NÁA MBÁ NUMBAAʼ MINGÍJYÚUʼ RÍGI̱

3 | Atiewu̱u̱n bi̱ kúwá náa guʼwáaʼ

NDÍJKHA RÍ GÍʼDOO NUMUU RÁ

Índo̱ náa kuwáanʼ na̱jkha̱ raʼni itháan xkawiʼ, mbaʼiin xa̱bu̱ nánguá eñawu̱u̱n bi̱ kúwá náa guʼwún.

Xa̱bu̱ nuni tsíngumi̱jna̱.
Xa̱bu̱ bi̱ nidamijná nagi̱ʼdu̱u̱.
Xa̱bu̱ bi̱ guáʼdiin e̱ji̱n nánguá exmiéjúúnʼ kuñún e̱jñu̱ún.

Lá natayáá má ráʼ.

Náa mbiʼi mingíjyúuʼ gíʼdoo wéñuuʼ numuu rí maraʼdiin bi̱ mambájxa̱a̱ʼ gajmiáanʼ, numuu rí ikhiin mumbayáaʼ maraxtaa májánʼ.
Rí maxmiéjuanʼ wéñuuʼ maʼni rí xákúwá májánʼ bi̱ kúwá náa guʼwáaʼ.
Noticia rí gamíi, ma̱ndoo maʼnimíñún ejña̱a̱nʼ, itháan ki xóo ikháán ku̱ma̱a̱ʼ.

Rí ma̱ndoo matani̱

Náa Biblia naʼthí: “Bi̱ gajkhun nambájxa̱a̱ʼ ga̱jma̱a̱ʼ ma̱ʼndoo kaʼyaaʼ xúgíʼ mbiʼi ga̱jma̱a̱ nindxu̱u̱ mbáa ndxájuaʼ bi̱ nigumaa mu mambáyaaʼ índo̱ narígá gamiéjunʼ” (Proverbios 17:17).

Aratháán mbáa bi̱ nakro̱ʼo̱o̱ kaʼyaaʼ ga̱jma̱a̱ ma̱ndoo maxnáa májánʼ consejos. Rí ma̱ta̱ya̱a̱ dí xtáa mbáa bi̱ nandoo kaʼyaaʼ maxnáaʼ tsiakii mu matraʼníí xkujndu rí na̱ʼkha̱nú inaaʼ.

RÍ MA̱NDOO MATANI̱: Consejo dí ma̱ndoo mambáyáaʼ

Mu matie̱wu̱u̱n bi̱ kúwá náa guʼwáaʼ náa mbiʼi mingíjyúuʼ atanimbaníí ikha rígi̱.

ARAXTAA MÁJÁNʼ GA̱JMA̱A̱ʼ BI̱ NDIYÁA

Araxtaa májánʼ ga̱jma̱a̱ʼ bi̱ ndiyáa

Náa Biblia naʼthí: “Itháan májánʼ dí a̱jmi̱i̱n ki xóo mbáwíi, […]. Numuu rí á mu mbáa rí ikhiin naxpátri̱ga̱a̱, bi̱ imba̱a̱ ma̱ndoo mambáyúu ndxájuu mu matuxi̱i̱” (Eclesiastés 4:9, 10). Xa̱bu̱ gajmii gíʼmaa mani̱ndxu̱ún xóo xa̱bu̱ bi̱ kúwá náa ikháá má equipo, raʼkháa rí mámbáa xtáa náa mámbáa equipo.

Índo̱ rígá mbá rí naʼni makiʼnán, xakiʼnán xtayáá bi̱ xtaa gajmaaʼ. Makuwáanʼ itháan májánʼ á mu naʼngo̱o̱ a̱jkia̱la.
Á mu rígá xkujndu xúniʼñánʼ rí manújngoo xúʼkhiín mbá xmáná, gutamíjnala xóo munimbáníí, raʼkháa dí magiʼdala.
Guríyáʼla mbiʼi makuwáanʼ mbá nájmáanʼ mu muni̱ rí naniguala.
Garmáʼáan a̱jkia̱la mbiʼi mitsaanʼ rí nikuwáanʼla. Ma̱ndoo mbu̱ya̱la fotos dí nirawíi nákhá nidamijnála o imbo̱ʼ rí ni̱nila.

