Jeremías
47 Rígi̱ nindxu̱u̱ ajngóo Jeobá dí profeta* Jeremías nigruigú ga̱jma̱a̱ numún filisteos nákha faraón xóó tsegruigú Gaza. 2 Rígi̱ rí naʼthí Jeobá:
“¡Atayáá! Iyaʼ na̱ʼkha̱ asndu náa norte.
Maʼga̱nú mani̱ndxu̱u̱ yambo̱o̱.
Margu̱ʼu̱ xuajin ga̱jma̱a̱ xúgíʼ dí rígá,
xó má xuajin ga̱jma̱a̱ xa̱bu̱.
Xa̱bekha mundxa̱ʼwa̱skhá,
ga̱jma̱a̱ xúgíinʼ bi̱ kúwá náa xuajin rúʼko̱ mumbi̱ya̱ʼ.
3 Índo̱ gúdxawíín aʼwóo tsújúún wáyú rí naguwáʼ,
ga̱jma̱a̱ aʼwóo carro rí nuxmijná ga̱jma̱a̱
ma̱ngaa aʼwóo llántóo carro,
xabuanii xátangi̱i̱n muyejxi kidííʼ mu mbuñíinʼ e̱jñu̱ún,
numuu rí ñawúúnʼ nánguá gíʼdoo tsiaki̱i̱,
4 numuu rí mbiʼi rí ma̱ʼkha̱nú, xúgíinʼ filisteos maguma gámbíin ga̱jma̱a̱ xúgíinʼ xa̱bu̱ bi̱ nambájxu̱u̱n gajmiún bi̱ kúwá náa
Tiro ga̱jma̱a̱ náa Sidón maguma gámbíin.
5 Gaza maʼga̱nú maʼga edxu̱u̱ ga̱jma̱a̱ numuu ma̱jti̱ʼ.*
Asquelón maguanúu wíí.
Rí naguanúu xóó náa xkua̱,
asndu náá mbiʼi guniʼñááʼ rurujtumijnála rá.
6 ¡Ikháán! ¡Espada ndrígóo Jeobá!
Asndu nguáná gáʼni wíyáa rá.
Gajnguáanʼ náa xtáaʼ.
Ayájxa̱a̱ʼ, wíí gáʼni.
7 Xú káʼnii gáʼni wíyúu
á mu Jeobá má niʼtáñajuunʼ xá.
Nikuʼmaa maʼga náa Asquelón ga̱jma̱a̱ náa rawuunʼ lamáa,*
ikhí nikuʼmaa ikhaa”.