BINELÍWAMI 57

Ani isísaká bilé namuti we chati, ¿chúriká ni iʼwíritami nima?

Japi riká machíina echi oselí

Tákoré mi we galé Jeobá alí mi iʼwérili isimí ke chati namuti isiá, isini kaachi ami isímiré namuti japi echi omonáritima. Nalí a nirú jaré namuti japi wabé chati ju jarecho yúa (Efesios 5:5). Ami isísaká bilé namuti japi we chati ju, ami newalásaré japi Jeobá ke siné riwema mi galea alí japi echi ko mi wikáwinali alí mi iʼwírinali.

1. ¿Piri ta nokisáré jiti Jeobá tamó ku wikáwima?

Japalí bilé japi we galé Jeobá machí japi we cha isili, echi ko we risoa nili. Nalí Jeobá ko ané japi a ku wikáwima néeka jepuná raʼíchali japi aneli echi puéblowala: “Tákoré echi namuti chati japi timí nokali sitákami lamúami ju, echi ko we rosákami ku ripima japi riká ipalí” (Isaías 1:18). Nalí, ¿piri ta nokisáré jiti Jeobá tamó ku wikáwima? Ati we omona nílisaré ne sulachí jonsa echi chati namuti jitra japi ta nokali, ati riwésaré nokayá japi chati ju alí tánisaré Jeobá japi tamó ku wikáwima. Alí ti iʼwérili nokisáré nakuliwia tamujé natáala alí riwésaré nokayá echi namuti japi isili japi ta cha nokiboa, alí ku nijéwisaré suwaba echi Jeobá nuláala (leeri Isaías 55:6, 7).

2. ¿Chúriká tamó iʼwiri Jeobá néeka echi ancianos japalí ti cha nokisaa?

Echi japi isili bilé namuti we chati, Jeobá ko jériká ané: “Japi bayema echi ancianos congregación muchúwami” (leeri Santiago 5:14, 15, TNM). Echi ancianos jawárami ju echi espíritu santo jitra, echi ko we galé Jeobá alí echi hermanos, alí we aʼlá binéritami ju jiti tamó iʼwírima checho ku Onorúami amígowala niya (Gálatas 6:1).

¿Chúriká tamó iʼwiri echi ancianos japalí ti nokisaa bilé namuti we chati? Okuá o bikiá ancianos ma, tamó iʼwírima néeka echi Biblia jiti ta machiboa chúsiá we chati nili japi ta nokali. Ayénachó tamó iyama we aʼlá busuréliami alí iʼwérili, jiti ma ke che ku nokiboa echi chati namuti. Bilé hermano isísaká bilé namuti we chati alí ke omona nílisa, echi ancianos ko ruyema echi congregación japi ma ke testigo Jeobá ju jiti ke echi yúa napawima alí ke isima japi jarecho echi riká cho nokimea.

AMINABI NATABO JAPI TA BINÉ

We aʼlá biné alí we natéami niraa iné japi isimí Jeobá tamó iʼwírimia japalí ti nokisaa bilé namuti japi we chati ju.

3. Ruyea echi chati namuti japi ta nokali tamó iʼwírima jiti Jeobá ku amígowala nipo

Suwaba echi namuti chati japi ta noká we omonáriti Jeobá, jiti bela ati echi ruyésaré japi ta nokali. Leérisi Salmo 32:1-5 alí raʼichasi jepuná jitra:

¿Chúsiá we aʼlá ju japi ta ruyepo Jeobá echi chati namuti japi ta nokali?

Ma ti ruyesa Jeobá japi ta nokali ayénachó iʼwírili tánipo echi ancianos, echi riká ti nokisáaká ati ku kilí nílipo. Inesi echi VIDEO alí raʼichasi jepuná jitra:

VIDEO: Jeobá “we galá binéraga ruyé siʼnéami [...] mapu ikí Binói galeko” (3:01)

Jiti Canon checho ku Jeobá amígowala nima, ¿chúriká nokali echi ancianos iʼwiria?

Jiti echi ancianos tamó iʼwírima we natéami ju japi ta ne sulachí jonsa raʼichabo alí japi ruyepo suwaba japi bichíwali ju. Leérisi Santiago 5:16 alí raʼichasi jepuná jitra:

¿Chúsiá echi ancianos ke jilí nirama tamó iʼwiria ata bichíwali ruyésaká japi ikili?

Jenaʼí nirú jaré dibujos: 1. Bilé hermano japi we omona nilia atí póolia atí echi akala. 2. Echi hermano raʼichia atí Jeobá yúa. 3. Echi hermano raʼicha bilé anciano yúa teléfono néeka. 4. Echi hermano ko napawika atí bikiá ancianos yúa echoná Salón. 5. Jipi ko echi hermano ku kanilia wilí jiti ma ruyeli Jeobá alí echi ancianos echi namuti chati japi isili. — Ruyé japi mi chati isili, ne bichíwali ruyé echi ancianos japi mi isili alí riwé japi Jeobá mi iʼwírima.

4. Jeobá ko iʼwiri echi japi cha nokali

Japalí bilé japi we cha isili ke nijéwinali japi Jeobá nulá, echi ko machibúrami ju congregación jonsa alí ma ti ke echi yúa napawí alí ti riwé echi yúa raʼichia. Leérisi 1 Corintios 5:6, 11 alí raʼichasi jepuná jitra:

Japi riká echi pe taa batusí chokóami isimí japi suwaba batusí chokólima, ¿achi mi mayé japi cha ikimea echi congregación ati yúa napawísaká echi japi we cha isíami ju? ¿Chúsiá?

Jiti echi ancianos we galéami ju japi riká Jeobá, echi ko iʼwérili noká aaya alí iʼwiria echi japi machibúrami nili echoná congregación jonsa. Wiká echi jitra ma ku roʼili alí jipi ko ma ku testigo Jeobá ju, ¿chúsiá? Jiti tákoré machibúrami nili, echi namuti iʼwírili aʼlá ku natia alí checho ku aʼlá isiá (Salmo 141:5).

Japi riká isimí Jeobá echi yúa japi cha nokali, ¿chúriká néwariwéliti japi wachía isíami ju alí we galéami?

5. Jeobá ko tamó ku wikawi ata riwésaká cha nokayá

Jesús ko ruyeli bilé historia tamó binérimia japi chu nili Jeobá japalí bilé cha isíami ku riwesa cha isía. Leérisi Lucas 15:1-7 alí raʼichasi jepuná jitra:

¿Piri tamó bineri Jeobá jitra echi historia?

Leérisi Ezequiel 33:11 alí raʼichasi jepuná jitra:

¿Piri namuti we natéami nokiboa jiti néwariwélitipo japi ta we omona nili echi jitra japi ta nokali?

Bilé boʼwá niséami ku saʼwea atí bilé boʼwá japi ronola chiwali. — Jeobá ko ju japi riká bilé boʼwá niséami: echi ko we aʼlá tibú echi bukula boʼwá.

JAPI ANÍ JARÉ PAGÓTAMI: “We ni majaa nili raʼichia echi ancianos yúa, jiti ni ruyésaká japi ni isili echi ko tamí machibuma echoná congregación jonsa”.

Mujé ko, ¿piri mi anema bilé japi echi riká nata?

JAPI MI BINELI

Ati nokisáaká bilé namuti we chati, Jeobá ko tamó ku wikáwima. Nalí ati we omona nílisaré ne sulachí jonsa echi namuti jitra japi ta nokali alí iʼwérili nokisáré ke echi riká ku nokayá.