Octubre

Lá naʼniaaʼ mingíjyúuʼ matatsimbaaʼ ráʼ. David nigíʼnuʼ xúʼko̱ ma̱ngaa, mu ikhaa niʼthún Dios: “Araxnúʼ ku̱ma̱ mu xúʼko̱ ikhúún manimbo̱ʼ kayaaʼ” (Sal. 51:12). David nindoo kaʼyoo Jeobá, mu nguáná niʼniuuʼ mingíjyúuʼ maʼnimbo̱o̱ kaʼyoo, ga̱jma̱a̱ xúʼko̱ má nuguáʼníí mangáánʼ. Náá numuu rá. Timbá, numuu dí rúʼko̱ nikhánálú asndu nákha nigumáánʼ. Ragajma, numuu rí Gixa̱a̱ mambáa mbiʼi natsudáánʼ dí xúʼnimbulú, xóo ma nini ikhaa (2 Cor. 11:3). Ragajtsú, náa numbaaʼ dí kuwanlú narígá wéñuuʼ dí tséjmaa; ikhaa nindxu̱u̱ “espíritu dí naxkajxi̱i̱n xa̱bu̱ bi̱ tsénimbu̱u̱n” (Efes. 2:2). Ikhaa jngóo, mu muʼnimbulú kuʼyáá Jeobá ga̱jma̱a̱ xa̱bu̱ bi̱ ikhaa nigruigi̱i̱n, ndayóoʼ muʼni tsiakimíjna̱ mu̱ʼni̱ ga̱jma̱a̱ numulú, ma̱ngaa ga̱jma̱a̱ numuu Gixa̱a̱ xúʼko̱ ma náa numbaaʼ. w23.10 6 kutriga̱ 1

Ndiéjunʼ ejmañuluʼ náa milagro rígi̱ dí niʼni Jesús rá. Mbá ikha dí naʼsngúlú nindxu̱u̱ dí gíʼmaa manindxu̱lú xa̱bu̱ guabaaʼ. Jesús táʼnimbamínáʼ índo̱ niʼni rí iyaʼ magutajxi̱i̱ vino. Ikhaa, nimbá miʼtsú táʼnimbamínáʼ ga̱jma̱a̱ xúgíʼ dí niʼngo̱o̱ niʼni. Ikhaa ninindxu̱u̱ má xúʼko̱ xa̱bu̱ guabaaʼ ga̱jma̱a̱ nixnúu má xúʼko̱ gamajkhu Anu̱u̱ (Juan 5:​19, 30; 8:28). Á mu nduʼyaridáá Jesús, manindxu̱lú xa̱bu̱ guabaaʼ ga̱jma̱a̱ xúʼni mbaʼumíjna̱ dí naʼngo̱o̱ nuʼni. Muxnáá má xúʼko̱ gamajkhu Dios ndrígúlú bi̱ nuʼni ñajuunʼ (Jer. 9:​23, 24). Guxnáá xúgíʼ gamajkhu dí ikhaa kaʼyoo. Xó má eʼyáá, nimbá xáʼngo̱o̱ guʼni á mu raʼkháa Jeobá embáyuluʼ (1 Cor. 1:​26-31). Mbáa xa̱bu̱ guabaaʼ tséyóo maʼnimbamínáʼ ga̱jma̱a̱ numuu dí májánʼ dí naʼni ga̱jma̱a̱ numuu imba̱a̱. I̱ndó má ndaʼyoo dí gíʼdoo numuu rí Jeobá ndaʼyoo ga̱jma̱a̱ nangajo̱o̱ rí ikhaa naʼni (atayáá ma̱ngaa Mateo 6:​2-4; Heb. 13:16). Jeobá nadxuu wéñuʼ a̱jkiu̱u̱n índo̱ ndaʼyoo dí nandulúʼ manindxu̱lú xa̱bu̱ guabaaʼ xóo Jesús (1 Ped. 5:6). w23.04 4 kutriga̱ 9; 5 kutriga̱ 11, 12

Dios niʼni dí apóstol Pablo maxkajxiin cristianos mu mbuyáá dí ndaʼñún eʼwíinʼ. Xú káʼni ma̱ndoo muʼnimbáníí consejo rígi̱ náa reunión rá. Garmáʼáan a̱jkiu̱lú dí eʼwíinʼ ma̱ngaa nandún muni̱i̱ comentar. Gúʼgíiʼlú mbá xkri̱da dí mambáyulú mu ma̱ndoo makru̱ʼu̱lú. Índo̱ naratámíjná gajmiáanʼ bi̱ nambájxáaʼ, na̱nguá rathá i̱ndó ikháán, natatsiñúnʼ dí ikhiin mangiin muthi. Xúʼko̱ má rígá náa reunión ma̱ngaa. Nandulú dí mbaʼin a̱ngiu̱lú muni̱i̱ comentar ma̱ngaa. Imbo̱ʼ dí ma̱ndoo muʼni mu muxnún tsiakii a̱ngiu̱lú nindxu̱u̱ dí muniʼñááʼlu dí mangiin muthi fe dí guáʼdáá (1 Cor. 10:24). Índo̱ muʼnilú comentar xájyúlú mbayuuʼ mu ma̱ndoo muni̱i̱ comentar eʼwíinʼ ma̱ngaa. Ma̱ngaa ragíʼmaa muthi mbá xúgííʼ dí na̱ʼkha̱ náa kutriga̱, á mu nuʼni xúʼko̱, eʼwíinʼ xáguáʼdáá dí muthi. w23.04 22, 23 kutriga̱ 11-13

Gíʼmaa garmáʼáan a̱jkiu̱lú ndiéjunʼ rí itháan gíʼdoo numuu, ikhaa nindxu̱u̱ rí mumbáñuun eʼwíinʼ índo̱ nuʼtáraʼa. Índo̱ nuʼtáraʼa gíʼdoo numuu rí makru̱ʼu̱lú kuʼñúún eʼwíinʼ. Nuʼtámíjná gajmiúlú xa̱bu̱ bi̱ mixtiʼkhu ku̱mu̱ún, náa ndi̱ji̱i̱n o ga̱jma̱a̱ nindxu̱ún mixtiʼkhu kayuʼ. Náá numuu gíʼmaa mbuʼyaridáá xkri̱doo apóstol Pablo rá. Numuu rí ikhaa nikro̱ʼo̱o̱ kaʼñún xa̱bu̱. Jesús nigíiʼ mani̱ndxu̱u̱ “apóstol bi̱ waxúʼmaa maʼga náa xa̱bu̱ numbaaʼ” (Rom. 11:13). Mu maʼnimbánuu rí nijuiʼtháán, Pablo niʼtárúʼún judíos, griegos, bi̱ najmañún, xa̱bu̱ bi̱ nudu, bi̱ guaʼdáá ñajunʼ mba̱ʼu̱ ga̱jma̱a̱ reyes. Mu ma̱ndoo maʼganúú asndu náa a̱jkiu̱ún rí naʼthúún, Pablo niʼni tsiakimijna mani̱ndxu̱u̱ “xóo kaʼniún eʼwíinʼ xa̱bu̱” (1 Cor. 9:​19-22). Índo̱ niʼtáráʼa Pablo nindxaʼwámi̱na̱ʼ xú káʼnii ku̱mu̱ún xa̱bu̱ ga̱jma̱a̱ xóo ndi̱ji̱i̱n. Ndiéjunʼ eʼsngúlú ikháanʼ rá. Rí magajnúu itháan májánʼ rí muʼtáraʼa á mu nundxaʼwamíjna̱lu xú káʼnii ndayóoʼ mámbá xa̱bu̱. w23.07 23 kutriga̱ 11, 12