“Nguáná bi̱ nidamijná xúndxaʼwamíjna ikháá kayuuʼ, mú raʼkháa rúʼko̱ eyoo gáʼthúu̱n rí xándoo muñajunʼ mbóó. Mbá nájmi̱i̱n ma̱ndoo muraʼwíí mbóó rí muni̱ ga̱jma̱a̱ munimíjna̱ rí magajnúu májánʼ” (David).

XÁTATSIʼÑÚN BI̱ NAMBÁJXÁAʼ GAJMIÁANʼ

Xátatsiʼñún bi̱ nambájxa̱a̱ʼ gajmiáanʼ

Xáraʼthi̱i̱n rí i̱ndó bi̱ nambájxa̱a̱ʼ gajmiáanʼ muxnaaʼ tsiakii. Mangáán araxnún tsiakii. Xí natambáñúún eʼwíinʼ maʼni rí mangáán mbi̱ya̱a̱ tsiakii.
Mámbá mbiʼi atrajxi̱i̱ xú kaʼnii xtáa mbáa bi̱ natambájxa̱a̱ʼ ga̱jma̱a̱ʼ.
Atrajxu̱u̱n xú káʼnii niraʼníí xkujndu rí nambríguíi ga̱jma̱a̱ rí xtaʼdáá ikháán.

“Mígiu̱lú nindxu̱ún xóo mbá aguʼ. Índo̱ kúwáanʼ náa awúu̱n xkujndu, ikhiin ma̱ndoo muthulú náá gíʼmaa mu̱ʼgua̱. Nguáná nuni̱ marmáʼáan a̱jkiu̱lú mbá rí nduʼyáá má. Mígiaaʼ nandún kuyaaʼ, mangiin nduyáá rí ikháán nandaaʼ xtañún” (Nicole).

GAKRUA̱ʼA̱A̱ʼ XTAÑÚN EJÑA̱A̱Nʼ

Gakrua̱ʼa̱a̱ʼ xtañún ejña̱a̱nʼ

Náa Biblia naʼthí: “Xúgiáanʼ gíʼmaa makuwáanʼ xawii mudxawíín, mú xútala mbá nacha̱ ga̱jma̱a̱ xákiʼnáanʼla mbá nacha̱” (Santiago 1:19). Mbáa ejña̱a̱n’ xáʼndúún gúthaanʼ dí na’ni maxmiéjúnʼ o dí na’ni míñún. Á mu naʼngo̱o̱ a̱jkia̱a̱nʼ natadxuun dí nuthaanʼ, xaʼniúún mingíjyúuʼ muthaanʼ dí ekumu̱ún.

Atani̱ rí ejña̱a̱nʼ makuwá májánʼ. Mbáa ikhiin maʼndún maratamíjná gajmiáanʼ índo̱ nda̱a̱ wéñuuʼ ñajunʼ, xóo índo̱ najkuala kamba̱a̱ o índo̱ najkua náa carro, raʼkháa índo̱ ikháanʼ nandala mutamijná gajmiála.
Xáraxnu̱u̱ mbuyáá wéñuuʼ ejña̱a̱nʼ noticia dí gamíi.
Arathún ndiéjunʼ xtaa ratani̱ ikháán mu nda̱a̱ dí gáguáʼníí.
Araʼdáá mbá awan xóo muni̱ kawumijnála á mu narígá mbá gamiéjunʼ ga̱jma̱a̱ aratamíjná gajmiáanʼ ejña̱a̱nʼ rígi̱.

“Aratamíjná gajmiáanʼ ejña̱a̱nʼ ga̱jma̱a̱ atatsíñún dí ikhiin mangiin muthi. Mbáa namiñuu o nakiʼníi, mu tsétaanʼ. Arathún dí xúʼko̱ ma ku̱ma̱a̱ʼ mangáán ga̱jma̱a̱ arathún ndiéjunʼ tani̱ mu xakuma̱a̱ʼ xúʼko̱” (Bethany).