Natchigagü i Ngutaqueꞌearü Nguꞌarü Popera Maü̃ rü Puracücaꞌ
© 2023 Watch Tower Bible and Tract Society of Pennsylvania
4-10 TCHETẼBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ | ESTER 1-2
“Itérüü̃ meãmare niĩ”
w17.01 25wa 11tchimaü̃
11 Nagutcha naweꞌü̃ meãmareü̃ü̃ ngẽguma togü guü̃guma tüü̃ ngugügu. Nüü̃ nadau i Itéarü cuaꞌruü̃. Tüma rü wüie ngeꞌe ãũrima mecüraü̃ tiĩ. Ãẽꞌgacü ya Pérchiaãnecü̃ãꞌ tümacaꞌ nadau ya wüie ngeꞌe namaꞌruü̃. Nüü̃ naunetagü i nümaü̃ i ngeꞌegü na ãẽꞌgacüü̃tawa taĩ rü Ité niĩ ya wüie tüü̃ naunetae. Wüi taunecütchigu tüü̃ narümegü ga yema ngeꞌegü na ngẽmaãcü ãẽꞌgacü tümawaꞌeü̃caꞌ. Notürü Ité rü tama yema ngeꞌeü̃gürüü̃ niĩ. Woo togü tüü̃ narüme rü tüma rü meãmare tiĩ. Woo ãẽꞌgacü tüü̃ nauneta na tümamaã naãmaü̃ rü tama tatoraü̃ rü tüma rü meãmare taĩẽtcha. — Est 2:9, 12, 15, 17
ia 130wa 15tchimaü̃
15 Yeguma ngĩwa nangugu na ãẽꞌgacüpeꞌewa ngĩü̃ nagagüü̃ rü ãẽꞌgacü tümamaã nüü̃ niu na nüü̃ tauneta ga taꞌacü tanawaꞌeü̃ na yeera tamecüraü̃. Notürü tüma rü meãmare taĩ rü tanayau ga pacügüarü dauruü̃arü ucuꞌẽ. (Est 2:15) Tüma rü nüü̃ tacuaꞌãtchi na ãẽꞌgacü tama namaãicatama nataãẽ i tümaarü me. Erü nagutchaü̃tchi na duü̃ü̃gü naweꞌü̃ i nügü írüíraü̃ rü meãmareü̃ü̃ i ãẽꞌgacüpatawa. Eꞌna tüma rü taweꞌguü̃?
w17.01 25wa 12tchimaü̃
12 Tchi meãmareü̃ü̃ tiĩgügu rü torü natchiruwa rü tacümagüwa tanaweꞌgü na tama togügu tidaucüraü̃waꞌe. Taꞌacü togücaꞌ name na yiemagü tama yigü ticuaꞌüü̃gü, notürü nüü̃́ name na ‘duü̃ü̃gümaã tamecümagü rü taguma teémaã tanuãẽgü’. (Nawa naugütae 1 Pedru 3:3, 4, Jeremias 9:23, 24) Tchi taãẽwa nagu tarüĩnüegu na togüarü yeera tiĩgü rü nüü̃ nicuaꞌãtchi i ngẽma i torü deagüwa rü taꞌacü taügüwa. Cuaꞌãtchiruü̃, bemana togüü̃ tanaweꞌgütchaü̃ na tüü̃́ nangẽma wüi puracü i meẽtchiü̃, rüeꞌna nüü̃ tacuaꞌgüü̃ i wüi ore i tauemamaã nüü̃ iuü̃ rüeꞌna namaã taãmücügüü̃ i taene rüeꞌna taeya i “tatchigaü̃”. Rü nhuguãcü taügü i wüi ngẽmaü̃ i togüarü ngü̃ẽẽmaã, notürü togüü̃́ nüü̃ tacuaꞌẽẽ na taica taügüü̃ i ngẽma. Notürü, nüü̃ nadau i Ngetchutchuarü cuaꞌruü̃. Tchi nanawaꞌegu nüü̃ niutchi ga norü ĩnügü̃, notürü norü ngútchaü̃maã guü̃guma nüü̃ niu i taꞌacü Tupanaarü Orewa ngemaü̃. Numa rü meãmare niĩ rü nanawaꞌe na duü̃ü̃gü nüü̃ nacuaꞌgüü̃ na norü ore rü Yeuwawa ne naũ. — Juã́ũ 8:28
Nguꞌẽẽtaegü uirurüü̃ iĩü̃
Yatügü i nacaꞌ daugüü̃ nüü̃ inayangau i wüi ore i persagawa rü nawa nüü̃ niu natchiga i wüi yatü nagu naãéga Marduka (ticunagawa Marduquéu). Nüma rü ngẽmaü̃maã cuácü niĩ, bemana dĩẽrupanemaã icuáü̃, ga Chúchawa. Arthur Ungnad, wüi yatü na meã nüü̃ nacuaꞌ i ngẽmatchiga, nüü̃ niu na yema ore i persagawa nhaü̃: “ngẽma ore niĩ i wüirica i ore natchiga i Marduquéu na tama Tupanaarü Orewa ne naũ”.
