Ezequiel
31 Nákha tsiguʼ 11, dí naʼni ajtsú igu̱nʼ, timbá mbiʼi dí gu̱nʼ rúʼko̱, nigruígú mbu̱júu̱ ajngóo Jeobá. Niʼthúnʼ: 2 “A̱ʼdióo xa̱biya̱, aratháán rígi̱ faraón, rey ndrígóo Egipto, ga̱jma̱a̱ soldádiu̱u̱:
‹Tsáá lá itháan mba̱a̱ ki xóo ikháán rá.
3 Nindxa̱a̱ʼ xóo mbáa xa̱bu̱ asirio, xóo mbá ixi̱ cedro dí rígá náa Líbano,
dí ra̱ʼkhá tháán mitsaanʼ* gíʼdoo ñawúunʼ, ga̱jma̱a̱ gíʼdoo mi̱du̱ inúu dí naʼni xkamijxoo
ga̱jma̱a̱ ra̱ʼkhá tháán ndiʼya, inuu na̱jkha̱nú asndu náa du̱u̱n.
4 Iyaʼ niʼni rí mba̱ja̱a̱ wéñuuʼ, iduu iyaʼ niʼni dí ra̱ʼkhá tháán gáʼya.
Iyaʼ dí nanújngoo niruguamaʼáan náa dí wíji̱,
ga̱jma̱a̱ iyaʼ dí na̱jkha̱ kúʼúun nixíjyoo xúgíʼ ixi̱ dí rígá xanáá.
5 Ikha jngóo ra̱ʼkhá tháán ndiʼya ki xóo xúgíʼ ixi̱ dí rígá xanáá.
Ra̱ʼkhá tháán mbaʼa ñawúunʼ nigiʼdoo ga̱jma̱a̱ nijuáʼwíi,
ndiʼya numuu dí ikhí nanújngoo iyaʼ dí gíʼdoo jxu̱u̱ʼ.
6 Xúgíinʼ ñu̱ʼu̱ bi̱ jngruigu̱u̱n rijma̱a̱ nini̱ xújúúnʼ náa ñawúunʼ,
xúgíinʼ xujkhú xáná niguáʼdiin e̱jñu̱ún náa agoo ñawúunʼ,
ga̱jma̱a̱ xúgíinʼ xa̱bu̱ xuajin nikúwá náa xkamijxoo.
7 Ni̱jkha̱nú niʼni mba̱a̱ ga̱jma̱a̱ ra̱ʼkhá tháán mitsaanʼ, ma̱ngaa nijuáʼwíi mbaʼa ñawúunʼ,
numuu rí ajmu̱u̱ nixkuaʼán asndu náa iyaʼ dí gíʼdoo jxu̱u̱ʼ.
8 Nimbá ixi̱ cedro dí rígá náa jardín* ndrígóo Dios tsémbríguii ga̱jma̱a̱.
Nimbá ixi̱ enebro ragíʼdoo wéñuuʼ ñawúunʼ xóo gíʼdoo ñawúunʼ ikhaa.
Nimbá xindxama* tsémbríguii ga̱jma̱a̱ xóo gíʼdoo ñawúunʼ.
Nimbá ixi̱ dí rígá náa jardín ndrígóo Dios tsémbríguii ga̱jma̱a̱ xóo mitsaanʼ.
9 Ni̱ni̱ dí maʼni mitsaanʼ ga̱jma̱a̱ magiʼdoo mbaʼa ñawúunʼ,
ikha jngóo, xúgíʼ ixi̱ dí rígá náa Edén, náa jardín ndrígóo Dios bi̱ gajkhun, naxígu̱u̱n kuyáá›.
