Ezequiel
32 Nákha tsiguʼ 12, índo̱ naʼni 12 igu̱nʼ, timbá mbiʼi dí gu̱nʼ rúʼko̱, nigruígú ajngóo Jeobá. Niʼthúnʼ: 2 “A̱ʼdióo xa̱biya̱, atani̱ mbá ajmúú ngíná ga̱jma̱a̱ numuu faraón, rey ndrígóo Egipto, ga̱jma̱a̱ aratháán:
‹Ninindxa̱a̱ʼ xóo mbáa león gújkuiiʼ* náa majñu̱únʼ xa̱bu̱ xuajin,
mú dí xúgi̱ niguanáaʼ wíí.
Ninindxa̱a̱ʼ xóo mbáa xujkhúʼ mba̱a̱ bi̱ xtáa náa iyaʼ,
natambíjximinaʼ náa mañu ndrígáaʼ, natani̱ jnguaʼán rajkuáaʼ náa iyaʼ ga̱jma̱a̱ natani̱ gachíí mañu›.*
3 Rígi̱ dí naʼthí Tátá Jeobá bi̱ itháán mba̱a̱:
‹Majmiuʼ mbá nguáthi̱i̱n xa̱bu̱ bi̱ kúwá náa mbaʼa xuajin mu mudataʼmáʼ a̱muʼ náa tsu̱da̱a̱ʼ,
ikhiin muxmatri̱ña̱a̱nʼ ga̱jma̱a̱ a̱muʼ dí nagúguíin ga̱jma̱a̱ e̱gi̱ʼ.
4 Maniʼñáti̱ga̱a̱n náa ku̱ba̱ʼ nijndooʼ,
mada̱a̱nʼ náa xaná.
Ma̱ni̱ dí mbá xúgíinʼ ñu̱ʼu̱ bi̱ jngruigu̱u̱n rijma̱a̱ matrámiiʼ náa ikháán
ga̱jma̱a̱ xujkhú xáná bi̱ kúwá náa xúgíʼ tsu̱du̱u̱ ku̱ba̱ʼ mu̱pha̱a̱ʼ asndu magiʼmúún.
5 Mada̱ʼ xuyaaʼ náa kúbá
ga̱jma̱a̱ dí gáwanáa ma̱ni̱ majthíí náa mata.*
6 Eʼdiaaʼ dí nagadíí, dí ra̱ʼkhá tháán mba̱ji̱nʼ maʼni dí ku̱ba̱ʼ ga̱jma̱a̱ kúbá maʼni xtiʼtiʼ,
dí gága̱jta̱a̱ ikhí maʼni majnííʼ mañu›.*
7 ‹Índo̱ gáguma gámba̱a̱n, marugóo mekhu ga̱jma̱a̱ ma̱ni̱ dí ni xámbiʼiin a̱ʼgua̱a̱n.
Majmuʼ du̱u̱n mu marugóo ga̱jma̱a̱ a̱jkha̱ʼ,
ga̱jma̱a̱ gu̱nʼ ni xámbiʼii.
8 Ga̱jma̱a̱ numaaʼ ni xámbiʼiin xúgíinʼ bi̱ tri̱gi̱i̱n mekhuíí
ga̱jma̱a̱ náa ku̱ba̱a̱ʼ maʼni mikína›, eʼthí Tátá Jeobá bi̱ itháán mba̱a̱.
9 ‹Ma̱ni̱ dí makiʼníin xa̱bu̱ bi̱ kúwíin náa mbaʼa xuajin,
índo̱ gágún kudiin náa i̱ʼwáʼ xuajin bi̱ gáguanún náa ikháán, náa ku̱ba̱ʼ rí tsétatsinuuʼ.
10 Ma̱ni̱ dí xa̱bu̱ bi̱ kúwá náa mbaʼa xuajin mamiñún,
ga̱jma̱a̱ índo̱ gájmuʼ espádóʼ náa inún ikhiin,
reyes ndrígu̱ún ra̱ʼkhá tháán gámíñún índo̱ gúyáá dí gágíʼnaaʼ.
Xáwi̱ji̱i̱ raguíʼiin, mámbáa mamiñúu rí makhañúu, mbiʼi dí ikháán gákháñáaʼ›.
11 Numuu dí rígi̱ dí naʼthí Tátá Jeobá bi̱ itháán mba̱a̱:
‹Espada ndrígóo rey bi̱ xtáa náa Babilonia ma̱ʼkha̱ náa ikháán.
12 Ma̱ni̱ dí soldado bi̱ xkujiinʼ muradíin ga̱jma̱a̱ espada soldádiaaʼ,
xúgíinʼ ikhiin nindxu̱ún bi̱ itháan xkawi̱i̱nʼ bi̱ kúwá náa majñu̱únʼ xa̱bu̱ xuajin.
Muni̱ gámbáa dí naʼnimbamínáʼ Egipto, ga̱jma̱a̱ mbá xúgíinʼ soldádiu̱u̱ muradíin.