Ngẽma Arthur arü orewena, nümaü̃ i duü̃ü̃gü nanaümatüü̃ i nagawa muü̃tchiü̃ i persaarü oregü. Nümaü̃ i ngẽma oregü rü Persépolis arü poperagü niĩ, rü ngẽma duü̃ü̃gü nüü̃ inayangau i ngẽma poperagü nawa i iãnearü poeguü̃arü ngaicamana. Yema poperagü ãẽꞌgacü ga Xerxes I arü nguneü̃ niĩ. Elamitagawa nanaümatüü̃ i ngẽma poperagü rü nawa nangẽma muü̃ma i naégagü na Ester arü poperawa nangoꞌ.
Muü̃tchi i Persépolis arü poperagü nüü̃ niu natchiga i yatü i Marduka, wüi ãẽꞌgacüarü ngü̃ẽẽruü̃ rü napuracü ga Chúchaarü ãẽꞌgacüpataü̃wa yeguma Xerxes I ãẽꞌgacü niĩgu. Wüi popera nüü̃ niu ga Marduka to nagaü̃ nacuaꞌ. Ngẽma rü ngẽgumarüü̃ taꞌacü Tupanaarü Ore nüü̃ niu natchiga i Marduquéu. Nüma rü wüi ãẽꞌgacüarü ngü̃ẽẽruü̃ niĩ rü bemana tare nagawa nidea rü ta napuracü nacaꞌ ga ãẽꞌgacü Achuéru (Xerxes I). Marduquéu guü̃guma ãẽꞌgacüpataarü ĩãꞌwa nadauü̃tae ga Chúchawa. (Est 2:19, 21, 3:3) Yema ãẽꞌgacüpataarü ĩãꞌ rü natchica nameẽtchi niĩ rü nawa napuracüe ga ãẽꞌgacügüarü ngü̃ẽẽruü̃gü.
Nüü̃ ticuaꞌãtchi na taꞌacü ngẽma poperagü nüü̃ niu natchiga i Marduka, namaã nawüigu i taꞌacü Tupanaarü Ore nüü̃ niu natchiga i Marduquéu. Rü nawüigu niĩ i norü nguneü̃gü, norü iãne rü puracü erü nümagü ãẽꞌgacüarü ngü̃ẽẽruü̃ niĩgü. Guü̃ma i ngẽma tüü̃ naweꞌ na bemana na Marduka rü Marduquéu niĩ ya Ester arü poperawa.
11-17 TCHETẼBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ | ESTER 3-5
“Togüü̃ rüngü̃ẽẽ na norü memaẽ naügüü̃caꞌ”
it-2 412wa 3tchimaü̃
Marduquéu nüü̃ nacuaꞌ ga Amáü̃peꞌewa nacã́apüꞌü rü tama namaã nawüigu ga taꞌacü nũcüma naügü ga ãẽꞌgacügüpeꞌewa. (2 Sam 14:4, 18:28, 1 Reis 1:16) Rü nhuꞌmatchi, tama napeꞌewa nacã́apüꞌü erü Amáü̃ rü Amalétanüü̃ niĩ, rü Yeuwa “rü guxü̃gutáma Amaléxtanüxü̃gümaxã rü nataagümaxã nügü nadai”. (Êxo 17:16) Marduquéu nüü̃ nacuaꞌ ga nawaꞌe Tupanaga naĩnü.
