Natchigagü i Ngutaqueꞌearü Nguꞌarü Popera Maü̃ rü Puracücaꞌ
© 2024 Watch Tower Bible and Tract Society of Pennsylvania
2-8 TCHETẼBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ SALMOS 79-81
Naweꞌ na nüü̃ cungetchaü̃ i Yeuwaéga ya meẽtchiü̃
w17.02 9wa 5tchimaü̃
5 Na Tupanaégaü̃ tatatchigaẽẽü̃caꞌ inawaeꞌgü nüü̃ ingetchaü̃ i ngẽma naéga. Nhuãcü tá iügüü̃ i ngẽma? Torü üwa. Yeuwa nawaꞌe na iüünegüü̃. (Nawa naugütae 1 Pedru 1:15, 16.) Ngẽma rü nhaü̃tchiga niĩ na Yeuwaü̃icatama ticuaꞌüü̃gü rü naga taĩnüẽ i guü̃ i torü maü̃nemaã. Woo duü̃ü̃gü tawe ningeü̃tanü, torü memaẽü̃ iügüü̃ na Yeuwaarü mugüga iĩnüẽü̃caꞌ i torü maü̃wa. Ngẽguma meü̃gü iügügu, rü nüü̃ ticuaꞌüü̃gü ya Yeuwa. (Mat 5:14-16) Tupanaarü mugüãcüma tamaẽ, rü ngẽmacaꞌ tanaweꞌgü na norü mugü rü meü̃ niĩ rü ta na Tchataná dorataꞌáü̃ niĩ. Rü ngẽguma tchieü̃ iügügu, guü̃ i torü maü̃nemaã rü nüü̃ taoe i ngẽma rü tama tchieü̃ iügüama, erü ngẽma rü nüü̃ nanatchieẽẽ i Yeuwaéga. — Sal 79:9
ijwbv 3 4-5tchimaü̃gü
Tupanaarü Orewa, ngẽma ore i “nüna icae i Yeuwaéga” rü tama nhaü̃tchigamare nüü̃ icuaꞌü̃ i Yeuwaẽ́ga rü ta nüü̃ icuaꞌüüü̃güü̃ i naẽ́gamaã. (Sal 116:12-14) Notürü natchiga rü ta Tupanagu iyaõ rü Tupanaarü ngü̃ẽẽcaꞌ nadau. — Sal 20:7, 99:6
Ngetchutchucaꞌ rü Tupanaéga ãũrima nameẽtchi. Yeguma norü ngúeü̃güü̃ nanguꞌẽẽgu na nhuãcü iyumüẽ, nüma rü inanaügü i nhaü̃: “‘Pa Tonatü ya Daxũgucüx, üünecü nixĩ i cuéga’”. (Mateu 6:9) Ngetchutchu rü ta nanaweꞌ rü nacaꞌ tanayaugü i ngẽma maü̃ i taguma guꞌü̃ rü name niĩ nüü̃ icuaꞌü̃, rü naga ĩnüẽü̃, rü nüü̃ ingetchaü̃ ya teé nagu ãẽ́gacü ya Yeuwa. — Juã́ũ 17:3, 6, 26
Nguꞌẽẽtaegü uirurüü̃ iĩü̃
it-2 145wa
Nagagu i Yuchéü̃ natatchigaẽẽ i Yacú nanegüwa, rü yemacaꞌ aiꞌrügümaraü̃ niĩ yeguma Tupanaarü Orewa nangoꞌgu i Yuchééga rü natchiga niĩ i guü̃ma Iraéutücumügü. (Sal 80:1) rüeꞌna natchiga niĩ i 10 i Iraéutücumügü i nórtewa yemaü̃. (Sal 78:67, Am 5:6, 15, 6:6) Rü naéga nangoꞌ ta i Tupanaarü Orearü unetagü.
9-15 DE TCHETẼBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ SALMOS 82-84
Moẽ nüna naã nagagu i taꞌacü Yeuwacaꞌ cuüü̃
wp16.6 8wa 3tchimaü̃
Wüi ga Coré nane rü nanawü i Salmo 84, rü nawa nüü̃ niu natchiga i weritchiü̃ ya tchiru. Tareeꞌpüꞌcüna i wüi taunecüwa, nanegü ga Coré rü wüi i yüügurica napuracüe ga Tupanapatawa. Notürü teé tanawü i nhaa salmo rü wüi i tchiru niĩtchaü̃, na Tupanapatagu napeü̃caꞌ. Nüma rü nhanagürü: “Pa Cori Pa Tupanax ya Guxãétüwa Ücüx, rü namexẽchi ya cupata ya üünene. Rü poraãcü choxü̃́ nangúchaü̃ nax cupataã̱xtügu chaxücuxü̃. Rü guxü̃ma i chorü taãẽmaxã cuxca̱x chawiyaechaü̃ Pa Tupana ya Guxü̃guma Maxü̃cüx. Rü woo i chirugü rü togü i werigü rü naxãchica i ngéma cupatawa nax ngẽxma naxüxchiãü̃güxü̃ca̱x, Pa Chorü Tupana Pa Chorü Ãẽ̱xgacü ya Guxãétüwa Ücüx” (Sal 84:1-3) Eꞌna torü ngútchaü̃ niĩ guü̃guma tangutaqueꞌegü i Tupanaarü duü̃ü̃gümaã? — Sal 26:8, 12
w08 15/7 30wa 3-4tchimaü̃gü
Nagagu i marü yaü̃ rüeꞌna daꞌawe tama yeeraãcü Yeuwacaꞌ tapuracüe.