Mbáa xa̱bu̱ guabaaʼ bi̱ tsékiʼnáa nindxu̱u̱ gújkuííʼ. Mu maʼthí ajngáa guabaaʼ índo̱ gáraʼnuu mbá rí maʼniuu mingíjyúuʼ, mbaʼyóoʼ rí magiʼdoo tsiakii. Espíritu santo naʼni rí xákiʼnán numuu rí ikhaa nindxu̱u̱ bi̱ naxnulúʼ (Gál. 5:​22, 23). Ajngáa griega rí mbaʼa nuthu najuiʼtájuíi xóo “xákiʼnán”, nguáná najmaa mu majuiʼthá ga̱jma̱a̱ numuu mbáa wayuu xaná bi̱ nda̱wa̱á naniñamina̱ʼ matatsimaaʼ tsu̱du̱u̱. Lá naʼngo̱o̱ natatsaʼwáminaʼ nguáthá nixtiʼkhuu ráʼ. Nákha ginii nindxu̱u̱ mbá wayuu bi̱ najmangu̱u̱ʼ, mú xúgi̱ nindxu̱u̱ mbáa wayuu guabaaʼ. Guabaaʼ mú gújkuiiʼ. Ikháanʼ rá. Xú káʼnii ma̱ndoo manindxu̱lú guabáanʼ, mú ga̱jma̱a̱ gújkiáánʼ ma̱ngaa rá. Xáʼngulú musngajmá rígi̱ i̱ndó ikháán ikha jngóo gunda̱ʼa̱ Dios rí maxnúlú xi̱ʼ kaʼwu ndrígóo. Rígá mbaʼa rí nasngájmaa dí ma̱ndoo maʼngo̱o̱ a̱jkiu̱lú. Mbaʼin Testigos nusngajmaa cualidad rígi̱ índo̱ nandún mugi̱ʼdu̱u̱n gajmíi̱nʼ ikhiin, numuu rí niriʼña̱a̱ májánʼ, mbaʼin ninigu̱u̱n xóo nindxu̱lú Testigos (2 Tim. 2:​24, 25). w23.09 14, 15 kutriga̱ 3

Náa mbá visión dí ra̱ʼkhá tháán mitsaanʼ rí ndiʼyoo apóstol Juan náa ndiʼñún bi̱ mbá 24 bi̱ kuya̱ edxu̱u̱ náa mekhuíí rusmbati̱gu̱u̱n náa Jeobá. Ikhiin nini̱ mba̱a̱ numuu rí niguánú ndiyáá dí i̱ndó ‹Ikhaa kaʼyoo magruigú gamajkhu, dí maguma mba̱a̱ ga̱jma̱a̱ magruigú tsiakii› (Apoc. 4:​10, 11). Rígá mbaʼa numuu rí ángeles nuni̱ mba̱a̱ ga̱jma̱a̱ nduyamajkuíí Jeobá. Numuu dí kúwi̱i̱n gajmiún náa mekhuíí ma̱ngaa nuniʼníiʼ májánʼ. Ga̱jma̱a̱ xúgíʼ rí ikhaa naʼni, nduyáá xú káʼnii cualidad rí gíʼdoo, rúʼko̱ naxkajxi̱i̱n dí muni mba̱a̱ (Job 38:​4-7). Mangáánʼ gíʼmaa muʼni mba̱a̱ Jeobá índo̱ nuʼtámíjná gajmiúlú. Nuʼnilú rígi̱ índo̱ nuʼtháán mbóoʼ dí nanigulúʼ rí ikhaa naʼni, ga̱jma̱a̱ ndíjkha dí nanigulúʼ. Índo̱ nuraxnuu ga̱jma̱a̱ nuʼnigajma̱a̱ Biblia nuʼnimíjna rí mbuʼyáá cualidad dí nanigulúʼ rí gíʼdoo Jeobá (Job 37:23; Rom. 11:33). Nda̱wa̱á guʼtháán ndiéjunʼ kumulú índo̱ nundxa̱ʼwa̱míjna̱ náa xúgíʼ cualidad dí gíʼdoo. Ma̱ngaa ma̱ndoo muʼni mba̱a̱ Jeobá índo̱ guʼyáá xú káʼnii embáyulú o nambáñun eʼwíinʼ a̱ngiu̱lú (1 Sam. 2:​1, 2). w23.05 3, 4 kutriga̱ 6, 7

Nákha 1919, Babilonia rí Mba̱a̱ dí nindxu̱u̱ xúgííʼ religión dí ragájkhun niniñuuʼ raʼtáñajuunʼ xuajñuu Dios. Ikhaa má tsiguʼ rúʼko̱ nigíʼdi̱i̱ niñajunʼ “ñumbáá jmbii bi̱ májánʼ endxa̱ʼwáminaʼ” mu xúʼko̱ xa̱bu̱ bi̱ ninigu̱u̱nʼ majmañún ma̱ndoo magún náa “Kamba̱a̱ rí Kaʼwu” (Mat. 24:​45-47; Is. 35:8). Ñajunʼ dí nini bi̱ ni̱ni̱ májáanʼ kamba̱a̱ rígi̱ nákha wajyúuʼ nimbañúún xa̱bu̱ bi̱ nigíʼdi̱i̱ nigún ikhí mu majmañún itháán ga̱jma̱a̱ numuu Jeobá ma̱ngaa dí nikudaminaʼ maʼni nda̱wa̱á (Prov. 4:18). Ma̱ngaa nindoo niriʼkumijná mu muni̱ dí naniguuʼ Dios, mú ikhaa na̱nguá nigi̱ʼthu̱u̱n dí muriʼkumijnáá mbá nacha̱. Dí niʼni nindxu̱u̱ dí maʼni kaʼwii xuajñuu mañu mañúú xóo awan ni̱jkha̱ ranújngoo. Ra̱ʼkhá tháán gagi gákuwáanʼ índo̱ gáʼga̱nú mbiʼi dí ma̱ndoo muʼni xúgííʼ dí Dios naniguuʼ. Mu kamba̱a̱ mani̱ndxu̱u̱ má xúʼko̱ májánʼ ndayóoʼ maguma májáanʼ. Asndu nákha 1919 niguma mbaʼa ñajunʼ mu maguma kaʼwii “Kamba̱a̱ rí Kaʼwu”, mu xúʼko̱ itháán mbaʼin xa̱bu̱ ma̱ndoo magajni̱ín náa Babilonia rí Mba̱a̱. w23.05 17 kutriga̱ 15; 19 kutriga̱ 16