13 Ma̱ni̱ gámbíin mbá xúgíinʼ xujkiúu náa mijngii iyaʼ dí xkujyuʼ,
mu xúʼko̱ ni má rajkhúún xa̱bu̱ ga̱jma̱a̱ tsújún xujkhúʼ ni xúxuma̱ʼ ikhí›.
14 ‹Mbiʼi rúʼko̱ ma̱ni̱ kaʼwi̱i̱ iyooʼ
ga̱jma̱a̱ ma̱ni̱ dí mañu ndrígóo maʼga xóo ejkha̱ aceite›, eʼthí Tátá Jeobá bi̱ itháán mba̱a̱.
15 ‹Índo̱ gáni̱ dí Egipto mani̱ndxu̱u̱ xóo mbá ku̱ba̱ʼ mijxooʼ* dí niguanáa, mbá ku̱ba̱ʼ náa nirawíi mbá xúgíʼ dí rígá ikhí,
ga̱jma̱a̱ índo̱ gáni̱ dí mumíniiʼ mbá xúgíinʼ xa̱bu̱ bi̱ kúwá ikhí,
maguánú mbuyáá dí ikhúún nindxu̱ʼ Jeobá.
16 Ajmúú rígi̱, nindxu̱u̱ mbá ajmúú ngíná ga̱jma̱a̱ xa̱bu̱ muni̱ ajmúú,
wa̱ʼxiúnʼ xa̱bu̱ xuajin muni̱ ajmúú.
Muni̱ ajmúú ga̱jma̱a̱ numuu Egipto, ma̱ngaa muni̱ ajmúú ga̱jma̱a̱ numún soldádiu̱u̱›, eʼthí Tátá Jeobá bi̱ itháán mba̱a̱”.
17 Nákha tsiguʼ 12, mbiʼi 15 dí gu̱nʼ rúʼko̱, nigruígú ajngóo Jeobá. Niʼthúnʼ: 18 “A̱ʼdióo xa̱biya̱, agáwíinʼ a̱jkia̱a̱nʼ ga̱jma̱a̱ numún soldado bi̱ kúwá náa Egipto ga̱jma̱a̱ atani̱ dí magúun náa ku̱ba̱ʼ dí itháan mi̱jnu̱ʼ, ikhiin* gajmiún wa̱ʼxiúnʼ xa̱bu̱ bi̱ kúwá náa xuajin dí mba̱ʼu̱, mangiin gajmiún bi̱ nagúun náa iñá wajinʼ.
19 ‹Lá naku̱ma̱a̱ʼ dí itháan mitsiʼñán ikháán ki xóo eʼwíinʼ ráʼ. ¡Arajtaa, atabáaʼ náa majñu̱únʼ bi̱ túthu xtóo xuyuuʼ tsáʼkhún!›.
20 ‹Bi̱ egipcios majnguti̱gi̱i̱n náa majñu̱únʼ bi̱ nikháñún ga̱jma̱a̱ espada. Egipto niguma gámbáa ga̱jma̱a̱ espada, guxmajtáala gúʼgua gajmíi̱n mbá xúgíinʼ xa̱bi̱i̱.
21 Asndu náa Iñá wajinʼ* dí itháan mi̱jnu̱ʼ, ikhí soldado bi̱ xkujiinʼ mutamijná gajmiún ikhaa,* mangiin bi̱ numbayíí. Ikhiin magúun náa iñá wajinʼ ga̱jma̱a̱ makhañún, xó má bi̱ túthu xtóo xuyuuʼ tsáʼkhún bi̱ nikháñún ga̱jma̱a̱ espada. 22 Ikhí xtáa Asiria gajmíi̱n mbá xúgíinʼ xa̱bi̱i̱. Mbá xúgíʼ iñá wajinʼ náa nijuiʼdi̱ín rígá mbájndi náa ikhaa,* mbá xúgíinʼ nikháñún ga̱jma̱a̱ espada. 23 Iñá wajñúúnʼ rígá náa iñáʼ dí itháan mi̱jnu̱ʼ ga̱jma̱a̱ xa̱bi̱i̱ bi̱ mbaʼin kúwá náa mbájndi iñá wajñuuʼ, mbá xúgíinʼ nikháñún ga̱jma̱a̱ espada, numuu dí nini̱ dí mamiñún xa̱bu̱ bi̱ nduya.