Nũcümaü̃tchima, wüi lewítanüü̃ nüü̃ niu ga norü ngútchaü̃ i taucürüwama nangupetüü̃. Nüma rü Tupanapatawa napuracü ga tare yüügu i taunecügu. Notürü norü ngútchaü̃ niĩ guü̃guma nawa nayemaetcha. (Sal 84:1-3) Taꞌacü nüü̃ narüngü̃ẽẽ a yima yatü ga yaõcü na nataãẽü̃caꞌ ga norü puracümaã? Nüma rü nüü̃ nicuaꞌãtchi na nameẽtchi niĩ Tupanapatawa napuracü woo wüitama ga nguneü̃gu. (Sal 84:4, 5, 10) Ngẽgumarüü̃, name tama torü turagüguicatama tarüĩnüẽ, rü inawaꞌegü namaã itaãẽgü i taꞌacü taü.
w20.01 17wa 12tchimaü̃
12 Tchi cuma rü quidaꞌawegu, aicuma nagu yaõ na Yeuwa nüü̃ nacuaꞌ i taꞌacü cuü̃ ngúü̃. Rü nüü̃ nacaꞌaü̃ na meã nagu curüĩnüü̃caꞌ i curü gutchaü̃tchiga. Rü ngẽmaãcü, Tupanaarü Orewa naugütae. Meãma nacaꞌ rüĩnü i deagü i cuü̃ naweꞌ na nhuãcü Yeuwa namaã nataãẽ i wüitchigü i norü duü̃ü̃. Rü nüü̃ quicuaꞌãtchi ta na Yeuwa rü tümamaã namecüma ya teé aicuma naga taĩnüẽü̃. — Sal 84:11
Nguꞌẽẽtaegü uirurüü̃ iĩü̃
it-2 350wa
Nacaꞌ tagutchaãẽ i yutegüü̃ rü tacutagüü̃ wüi nacüma niĩ i nanaweꞌ na yaõgüü̃ i aicumagüü̃ iĩgüü̃. Rü Orearü uruü̃ ga Tiagu yaõgüü̃caꞌ nanawü i nhaü̃: “Natürü tümaarü õ i Tanatü ya Tupanape̱xewa aixcüma mexü̃, rü ngẽma nixĩ nax nüxü̃ tarüngü̃xẽẽxü̃ i taxcutagü rü yutegüxü̃ rü tügüna tadauxü̃ nax tama ñoma i naanearü chixexü̃gu tanguxü̃.” — Tia 1:27
16-22 DE TCHETẼBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ SALMOS 85-87
Yumüẽ rü tüü̃ narüngü̃ẽẽ na tama nüü̃ tarütchaueü̃caꞌ
w12 15/5 25wa 10tchimaü̃
10 Na Yeuwacümaãcüma tamaẽü̃caꞌ, inawaꞌegü guü̃guma iyumüẽgü. (Rom 12:12) Inawaꞌegü nüna nacaꞌ taca na tüü̃ narüngü̃ẽẽü̃caꞌ na norü ngútchaü̃ãcüma tamaẽü̃caꞌ. Nacaꞌ i ngẽma, name nüna nacaꞌ taca i naãẽ i üüneü̃, yeera i õ, rü pora na tama pecadugu tayiĩcaꞌ rü meãma ideagüü̃caꞌ i Tupanaarü Ore. (2 Tim 2:15, Mat 6:13, Luca 11:13, 17:5) Wüi buü̃ü̃ guü̃guma nanawaꞌe i nanatüarü ngü̃ẽẽ rü ngẽgumarüü̃ tanawaꞌegü i Yeuwaarü ngü̃ẽẽ. Ngẽguma nüna nacaꞌ ítacagu i ngü̃ẽẽ na meã nacaꞌ tapuracüeü̃caꞌ, aicuma nagu tayaõgü na nüma rü ngẽma naü tá. Taguma nagu rüĩnüẽ na nüü̃ tatchiewe! Ngẽmaetüwa, nacaꞌ tayumüẽgü na nüü̃ ticuaꞌüü̃güü̃caꞌ, rü moẽ nüna iãgüü̃caꞌ, rü norü ngü̃ẽẽcaꞌ idaugüü̃caꞌ i gutchaü̃güwa. Rü ta tüü̃ narüngü̃ẽẽü̃caꞌ na nacaꞌ tapuracüeü̃caꞌ i norü ngútchaü̃ãcüma na nüü̃ tatatchigaẽẽü̃caꞌ i naéga. — Sal 86:12, Tia 1:5-7
17 Nawa naugütae Salmo 86:6, 7. Dawí aicuma nagu nayaõ ga Yeuwa nüü̃ naĩnü rü nanangãü̃ i norü yumüẽgü. Rü cuma rü ta ngẽmagu cuyaõ. Nangẽma muü̃tchi i cuaꞌruü̃gü i tüü̃ naweꞌü̃ na Yeuwa tüna naã i cuaꞌ rü pora na tama nüü̃ tarütchaueü̃caꞌ. Rü nüma rü tüü̃ narüngü̃ẽẽ nawa i taenegü rü ta togü i duü̃ü̃gü i tama nüü̃ nicuaꞌüü̃gü.
18 Aicuma niĩ na Yeuwa tama guü̃guma nanangãü̃ i torü yumüẽgü i torü ngútchaü̃ãcüma. Notürü aicuma niĩ na nüma rü nanangãü̃ tá. Yeuwa tüna naã tá i taꞌacü aicuma tanawaꞌegü i meã i ngoragu. Ngẽmaãcü nayumüẽama, rü nagu nayaõ na Yeuwa rü cuna nadau i nhuꞌma rü wipeꞌewa i meẽtchiü̃ i naãnewa nüma rü ‘nanataãẽẽẽ i guü̃ma i ngẽma maẽü̃’. — Sal 145:16
Nguꞌẽẽtaegü uirurüü̃ iĩü̃
it-1 556wa 6tchimaü̃
Dawí nayumüẽ na Tupana nawüiguẽẽü̃caꞌ i norü maü̃ne, rü ngẽma rü nanaweꞌ na bemana duü̃ü̃arü ĩnü rü norü muü̃ rü nüü̃ nitoye i norü maü̃ne. (Sal 86:11) Ngẽma duü̃ü̃gü i norü maü̃negü i marü yauyeü̃ rü tama meã Tupanaü̃ nicuaꞌügüü̃. (Sal 119:113, Apo 3:16) Wüi duü̃ü̃ i nüü̃́ nangẽma i maü̃ne i yayaeü̃ rü ngẽguma nüü̃ nawomüẽẽtchaü̃gu i togü. (1Crô 12:33, Sal 12:2) Ngetchutchu nüü̃ niutchiga i ngẽma duü̃ü̃gü i togüepeꞌewa meã maẽnetaü̃. — Mat 15:7, 8
23-29 DE TCHETẼBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ SALMOS 88-89