Mangiin a̱ngiu̱lú Cuerpo Gobernante kúwá runiratiin a̱ngiu̱lú bi̱ nuñambáá náa Comité ndrígún. A̱ngiu̱lú bugi̱ kúwá runi̱ májánʼ ñajunʼ, kijmaratiin májánʼ, ga̱jma̱a̱ kúwá má xawii mu mumbáñuun mugiu̱u̱ Cristo. Índo̱ bi̱ kaxtaʼwíin gágúun mekhuíí, índo̱ gáwámbá rí majphú mba̱a̱ ga̱ʼkhu̱, xa̱bi̱i̱ Jeobá makuwá ruyamajkuíí má xúʼko̱ náa tsu̱du̱u̱ Ku̱ba̱ʼ. Numuu rí Jesucristo ni̱ndxu̱u̱ bi̱ kayá edxu̱u̱, xa̱bi̱i̱ Jeobá nditháan xákáwabiinʼ. Gajkhun má dí mbiʼi ríʼkhíin murugui̱i̱n mbá nguéjmi̱i̱n xa̱bu̱ xkawiinʼ bi̱ náa Biblia naxnáa mbiʼñún Gog ga̱jma̱a̱ Magog (Ezeq. 38:​18-20). Mbiʼi dí gúrugui̱i̱n xáʼni ma mbayuuʼ ga̱jma̱a̱ xájmiin. Xáʼngu̱u̱n gúni̱ rí testigos muniñaaʼ ruyamajkuíí Dios. Jeobá má gámbáñún, náa mbá visión, apóstol Juan ndiʼñún “mbaʼin xa̱bu̱” bi̱ nindxu̱ún eʼwíinʼ mugiu̱u̱ Cristo ma̱ngaa nijuiʼtháán dí “mbaʼin xa̱bu̱” bugi̱ nikáwíin náa “majphú mba̱a̱ ga̱ʼkhu̱”. Nakujmaa gajkhun rí maguma káwíin (Apoc. 7:​9, 14). w24.02 5, 6 kutriga̱ 13, 14

Ndiéjunʼ ga̱ndoo muʼnilú mu Jeobá maxnúlú espíritu santo ndrígóo rá. Gunda̱ʼa̱a̱lú, gúʼnigajma̱a̱ Ajngáa rawuunʼ ga̱jma̱a̱ gakuwáánʼ mbá kambájxu̱lú náa xuajñuu dí ikhaa nayéjkha̱ edxu̱u̱ ga̱jma̱a̱ xi̱ʼ kaʼwu ndrígóo. Á mu nuʼnilú rígi̱, mambáyulú muguaʼdáá “rí naxná espíritu santo” (Gál. 5:​22, 23). Mu, Jeobá maxnúlú rígi̱, dí nuʼnilú ga̱jma̱a̱ dí nundxaʼwamíjna̱ gíʼmaa maʼni kaʼwu. Á mu nuniʼñáánʼ dí mba̱ja̱a̱ dí ra̱májánʼ náa nundxaʼwamíjna̱ ga̱jma̱a̱ nuʼnilú dí raʼkhí, rígi̱ maʼni dí mandáti̱gu̱lú espíritu santo ndrígóo (1 Tes. 4:​7, 8). Ndiéjunʼ imbo̱o̱ ma̱ndoo muʼnilú rá. Pablo niʼthí: “Xúsngajmála rí tsémajkuala rí kiʼtáriyaʼ” (1 Tes. 5:20). Náa versículo rígi̱, ajngáa “kiʼtáriyaʼ” nandoo gáʼthúu̱n xúgíʼ ajngáa dí Dios naxnúlú ga̱jma̱a̱ espíritu ndrígóo. Xó má ajngáa ga̱jma̱a̱ numuu mbiʼi ndrígóo ga̱jma̱a̱ dí mijngii má e̱ʼkha̱. Ikháanʼlu na̱nguá endxaʼwamíjna̱ dí ndayóoʼ xóó ma̱ʼkha̱ mbiʼi ndrígóo Jeobá o dí ikháanʼlu xúʼyáá Armagedón. Dí itháán nuʼnilú nindxu̱u̱ dí nusngajmá dí nuguaʼthi̱i̱n mbiʼi rúʼko̱, dí inu má ma̱ʼkha̱, ikha jngóo nuñewa̱a̱n dí nuʼnilú ga̱jma̱a̱ nuʼni má xúʼko̱ “rí maxnúu gamajkhu Dios” (2 Ped. 3:​11, 12). w23.06 12, 13 kutriga̱ 13, 14

Ndiéjunʼ gíʼmaa maʼni mbáa cristiano á mu náa celular ndrígóo o asndu ndiéjunʼ má najmuu nagájnuu mbá xtiʼkhuu ndrígóo pornografía rá. Gíʼmaa maniñuuʼ mbaʼyoo mbá nache̱. Dí nambájxulú gajmiúlú Jeobá nindxu̱u̱ rí itháán gíʼdoo numuu, nda̱a̱ imbo̱o̱, dí marmáʼáan a̱jkiu̱lú rígi̱ mambáyulú mu muraʼwíí májánʼ. Mú, rígá mbaʼa xtiʼkhuu dí mbaʼin ethi dí ranindxu̱u̱ pornografía, mu naʼni dí mundxaʼwamíjná dí tsaga, asndu xtiʼkhuu rígi̱, na̱nguá eyulú mbuʼyáá ma̱ngaa. Náa numuu rá. Numuu dí tsíyulú muxuʼdámíjná aʼkhá náa a̱jkiu̱lú (Mat. 5:​28, 29). David, mbáa ndxájulú bi̱ kayá edxu̱u̱ náa xuajin Tailandia naʼthí: “Ikhúún naniguʼ marajximínáʼ: ‹Lá manigu̱u̱ʼ Jeobá dí maguánúʼ mba̱yo̱o̱ xtiʼkhu rígi̱ maski ajndu tsénindxu̱u̱ pornografía rá.› Índo̱ nandxaʼwamina xígi̱ kaʼnii, nambáyuʼ maraʼwíi májánʼ dí mani”. Rí mamiñulú muʼni mbá dí maʼni gawúunʼ, dí maʼni rí Jeobá maxtáá ngíná nambáyulú mu muraʼwíí májánʼ dí muʼni. “Rí mamiñáanʼ xtayáá Jeobá ikhú nagi̱ʼdu̱u̱ naraʼdáá ku̱ma̱”. w23.06 23 kutriga̱ 12, 13

Ajngáa “awúu̱n guʼwáaʼ” mbáa nindxu̱u̱ náa nagimbáanʼ. Á mu mbiʼi rúʼko̱ nakuwáanʼ kambájxu̱lú, Jeobá mañewu̱nlú xó má nikudáminaʼ maʼni. Ikha jngóo asndu nákha xúgi̱, tséyóoʼ dí i̱ndó maʼngo̱o̱ a̱jkiu̱lú kuʼñúún a̱ngiu̱lú ma̱ngaa gíʼmaa musngajmá dí gajkhun nandulú kuʼñúún. ¡Á mu tsíyulú kuʼyamijná xándoo muʼni kríyamíjná! Índo̱ gakuwáánʼ náa “mbiʼi mba̱a̱ ndrígóo Jeobá” maʼni ra̱ʼkhá tháán mingíjyúuʼ makuwíin xúgíinʼ xa̱bu̱ (Sof. 1:​14, 15). Mangáanʼ bi̱ nindxu̱lú xa̱bi̱i̱ Jeobá muraʼníílú xkujndu. Mú, á mu nakuwáánʼ xawii asndu nákha xúgi̱, xáxmiéjunlú ga̱jma̱a̱ ma̱ndoo mumbáñún eʼwíinʼ. Rí maʼngo̱o̱ a̱jkiu̱lú mambáyulú mu maʼngulú muraʼníí asndu ndiéjunʼ má xkujndu dí guguaʼdáá. Á mu nagáwíinʼ a̱jkiu̱lú rígi̱ gámbáyulú mu makuwáánʼ xawii mu mumbáñún a̱ngiu̱lú ga̱jma̱a̱ muxnún rí ndaʼñún. Ga̱jma̱a̱ rí nandulú kuʼñúún mambáyulú mu makuwáanʼ jnduʼ. Jeobá maʼni tsajkurámáanʼ mu makuwáanʼlu kámuu náa mbá numbaaʼ dí gamiéjunʼ ga̱jma̱a̱ xkujndu mambáa (Is. 65:17). w23.07 7 kutriga̱ 16, 17