it-2 412wa 5tchimaü̃
Nagagu i mu ga nüü̃ niu ga nüü̃ nimaꞌtchaü̃ ga guü̃ma ga yudíugü, Marduquéu nagu nayaõ ga Ité ãẽꞌgacüpeꞌewa nayema na nüü̃ narüngü̃ẽẽü̃caꞌ a yudíugü. Nüma rü Itéü̃ naweꞌ na nhuãcü tüma rü yudíugüü̃ rüngü̃ẽẽ. Woo ãẽꞌgacümaã idea rü ãũcümaü̃ niĩ tüma rü tanayau taüü̃ ga yema. — Est 4:7–5:2
ia 133wa 23tchimaü̃
23 Marduquéu nanangãü̃ na nüü̃ naporaẽẽü̃caꞌ ga Itéarü õ. Nüma rü nüü̃ niu na tchi tama tümawa ne naũgu ga yema ngü̃ẽẽ, to nacümawa ne naũ ga ngü̃ẽẽ na nawa íinguü̃ü̃caꞌ ga yema gutchaü̃. Rü yemaãcü, Marduquéu nanaweꞌ ga aicuma Yeuwagu nayaõ, na nüma rü guü̃guma norü duü̃ü̃güü̃ ínapoü̃ rü nayanguẽẽ ga norü unetagü. (Jos 23:14) Yicama, Marduquéu Iténa naca i nhaü̃: “Rü bexmana ngẽma nax toxü̃ ícupoxü̃xü̃ca̱x nixĩ i ãẽ̱xgacüma̱xwa nax cunguxü̃ i ñu̱xmax?” — Est 4:12-14
Nguꞌẽẽtaegü uirurüü̃ iĩü̃
kr 160wa 14tchimaü̃
14 Narüü̃ ga Ité rü Marduquéu, Yeuwaarü duü̃ü̃gü nügü naporaẽẽ na nawaꞌeãcüma nüü̃ nicuaꞌüü̃güü̃caꞌ. (Est 4:13-16) Guü̃guma nacaꞌ nayumüẽ a taenegü rü taeyagü na nangẽmagüü̃caꞌ i gutchaü̃gü i ãẽꞌgacüpeꞌewa. Ngẽma yumüẽgü ãũrima nüü̃ narüngü̃ẽẽ a taenegü rü taeyagü na nüü̃́ nangẽma i gutchaü̃gü rü naweꞌ ningeü̃tanü. — Nawa naugütae Tiagu 5:16
18-24 TCHETẼBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ | ESTER 6-8
“Wüi nguꞌẽẽtae natchiga na nhuãcü meã togümaã nidea”
ia 140wa 15tchimaü̃
15 Ité yana namaã taĩnü rü nüü̃ itananguẽẽ i to nguneü̃ na ãẽꞌgacümaã ideaü̃caꞌ. Ngẽguma Tupanagu tayaõgügu, nhuguãcü nüü̃ ticuaꞌãtchi na nhuãcü Yeuwa nanameẽẽ i torü gutchaü̃gü i taꞌacügu tarüĩnüẽarü yeera niĩ.
ia 140wa 17tchimaü̃
17 Ité Yeuwacaꞌ tayumüẽ naü̃pa ga nüü̃ tiu i nhaü̃: “Pa Chorü Ãẽ̱xgacüx, ngẽxguma chi aixcüma choxü̃ cungechaü̃xgu, rü cuxca̱x namexgu i ngẽma cuxna naxca̱x chaca̱xaxü̃, rü ñaaxicatama nixĩ i chanaxwa̱xexü̃ nax cuxna naxca̱x chaca̱xaxü̃, Pa Ãẽ̱xgacüx: ¡Rü choxü̃́ nüxü̃ nangechaxü̃ i chorü maxü̃ rü nüxü̃́ nüxü̃ nangechaxü̃ i ngẽma chautanüxü̃güarü maxü̃!” (Est 7:3) Nüü̃ nadau na Ité tanaweꞌ ga tama nagu tidaucüraü̃tchaü̃ ga ãẽꞌgacü natchiga ga taꞌacü nüü̃ name. Ité ãẽꞌgacüna taca na tüü̃ ínapoü̃caꞌ.
ia 141wa 18-19tchimaü̃gü
18 Aicuma niĩ ga yema rü nabaiꞌãtchiẽẽ ga ãẽꞌgacü. Teé tchieü̃ taütchaü̃ nacaꞌ ga ãẽꞌgacümaꞌ? Ité ngĩgürügüama: “Erü choma rü chautanüxü̃gü rü marü toxü̃ naxüpane nax ngẽmaãcü toxü̃ nada̱i̱xü̃ca̱x ya guxãma. Rü ngẽxguma chi tomaxã natáegügu nax togüarü puracütanüxü̃gü tixĩgüxü̃ca̱x, rü choma rü chi taxu ñachagürümare, woo i ngẽma rü ta rü wüxi i chixexü̃ i taxü̃ nixĩ i cuxca̱x, Pa Ãẽ̱xgacüx —ngĩgürügü.” (Est 7:4) Nüü̃ nadau na Ité gutchaü̃tchigaü̃ tiu notürü taü ga yema erü nüü̃ icuaꞌ ga yema mu rü nanagutchaẽẽ ga yudíugüarü maü̃. Rü nhuꞌmatchi yema rü ãẽꞌgacüarü tchieü̃caꞌ niĩ rü Ité nawaꞌe yematchigaü̃ tiu.