Yeuwa rü togü i ãẽꞌgacüarü yeera meü̃ niĩ
w17.06 28wa 5tchimaü̃
5 Yeuwa tama nawaꞌe i duü̃ü̃güarü mugü na nüü̃ naunetaü̃caꞌ i taꞌacü weꞌguü̃ rüeꞌna tchieü̃ niĩ. Yeuwa rü guü̃arü yeera weꞌguü̃ niĩ. Rü duü̃ü̃güna naã i mugü nawa i taꞌacü weꞌguü̃ niĩ. Tupanaarü Ore nüü̃ niu na Yeuwa ‘rü guxü̃ma wüxiguraxü̃ãcüma nanangugü rü aixcüma nawe̱xgu i ngẽma namaxã naxueguxü̃ i wüxichigü’. Rü ngẽmacaꞌ, inawaꞌegü nagu tayaõgü na guü̃ma i norü mugü, norü unetagü rü norü ngútchaü̃ rü weꞌguü̃ niĩ. — Sal. 89:14, 119:128
w17.06 29wa 10-11tchimaü̃gü
10 Nüma rü tama tüna nanatchuꞌumare rü nanawaꞌe na tüü̃́ nangẽma i taãẽ. (2 Cor 3:17) Dawí Yeuwatchiga rü nhanagürü: “Rü nüma ínangexmaxü̃wa rü poraãcü nangóone. Rü napatawa nangẽxma i pora rü taãxẽ.” (1 Crô 16:7, 27) Etã ga wiyaeü̃ rü nhanagürü: “Pa Corix, nataãẽgü i ngẽma duü̃xü̃gü i nüxü̃ cuáxü̃ nax taãẽãcü cuxü̃ yacua̱xüü̃güxü̃ rü aixcüma curü oregu namaxẽxü̃ nax ngẽmaãcü curü ngóonexü̃wa nangẽxmagüxü̃. Rü nataãẽgü i ngẽma curü duü̃xü̃gü i guxü̃guma cumaxã taãẽgüxü̃ rü naxca̱x daugüxü̃ nax cucümagu naxĩxü̃.” — Sal 89:15, 16
11 Ngẽguma yeera nagu tarüĩnüẽgu na nhuãcü Yeuwa rü namecüma niĩ, yeera nüü̃ icuaꞌgüü̃ na nüma rü ãẽꞌcacü i togüarü ãẽꞌcacü meü̃ niĩ. Rü torü ĩnü rü wiyaeü̃arü ĩnürüü̃ niĩ yeguma nhaü̃gu: “Rü ngẽma 1,000 i ngunexü̃ i nagu ngextámare changexmaxü̃arü yexera rü narümemae nixĩ nax wüxitama i ngunexü̃ cupataã̱xtüwa changexmaxü̃.” (Sal 84:10) Nacaꞌ i wiyaeü̃ natauma i taꞌacü Yeuwaarü puracüarü memaẽü̃ niĩ. Rü ngẽma rü aicuma niĩ. Yeuwa torü Üruü̃ niĩ rü aicuma nüü̃ nacuaꞌ i taꞌacü inawaꞌegü na aicuma tataãẽgüü̃caꞌ. Nüma rü inaãwaꞌeü̃ rü taꞌacü inawaꞌegüarü yeera tüna naã. Guü̃ma i taꞌacü i Yeuwa tüü̃́ nawaꞌe rü torü mecaꞌ niĩ. Woo nhuguãcü inawaꞌegü pora taü na Yeuwaga iĩnüẽü̃caꞌ, rü iügüü̃ i ngẽma rü guü̃guma torü mecaꞌ niĩ. — Nawa naugütae Isaías 48:17.
w14 15/10 10wa 14tchimaü̃
14 Rü Ngetchutchuwa, Dawi ‘guxü̃gutáma Iraéanecüã̱xgüarü ãẽ̱xgacü nixĩ ’. Aicuma niĩ na ngẽma Dawitaa ‘guxü̃gutáma Iraéanecüã̱xgüarü ãẽ̱xgacü nixĩ ñoma üa̱xcü ibáixechaxü̃rüxü̃’. (Sal 89:34-37) Rü ngẽmaãcü ngẽguma Cristu nhama i naãnemaã ínacuaꞌgu tá rü tagutáma togüeü̃ nawomüẽẽ rü norü meü̃ rü nangẽmaetchaü̃ tá!
Nguꞌẽẽtaegü uirurüü̃ iĩü̃
w93 1/1 32wa
Yeguma Iraéutanüü̃ nüü̃ narüdaunügu ga tauwemacü rü nüna nacuaꞌãtchie ga wüi meü̃. Tupana namaã nauneta ga Dawítaagü guü̃guma ãẽꞌcacü niĩgü. Nüma rü nhanagürü: “Rü ñoma tauemacü guxü̃guma ngóxü̃rüxü̃ rü ngẽxgumarüxü̃ guxü̃gutáma Iraéanecüã̱xgüarü ãẽ̱xgacügü nixĩgü ñoma daxũguxü̃ i naane ngẽxmaechaxü̃rüxü̃.” (Sal 89:35-37) Rü ngẽma uneta nagu nayanguẽẽ ga Ngetchutchu. (Luca 18:38) Ngetchutchu, norü yuwena, wenaarü maü̃ rü naãẽ niĩ i nüma rü dauü̃guü̃ i naãnewa naũ. (Pur 2:34-36) Rü nawena, ãẽꞌcacü nüü̃ niĩẽẽ i dauũguü̃ i naãnewa. (Apo 12:10) Nüma rü marü namaã ínacuá i nhuꞌma rü “nüma rü guxü̃gutáma ãẽ̱xgacü nixĩ”. (Dan 2:44) Ngẽmaãcü, Ngetchutchu ya taguma yucü ya Dawítaa rü guü̃gutáma namaã ínacuáü̃ nhama tauwemacü i guü̃gutáma nangẽmaetchaü̃rüü̃.
5 Ngẽmaãcü, ngẽguma guü̃guma nüü̃ cudaugu i tauwemacü i dauü̃guü̃ i naãnewa, rü nüna nacuaꞌãtchi i ngẽma Tupanaarü uneta rü moẽ nüna naã erü Tupana marü namaã ínacuá i nhuꞌma rü wipeꞌewa ta. Rü ngẽma rü Tupanaü̃ natatchigaẽẽ rü ta duü̃ü̃güarü mecaꞌ niĩ. — Apo 11:15
30 DE TCHETẼBRUARÜ–6 DE OTUBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ SALMOS 90-91
Yeera cumaü̃tchaü̃? Yeuwagu nayaõ!
wp19.3 5wa 3-4tchimaü̃gü
Muü̃tchi i cientistagü rü nüü̃ niugü na saúdearü tratamentogü nacaꞌ tama yaguãü̃ rü tama nüü̃ narüngü̃ẽẽ i duü̃ü̃gü na yeera namaẽü̃caꞌ.