Náa Biblia naʼthí ga̱jma̱a̱ numún xa̱bi̱i̱ Dios bi̱ guájun jmbu, rí tsémiñún. Mú nguáná asndu bi̱ itháán niguáʼdáá tsiakii na̱nguá nikumu̱ún xúʼko̱. Mbá xkri̱da, mbaʼa nuthu rey David támiñuu ga̱jma̱a̱ nikumu̱u̱ rí ‹gíʼdoo tsiakii xóo mbá kúbá›, mú nguáná nikumu̱u̱ dí nimíñuu ga̱jma̱a̱ na̱nguá gíʼdoo tsiakii (Sal. 30:7). Sansón ma̱ngaa ra̱ʼkhá tháán xkujiiʼ índo̱ Jeobá naxnúu espíritu ndrígóo, mú índo̱ na̱nguá gíʼdoo tsiakii ndrígóo Dios naku̱mu̱u̱ dí nindxu̱u̱ “xó má xúgíinʼ” (Juec. 14:​5, 6; 16:17). Nakujmaa kaʼwu dí tsiakii ndrígu̱ún xa̱bu̱ bugi̱ na̱ʼkha̱ náa Jeobá. Apóstol Pablo ma̱ngaa ndiʼyoo dí ndayóoʼ tsiakii ndrígóo Jeobá (2 Cor. 12:​9, 10). Ikhaa ma̱ngaa niʼniuu nandii (Gál. 4:​13, 14) Ma̱ngaa naʼni tsiakimínáʼ maʼni dí májánʼ (Rom. 7:​18, 19) Nguáná nixmiéjuunʼ ga̱jma̱a̱ nimíñuu rí makhañúu (2 Cor. 1:​8, 9) Maski ajndu xúʼko̱ ikhaa niʼthí: “Índo̱ guabúúnʼ ikhú gúʼdoo tsiakii” Náá numuu rá. Numuu dí Jeobá naxnúu tsiakii dí ndayóoʼ, ga̱jma̱a̱ xúʼko̱ nanindxu̱u̱ mbáa bi̱ gíʼdoo tsiaki̱i̱. w23.10 12 kutriga̱ 1, 2

Á mu mbóo mbiʼi nakumulú dí nda̱a̱ numulú, garmáʼáan a̱jkiu̱lú dí Jeobá nindxu̱u̱ bi̱ ni̱ʼkha̱ kaguáanʼ náa xuajñuu (Juan 6:44). Ikhaa ndaʼyoo cualidad dí kuaʼdáálú maski ajndu ikháán tséʼyáálú ga̱jma̱a̱ ndaʼyoo xú kaʼnii phú nindxu̱lú (2 Crón. 6:30). Ikha jngóo, índo̱ naʼtulúʼ dí kuaʼdáá numulú, ma̱ndoo muʼnimbulú (1 Juan 3:​19, 20). Mbáa tikhuáánʼ dí ikháanʼ kaʼníí nagawúnluʼ eʼni aʼkhá rí niʼni nákha xóó tséʼninuuʼ dí gajkhun (1 Ped. 4:3). Ga̱jma̱a̱ eʼwíinʼ mbayuuʼ má kúwá runi̱ ñajuunʼ Jeobá, mú kaʼníí nunimíjna̱ ga̱jma̱a̱ rí nagua̱ʼa̱ xuñúúnʼ. Ikháanʼ rá. Lá naku̱ma̱a̱ʼ dí Jeobá xóó tséʼni̱ mba̱a̱ a̱jkiu̱u̱n kaʼyaaʼ ráʼ. Á mu xúʼko̱, mbáa maʼni̱i̱ a̱jkia̱a̱nʼ á mu natayáá dí mbaʼin xa̱bi̱i̱ Jeobá bi̱ niguájun jmbu nikumu̱ún xúʼko̱ kaʼnii. Mbá xkri̱da, apóstol Pablo nikumu̱u̱ dí ra̱ʼkhá tháan ngínáa xa̱bu̱ nindxu̱u̱, índo̱ nandxa̱ʼwáminaʼ ga̱jma̱a̱ numuu aʼkhá ndrígóo (Rom. 7:24). Maski ajndu nitanga̱a̱ a̱jkiu̱u̱n ga̱jma̱a̱ numuu aʼkhá dí niʼni ma̱ngaa nijngúun iyááʼ, nikumu̱u̱ rí nindxu̱u̱ “bi̱ itháan chíʼgíiʼ náa apóstol” ga̱jma̱a̱ “bi̱ itháán gíʼdoo aʼkhá”, ki xóo eʼwíinʼ (1 Cor. 15:9; 1 Tim. 1:15). w24.03 27 kutriga̱ 5, 6

Dí táraʼwíi májánʼ maʼni Rey Jehoás, ma̱ndoo majmañulú mbá rí gíʼdoo numuu: Gíʼmaa muraʼwíin májánʼ bi̱ mambáxulu gajmiúlú, gíʼmaa dí maʼndún kuyáá Jeobá ga̱jma̱a̱ muni dí maʼdxuu a̱jkiu̱u̱n. Ma̱ndoo mbuʼñíi bi̱ mambájxulú gajmiúlú rí tséʼniuu má nguáthá tsigún. Garmáʼáan a̱jkia̱a̱nʼ dí Jehoás itháan chíʼgíiʼ ki xóo Jehoiadá. Atatsaʼwáminaʼ ga̱jma̱a̱ numún bi̱ nambájxáaʼ gajmiáanʼ ma̱ngaa atrajxi̱mínáʼ rígi̱. Lá numbayúʼ mu magúʼdoo itháan fe náa Jeobá xáʼ. Lá nuxkajxu̱u̱n manimbánuu ikha ndrígóo xáʼ. Nanigu̱u̱nʼ muthi ga̱jma̱a̱ numuu Jeobá ma̱ngaa dí najmañún índo̱ nuraxnuu Biblia ráʼ. Nduyamajkuíí ikha ndrígóo xáʼ. Nuthu̱nʼ náa najnga̱wu̱u̱n o i̱ndó nuthi dí nandún madxawun dxe̱ʼ. (Prov. 27:​5, 6, 17.) Guʼtálu gajkhun, a mu bi̱ nambájxa̱a̱ʼ gajmiáanʼ na̱nguá eñún kuyáá Jeobá nda̱a̱ numuu dí mambájxa̱a̱ʼ gajmiáanʼ. Mú á mu nandún kuyáá Jeobá gíʼmaa matie̱wu̱u̱n, numuu rí ikhiin mumbayáaʼ (Prov. 13:20). w23.09 9, 10 kutriga̱ 6, 7

