Nasngájma fe ndrígóo

Abrahán niʼsngóo a̱ʼdióo Isaac ma̱ndoo kaʼyoo Jeobá ga̱jma̱a̱ maʼnimbo̱o̱ náa xúgíʼ rí nikudaminaʼ maʼni. Mú índo̱ nigiʼdoo 25 tsiguʼ, Jeobá nindo̱ʼo̱o̱ Abrahán maʼni mbá rí majphú mingíjyúuʼ. Lá nataya ndiéjunʼ rí nindo̱ʼo̱o̱ xáʼ.

Dios niʼthúu̱n Abrahán: “Mbá péñu, ayuʼ ga̱jma̱ʼ a̱ʼdiáaʼ ga̱jma̱a̱ araxnáxi̱i̱ xóo tsigijñaʼ náa kúbá ndrígóo Moria”. Abrahán na̱nguá eʼyoo náa numuu dí Jeobá nindo̱ʼo̱o̱ maʼni rúʼko̱; mú maski ajndu má xúʼko̱ niʼnimbo̱o̱.

Miʼcha̱, rí imbo̱ʼ mbiʼi, Abrahán ni̱jkhá kayáa Isaac ga̱jma̱a̱ a̱jmi̱i̱n bi̱ numbayíí. Nda̱wa̱á rí ajtsú mbiʼi, mitsínguánʼ ndiyáá kúbá. Abrahán niʼthúún bi̱ numbayíí dí muguaʼthi̱i̱n numuu dí ikhaa ga̱jma̱a̱ Isaac magún gúxnaxí mbá tsigijñaʼ. Abrahán kayá ni̱jkha̱ chílú ga̱jma̱a̱ nixnúu ixi̱ magu̱ a̱ʼdióo. Isaac niraxu̱u̱ anu̱u̱: “Náa wíji̱ xujkhúʼ bi̱ muxnáxi̱i̱ xóo tsigijñaʼ rá.” Abrahán niriʼña: “A̱ʼdióʼ, Jeobá má gáxnulú”.

Índo̱ niguáʼnu náa kúbá, nini mbá altar. Nda̱wa̱á, Abrahán niroʼóo rajkúu ga̱jma̱a̱ ñawúunʼ Isaac nitámáʼ náa altar.

Abrahán nigujtun chílú mu maxíyáa a̱ʼdióo. Ikhú, náa mekhu ángel ndrígio̱o̱ Jeobá niʼthúu̱n: “¡Abrahán! ¡Xátanigawíínʼ dxámá! Xúgi̱ nda̱yo̱o̱ rí xtaʼdáá fe náa Dios, numuu rí nitagíʼ maraxnaxíi a̱ʼdiáaʼ”. Ikhú Abrahán ndiʼyoo mbáa mugu̱ kambróʼoo chi̱jyu̱ʼ náa mbáa xtáʼdu̱u̱ iná. Nacha̱ má nirajkuíiʼ Isaac ga̱jma̱a̱ nixnáxi̱ mugu̱ ga̱jma̱a̱ numuu a̱ʼdióo.

Mbiʼi rúʼko̱, Jeobá niʼthí rí Abrahán nindxu̱u̱ bi̱ nambáxu̱u̱ ga̱jma̱a̱. Lá natayáá náa numuu rá. Numuu rí Abrahán niʼni xúgíʼ rí nindo̱ʼo̱o̱ maʼni, maski ajndu takro̱ʼo̱o̱ náa numuu nindo̱ʼo̱o̱ maʼni.

Jeobá niʼthúunʼ mbu̱júu̱ Abrahán: “Mani tsajkurámáánʼ ga̱jma̱a̱ maxniaʼ mbaʼin wéñuʼ e̱ji̱n”. Rúʼko̱ nindoo gáʼthi rí ga̱jma̱a̱ numún e̱ji̱i̱n Abrahán Jeobá maʼni tsajkurámiinʼ xúgínʼ xa̱bu̱ bi̱ nuni rí májánʼ.