24 Ikhí xtáa Elam gajmíi̱n mbá xúgíinʼ xa̱bi̱i̱, kúwá náa mbájndi iñá wajñuuʼ, mbá xúgíinʼ nikháñún ga̱jma̱a̱ espada. Nigúun náa iñáʼ dí itháan mi̱jnu̱ʼ bi̱ túthu xtóo xuyuuʼ tsáʼkhún, bi̱ nini̱ dí mamiñún xa̱bu̱ bi̱ nduya. Dí xúgi̱ marigá má xúʼko̱ ma̱jti̱ʼ náa ikhiin xó má mbá xúgíinʼ bi̱ nagúun náa iñá wajinʼ. 25 Nini̱ xia̱wuu* náa majñu̱únʼ bi̱ nikháñún, ga̱jma̱a̱ náa iñá wajñuuʼ kúwá mbá xúgíinʼ xa̱bi̱i̱ bi̱ mbaʼin. Xúgíinʼ ikhiin na̱nguá nithu xtóo xuyuuʼ tsáʼkhún, nikháñún ga̱jma̱a̱ espada numuu dí nini̱ dí mamiñún xa̱bu̱ bi̱ nduya. Marigá má xúʼko̱ ma̱jti̱ʼ náa ikhiin xó má mbá xúgíinʼ bi̱ nagúun náa iñá wajinʼ. Ikhaa nirajkua̱a̱ náa majñu̱únʼ bi̱ nikháñún.
26 Ikhí xtáa ma̱ngaa Mesec ga̱jma̱a̱ Tubal mangiin mbá xúgíinʼ xa̱bu̱ bi̱ kúwá náa ikhiin. Iñá wajñúúnʼ ikhiin rígá náa mbájndi iñá wajñuuʼ rey ndrígu̱ún. Xúgíinʼ túthu xtóo xuyuuʼ tsáʼkhún, nikháñún ga̱jma̱a̱ espada numuu dí nini̱ dí mamiñún xa̱bu̱ bi̱ nduya. 27 Lá xáguanún gajmiún soldado xkujiinʼ bi̱ túthu xtóo xuyuuʼ tsáʼkhún bi̱ nikháñún, bi̱ nigúun náa Iñá wajinʼ* kuda aju̱únʼ dí nuxmijná ga̱jma̱a̱ ráʼ. Ikhiin musngutaʼa aju̱únʼ náa edxu̱ún* ga̱jma̱a̱ aʼkhúún maʼga̱a̱ náa i̱tsu̱ún, numuu dí soldado bi̱ xkujiinʼ bugi̱ nini̱ dí mamiñún xa̱bu̱ bi̱ nduya. 28 Mú ikháán mujngupri̱ga̱a̱n náa majñu̱únʼ bi̱ túthu xtóo xuyuuʼ tsáʼkhún ga̱jma̱a̱ mata̱ba̱a̱ʼ náa majñu̱únʼ bi̱ nikháñún ga̱jma̱a̱ espada.
29 Ikhí xtáa Edom gajmíi̱n reyes ndrígio̱o̱, ma̱ngaa mbá xúgíinʼ bi̱ kuya̱ edxu̱u̱. Maski ajndu guáʼdáá tsiaki̱i̱ muradíin ga̱jma̱a̱ muniñu̱u̱nʼ náa majñu̱únʼ bi̱ nikháñún ga̱jma̱a̱ espada, ikhiin mangiin majnguti̱gi̱i̱n gajmiún bi̱ túthu xtóo xuyuuʼ tsáʼkhún, ma̱ngaa magúun gajmiún bi̱ nagúun náa iñá wajinʼ.
30 Ikhí kúwá mbá xúgíinʼ príncipes* bi̱ naguwáʼ xígií náa norte gajmiún mbá xúgíinʼ sidonios, bi̱ nigúun ga̱jma̱a̱ ma̱jti̱ʼ gajmiún bi̱ nikháñún maski ajndu ikhiin nini̱ dí mamiñún bi̱ nduya, numuu dí guáʼdáá tsiaki̱i̱. Majnguti̱gi̱i̱n xóo bi̱ túthu xtóo xuyuuʼ tsáʼkhún gajmiún bi̱ nikháñún ga̱jma̱a̱ espada, marigá má xúʼko̱ ma̱jti̱ʼ náa ikhiin xó má mbá xúgíinʼ bi̱ nagúun náa iñá wajinʼ.
31 Índo̱ faraón gáʼñúún mbá xúgíinʼ xa̱bu̱ bugi̱, maʼni̱i̱ a̱jkiu̱u̱n ga̱jma̱a̱ numuu dí nigíʼníí mbá xúgíinʼ soldádiu̱u̱, faraón gajmíi̱n mbá xúgíinʼ soldádiu̱u̱ makhañún ga̱jma̱a̱ espada›, eʼthí Tátá Jeobá bi̱ itháán mba̱a̱.
32 ‹Ikhaa niʼni dí mamiñún xa̱bu̱ bi̱ nduya, ikha jngóo faraón gajmíi̱n mbá xúgíinʼ soldádiu̱u̱ majnguti̱gi̱i̱n gajmiún bi̱ túthu xtóo xuyuuʼ tsáʼkhún, bi̱ nikháñún ga̱jma̱a̱ espada›, eʼthí Tátá Jeobá bi̱ itháán mba̱a̱”.