Alfa, náa letra griego nindxu̱u̱ timbá letra dí nagi̱ʼdu̱u̱, mú Omega nindxu̱u̱ rí naguámbáa iwáá. Jeobá naxná mbiʼyuu “Alfa ga̱jma̱a̱ Omega”, numuu rí índo̱ ikhaa nagi̱ʼdu̱u̱ mbá na̱jkha̱nú naguámbóo. Nda̱wa̱á rí niʼnii Adán ga̱jma̱a̱ Eva, Jeobá niʼthún: “Gaguaʼdiin mbaʼin e̱jña̱la, gaʼni mbaʼáanʼla, gakuwáanʼla náa xúgíʼ tsu̱du̱u̱ ku̱ba̱ʼ, ku̱ba̱ʼ gaʼni ndrígála ikháanʼ” (Gén. 1:28). Índo̱ Jeobá niʼthúu̱n rí nandoo maʼni, ninindxu̱u̱ asndu xóo niʼthí “Alfa”. Maʼga̱nú mbá mbiʼi dí bi̱ naguwáʼ náa Adán ga̱jma̱a̱ Eva majthíínʼ náa tsu̱du̱u̱ Ku̱ba̱ʼ ga̱jma̱a̱ muni̱i̱ maʼni mitsaanʼ. Mbiʼi rúʼko̱ Jeobá maʼthí “Omega”. Ajngáa “mekhu, ku̱ba̱ʼ ga̱jma̱a̱ xúgíʼ dí rígá ikhí”, Jeobá naʼthí dí gajkhun maʼnimbánuu rí nandoo. Jeobá niríyáʼ dí maʼni juwan mbiʼi mu maʼni rí nandoo náa xa̱bu̱ numbaaʼ ga̱jma̱a̱ Ku̱ba̱ʼ. Índo̱ gámbá rí maʼni juwan mbiʼi, maʼni mbánúu kájxi̱ (Gén. 2:​1-3). w23.11 5 kutriga̱ 13, 14

Rí magajníín náa Babilonia mu maguáan Israel ma̱ndoo mbajyúuʼ mbá a̱jkhu̱ igu̱nʼ, mú Jeobá nikuʼdáminaʼ rí mañewu̱u̱n. Judío bi̱ niguájun jmbu ndiyáá dí matangi̱ín Israel ra̱ʼkhá tháán mba̱a̱ dí májánʼ gundrígúu dí tsembríguii ga̱jma̱a̱ tsiakii dí ikhiin gúni mu maguáan. Mbáa dí itháán mba̱a̱ dí maguaʼdáá nindxu̱u̱ dí mbuyamajkuíí Dios xó má kaʼyoo. Náa Babilonia nda̱a̱ nimbá templo náa mbuyajkuíí Jeobá ní má na̱nguá niguaʼdáá náa nakarámáʼ tsigijñaʼ ní má nda̱wi̱i̱n ndxajkun bi̱ muxnajxi̱, ikha jngóo israelita tándoo guxnajxi̱ tsigijñaʼ xó má eʼthí náa Xtángoo dí nikhánáá Moisés. Ma̱ngaa nikúwi̱i̱n itháán mbaʼin xa̱bu̱ bi̱ ndiyamajkhún xándú bi̱ ragájkhun ki xóo bi̱ ninimbu̱ún kuyáá Jeobá. Ikha jngóo mbaʼin judíos bi̱ nindúún muni̱ dí Jeobá ninigu̱u̱ʼ nindúún wéñuuʼ matangi̱ín náa xuajñún mu mbuyamajkuíí Dios xó má kaʼyoo. w23.05 14, 15 kutriga̱ 3, 4

Á mu nandulúʼ majngruigulú má xúʼko̱ xóo e̱ji̱i̱n aguʼ ndayúlú espíritu santo ndrígóo Dios. Náá numuu rá. Numuu rí naʼni gakhi̱i̱ maraxtaa náa mbá numba dí rígá wéñuuʼ rí tséjmaa (1 Tes. 4:​3-5, 7, 8). Espíritu santo ma̱ndoo mambáyulúʼ munigaʼduunʼ ku̱ma̱ dí rígá náa numbaaʼ rí tsémbánii ga̱jma̱a̱ rí naniguuʼ Dios. Ma̱ngaa ma̱ndoo mambáyúlú muʼni “rí májánʼ, rí jmbu ga̱jma̱a̱ rí gajkhun” (Efes. 5:9). Jesús niʼthí dí Jeobá “maxnúún espíritu santo bi̱ gúnda̱ʼa̱a̱” (Luc. 11:13). Ikha jngóo mu ma̱ndoo makhánulúʼ, guʼtákáñíí Jeobá rí maxnúlú, ma̱ngaa nakánulú índo̱ nuʼni mba̱a̱ Jeobá náa reunión gajmiúlú a̱ngiu̱lú (Efes. 5:​19, 20). Espíritu santo ma̱ndoo mambáyulú makuwáánʼ xó má naniguuʼ Dios. w24.03 23, 24 kutriga̱ 13-15

Ndayóoʼ dí maʼngo̱o̱ itháan a̱jkia̱a̱nʼ ráʼ. Á mu xúʼko̱. Atanda̱ʼa̱a̱ Jeobá dí mambáyáaʼ mu maʼngo̱o̱ itháán a̱jkia̱a̱nʼ. Numuu rí ikhaa naxná xi kaʼwu ndrígóo (Gál. 5:​22, 23). Ikha jngóo, gunda̱ʼa̱lu Jeobá dí maxnúlú xi̱ʼ kaʼwu ndrígóo ga̱jma̱a̱ mambáyúlú mu muguaʼdáá cualidades dí ikhaa naxná. A mu kuwáanʼ náa mbá xkujndu dí naʼniulú miʼskhaa maʼngo̱o̱ a̱jkiu̱lú gunda̱ʼa̱lú Jeobá xi kaʼwu ndrígóo (Luc. 11:13). Ma̱ngaa ma̱ndoo munda̱ʼa̱a̱ Jeobá mambáyúlú mbuʼyáá xó má eʼyoo ikhaa. Nda̱wa̱á dí niʼtákáñíí gu̱ʼni̱ xúgíʼ xó má eʼngulú mu maʼngo̱o̱ a̱jkiu̱lú xúgíʼ mbiʼi. A mu na̱nguá eniʼñáá runda̱ʼa̱lú Jeobá ga̱jma̱a̱ á mu ikháanʼ nu̱ʼni̱ tsiakimíjna̱ mu musngajmá cualidad rígi̱, xúʼko̱ guʼyáá dí mañu mañúú maʼngo̱o̱ itháán a̱jkiu̱lú. Ma̱ngaa rí mundxaʼwamíjna̱ náa xkridún xa̱bu̱ bi̱ naʼthí Biblia. Náa Biblia ma̱ndoo muxkamaa xkridún xa̱bu̱ bi̱ niʼngo̱o̱ a̱jkiu̱ún. Á mu nundxaʼwamíjna̱ ga̱jma̱a̱ numuu ikhiin ma̱ndoo majmañulú xú káʼnii ma̱ndoo musngajmá cualidad rígi̱. w23.08 22 kutriga̱ 10, 11