Nũcümaü̃tchi, Moiché, wüi yatü ga Tupanaarü Orewa nanawü rü nhanagürü i nhaü̃: “Rü 70 ya taunecü nixĩ ya woetama nagu imaxẽcü. Rü yíxema rüporamaegüxe rü 80 ya taunecüwa tangugü. Natürü yíxema máxarü maxü̃ã̱güxe rü tümaca̱x ínangu i ngúxü̃gü rü guxchaxü̃gü. Rü yimá torü taunecügü rü torüxü̃ paxãma nangupetü.” (Salmo 90:10) Woo guü̃ma i taꞌacü duü̃ü̃gü rü marü nanaügü, torü maü̃ rü niĩ narüü̃ ga Moichéarü nguneü̃gu, rü tama muü̃tchi i taunecügügu tamaẽ.
wp19.1 5wa, quadru
Muü̃tchi i duü̃ü̃gü nüü̃ nacuaꞌgüü̃tchaü̃ i ngẽma. Bemana cuma rü marü cugüna cuca i ngẽma. Notürü, taꞌacü aicuma nüü̃ icuaꞌgütchaü̃ rü nhaa ca niĩ: Tchi Tupana nanaügu guü̃ma i taꞌacü dauü̃guü̃ i naãnewa rü nhaa naãnewa ngẽmaü̃, rü ngetá ne naũ a Tupana?
Cientistagü rü aiꞌrügümaraü̃ãcüma nüü̃ niugü na guü̃ma i naãnewa rü dauü̃guü̃ i naãnewa ngẽmaü̃, rü nüü̃ nangẽma i norü ügü, cuaꞌãtchiruü̃ ẽtagü rü planetagü. Rü ngẽma ĩnü namaã nawuigu i taꞌacü Tupanaarü Ore nüü̃ niu. Nawa i nüíra wetchicuru i Tupanaarü Ore rü nhanagürü: “Tupana namaxã inaxügüxü̃ nixĩ nax naxüaxü̃ ga guxü̃ma i daxũwa ngẽxmaxü̃ rü ñoma i naane.” — Gên 1:1
Naãne, dauü̃guü̃ i naãne rü guü̃ma i taꞌacü nawa ngẽmaü̃ rü tama ngürümare naügü rü bai nügütama naügü. Na nhama i naãne rü dauü̃guü̃ i naãne nangẽmaü̃caꞌ nawaꞌe na nangẽma wüi ngẽmaü̃ rüeꞌna wüi duü̃ü̃ i tama naãnewa rü dauü̃guü̃ i naãnewa ne naũ. Yeuwa ya Tupana niĩ i ngẽma duü̃ü̃. Naü̃ne rü naãẽ niĩ rü tama nawa ne naũ i taꞌacü naü. Yeuwa rü norü poramaã rü norü cuaꞌmaã nanaü i guü̃ma i taꞌacü naãnewa rü dauü̃guü̃ i naãnewa ngẽmaü̃. — Juã́ũ 4:24.
Tupanaarü Ore rü nhanagürü: “Rü nũxcümaxü̃chima naxü̃pa nax cunaxüxü̃ ga ñoma ga naane rü norü ma̱xpǘnegü rü woetama marü Tupana quixĩ. Rü cuma rü guxü̃gutáma cungexmaecha.” (Sal 90:2) Ngẽmaãcü, taúema naü a Tupana, nüma rü guü̃guma Tupana niĩ. Rü ngẽma nanaweꞌ na Tupana “nũxcümaxü̃chima” rü nanaü i naãne rü dauü̃guü̃ i naãne. — Apo 4:11
16 Tchataná nüü̃ nacuaꞌ na torü maü̃ rü tacaꞌ narümemaẽ niĩ. Notürü nüma rü nüü̃ niu na nüü̃ ítawogü i guü̃ma i taꞌacü tüü̃́ ngẽmagüü̃ rü Yeuwa na tamaẽamaü̃caꞌ. (Jó 2:4, 5) Notürü nüma rü nagutchinü! “Chatanáarü pora ga namaxã tüxü̃ iyanatauxẽẽchaü̃xü̃” rü ngẽmagagu rü nüma tüü̃ namuü̃eü̃ẽẽtchaü̃ na Yeuwana tüü̃ niĩgatchiẽẽü̃caꞌ. (Ebr 2:14, 15) Nhuguãcü, Tchataná nümaü̃ duü̃ü̃güwa rü namaã i yu rü tüü̃ nanaãũnegü ngoi Yeuwaga iĩnüẽ. Rü nhuꞌmatchi rü daꞌawe i tchieü̃wa tchatana tüü̃ nangútchaü̃ẽẽ na tama Tupanaarü mugüga iĩnüẽü̃caꞌ. Cuaꞌãtchiruü̃, nümaü̃ i duturugü rüeꞌna tatanüü̃gü rü bemana tüü̃ natchieweü̃tchi nacaꞌ tanayau i nagü rüeꞌna tanayau i wüi tratamento i tama Tupanaarü Orearü ucuꞌẽgümaã nawüigu.