19 Itéarü cuaꞌruü̃ ãũrima tüü̃ narüngü̃ẽẽ na nhuãcü meã togümaã nidea. Tchi wüi nguneü̃gu cunawaꞌe gutchaü̃tchigaü̃ quiugu namaã i cutanüü̃, cumügü rüeꞌna wüi duü̃ü̃ na togümaã ínacuá, yana namaã naĩnü, rü namecümaãcü nidea rü ãũrima cuü̃ narüngü̃ẽẽ na tama nagu quidaucüraü̃waꞌeü̃́caꞌ. — Pro 16:21, 23
Nguꞌẽẽtaegü uirurüü̃ iĩü̃
w06 1/3 11wa 1tchimaü̃
Yema 330.000 quíru naguü̃ i dĩẽrumü ga Amáü̃ nüna naãtchaü̃ i ãẽꞌgacücaꞌ rü nore niĩ erü tchi namaã nataegugu ga yudíugü na togümeꞌẽwa nayemaü̃caꞌ rü nanayau tá yeera i dĩẽru. Rü nhuꞌmatchi yeguma nüü̃ nimaꞌgügu ga guü̃ma ga yudíugü rü tüü̃ nimaꞌ tá ga ãẽꞌgacümaꞌ.
25 TCHETẼBRUARÜ – 1 OTUBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ | ESTER 9-10
“Nüma rü napuracü na togüü̃ narüngü̃ẽẽü̃caꞌ”
it-2 412wa 8tchimaü̃
Marduquéu nanayau ga Amáü̃arü puracü, rü nanayau ta ga ãẽꞌgacüarü anera na poperagüwa nangoꞌü̃caꞌ. Ité rü Marduquéuü̃ iuneta na namaã inacuáü̃caꞌ ga yema yemaü̃gü ga Amáü̃arütchire iĩü̃. Rü nawena, ãẽꞌgacü nanamu na naégagu Marduquéu nanaümatüü̃ rü nanaunagüü̃ i to mu na tama nanatchuꞌu ga yudígü ga namaã nügü nadaiꞌü̃caꞌ ga norü uwanügü ga nadaitchaü̃ü̃. Nagagu ga norü puracü ga ãẽꞌgacüpeꞌewa, yudíugü nüü̃ nangetchaü̃ ga Marduquéu, rü nüma rü napuracüama ga yudíugüarü mecaꞌ. — Est 9:19-22, 27-32, 10:2, 3
it-2 760wa 5tchimaü̃
Marduquéu rü Ité rü Yeuwaarü duü̃ü̃gü niĩgü rü na nüü̃ nicuaꞌüü̃güü̃caꞌ nümagü nanaügü i wüi peta na yema naüü̃caꞌ. Yeuwa nüü̃ narüngü̃ẽẽ na nanameẽẽü̃caꞌ ga gutchaü̃ ga yudíugücaꞌ ínanguꞌ yeguma Marduquéu tama Amáü̃peꞌewa nacã́apüꞌügu, erü nüma rü Yeuwaü̃icatama nicuaꞌüü̃.
cl 101-102wa 12-13tchimaü̃gü
12 Anciãogü nanawaꞌe meã nangugü i norü ĩnü natchiga i norü puracü i yaõgüü̃tücumüwa. (1 Pe 5:2, 3) Anciãogücaꞌ Tupanaarü Ore nüü̃ niu i nhaü̃: “Nüxna pedaugüxü̃ca̱x i ngẽma Tupanaãrü duü̃xü̃gü i yaxõgüxü̃ i Ngechuchu nagümaãtama naxca̱x taxexü̃.” (Pur 20:28) Ngẽma ore nanaweꞌ tüꞌcüü̃ anciãogü nawaꞌe mecümaãcüma nüna nadau a wüitchigü i taene rü taeya.
13 Tupana rü anciãogüü̃ namu na meãma nüna nadau i yaõgüü̃tücumü erü taenegü rü taeyagü nhama i carnerugürüü̃ niĩ. (Juã́ũ 21:16, 17) Yeuwaü̃́ nameẽtchi i norü duü̃ü̃gü rü ngẽmacaꞌ nanamu ga Ngetchutchu nacaꞌ nayu, rü yema tama natautcha erü Ngetchutchu rü Tupana nane i nügümaã wüicacü. Anciãogü tama nüü̃ inarüngüma i ngẽma rü meã Yeuwaarü duü̃ü̃güna nadaugüü̃.
Nguꞌẽẽtaegü uirurüü̃ iĩü̃
w06 1/3 11wa 4tchimaü̃
Ngẽma rü nanaweꞌ ga norü ngútchaü̃ niĩ nüü̃ ínapoü̃ ga norü maü̃ rü tama yeera i dĩẽru nanayaugü.