Jesús niʼni mbaʼyoo apóstol Pedro dí Jeobá gáñewu̱u̱n. Índo̱ nigabi̱i̱, Jesús niʼni mbu̱júu̱ milagro mu Pedro ga̱jma̱a̱ eʼwíinʼ apóstoles murawíinʼ e̱gi̱ʼ (Juan 21:​4-6). Milagro dí nirígá rígi̱, niʼni mbaʼyoo Pedro dí Jeobá ma̱ndoo mambáñún ga̱jma̱a̱ rí gáʼñúunʼ. Mbáa ikhú Pedro nirmáʼáan a̱jkiu̱u̱n rí niʼthí Jesús dí Jeobá má gáñewu̱u̱n bi̱ gúyáʼ “ginii rí naʼtáñajunʼ Dios” (Mat. 6:33). Rígi̱ nimbáyúu Pedro mu xúʼko̱ magíʼ ginii dí maʼtáraʼa raʼkháa dí mbañíin e̱gi̱ʼ. Xúʼko̱ índo̱ niʼni ndxa̱a̱ Pentecostés tsiguʼ 33 támiñuuʼ niʼngo̱o̱ nimbáñún mbaʼin xa̱bu̱ muniʼnuuʼ dí gajkhun (Hech. 2:​14, 37-41). Ga̱jma̱a̱ itháán nda̱wa̱á nimbáñún mbaʼin samaritanos ga̱jma̱a̱ xa̱bu̱ bi̱ nanguá nindxu̱ún judío mu mani̱ndxu̱ún xa̱bi̱i̱ Cristo (Hech. 8:​14-17; 10:​44-48). Jeobá nijmiuu Pedro mu xúʼko̱ ma̱ndoo mambáñún mbaʼin xa̱bu̱ makuwíin náa xuajñuu Dios. w23.09 20 kutriga̱ 1; 23 kutriga̱ 11

Naʼni xóo a̱jma̱ tsiguʼ nda̱wa̱á rí xa̱bu̱ babilonios nini gámbáa Jerusalén. Rey Nabucodonosor nigiʼdoo mbá xnuʼndaa dí niʼni maxmiéjuunʼ náa rí ndiʼyoo mbáa xándú mba̱a̱ wéñuuʼ. Wakhííʼ má rúʼko̱ niʼthúún xúgíinʼ xa̱bu̱ bi̱ najmañún náa Babilonia ma̱ngaa Daniel, rí muthán ndiéjunʼ eyoo gáʼthúu̱n xnuʼndaa rí nigiʼdoo. Á mu na̱nguá ejmi̱i̱n gútha̱a̱n, magudíin xúgíinʼ (Dan. 2:​3-5). Daniel na̱nguá nigiʼdoo mba̱yu̱u̱ʼ mbiʼi; ga̱jma̱a̱ gámíi rí makhañún mbaʼin. Ikha jngóo “nindoʼoo rey itháán mbiʼi mu maʼthun ndiéjunʼ eyoo gaʼthúu̱n xnuʼndaa” (Dan. 2:16). Mu maʼni rígi̱ ndiyóoʼ fe ga̱jma̱a̱ rí xámíñuu. Náa numuu rá. Numuu rí náa Biblia na̱nguá eʼthí á mu Daniel niʼtájuíi má xnuʼndaa ginii. Daniel niʼtámíjná gajmíi̱n ajtsíin bi̱ nambájxu̱u̱ gajmíi̱n, ga̱jma̱a̱ “nindu̱ʼu̱u̱n rí mutakháñii Dios bi̱ xtáa mekhuíí rí magáwíinʼ a̱jkiu̱u̱n kaʼñún ga̱jma̱a̱ numuu ngu̱ʼwa̱ rúʼko̱” (Dan. 2:18). Jeobá niriʼña̱a̱ rí niʼtájkháan Daniel, nimbáyúu maʼtájuíi xnuʼndaa ndrígóo rey. ¡Ikhaa gajmíi̱n mígiu̱u̱ na̱nguá niradíin! w23.08 3 kutriga̱ 4

Gundxa̱ʼwámi̱jna̱ xóo embáyulú dí maʼngo̱o̱ a̱jkiu̱lú. Dí maʼngo̱o̱ a̱jkiu̱lú mambáyulú mu makuwáánʼ gagi ga̱jma̱a̱ dí xájmangulú, ma̱ngaa ma̱ndoo mambáyúlú dí xáʼniulú nandii ga̱jma̱a̱ dí makuwáánʼ májánʼ. Ma̱ngaa nambáyulú mu mambáxulu májánʼ gajmiúlú eʼwíinʼ, ga̱jma̱a̱ dí makuwáánʼ mbá jnduʼ náa guʼwá nagimbáanʼ. Á mu tsékiʼnáálú mbá nacha̱ índo̱ mbáa naʼniulú mbá raʼkhí, ma̱ndoo mu̱ʼni̱ dí xárígá xkujndu (Sal. 37:​8, nota; Prov. 14:29). Mú rí itháan májánʼ nindxu̱u̱ nusngajmá dí nduʼyaridáá Anu̱lú bi̱ xtáa mekhuíí ga̱jma̱a̱ xúʼko̱ ma̱ndoo mambaxúlúʼ itháan májánʼ gajmiúlú. Ra̱ʼkhá tháán mitsaanʼ dí maʼngo̱o̱ a̱jkiu̱lú muguaʼthi̱i̱n numuu rí nambáyulú mbá xúgiáanʼ. Maski má naʼni mingíjyúuʼ musngajmá cualidad rígi̱, mú Jeobá má gámbáyulú. Índo̱ gákuwáanʼ ruguaʼthi̱i̱n numbaaʼ nuxi̱ʼ, ma̱ndoo mbuʼyáá gajkhun dí “iduu Jeobá nayejxi̱ má xúʼko̱ náa bi̱ namíñúún kuyáá, náa bi̱ guáʼthi̱i̱n ngajua ndrígóo dí tsétumuu” (Sal. 33:18). Ikha jngóo mbá xúgiáanʼ gúʼgími̱jna̱ mu maʼngo̱o̱ a̱jkiu̱lú ma xúʼko̱. w23.08 22 kutriga̱ 7; 25 kutriga̱ 16, 17

Santiago niʼthí rí mbáa xa̱bu̱ maski ajndu gíʼdoo fe, mú rí xóo nasngájma nindxu̱u̱ i̱mba̱ núthu (Sant. 2:​1-5, 9). Ma̱ngaa niʼthí ga̱jma̱a̱ numún a̱ngiu̱lú xóo xa̱bekha o gu̱ʼu̱, rí ndaʼyoo i̱mba̱ ndxájuu rí ndayóoʼ xtíñún o ganitsu rí muphu, mú na̱nguá eʼni nimbá mu mambáyúu. Maski ajndu xa̱bu̱ buʼko̱ naʼthí rí gíʼdoo fe, mú na̱nguá esngájma rí xóo e̱ʼni̱, rúʼko̱ nda̱a̱ rí gáñambáá (Sant. 2:​14-16). Santiago nijmuu xkridoo Rahab mu maʼthí rí mbáa bi̱ gíʼdoo fe nasngájmaa ga̱jma̱a̱ rí naʼni (Sant. 2:​25, 26). A̱ʼgu̱ bugi̱ niʼthí rí niʼdxawuun ga̱jma̱a̱ numuu Jeobá ma̱ngaa rí ndaʼyoo dí ikhaa má gámbáñún israelitas (Jos. 2:​9-11). Ndiéjunʼ niʼni mu masngájma rí gíʼdoo fe náa Jeobá xá. Nirkaʼwiin a̱jmi̱i̱n israelitas bi̱ nuyama, mu xúʼko̱ xuradíin. Xó má Abrahán, a̱ʼgu̱ bugi̱ niʼni rí jmbu maski ajndu nindxu̱u̱ xa̱bu̱ aʼkhá ga̱jma̱a̱ na̱nguá ninindxu̱u̱ israelita. Mú xkri̱doo naʼsngúlú rí gíʼdoo numuu musngajmá xóo kuwáánʼ ru̱ʼni̱ á mu kuaʼdáá fe. w23.12 5, 6 kutriga̱ 12, 13