17 Taúema nayutchaü̃. Notürü, woo ngẽma rü nangupetüü̃, aicuma nagu tayaõgü na Yeuwa rü taguma tüü̃ inarüngüma rü guü̃guma tüü̃ nangetchaü̃. (Nawa naugütae Romacü̃ãꞌ 8:37-39.) Ngẽguma wüi duü̃ü̃ i Yeuwamaã ãmücüü̃ nayugu, nüma rü norü ngútchaü̃maã rü nüna nacuaꞌãtchi i ngẽma duü̃ü̃. (Luca 20:37, 38) Nüma rü ãũrima nanawaꞌe nüü̃ ínarüdaẽẽ i ngẽma duü̃ü̃. (Jó 14:15) Yeuwa nanaütanü i torü pecadugü nawa i nane na ngẽmaãcü maü̃ i taguma gúü̃ tüü̃ ngẽmaü̃caꞌ. (Juã́ũ 3:16) Rü nüü̃ tadaugü na nhuãcü Yeuwa ãũrima tüü̃ nangetchaü̃ rü tüna nadau. Rü ngẽmacaꞌ, ngẽguma poraãcü tidaꞌawegügu rüeꞌna ãũcümaü̃wa ingẽmagügu, Yeuwacaꞌ tadaugü na nüma rü tüü̃ nataãẽẽẽü̃caꞌ, rü tüna naãü̃caꞌ i cuaꞌ rü pora. — Sal 41:3
Nguꞌẽẽtaegü uirurüü̃ iĩü̃
wp17.5 5wa
Tupanaarü Ore tama tüü̃ nanguꞌẽẽ na wüitchigü i duü̃ü̃ nüü̃ nangẽma i wüi ãĩyu na nüü̃ ínapoü̃ü̃caꞌ. Wüieꞌpüꞌcüna, Ngetchutchu nhanagürü: “Rü tama name i nüxü̃ pexoo̱x i wüxi i buxü̃ i ñaarüxü̃ choxü̃́ yaxõxü̃. Erü ngẽma norü dauruü̃gü i orearü ngeruü̃gü i daxũcüã̱x rü guxü̃guma Chaunatü ya daxũgucüpe̱xewa nangẽxmagü.” (Mat 18:10) Taꞌacü Ngetchutchu nüü̃ niutchaü̃ i nhaa deagümaã? Nüma rü nüü̃ niu na ãĩyugü rü duü̃ü̃gücaꞌ nagutchaãẽ, notürü tama nüü̃ niutchaü̃ na wüitchigü i duü̃ü̃ nüü̃́ nangẽma i wüi ãĩyu na nüü̃ ínapoü̃ü̃caꞌ. Rü ngẽmacaꞌ, yaõgüü̃ i aicumagüü̃ rü tama ãũcümaü̃wa nügü ngẽmagüẽẽ, erü nüü̃ nacuaꞌgüü̃ na ãĩyugü rü tama nüü̃ ínapoü̃ tá.
Eꞌna ngẽma rü nanaweꞌ na ãĩyugü rü tama duü̃ü̃güü̃ narüngü̃ẽẽ? Tama. (Sal 91:11) Nümaü̃ aicuma nagu nayaõgü na Tupana rü nüü̃ narüngü̃ẽẽ rü nüü̃ naucuꞌẽ nawa i ãĩyugü. Yeuwaarü Orearü Uruü̃gü mueꞌpüꞌcüna nüü̃ nicuaꞌãtchitanü na ãĩyugü rü nüü̃ narüngü̃ẽẽ i norü puracü i Yeuwacaꞌ ngẽguma Tupanaarü Oreü̃ niugügu. Notürü, tama nüü̃ tadaugü i ãĩyugü, rü ngẽmacaꞌ tama nüü̃ icuaꞌgüü̃ nhuãcü Tupana duü̃ü̃güü̃ narüngü̃ẽẽ nawa i ãĩyugü. Rü ngẽmaãcü, tauma natchie Tupanana moẽ taã nagagu i ngeü̃rüüü̃mare i ngü̃ẽẽ i nüma rü tüna ãü̃. — Cor 3:15, Tia 1:17, 18
7-13 DE OTUBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ SALMOS 92-95
Yeuwacaꞌ napuracü rü memaeü̃ niĩ!
w18.04 26wa 5tchimaü̃
5 Nüü̃ iuneta i taꞌacügü nüna tangútchaü̃ i Yeuwaarü puracüwa na Yeuwana moẽ iãgüü̃caꞌ nagagu i norü meü̃. Wiyaeü̃ rü nhanagürü: “Name nixĩ nax moxẽ cuxna taxãgüxü̃. . . Pa Corix, cuma rü ngẽma cha̱u̱xca̱x cuxüxü̃maxã choxü̃ cutaãẽxẽxẽ. Rü ngẽma mexü̃ i cuxüxü̃ rü taãxẽ choxna naxã.” (Sal 92:1, 4) Nagu rüĩnü i guü̃ma i taꞌacü Yeuwa marü cuna naã, cuaꞌãtchiruü̃: curü maü̃, Tupanaarü Ore, yaõgüü̃tücumü, curü õ rü norü unetagü natchiga i meü̃gü i wipeꞌewa nangupetüü̃ tá. Ngẽguma nüü̃ cuunetagu i taꞌacügü nüna cungútchaü̃ i Yeuwaarü puracüwa, ngẽma rü nhama wüi i “moẽtchi” i Yeuwaü̃ nhacugürürüü̃ nacaꞌ i guü̃ma. Rü ngẽma rü yeera cuü̃ nüna nangaicamaẽẽ.
w18.11 20wa 8tchimaü̃
8 Yeuwa rü wüi i nanatürüü̃ niĩ. Nüma rü nanawaꞌe na naacügü rü taãẽãcü namaẽ. (Isa 48:17, 18) Rü ngẽmacaꞌ, nüma rü tüna naã i ucuꞌẽgü natchiga i tacümagü rü nhuãcü meã togüemaã tamaẽ. Yeuwa nanawaꞌe na torü ĩnü rü norü ĩnürüü̃ niĩ, rü ta na tacümagü rü nacümagürüü̃ niĩ. Notürü ngẽma rü tama wüi natchuꞌu niĩ. Rü ngẽmaétüwa, ngẽma ucuꞌẽgü tüü̃ nangúeẽẽ na meã nagu tarüĩnüẽü̃caꞌ rü tá cuaꞌ tüna naã. (Sal 92:5, Pro 2:1-5, Isa 55:9) Ngẽguma torü ĩnü rü Yeuwaarü ĩnürüü̃ niĩgu, meü̃ i uneta iügüü̃ rü ta nüü̃ taunetagü i taꞌacü tüü̃ name. (Sal 1:2, 3) Rü aicuma niĩ na torü ĩnü rü Yeuwaarü ĩnürüü̃ niĩ rü torü mecaꞌ niĩ!