2-8 OTUBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ | JÓ 1-3
“Nanaweꞌama na Yeuwaü̃ cungetchaü̃”
w18.02 6wa 16-17tchimaü̃gü
16 Yó rü namuarü yemaü̃güãü̃tchi, natatchigaü̃ rü duü̃ü̃gü tama nagu nidaucüraü̃. (Jó 29:7-16) Yema rü bemana nanatchiẽẽ ga norü maü̃ tchi bemana Yó nagu rüĩnügu ga togüarü yeera niĩ rü tama nanawaꞌe i Tupanaarü ngü̃ẽẽ. Notürü yema rü tama nangupetüü̃. Yeuwa nüü̃ niu ga Yó ‘aicüma naga ĩnücü rü meã maü̃cü. Rü natauü̃ma i tchieü̃ i natchiga rü meã nügüna nadau na taúemaama tchieü̃ naüü̃caꞌ.’ — Jó 1:8
17 Notürü paãma Yóarü maü̃ nanaütchicüü. Yó ínarütau guü̃ma ga norü ngẽmaü̃gü rü natanüü̃gü rü yemacaꞌ nayutchaü̃. Nacaꞌ nagutchaü̃tchi ga yema! Rü yema rü nangupetüü̃ ga Tchatanágagu. Nüma rü nüü̃ niu ga Yó rü Yeuwaü̃ nicuaꞌüü̃ na nacaꞌ nanayaumare i Yeuwaarü ngü̃ẽẽ. — Nawa naugütae Jó 1:9, 10
w19.02 5wa 10tchimaü̃
10 Yema ga Tchataná nüü̃ niu tama niĩ ga Yótchigarica. Cuthiga niĩ ta. Tchataná nüü̃ niu na cuma rü tama aicuma Yeuwaü̃ cungetchaü̃. Nüma rü nüü̃ niu na tama cuyuü̃caꞌ cuma rü Yeuwaü̃ ícutaꞌ. Yeuwa nagu nayaõ na cuma rü aicuma nüü̃ cungetchaü̃ rü naga cuĩnüama rü ngẽmaãcü nanaweꞌ na Tchataná dorataꞌáü̃ niĩ. Rü Tupana nüü̃ nauneta na cuü̃ narüngü̃ẽẽ na naga cuĩnüamaü̃caꞌ. — Ebr 13:6
Nguꞌẽẽtaegü uirurüü̃ iĩü̃
w21.04 11wa 9tchimaü̃
9 Cuaꞌãtchiruü̃, yeguma nüü̃ niugu i ngẽma ore, Ngetchutchu nayanguẽẽ i wüi ore ga nũcümaü̃ nüü̃ niu nawa i Salmo 22:1. Rü nhuꞌmatchi, nanaweꞌ ga Yeuwa tama ‘nanatchuꞌu na taúema gutchaü̃ namaã üü̃caꞌ i nane. (Jó 1:10) Ngẽma rü nanaweꞌ na Yeuwa tama naneü̃ ínapoü̃ nacaꞌ ga norü uwanügü ga poraãcü nüü̃ naü, rü Ngetchutchu nüü̃ nacuaꞌ i ngẽma. Yema niĩ wüi poraãcü ga gutchaü̃ na taúemaü̃ naü̃pa ngupetüü̃. Ngẽma Ngetchutchuarü ore nanaweꞌ ta na nüma rü nüü̃ nacuaꞌ na tama tchieü̃ naü rü tama nanawaꞌe nayu.
9-15 OTUBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ | JÓ 4-5
“Nacaꞌ ínaũãẽ i oregüneta”
it-1 793wa 15tchimaü̃
Erifá niĩ wüi yatü yaẽ rü duü̃ü̃gü nüü̃ nacuaꞌ ga nüma rü naãẽ i cuácü niĩ.
w05 15/9 26wa 2tchimaü̃
Erifá nüna nicuaꞌãtchi ga taꞌacü namaã ngupetüü̃ yeguma wüi ngoꞌo namaã nideagu. (Jó 4:15, 16) Yema doragü ga Erifá nüü̃ niu rü nüü̃ nanaweꞌ ga wüi ga ngoꞌowa ne naũ. Rü aicuma niĩ ga yema ngoꞌo Erifáü̃ nanangútchaü̃ẽẽ na yema naüü̃caꞌ.
w10 15/2 19wa 6tchimaü̃
Tchataná rü Erifáwa nüü̃ niu na duü̃ü̃gü rü naturagü niĩ. Tupanaarü Ore nüü̃ niu na duü̃ü̃gü rü nhama wüi i tü̃ü̃ i waiümünacaꞌrüü̃ niĩ. (2 Cor 4:7) Taturaeü̃ erü tipecaduãgüü̃. (Rom 5:12) Ngẽguma taicatama ingẽmagügu, yeera natautcha na Tchataná tüü̃ natchieweü̃caꞌ. Notürü, erü Yeuwaarü duü̃ü̃gü tiĩgü, tüü̃́ nangẽma muü̃tchi i ngü̃ẽẽgü. Woo tipecaduãgüü̃, Tupana tüü̃ nangetchaü̃. (Isa 43:4) Rü nhuꞌmatchi, Yeuwa nüna naã i naãẽ i üüneü̃ nacaꞌ i teé nüna ícaꞌe. — Luca 11:13
mrt 32wa 14, 16-17tchimaü̃gü
Taꞌacü Tupanaarü Ore nüü̃ niu: “Meãma penangugü i guxü̃ma i oregü.” — 1 Techarónicacü̃ãꞌ 5:21.
