NÁA MBÁ NUMBAAʼ MINGÍJYÚUʼ RÍGI̱

1 | Atiewumínáʼ mu xáʼniaʼ nandii

NDÍJKHA RÍ GÍʼDOO NUMUU RÁ

Mbá xkujndu o mbá gamiéjunʼ ma̱ndoo maʼni rí mbáa maʼniuu itháan nandii.

Índo̱ xa̱bu̱ naguáʼníí mbá dí ra̱májánʼ naʼni rí maxmiéjúúnʼ wéñuuʼ ga̱jma̱a̱ rúʼko̱ naʼni dí tséjyúuʼ eʼniún nandii.
Mbaʼa nuthu, médicos tséʼngu̱u̱n gúni̱ thanún xúgíinʼ bi̱ naʼniún nandii ni má nda̱a̱ thana muxnún.
Nguáná, xa̱bu̱ na̱nguá guaʼdáá mbújkha̱a̱ mu mutsi rí nda̱ñúunʼ, xóo ganitsu o thana.

Lá natayáá má ráʼ.

Nandii ga̱jma̱a̱ rí maxmiéjuanʼ ma̱ndoo maʼni rí xátraʼwíí májánʼ rí matani̱. Ga̱jma̱a̱ rúʼko̱ maʼni dí maʼnianʼ itháan nandii.
Á mu tsétani tanaminaʼ nacha̱, nandii ma̱ndoo maʼni itháan mba̱a̱ ga̱jma̱a̱ gamíi makhañáaʼ.
Á mu tséʼniaaʼ nandii, majmáán matraʼwíí májánʼ rí matani̱ náa mbiʼi mingíjyúuʼ.
Tséʼniuu má á mu xtaʼdáá wéñuuʼ mbújkha̱a̱, ma̱ndoo matiewumínaʼ mu xáʼniaʼ nandii.

Rí ma̱ndoo matani̱

Mbáa xa̱bu̱ bi̱ nandxa̱ʼwáminaʼ májánʼ naʼngo̱o̱ ndaʼyoo rí gamíi marigá, ikha jngó ndayáʼ xóo maʼni mu xágíʼnuu rúʼko̱. Á mu rí tsíyaaʼ maʼniaʼ nandii, ataniminaʼ maraxtaa kaʼwu. Itháan májánʼ rí matiewumínáʼ ki xóo rí matani̱ tanaminaʼ.

“Numuu rí nunimíjna̱ makuwáanʼxu kaʼwu, rúʼko̱ nayambáá mu xámbuxu̱ mba̱a̱ wéñuuʼ mbújkha̱a̱ mu̱ni̱ tanamijnáxu̱” (Andreas).a

a Nixtiʼkhuu mbiʼñún tikhun.

RÍ MA̱NDOO MATANI̱: Consejo dí ma̱ndoo mambáyáaʼ

Mu xániaaʼ wéñuuʼ nandii náa mbiʼi mingíjyúuʼ, atanimbaníí ikha rígi̱

ÁRAXTAA KAʼWU

Áraxtaa kaʼwu

Náa Biblia naʼthí: “Bi̱ nandxa̱ʼwáminaʼ májánʼ ndaʼyoo gamíi ga̱jma̱a̱ narkaʼwuminaʼ” (Proverbios 22:3). Wapháá gáta̱ya̱a̱ ndiéjuunʼ gamíi maʼni rí maʼniaʼ nandii.

Gaguʼwaanʼ matrajñáa ñawáanʼ ga̱jma̱a̱ xábú, itháan índo̱ matru̱gua̱ ganitsu ma̱ngaa índo̱ niguámbáa nidxuʼ gátamijxáaʼ.
Tsejtsi gátani kaʼwi̱i̱ guʼwáaʼ, itháan náa trástiáaʼ rí najmaa nángi eʼni.
Tsumáá gátani̱ gajmiáanʼ xa̱bu̱ bi̱ naʼniún nandii.