10 Ikha jngóo, rígi̱ dí naʼthí Tátá Jeobá bi̱ itháán mba̱a̱: ‹Numuu dí ixi̱ rígi̱ ra̱ʼkhá tháán ndiʼya, inuu na̱jkha̱nú asndu náa du̱u̱n, ikha jngóo a̱jkiu̱u̱n niʼnimbamínáʼ numuu dí ra̱ʼkhá tháán ndiʼya, 11 maxnajxí náa xa̱bu̱ ñajunʼ bi̱ gíʼdoo tsiaki̱i̱ bi̱ xtáa náa majñu̱únʼ xa̱bu̱ xuajin. Ikhaa mbaʼyoo ndiéjunʼ gáʼniuu, ga̱jma̱a̱ ikhúún ni xáʼndoʼ gáyóo ga̱jma̱a̱ numuu dí ra̱májánʼ rí niʼni. 12 Xa̱bu̱ bi̱ naguwaáʼ, bi̱ itháán xkawi̱i̱nʼ bi̱ kúwá náa majñu̱únʼ xa̱bu̱ xuajin, murujtu ga̱jma̱a̱ muniña̱a̱ʼ náa kúbá, ñawúunʼ majngutígú náa xúgíʼ mata* ga̱jma̱a̱ ñawúunʼ dí nijmigaʼ majti náa xúgíʼ iyaʼ rí gíʼdoo jxu̱u̱ʼ dí na̱jkha̱ náa xuajin. Mbá xúgíinʼ xa̱bu̱ xuajin muni̱ tsíngumi̱jna̱ náa xkamijxoo ga̱jma̱a̱ muniña̱a̱ʼ. 13 Xúgíinʼ ñu̱ʼu̱ bi̱ jngruigu̱u̱n rijma̱a̱ matrámiiʼ náa ixu̱u̱ dí kri̱ga̱, ga̱jma̱a̱ mbá xúgíinʼ xujkhú xáná matrámiiʼ náa ñawúunʼ. 14 Narígá xígi̱ kaʼnii mu nimbá ixi̱ dí wíji̱ náa rawuunʼ iyaʼ xáʼya ga̱jma̱a̱ xáʼga̱nú inuu náa du̱u̱n, ma̱ngaa mu nimbá ixi̱ dí kaxíjyáá májánʼ xáʼya wéñuuʼ ki xóo i̱ʼwáʼ. Numuu rí xúgíʼ mambáa, maʼga̱a̱ náa ku̱ba̱ʼ rí itháán mi̱jnu̱ʼ, náa nagúun xa̱bu̱ numbaaʼ, náa iñá wajinʼ›.
15 Rígi̱ dí naʼthí Tátá Jeobá bi̱ itháán mba̱a̱: ‹Mbiʼi dí ikhaa gáʼgáa náa Iñá wajinʼ,* ma̱ni̱ dí makuwá ngíná. Ikha jngóo maru̱goo iyaʼ dí mi̱jnu̱ʼ ga̱jma̱a̱ ma̱rikoo jxu̱u̱ʼ iyaʼ mu xúʼko̱ ni xáʼni xkujyuʼ. Ma̱ni̱ dí maʼni mikína náa Líbano ga̱jma̱a̱ numuu ikhaa, ga̱jma̱a̱ mbá xúgíʼ ixi̱ dí rígá xanáá mujndooʼ. 16 Ma̱ni̱ dí mamiñún xa̱bu̱ xuajin índo̱ gúdxawíín xóo gáxpatri̱ga̱a̱, índo̱ gáni̱ dí maʼga̱a̱ náa Iñá wajinʼ* gajmíi̱n bi̱ nagúun náa iñá wajinʼ. Mbá xúgíʼ ixi̱ dí rígá náa Edén, ixi̱ dí itháan májánʼ dí rígá náa Líbano, mbá xúgíʼ ixi̱ dí kaxtíjyáá májánʼ maʼni̱i̱ a̱jkiu̱ún náa ku̱ba̱ʼ dí itháan mi̱jnu̱ʼ. 17 Ikhiin nigúun gajmiún náa Iñá wajinʼ,* náa gajchún bi̱ nikháñún ga̱jma̱a̱ espada, mangiin bi̱ nimbayíí bi̱ nikúwíin* náa agoo xkamijxoo náa majñu̱únʼ xa̱bu̱ xuajin›.
18 ‹Ndiéjunʼ lá ixi̱ dí rígá náa Edén ma̱ndoo mambríguii ga̱jma̱a̱ gamajkhu dí natandrígú ga̱jma̱a̱ dí xóo mba̱a̱n rá. Gajkhun dí muni̱ rí midxu̱u̱ʼ náa ku̱ba̱ʼ dí itháan mi̱jnu̱ʼ gajmiáanʼ ixi̱ dí rígá náa Edén. Maraxtaa náa majñu̱únʼ bi̱ túthu xtóo xuyuuʼ tsáʼkhún, bi̱ nikháñún ga̱jma̱a̱ espada. Rígi̱ magíʼnuu faraón gajmíi̱n mbá xúgíinʼ soldádiu̱u̱›, eʼthí Tátá Jeobá bi̱ itháán mba̱a̱”.