Nacaꞌ nadau na nüü̃ cucuaꞌü̃caꞌ tchi teé tideagu rü aicumaü̃ niu.
Aicuma nüü̃ nacuaꞌ tchi ngẽma ore rü nhamaãcüü niĩgu rü weꞌguü̃ niĩ. Nacaꞌ iũãẽ namaã i oregü na tautchaãcüma nidea i wüi natchiga na nagutcha niĩ rüeꞌna tchi ngẽmatchigaü̃ niugu na duü̃ü̃güü̃ nabaiꞌãtchiẽẽgüü̃caꞌ.
Nguꞌẽẽtaegü uirurüü̃ iĩü̃
w03 15/5 22wa 6tchimaü̃
Wüitchigü i yiemagü inawaꞌe taenegüü̃ rü taeyagüü̃ rüngü̃ẽẽ na Yeuwacaꞌ napuracüeamagüü̃caꞌ. Namaã taügüü̃ ngẽgumarüü̃ i nhaa oregü rü nhanagürü: “Rü ngẽma tuxraxü̃ rü peyaporaãchixẽxẽ, rü ngẽma ipaxü̃ rü nüxü̃ perüngü̃xẽxẽ.” (Isa 35:3) Ngẽmaãcü, name na cugü naporaẽẽ na guü̃guma nüü̃ cutaãẽẽẽü̃caꞌ wüi rüeꞌna tare taenegü. (Ebr 10:24, 25) Rü nüü̃ nataãẽẽẽ i meü̃ i oremaã rü moẽ nüna naã erü nümagü nügü naporaẽẽ na Yeuwaü̃ nataãẽẽẽamaü̃caꞌ rü aicuma nüü̃ narüngü̃ẽẽ tá na nanayaugüü̃caꞌ i maü̃ i taguma gúü̃.
16-22 OTUBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ | JÓ 6-7
“Ngẽguma curü maü̃ rü nagutchaü̃tchigu”
w06 15/3 14wa 10tchimaü̃
Yóarü gutchaü̃gü rü taü̃ niĩ rü yemagagu nüma nüü̃ niu ga norü maü̃ rü nhama wüi i puracü i tchieü̃rüü̃ niĩ. — Jó 10:17
w20.12 16wa 1tchimaü̃
Ngẽmagagu, nüü̃ icuaꞌgüü̃ tüꞌcüü̃ nhuguãcü tarümaãtchi. Muü̃tchi ga Yeuwaarü duü̃ü̃gü ngẽgumarüü̃ narüĩnüẽ. Rü ta nümaü̃ rü nayutchaü̃. — 1 Reis 19:2-4, Jó 3:1-3, 11, 7:15, 16
g 1/12 16-17wa
Namaã nidea i cumücü i naãẽ i cuácü rü nagu nayaõ. Tupanaarü Ore nhanagürü: “Rü ngẽma aixcüma tamücü ixĩxü̃, rü guxü̃guma tüxü̃ nangechaü̃. Rü ngẽxguma guxchaxü̃ taxca̱x ínguxgu rü ñoma wüxi i taenexẽxü̃chirüxü̃ nixĩ.” — Pro 17:17
Guü̃ i curü maü̃nemaã Tupanacaꞌ nayumüẽ. Salmo 65:2 nüü̃ niu na Yeuwa ya Tupana rü yumüẽü̃ ĩnücü niĩ rü 1 Pedru 5:7 nhanagürü: “Tupana rü guxü̃guma pegu narüxĩnü rü aixcüma pexna nadau.” Rü Tupanaarü Ore mueꞌpüꞌcüna nüü̃ niu ta na inawaꞌegü Tupanagu tayaõgüü̃. Cuaꞌãtchiruü̃:
“¡Rü guxü̃ i curü maxü̃maxã nüxna rüyoe ya Cori ya Tupana! ¡Rü taxṹ i cuxrütama cua̱xna curüyoexü̃! ¡Rü guxü̃ma i ta̱xacü i cuxüxü̃wa rü Tupaname̱xẽgu naxǘ! Rü nüma rü tá cumaxã inacua̱x rü mea tá ínanguxuchi i ngẽma cuxüxü̃.” — PROVÉRBIOS 3:5, 6
