8 Atagíʼ xkri̱da

NDIÉJUUNʼ EYOO GÁʼTHÚU̱N RÁ.

Dí mataʼgíʼ xkri̱da nindxu̱u̱ dí maraxtaa xó má dí narasngáa. Mbáa xa̱bu̱ nikhi̱i̱ xándoo magiʼthu̱u̱n dí a̱ʼdióo maʼthí dí gajkhun á mu naʼthúu̱n dí maʼthí dí nda̱wa̱a̱ índo̱ na̱ʼkha̱ gáʼyoo mbáa xa̱bu̱.

“Mbaʼin xa̱bu̱ nuthi: ‹Atani̱ dí natha̱a̱nʼ raʼkháa dí nani ikhúún›, mú e̱ji̱n na̱nguá yejxi̱i̱ rúʼko̱. Ikhiin nindxu̱ún xóo mugu̱, nduyaridáá xúgííʼ dí nuʼthá ga̱jma̱a̱ dí nuʼni. Á mu nuʼsngúún muni mbá dí májánʼ mu ikháanʼ tséʼgíʼ muʼni dí nuʼthá, ikhiin mbuyáá ga̱jma̱a̱ muthulú” (David).

IKHA RÍ NA̱ʼKHA̱ NÁA BIBLIA: “Ikháán bi̱ naratáraʼa ‹xátani̱ kuʼwáʼ›, lá natani̱ kuʼwáʼ ráʼ.” (Romanos 2:21).

NDÍJKHA RÍ GÍʼDOO NUMUU RÁ.

E̱ji̱n itháán nduyaridúún xabuanii ki xóó a̱ngiu̱ún bi̱ nagún gajmiún escuela, xúʼko̱ má eni̱ asndu índo̱ naniin. Rúʼko̱ eyoo gáʼthúu̱n dí ikháanʼla xabuanii ma̱ndoo muxnunla májánʼ ikha e̱jña̱la, á mu nuʼgíʼ nunimbáníí dí nuthala.

“Ma̱ndoo mutaxu̱ mbaʼa nuthu kikháá dí asndu tséyáaxu á mu nudxawíín e̱jñu̱xu̱, mú, á mu tséʼgíʼ munimbaníí dí nutaxu, ikhiin mutuxu. Kúwíin xawii mbuyáá xúgííʼ dí nunixu” (Nicolasa).

IKHA RÍ NA̱ʼKHA̱ NÁA BIBLIA: “Ku̱ma̱ dí na̱ʼkha̱ rijma̱a̱ […] tséʼni a̱jma̱ inuu” (Santiago 3:17).

NDIÉJUUNʼ GÁNDOO MATANI̱ RÁ.

Atrajxi̱mínáʼ: Xú káʼnii embájxu̱ʼ gajmuʼ bi̱ ndiya̱a̱ ma̱ngaa gajmíʼ e̱ji̱nʼ rá. Ndiéjuunʼ e̱yo̱o̱ náa tele rá. Tsiéjúúnʼ embájxu̱ʼ gajmíʼ rá. Naxmiéjunʼ kañun eʼwíinʼ ráʼ. Lá manigua̱a̱ʼ dí ejña̱a̱nʼ mani̱ndxu̱ún xó má ikháán ráʼ.

“Ikhúún gajmuʼ a̱jmbio̱ʼ tséthúun e̱jñu̱xu̱ rí munimbánii tikhu ikha rí asndu ikháanʼ tsénimbáníí” (Cristina).

Arathá rí muni mba̱a̱ a̱jkiu̱ún. E̱ji̱n nduyáá má dí anún o ru̱du̱ún nindxu̱ún xa̱bu̱ aʼkhá. Á mu ikháán naratháán dí maʼni mba̱a̱ a̱jkiu̱u̱n kaʼyaaʼ bi̱ ndiyáa o e̱jña̱a̱ʼ índo̱ nakiéʼkháanʼ, xtaa rarasgúún mbá rí gíʼdoo wéñuuʼ numuu rí mani̱ndxu̱ún xa̱bu̱ gamajkhuii ga̱jma̱a̱ xa̱bu̱ wabaaʼ.

“Ndayóoʼ muthaxu rí muni mba̱a̱ a̱jkiu̱ún náa rí nikiéʼkhuxu, á mu rí xúnixu e̱jñu̱xu̱ xúni̱ xúʼko̱ mangiin” (Román).