w20.01 19wa 18tchimaü̃
18 Woo marü yaguãgü, Yeuwa nanaüama i norü puracü i tawa. (Sal 92:12-15) Bemana cuma rü nagu rüĩnü na curü puracü i Yeuwacaꞌ rü nore niĩ. Notürü Ngetchutchu tüü̃ nanguꞌẽẽ na, Yeuwacaꞌ, guü̃ma i taꞌacü nacaꞌ iügüü̃ rü nameẽtchi niĩ. (Luca 21:2-4) Rü ngẽmacaꞌ, naguicatama rüĩnü i taꞌacü cuüü̃. Cuaꞌãtchiruü̃, cuma rü togüemaã quidea i Yeuwatchiga, nacaꞌ cuyumüẽ rü taenegüü̃ cutaãẽẽẽ na tama nüü̃ narütchaueü̃caꞌ. Yeuwacaꞌ nameẽtchi niĩ na cuma rü curü ngútchaü̃maã naga cuĩnü nüétama nore rüeꞌna muü̃tchi i puracü nacaꞌ cuü. — 1 Cor 3:5-9
Nguꞌẽẽtaegü uirurüü̃ iĩü̃
cl 176wa 18tchimaü̃
18 Nüü̃ nadau na nhuãcü Pauru nüü̃ niutchiga i Yeuwaarü cuaꞌ: “Rü guxü̃ma i ngẽma Tupanaarü mexü̃gü rü taxúema nüxü̃ tacua̱x i norü mu. Rü ngẽxgumarüxü̃ ta i norü cua̱x rü norü ĩnü rü taxúema nüxü̃ tacua̱x i ngẽma. Rü taxúema nüxü̃ tacua̱x i ngẽma nagu naxĩnüxü̃ rü naxüxü̃.” (Rom 11:33) Gregugawa, Pauru inaügü i ngẽma wetchicuru namaã i dea i tomagawa “Ó”, nacaꞌ nanaweꞌ na nüü̃ nicuaꞌüü̃ nagagu i norü cuaꞌ. Rü dea i gregugawa nacaꞌ i “profundas” rü narüü̃ niĩ i dea i tomagawa “abismo”. Rü ngẽma rü tüü̃ narüngü̃ẽẽ na taãẽwa nüü̃ tadau i cuaꞌruü̃. Ngẽguma nagu rüĩnüẽgu i Yeuwaarü cuaꞌ rü ngẽma rü nhama nüü̃ idauü̃rüü̃ i wüi ãmaü̃ i mamaü̃ i taucürüwama nüü̃ daugüü̃ i norü guꞌ! (Sal 92:5) Ngẽma rü tüü̃ narüngü̃ẽẽ nacaꞌ yigü írüraü̃, caꞌna?
14-20 DE OTUBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ SALMOS 96-99
Penaunagü i ore i meü̃!
w11 1/3 6wa 1-2tchimaü̃gü
Rü õgüü̃tanüü̃ nawaꞌe nüü̃ niugü i “Tupanaarü ore i mexü̃” i duü̃ü̃gümaã, rü ta nüü̃ niugü na Tupana meãma nhama i naãnemaã ínacuá i wipeꞌewa. Notürü, nhaa dea “ore i mexü̃” rü to nacümaãcü Tupanaarü Orewa nangẽma. Cuaꞌãtchiruü̃, nüü̃ niu i ‘ore i meü tüü̃ namaẽẽẽü̃tchiga’ (Salmo 96:2), rü “ore i mexü̃” i Tupanaarü (Rom 15:16), rü ta “ore i mexü̃ ya Ngechuchu ya Cristu ya Tupana Nanechiga”. — Mar 1:1
Rü ngẽma dea nüü̃ niutchaü̃ na Tupanaarü ore i meü̃wa nangẽma i guü̃ma i ore i aicumaü̃ i Ngetchutchu nüü̃ yauü̃ rü norü ngúeü̃gü nanaümatüü̃. Naü̃pa na daũü̃guü̃ i naãnewa naũ, rü Ngetchutchu norü ngúeü̃güü̃ nhanagürü: “Guxü̃ i nachixü̃anewa pexĩ i guxü̃ i duü̃xü̃gütanüwa. ¡Rü chorü duü̃xü̃güxü̃ peyaxĩgüxẽxẽ̱x! ¡Rü ípenabaiü̃xẽxẽ chauégagu rü Chaunatüégagu rü Naãxẽ ya Üünexü̃égagu! ¡Rü penangúexẽxẽ nax naga naxĩnüexü̃ca̱x i guxü̃ma i ngẽma pexü̃ chamuxü̃!” (Mat 28:19, 20) Rü ngẽmaãcü, ngẽma õgüü̃tanüü̃ i aicumagüü̃arü puracü rü natchiga Tupanaü̃ niugü rü nawaꞌe togüeü̃ narüngü̃ẽẽ na Ngetchutchuwe narüĩü̃caꞌ.
w12 1/9 16wa 1tchimaü̃
Noturü Tupanaarü Ore nüü̃ niu na ngẽma nguneü̃ ya Tupana duü̃ü̃güü̃ nagu icagüü̃ rü nacaꞌ niĩ duü̃ü̃güü̃ ínanguü̃ẽẽ i tchieü̃wa. (Salmo 96:13) Tupana nüü̃ nauneta i Ngetchutchu na nüna cacü niĩü̃caꞌ rü tá nanameẽẽü̃caꞌ i nhama i naãne. — Nawa naugütae Isaías 11:1-5, Puracügü 17:31.
w12 15/9 12wa 19tchimaü̃
Rü nüü̃ narüoẽẽ tá i guü̃ma i ngẽma tama naga ĩnüẽü̃ i duü̃ü̃gü rü ngoꞌogü. Ngẽma nguneü̃ rü taãẽü̃ niĩ tá! Rü guü̃ma i Yeuwaarü duü̃ü̃gü̃ rü taãẽãcü nüü̃ tá nicuaꞌüü̃gü ya Yeuwa ya guü̃maã ícuácü. — Nawa naugütae Salmo 99:1-3.