ATSU GANITSU RÍ MAMBÁYÁAʼ

Atsu ganitsu rí mambáyáaʼ

Náa Biblia naʼthí: “Nimbáa na̱nguá ewiyu̱u̱ʼ kaʼyoo xuyuuʼ, rí naʼni naxnúu rí mi̱khu̱ ga̱jma̱a̱ nañewu̱u̱n májánʼ” (Efesios 5:29). Musngajmá rí nuñewa̱a̱n xuyulúʼ á mu nuñewa̱a̱n rí naʼphulú.

Agi̱i̱n mba̱ji̱nʼ iyaʼ.
Atsu yaʼwu ga̱jma̱a̱ fruta.
Xíʼtsu wéñuuʼ dí yajtsúu, idú ni má azúcar.
Xátatsika̱ ndíí, xájmaa droga ni má xígíi̱n wéñuuʼ iya najnga̱a̱.

“Mú xáʼniuxu̱ nandii, nunimíjna̱ muphúxu ganitsu rí mambáyuxu, mú xúʼko̱ xámbuxu wéñuuʼ mbújkha̱a̱ mu muni̱ tanamijnáxu̱. Ikha jngóo nutsixu ganitsu rí mambáyuxu” (Carlos).

ATANI̱ EJERCICIO GA̱JMA̱A̱ ANU̱ʼ MÁJÁNʼ

Atani̱ ejercicio

Náa Biblia naʼthí: “Itháan májánʼ mbá ñawáanʼ rí mbi̱ya̱a̱ xa̱a̱ʼ ki xóo a̱jma̱ ñawáanʼ rí matiejunʼ gakhi̱i̱ ga̱jma̱a̱ rí matagayáaʼ raxkáá giñánʼ” (Eclesiastés 4:6). Awáán gíʼmaa matani̱: Ndayóo matiejunʼ mu ma̱ngaa ndayóoʼ mbi̱ya̱a̱ jxa̱a̱ʼ.

Atayáʼ rí matani̱. Ma̱ndoo matagajnáaʼ mi̱dxu̱ʼ kruíga̱a̱ʼ. Rí matani̱ mbá rí maʼni maruñáánʼ mambáyáaʼ mu xáʼniáaʼ wéñuuʼ nandii, itháan á mu nindxa̱a̱ʼ mbáa xa̱bu̱ nikhi̱i̱ o xtaʼdáá mbá nandii mbiiʼ.
Anu̱ʼ májánʼ

Anu̱ʼ májánʼ. Á mu tsénuʼ májánʼ maʼni rí maxmiéjuanʼ wéñuuʼ ga̱jma̱a̱ xátaʼgíʼ edxa̱a̱ʼ náa ñajunʼ rí natani̱. Índo̱ gáʼni mba̱yu̱u̱ʼ gamíi maniaʼ nandii.
Atagíʼ mbá hora rí mi̱nuʼ ga̱jma̱a̱ mbá hora dí marajxu̱u̱nʼ xúgíʼ mbiʼi.
Xáta̱ya̱a̱ tele ni má celular á mu nadxu̱u̱ʼ ginuʼ.
Xátatsiʼtsu wéñuuʼ ni má xígíin rí gíʼdoo cafeína ni má iyaʼ najnga̱a̱ índo̱ nacha̱a̱ʼ midxu̱u̱ʼ ginuʼ.

“Rí migú xóo má kaʼyoo nambáyuʼ wéñuuʼ. Á mu tségú májánʼ na̱ʼkhu̱ edxu̱ʼ ga̱jma̱a̱ xúgíʼ xuyuʼ. Mú índo̱ nagú májánʼ, ¡Xtáá xawii mani asndu ndiéjúúnʼ má! Gúʼdoo tsiakii ga̱jma̱a̱ tséʼniuʼ wéñuuʼ nandii” (Justin).