“Rü yíxema nüxü̃ ngechaü̃güxe, rü tüxna nanaxã i ngẽma naxca̱x ítacaxü̃. Rü ngẽxguma norü ngü̃xẽẽca̱x nüxna tacagüegu, rü nüma rü tüxü̃ naxĩnü rü tümaarü guxchaxü̃wa tüxü̃ ínanguxü̃xẽxẽ.” — SALMO 145:19
“Rü ngẽmaca̱x tama taxãneẽ na nüxna ingaicamagüxü̃ ya Tupana. Rü nüxü̃ tacua̱xgü ega ṯacüca̱x nüxna icaxgu, rü nüma tüxü̃ naxĩnü i ngẽxguma norü ngúchaü̃ yixĩgu i ngẽma naxca̱x nüxna ic̱axü̃.” — 1 JUÃ́Ũ 5:14
“Rü nüma ya Cori ya Tupana rü nüxna nixũgachi i ngẽma chixexü̃gu maxẽxü̃. Natürü tüxü̃́ nüxü̃ naxĩnü i tümaarü yumüxẽ ya yíxema aixcüma mexü̃gu maxẽ.” — PROVÉRBIOS 15:29
Tchi Tupanamaã quideagu i guü̃ma i curü gutchaü̃gü, nüma rü cuü̃ narüngü̃ẽẽ tá. Rü ngẽmacaꞌ Tupanaarü Ore tüü̃ naucuꞌẽ i nhaü̃: “¡Rü guxü̃guma nagu peyaxõgü!” rü “¡Taxṹ i nüxü̃ pemuü̃exü̃ nax perü yumüxẽwa namaxã nüxü̃ pixuxü̃ i perü guxchaxü̃gü!” — Salmo 62:8
Nguꞌẽẽtaegü uirurüü̃ iĩü̃
w20.04 16wa 10tchimaü̃
10 Yeuwarüü̃ tiĩgü ngẽguma tama togü tchiri tangugügu rü yana namaã taĩnüwaꞌegu. Cugü naporaẽẽ na meã nüü̃ cucuaꞌü̃caꞌ i taenegü rü taeyagü. Namaã nidea naü̃pa rü nawena i ngutaqueꞌegü. Namaã naũ i Tupanatchiga togümaã nideawa. Nüna nau na wüigu petchibüegüü̃caꞌ.
23-29 OTUBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ | JÓ 8-10
“Yeuwaarü ngetchaü̃ tüü̃ ínapoü̃ nacaꞌ i Tchatanáarü doragü”
w15 1/7 12wa 3tchimaü̃
Yó muü̃tchi ga gutchaü̃gü nüü̃́ nayema rü tama nüü̃ nacuaꞌü̃ tüꞌcüü̃ yema rü namaã ngupetüü̃. Rü yemacaꞌ nüma rü nagu rüĩnü na Tupana tama nacaꞌ nagutchaãẽ ngoi nüma rü naga naĩnüama rüeꞌna tama. (Jó 9:20-22) Yó rü nüü̃ niutchigüama ga tauü̃ma ga tchieü̃ na naüü̃ rü ngẽma rü nanaweꞌ ga nüma rü nagu narüĩnü na Tupanaarü yeera weꞌguü̃ niĩ ga nüma. — Jó 32:1, 2, 35:1, 2
w21.11 6wa 14tchimaü̃
14 Nũcüma yeguma nanaümatügu ga Tupanaarü Ore, ĩanegüwa nayema i poeguü̃ na duü̃ü̃güü̃ ínapoü̃caꞌ nacaꞌ ga norü uwanügü. Ngẽgumarüü̃, Yeuwaarü ngetchaü̃ tüü̃ ínapoü̃ nacaꞌ i ngeü̃rüüü̃mare i gutchaü̃gü na nanagutchaẽẽ na namaã taãmücügüama.