Nguꞌẽẽtaegü uirurüü̃ iĩü̃
it-1 427wa
Deagü natchiga i “ngexwaca̱xü̃xü̃ i wiyae” popera i Salmoswa nangẽma rü ta popera Isaíaswa rü Apocaríchiuwa. (Sal 33:3, 40:3, 96:1, 98:1, 144:9, 149:1, Isa 42:10, Apo 5:9, 14:3) Ngẽguma tanangugügu i ngẽma dea “ngexwaca̱xü̃xü̃ i wiyae” i ngetá nangoꞌ rü nanaweꞌ na nagu nawiyae nagagu i Yeuwaarü tchuraragü. Rü wiyaeü̃ nüü̃ niurüü̃ nawa i Salmo 96:10 ga nhaü̃: “Nüma ya [Yeuwa] Cori ya Tupana nixĩ i ãẽ̱xgacü ya guxãétüwa ngẽxmacü yixĩxü̃.” Yeuwa wipeꞌewa guü̃maã ínacuá tá i daũü̃guü̃ i naãnewa rü nhama i naãnewa rü bemana natchiga niĩ i ngẽma “ngexwaca̱xü̃xü̃ i wiyae”. — Sal 96:11-13, 98:9, Isa 42:10, 13
21-27 DE OTUBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ SALMOS 100-102
Moẽ nüna naã erü Yeuwa aicuma cuü̃ nangetchaü̃
18 Yeuwaü̃ cungetchaü̃ rü wüi meẽtchiü̃ i nacüma na cuü̃́ ngemaü̃caꞌ. (Nawa naugütae Provérbios 3:3-6.) Poraãcü Yeuwaü̃ cungetchaü̃ rü cuü̃ narüngü̃ẽẽ tá na nüü̃ curüporamaẽü̃caꞌ i gutchaü̃gü. Tupanaarü Ore rü mueꞌpüꞌcüna natchiga nidea i Yeuwaarü ngetchaü̃ nacaꞌ i norü duü̃ü̃gü. Ngẽma natchiga niĩ na nüma rü tagutáma nüü̃ ínawogü rü guü̃gutáma nüü̃ nangetchaü̃ i norü duü̃ü̃gü. (Sal 100:5) Nüna cucuaꞌãtchi na Tupana nügüraü̃ãcü nanaü i cuma. (Gên 1:26) Ngẽmaãcü, nhuãcü cunaweꞌ na aicuma nüü̃ cungetchaü̃?
19 Wüi nacüma niĩ moẽ nüna naã. (1 Te 5:18) Guü̃ i nguneü̃gu cugüãẽwa cugüna naca i nhaü̃: ‘Nhuãcü Yeuwa tchoü̃ naweꞌ na tchoü̃ nangetchaü̃?’ Rü ngẽmacaꞌ, curü yumüẽwa Yeuwana moẽ naã nagagu i meü̃gü i cucaꞌ naüü̃. Yeuwa muü̃ma i nacümagüwa nanaweꞌ na cuü̃ nangetchaü̃. Paururüü̃, cugü naporaẽẽ na nüü̃ cudauü̃caꞌ na nhuãcü Yeuwa cuna nadau. (Nawa naugütae Gárataanecü̃ãꞌ 2:20.) Cugüãẽwa cugüna naca: ‘Tchama rü Yeuwaü̃ tchaweꞌtchaü̃ na nüü̃ tchangetchaü̃?’ Ngẽma curü ngetchaü̃ rü cuü̃ narüngü̃ẽẽ tá nacaꞌ nüna quiũgatchi i tchieü̃ rü yana namaã cuĩnü i gutchaü̃gü. Rü nhuꞌmatchi, cuma rü tá meã nüna cudau i curü õ rü cunaweꞌ na Yeuwaü̃ cungetchaü̃ i guü̃ i nguneü̃gu.
10 Ngeü̃rüüü̃ i gutchaü̃gü rü Yeuwana tüü̃ niĩgatchiẽẽ? Nümaü̃ i cuaꞌruü̃gü niĩ: nataanüü̃tchi rü nangãwaꞌ, nügü nangẽẽgü, togüü̃ nangetchaü̃ẽẽ i deagümaã, nüü̃ nadawenü i ngeãẽtchicünaꞌãgü, rü vídeogü i máetatchiga. (Sal 101:3) Tchataná guü̃guma nacaꞌ nadau na nhuãcü Yeuwana tüü̃ niĩgatchiẽẽ. (1 Pe 5:8) Tchi tama nacaꞌ iũãgügu, Tchataná taãẽgu rü torü maü̃negu yaucutchi i ãũãtchiwaꞌe, womüẽü̃, naaüü̃, natchi naai, nügü icuaꞌüüü̃ rü tchieü̃guicatama rüĩnü. (Gár 5:19-21) Bemana ngẽma nacümagü rü tama poracü niĩ i taãẽwa. Notürü tchi tama paãma nüü̃ taoegu i ngẽma, rü naeyatchigü tá taãẽwa. — Tia 1:14, 15
w11 15/7 16wa 7-8tchimaü̃gü
7 Taꞌacü tá iügüü̃ na nüü̃ taoeü̃caꞌ i ngẽma nguꞌẽẽruü̃güneta? Taũ nüü̃ tayaugü i tapatawa rü bai nüü̃ tarümoẽgü. Taũ nawa iugütae i norü poperagü, rü bai taꞌacü nüü̃ niugü i televisãowa rü internetwa. Tüꞌcüü̃ iügüü̃ i ngẽma? Nagagu i torü ngetchaü̃. Nüü̃ tangetchaü̃ ya “Tupana ya Ixaixcümacüx”, rü ngẽmacaꞌ tama nacaꞌ tarüĩnüẽ i ngẽma oregüneta i tama namaã nawüigu i Tupanaarü Ore. — Sal 31:5, Juã́ũ 17:17
8 Nüétama i taꞌacü ngẽma nguꞌẽẽruü̃güneta nüü̃ niugü, taũ nawe tarüĩ! Tüꞌcüü̃ nacaꞌ idaugü i oregüneta i tama aicuma tüü̃ narüngü̃ẽẽ? Ngiã torü ngútchaü̃maã nüü̃ iĩnüẽ i Yeuwa rü norü duü̃ü̃gütanü erü aicuma tüü̃ nataãẽẽẽ namaã i ore i aicumaü̃ i Tupanaarü Orewa ne naũ. — Isa 55:1-3, Mat 24:45-47
Nguꞌẽẽtaegü uirurüü̃ iĩü̃
w14 15/3 16wa 20tchimaü̃
20 Notürü wiyaeü̃caꞌ natautcha Yeuwaü̃ nicuaꞌüü̃ i norü maü̃wa. (Nawa naugütae Salmo 102:19-21.) Ngẽgumarüü̃ nanaweꞌ i Salmo 102, teé tüü̃́ ngẽma i õ rü ngúü̃ tinge ta rü tügü taporaẽẽ na tama norü gutchaü̃guicatama tarüĩnüẽü̃caꞌ. Wiyaeü̃ rü nüü̃ niu na “ñoma wüxi i weri i nüxicatama ĩãca̱xwe̱xwa axü̃rüxü̃” niĩ. Nhaa orewa nanaweꞌ na nüma rü nagu rüĩnü na norü gutchaü̃gügumare namaü̃. (Sal 102:7) Tchi cuma rü nhuguãcü ngẽmagu rüĩnügu, rü Yeuwamaã nüü̃ niu i guü̃ma i curü ĩnügü narüü̃ i ngẽma wiyaeü̃. Curü yumüẽgü rü cuü̃ narüngü̃ẽẽ na tchieü̃guicatama curüĩnüü̃caꞌ. Yeuwa tamaã nauneta na “nüxü̃ naxĩnü i norü yumüxẽ i ngẽma ngéma wogümarexü̃, rü taxũtáma nüxü̃ naxo i ngẽma naxca̱x ínacagüxü̃”. (Sal 102:17) Ngẽma unetagu nayaõ.