Bi̱ nindxu̱lú cristianos tséʼnigajma̱a̱ káaʼ mbájníí rí naʼthí náa Biblia. Nanigulúʼ majmañulú “asndu rí itháan mi̱jnu̱ʼ dí nandxa̱ʼóo edxu̱u̱ Dios”, ga̱jma̱a̱ espíritu santo mambáyulú makru̱ʼu̱lú (1 Cor. 2:​9, 10). Náá numuu rí tsétagíminaʼ matríyáʼ awan mu matanigajma̱a̱ májánʼ mu xúʼko̱ maraxtaa itháán mijngii náa Jeobá rá. Rígá mbaʼa rí ma̱ndoo matani̱. Ma̱ndoo mataʼyáʼ ma̱ta̱ya̱a̱ xú kaʼnii Jeobá nindoo kaʼñúún xa̱bi̱i̱ nákha wajyúuʼ ga̱jma̱a̱ rúʼko̱ nasngájma rí nandoo kaʼyaaʼ mangáánʼ xúgi̱. Ma̱ngaa ma̱ndoo matanigajma̱a̱ xóo nindoo dí israelitas mbuyamajkuíí ikhaa ga̱jma̱a̱ xóo nandoo dí mbuʼyamajkuíí mangáánʼ xúgi̱. Asndu ma̱ndoo matanigajma̱a̱ itháán profecías dí Jesús niʼnimbánuu índo̱ nixtáa náa tsu̱du̱u̱ Ku̱ba̱ʼ. Manigua̱a̱ʼ wéñuuʼ rí matanigajma̱a̱ rígi̱ ga̱jma̱a̱ dí mambáyáaʼ ikhaa nindxu̱u̱ i̱yi̱ʼ Índice de las publicaciones Watch Tower ma̱ngaa Ikha rí munigajmaa xa̱bi̱i̱ Jeobá. Rí matanigajma̱a̱ xígi̱ káʼnii mambáyáaʼ maʼni itháán gujkhuʼ fe ndrígáaʼ ga̱jma̱a̱ rí mambáyáaʼ mataxkamaa “ku̱ma̱ ndrígóo Dios” (Prov. 2:​4, 5). w23.10 18, 19 kutriga̱ 3-5

Ajngáa rí nijmuu apóstol Pedro “wéñuuʼ” nandoo gáʼthúu̱n rí “naguaja̱n” náa versículo na̱ʼkha̱ raʼthí xóó, ndiéjunʼ dí naʼngo̱o̱ naʼni ngajua rígi̱ dí narugoo aʼkhá ndrígún a̱ngiu̱lú, gi̱i̱ naʼni mbríguii ngajua ga̱jma̱a̱ xóo mbá xtíin rí ma̱ndoo mataxuajan maʼni mba̱a̱, dí raʼkháa marugoo mbóó o a̱jma̱ aʼkhá, rí marugoo “mbaʼa aʼkhá”. Gi̱i̱ nandoo nduʼyáálú ajngáa rí marugoo nandoo gáʼthúu̱n matani mba̱a̱ a̱jkia̱a̱nʼ xó má mbá xuíʼtóo mbá xtíin ma̱ndoo marugoo náa niguma gachíí, xúʼko̱ má ngajua ma̱ndoo marugoo náa rí najngawi̱i̱n a̱ngiu̱lú. Ngajua rí kuáʼdáá náa a̱ngiu̱lú gíʼmaa maʼni itháán mba̱a̱ mu xúʼko̱ maxkajxáánʼ muʼni mba̱a̱ a̱jkiu̱lú kuʼñúún náa rí najngawi̱i̱n, maski asndu nguáná makujmaa rí nindxu̱u̱ gakhi̱i̱ (Col. 3:13). Índo̱ naʼngulú nuʼni mba̱a̱ a̱jkiu̱lú kuʼñúún a̱ngiu̱lú, xúʼko̱ nusngajmá ngajua nindxu̱u̱ itháán mba̱a̱ ga̱jma̱a̱ rí nandulúʼ muʼni mba̱a̱ Jeobá. w23.11 11, 12 kutriga̱ 13-15

Índo̱ rey Josías nigiʼdoo 26 tsiguuʼ, nigíʼdu̱u̱ niʼni májáanʼ templo. Índo̱ nini ñajunʼ rígi̱ nixka̱ma̱a̱ “libro náa na̱ʼkha̱ xtángoo ndrígóo Jeobá, dí nikhánáá Moisés”. Índo̱ rey niʼdxaun dí na̱ʼkha̱ raʼthí náa libro, mbá nacha̱ nigíʼ niʼnimbánuu dí na̱ʼkha̱ náa xtángoo ndrígóo Jeobá (2 Crón. 34:​14, 19-21). Lá nanigua̱a̱ʼ mag̱uʼwaanʼ matraxnuu Biblia ráʼ. A mu natani̱ tsiakimínáʼ matraxnuu, nanigua̱ʼ ráʼ. Ndiéjunʼ etani̱, mu xámbumaaʼ texto rí naku̱ma̱a̱ʼ dí mambáyaaʼ rá. Índo̱ Josías nigiʼdoo 39 tsiguuʼ niraʼwíí mbá dí raʼkhí maʼni, dí niʼni dí makhañúu. Ikhaa táʼndoo dí Jeobá mambáyúu, nikumu̱u̱ kaʼyaminaʼ ikhaa (2 Crón. 35:​20-25). Ndiéjunʼ ejmañulúʼ rá. Dí tséʼniuu nguáthá tsigulúʼ o nguáthá má mba̱yu̱u̱ʼ kúwáanʼ ruʼnigajma̱a̱ Biblia, gíʼmaa mbuʼyáaʼ má xúʼko̱ Jeobá. Mu muʼni rígi̱, gíʼmaa munda̱ʼa̱a̱ ma xúʼko̱ ikha, muʼnigajmaa ajngóo ga̱jma̱a̱ muʼdxawíín consejo dí gúxnulú a̱ngiu̱lú bi̱ kúwá má mba̱yu̱u̱ʼ nuni̱ ñajuunʼ Dios. Á mu xúʼko̱, mbáa nditháan xajngawáánʼ ga̱jma̱a̱ itháan makuwáanʼ gagi (Sant. 1:25). w23.09 12, 13 kutriga̱ 15, 16