Nguꞌẽẽtaegü uirurüü̃ iĩü̃
w10 15/10 6-7wa 20tchimaü̃
20 Taguma name Yeuwaü̃ tangugü i taꞌacügu tarüĩnüẽmaã erü Tupanaarü Ore nüü̃ niu na Yeuwaarü ĩnü rü guü̃ma i duü̃ü̃güarü ĩnügüarü yeera niĩ. (Jó 9:32) Tchi nawena na meã nacaꞌ tadaugügu i natchiga rü taũta meã nüü̃ icuaꞌgüü̃ i ngẽma, inawaꞌegü tanayau i ngẽma erü Yeuwawa ne naũ rü inawaꞌegü Yeuwagu tayaõgüü̃. Rü nüna nacuaꞌãtchi na nhuguãcü nümaü̃ i ore tüü̃ rüngü̃ẽẽ na nanaweꞌgüü̃caꞌ na nagu tayaõgüü̃ i Yeuwacümagü. Name yigü írüíraü̃ãcüma nüü̃ tacuaꞌãtchi na tama nüü̃ icuaꞌgüü̃ i guü̃ma i taꞌacü Tupana naüü̃. — Ecl 11:5
30 OTUBRUARÜ – 5 NOWẼBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ | JÓ 11-12
“Tamaẽꞌpüꞌ i nacümagü na nanayauü̃caꞌ i cuaꞌ”
w09 15/4 6wa 17tchimaü̃
17 Nhuãcü ga Yó meãma Yeuwamaã naãmücü? Nüü̃ name ga guü̃ma ga taꞌacü nüü̃ naĩnü natchiga na nhuãcü Abráü̃, Ichaá, Yacú rü to i natanüü̃gü. Rü, nüü̃ nadau i Yeuwa üü̃, Yó meã nüü̃ nacuaꞌü̃ i Yeuwacümagü. — Nawa naugütae Jó 12:7-9, 13, 16
w21.06 10-11wa 10-12tchimaü̃
10 Namaã naãmücü i taenegü rü taeyagü i yaõgüü̃tücumüwa. Nacaꞌ nadau na namaã naãmücü i taenegü rü taeyagü na meü̃ i cuaꞌrüü̃gü niĩ. Nümagü tama nawaꞌe cumaã nawüigu i nacümagüwa rü to natchigagüwa. Tupanaarü Ore nüna tüü̃ nacuaꞌãtchi na cuaꞌ i aicumaü̃ rü duü̃ü̃gü i narüyamaegüü̃ü̃tawa nangẽma. (Jó 12:12) Notürü, taenegü i marü yaẽ rü nawa nacuaꞌü̃gü ta i ngetüꞌüü̃gümaã rü paü̃gümaã i yaõgüü̃tücumüwa. Dawí rü ngetüꞌüü̃ niĩ notürü Yonatáü̃mücüü̃ nügü niĩẽẽ. (1 Sam 18:1) Nümagü rü nügü narüngü̃ẽẽgü na Yeuwacaꞌ napuracüeama woo muü̃tchi ga gutchaü̃gü. — 1 Sam 23:16-18
11 Bemana nagutcha ngẽwacaü̃ü̃ i duü̃ü̃gümaã naãmücü ngẽguma cuãnegu. Rü bemana nagutcha nüü̃ niu i curü ĩnütchiga i wüi duü̃ü̃maã, notürü na meü̃ i ãmücü niĩü̃caꞌ nawaꞌe i curü ĩnutchiga nidea. Cumücügü cuü̃ narüngü̃ẽẽtchaü̃ notürü nüü̃ nanatautchaẽẽ na ngẽmaãcü naügüü̃caꞌ.
12 Wüi meü̃ i nacüma niĩ na togümaã iãmücüü̃caꞌ rü Yeuwacaꞌ wüigu tapuracüe i yaõgüü̃maã. Ngẽguma yigü iporaẽẽgu na yaõgüü̃maã iãmücügüü̃, ngẽma rü torü mecaꞌ niĩ. Yeuwa ngẽma tamücügüwa tüü̃ narüngü̃ẽẽ ngẽguma gutchaü̃gü tacaꞌ íngugu. — Pro 17:17
it-2 886wa 4tchimaü̃
Cuaꞌ i aicumaü̃ rü Yeuwaü̃ itayangau erü “nüma ya Tupana rü nüxĩcatama nixĩ i Tupana yiĩxü̃, rü nüxĩcatama nixĩ i guxü̃xü̃ nacuáxü̃.” — Ro 16:27, Apo 7:12
Nguꞌẽẽtaegü uirurüü̃ iĩü̃
w08 1/8 11wa 5tchimaü̃
▪ Ngetüꞌüü̃gü rü paü̃gü airügumaraü̃ nidea i nhaü̃: “Guü̃guma” rü “taguma”. Cuaꞌãtchiruü̃, bemana cuacü rü nhanagürü: “Guü̃guma nagu curüĩnü na tchama rü wüi buü̃ tchiĩ!”, rüeꞌna “Cuma rü taguma tchoü̃ cuĩnü!”. Name nagu rüĩnü i taꞌacü cuacü rü cune rü nüü̃ niutchaü̃ rü tama taꞌacü marü nidea. Cuaꞌãtchiruü̃, “Guü̃guma nagu curüĩnü na tchama rü wüi buü̃ tchiĩ” bemana rü “nagu tcharüĩnü na cuma rü tama tchaugu cuyaõ” nhaü̃tchiga niĩ, rü “Cuma rü taguma tchoü̃ cuĩnü” bemana rü “tchanawaꞌe cumaã tchidea i taꞌacügu aicuma tcharüĩnü” nhaü̃tchiga niĩ. Cugü naporaẽẽ na nüü̃ quicuaꞌãtchiü̃caꞌ i taꞌacütchiga niĩ ngẽma ore i duü̃ü̃caꞌ.