28 DE OTUBRUARÜ – 3 NOWẼBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ SALMOS 103-104
Nüma rü nüna nacuaꞌãtchi “nax waixü̃müte̱xe ixĩgüxü̃”
5 Nagagu Yeuwa nügü írüíraü̃ rü ngetchaü̃tümüü̃waꞌe rü nüü̃ natautchaẽẽ na nüma rü tama nanatchieweü̃tchiwaꞌe. Cuaꞌãtchiruü̃, Yeuwa nügü írüíraü̃ yeguma nanadaitchaü̃ ga duü̃ü̃gü i tchieü̃ ga Chodómacüãꞌ. Norü ãĩyugüwa, Yeuwa nanamu Ló na maꞌpǘneanewa nanhaü̃caꞌ. Notürü Ló namuü̃ rü tama yéma naũtchaü̃. Rü yemaãcü Ló nacaꞌ naca na Chóawa naũü̃caꞌ i natanüü̃maã, yema iãne Yeuwa marü narüoetchaü̃. Yeuwacaꞌ natautcha na nanamuü̃ ga Ló na norü ucuꞌẽga naĩnüü̃caꞌ. Notürü, Tupana nüü̃ naĩnü rü tama nüü̃ narüoe ga yema iãne. (Gên 19:18-22) Muü̃tchi i taunecügüguwena, Yeuwa ta nüü̃́ nangetchaü̃tümüü̃gü ga duü̃ü̃gü ga Níniwecü̃ãꞌ. Nüma rü nanamu ga norü Orearü uruü̃ ga Yoná nacaꞌ yema duü̃ü̃gümaã nüü̃ niuü̃ ga Tupana nüü̃ narüoetchi ga yema iãne rü duü̃ü̃gü. Notürü yeguma Níniwecü̃ãꞌgü nüü̃ narüoẽẽ ga nacüma i tchieü̃, Yeuwa nüü̃ nangetchaü̃tümüü̃gü rü tama nüü̃ narüoe ga yema iãne. — Jon 3:1, 10, 4:10, 11
w23.09 6-7wa 16, 18tchimaü̃gü
16 Tchi tchieü̃gu tayigu rü inawaꞌegü na togü tüü̃ inayarüweꞌãtchiẽẽgü rüeꞌna tchi marü tama wüi puracü i Yeuwacaꞌ tüü̃ ngẽmagu, tama name na Yeuwana tiĩgatchi. Nüna nacuaꞌãtchi: Yeuwa taguma tüü̃ ínawogü. (Sal 103:8-10) Woo tagutchinügügu, Yeuwa nanayauama i torü puracü.
18 Aicuma nagu tayaõgü ta na Yeuwa tawa naü i norü puracü rü taétü nawémeꞌ ngẽguma yigü iporaẽẽgu na imeẽẽgüü̃caꞌ i torü gutchinügü rü nagu tayaõgüamaü̃caꞌ. — Sal 86:5, Pro 28:13
2 Tchi cuma rü pora cuügu na wüi puracü i Yeuwacaꞌ cunayauü̃caꞌ notürü ngẽma rü taũta nangupetüü̃, taũ nagu rüĩnü na cuma rü tauwama name. Nanayau i taꞌacügü nüna nangútchaü̃, wootchi tama nagutcha, rü nawaꞌe i tempu rü pora. Rü nagagu pora cuü, cuma rü cunaweꞌ na Yeuwamaã cuãmücü rü cuü̃ nameẽtchi rü ta nüna cuãtchaü̃ i curü memaeü̃. Rü nüü̃ nacuaꞌ na Yeuwa namaã nataãẽ i ngẽma curü pora. Rü Yeuwa tama nanawaꞌe na nacaꞌ taü i taꞌacü taucürüwa iĩü̃ i tacaꞌ. (Sal 103:14, Miq 6:8) Ngẽmaãcü, meã cugümaã nacuaꞌü̃, rü nüü̃ nauneta i taꞌacügü nüna cungútchaü̃ i tama taucürüwa iĩü̃.
Nguꞌẽẽtaegü uirurüü̃ iĩü̃
cl 55wa 18tchimaü̃
18 Taꞌacü tüü̃ nanguꞌẽẽ ngẽma Yeuwaarü pora? Namaã tabaiꞌãtchiãẽgü i ngẽma Yeuwa üü̃. Rü wüi wiyaeü̃ nhanagürü: “Rü namuxũchi i ngẽma cuxüxü̃, Pa Corix [Yeuwa]. . . . Rü guxü̃ma i ngẽma cuxüxü̃ rü namaxã nanapá i ñoma i naane.” (Sal 104:24) Aicuma niĩ! Rü cientistagü marü nüü̃ inayangau i yeera i wüi milhão i maẽü̃ i naãnearü tawa, notürü tama meãma nüü̃ nacuaꞌ nhure yiĩü̃. Wüi taꞌacüarü üruü̃ bemana nagu rüĩnü na nhuguãcü niguꞌ i norü ĩnü na ngewacaü̃ i ngẽmaü̃gü naüü̃caꞌ. Notürü ngẽma rü taguma nangupetüü̃ i Yeuwamaã, norü cuaꞌ rü taguma inayacuaꞌ.