, naté ne sojí 5,000 dólares. Jiti bela, jipi oméripo niwayá wiká videos raʼicháliami señas.

¿Chúriká nijíliwa echi videos raʼicháliami señas?

Japalí ma niwasa grabación, ma iyásaré echi japi inema. Chabé, ata natétisaré bilé compañía jiti niwama jaré copias videocinta alí DVD niraa, echi riká ma iyáliwa echi congregaciones. Nalí jena nóchali wilí rojorá alí wiká winomí naté. Bamíali 2013 suwábili simírikami okuá millones de dólares jiti niwama DVD raʼicháliami señas.

Echi japi ke omeri kipúa we kanilie jiti olayé videos. Nalí we jilírami ke japi néema, alí aminabi japalí ma wiká videocintas alí DVD nirúe. Siné kaachi, bilé libro japi Bíbliachi uchuwi, néeliwa jaré DVD. Bilé hermano Brasil bitéami, Gilnei riwéami, aní: “Japalí ti leéripo riké bilé texto, bachá ta aasa riweili chu iyiri nili echi videocinta japoná chukuyé alí miná ko aaya echi versículo. We jilírami ke”. Bilé hermana Rafayane riwéami, japi néeli DVD raʼicháliami señas, aní: “Japalí ni bineli binéi echi Biblia, we risiyá nili. We ni rojorae aa bilé texto alí referencias”. Japalí nawesasia simibi, echi hermanos toyé DVD alí echi videocintas jiti uchama echoná televisión echi pagótami níwala. Jarecho ko aboni níwala toyé japoná uchama echi DVD. Pe aminana buyali japoná uchabo DVD pantalla oláami, japi ke jilírami nili néeliwa. Bobby, Estados Unidos bitéami, aní: “Ma mi riwírisa bilé texto, alí mi bilecho texto riwírinili, wisabé niraa mi nakulíwisa riké bilecho DVD. Japalí echi riká ikiyé, we jilírami ke néeliwa echi Biblia japalí ti bineri”.

Bamíali 2013, echi Jeobá organizaciónwala, niwali bilé aplicación riwéami JW Library Sign Language, japoná echi hermanos omeri descargaria echi videos raʼicháliami señas echoná teléfono o tablet. Ne chokichí echi aplicación bi niruli raʼicháliami señas americano, nalí bamíali 2017 omérili néea suwaba raʼicháliami señas niraa. Echi hermanos we kanila mochili. Bilé hermano Brasil bitéami Juscelino riwéami, aní: “Ke ni mayéi. Ke ni riwéi natia japi echi Aʼlá Niseri we galé echi japi ke omeri kipúa alí nakí japi binepo japi riká echi japi aʼlá kipú. Japalí machínili echi aplicación, we ni kanilia nili alí ni we inili binénalia echi Biblia”.

Jipi ko niwáliwa echi videos raʼicháliami señas niraa japi nijíliwa echoná internet alí echoná aplicación JW Library Sign Language. Matétarabá jepuná, niwayá echi traducción, grabación alí nijía jena publicaciones raʼicháliami señas ma ke me rojorá, nalí pe kuabi rawé. Wiká publicaciones buyaní raʼicháliami señas japalí buyaní jarecho idiomas.

Inesi japi aní jaré hermanos japi ke omeri kipúa. Bilé hermana Klízia riwéami, aní: “¿Chu iyiri organización we natéami niraa iné echi japi ke omeri kipúa jiti iyama wiká namuti binemia Onorúami jitra? Tasi wesi nirú jenaʼí Wichimóbachi japi noká tamujé jitra japi riká echi organización Jeobá níwala”. Alí Vladimir aní: “Echi videos néwariwéliti japi Jeobá we galé echi japi ke omeri kipúa, japi riká galé echi kipúami”.

Wiká videos raʼicháliami señas niraa jériká, aní: “Na oselí ko ke ralinéwami ju jiti nijíliwa omáana Wichimóbachi jiti raʼicha japi aní echi Biblia. Jaré ko nijí echi winomí naresa echi oselí”. Matétarabá ne sulachí jonsa jiti timí wisabé niraa nijí winomí echoná donate.jw.org. Jena winomí jitra niwáliwa Biblias alí jarecho publicaciones jiti binema echi pagótami japi riká echi raʼicháliami señas niraa.