Náa Biblia na̱ʼkha̱ mbaʼa xkri̱da ndrígu̱ún gu̱ʼu̱ bi̱ nini ñajuunʼ Jeobá ga̱jma̱a̱ nindúún kuyáá. Nuñewa̱a̱n dí ‹nuni̱ ga̱jma̱a̱ nuni̱ má xúʼko̱ rí jmbu› (1 Tim. 3:11). Mbáa náa congregación ndrígáaʼ mataxkamiin a̱ngiu̱lú gu̱ʼu̱ bi̱ nuni̱ kájxi̱ ñajuunʼ Dios ga̱jma̱a̱ majmañaaʼ mbaʼa wéñuuʼ náa ikhiin. Á mu káʼnii nindxa̱a̱ʼ mbáa dxáʼgúu, atatsaʼwáminaʼ ga̱jma̱a̱ numuu mbáa ndxájulú bi̱ nikhi̱i̱ bi̱ mambáyáaʼ gáta̱ya̱a̱ ga̱jma̱a̱ atagíminaʼ dí matayaridáá. Mu ma̱ndoo matani rígi̱, atayáá cualidades ndrígóo ga̱jma̱a̱ atatsaʼwáminaʼ xú káʼnii gándoo matani̱ mu maraʼdáá mangáánʼ. Mbáa a̱ʼgu̱ bi̱ nindxu̱u̱ xa̱bu̱ guabaaʼ nambájxu̱u̱ májánʼ ga̱jma̱a̱ Jeobá xúʼko̱ má a̱ngiu̱lú mangiin. Mbá xkri̱da, numuu rí nindxu̱u̱ xa̱bu̱ guabaaʼ ga̱jma̱a̱ nandoo kaʼyoo Jeobá, naraʼwíí dí maʼnimbo̱o̱ kaʼñúún bi̱ nuxná ikha náa congregación ga̱jma̱a̱ bi̱ kúwá náa goʼwóo (1 Cor. 11:3). w23.12 18, 19 kutriga̱ 3-5

Jeobá nagíʼthu̱u̱n rí xa̱bu̱ bi̱ ninigúnʼ maʼndoo kaʼyoo a̱ʼgiu̱u̱ ga̱jma̱a̱ mañewu̱u̱n, mbaʼyoo xú káʼnii xtáa ga̱jma̱a̱ rí mambájxu̱u̱ májánʼ ga̱jma̱a̱ Dios. Rí majmáánʼ matatsaʼwa̱a̱ edxa̱a̱ʼ, matayamajkhún a̱ngiu̱lú gu̱ʼu̱ ga̱jma̱a̱ rí mani̱ndxa̱a̱ʼ mbáa bi̱ maku̱mu̱ún kuyáá, rígi̱ gámbáyáaʼ mu matiewa̱a̱n májánʼ a̱ʼgia̱a̱ʼ ga̱jma̱a̱ mbi̱ya̱ edxu̱u̱ náa guʼwáaʼ. Á mu natatsigúnʼ mbáa ma̱ndoo maraʼdiin e̱ji̱n. Náa xkridoo Jeobá ma̱ndoo majmañaaʼ xóo ma̱ndoo ma̱nindxa̱a̱ʼ mbáa májáanʼ xa̱bu̱ nikhi̱i̱ (Efes. 6:4). Jeobá niʼthúu̱n Jesús rí nandoo kaʼyoo ga̱jma̱a̱ dí nagruiguíi xóo a̱ʼdióo (Mat. 3:17). Á mu naraʼdiin ejña̱a̱nʼ májánʼ gáʼni dí maguʼwaanʼ marathu̱u̱n dí nandaaʼ xtañún ga̱jma̱a̱ rí marathu̱u̱n dí naraxtaa gagi índo̱ nuni̱ rí májánʼ. Xabuanii bi̱ nduyaridáá xkridoo Jeobá numbañún e̱jñu̱ún mu muni itháán ñajuunʼ Dios. Xú káʼnii gándoo gátani̱ rataminaʼ asndu nákha xúgi̱ rá. Rí mataniu̱u̱n rí májánʼ bi̱ kúwá náa guʼwáaʼ ga̱jma̱a̱ a̱ngiu̱lú bi̱ kúwá náa congregación ga̱jma̱a̱ atani̱ guʼuminaʼ marathu̱u̱n rí nandaaʼ xtañún (Juan 15:9). w23.12 28, 29 kutriga̱ 17, 18

Mbá xúgíinʼ xa̱bi̱i̱ Jeobá bi̱ kúwá náa xúgíʼ numbaaʼ numíniiʼ eʼni xkujndu ga̱jma̱a̱ naʼniulú nandii. Ma̱ngaa ndayóoʼ maʼngulú ga̱jma̱a̱ rí nuni̱ gínáanʼ o rí nuxkulú xa̱bu̱ bi̱ tsíñún gúñún xa̱bi̱i̱ Dios. Gajkhun má Jeobá tsérikhoo dí xáguaʼníí dí ra̱májánʼ, mú ikhaa má naʼthúlú dí mambáyulú (Is. 41:10). Ma̱ndoo maʼdxulu má xúʼko̱, majmáán muraʼwi̱i̱ májánʼ dí muʼni ga̱jma̱a̱ maguajún jmbu maski ajndu muraʼníí xkujndu gakhi̱i̱, numuu rí Jeobá nambáyulú. Jeobá nakudaminaʼ náa Biblia rí maxnulú “tsímáá ndrígóo Dios” (Filip. 4:​6, 7). Tsímáá rígi̱, naʼni rí maʼni̱i̱ a̱jkiu̱lú, núma̱aʼ má rí nambájxulú májánʼ gajmiúlú Jeobá. Ra̱ʼkhá tháán mitsaanʼ rí asndu “nimbáa xa̱bu̱ numbaaʼ tséʼngo̱o̱ gíkro̱ʼo̱o̱” o mandxaʼwáminaʼ. Lá mbá miʼtsú niratákáñííʼ Jeobá ga̱jma̱a̱ nda̱wa̱á niku̱ma̱a̱ʼ rí asndu xóo niʼni̱i̱ a̱jkia̱a̱nʼ ráʼ. Rúʼko̱ nindxu̱u̱ “tsímáá rí na̱ʼkha̱ náa Dios”. w24.01 20 kutriga̱ 2; 21 kutriga̱ 4

Ngajua dí guáʼdáá xa̱bu̱ náa Dios nixkaxi̱i̱ a̱jkiu̱ún rí muni̱ mba̱a̱ mbiʼyuu ga̱jma̱a̱ mbá kájxi̱ a̱jkiu̱ún. Rey David ndiʼyoo májánʼ rí maʼni mba̱a̱ mbiʼyuu Jeobá nindxu̱u̱ ikháá má rí maʼni mba̱a̱ Jeobá. Rí muʼtá ga̱jma̱a̱ numuu mbiʼyuu, nuʼtá xóo mitsaanʼ cualidad ndrígóo ga̱jma̱a̱ rí mitsaanʼ rí niʼni. David nindoo rí mbiʼyuu Anu̱u̱ maʼni kaʼwu ga̱jma̱a̱ maʼni mba̱a̱. Niʼthí rí nindoo maʼni ga̱jma̱a̱ xúgíʼ a̱jkiu̱u̱n. Levitas mangiin nini xúʼko̱, nini̱ mba̱a̱ mbiʼyuu Jeobá, ga̱jma̱a̱ nithi rí asndu táʼkha̱ ajngáa xóo muthi mu muni̱ mba̱a̱ mbiʼyuu Jeobá rí kaʼwu (Neh. 9:5). ¡Ra̱ʼkhá tháán nixtáa gagi Jeobá índo̱ ndiʼyoo rí nini mba̱a̱ mbiʼyuu ga̱jma̱a̱ xúgíʼ a̱jkiu̱ún! w24.02 9 kutriga̱ 6

Jeobá xándxaʼwáminaʼ dí tséjmáán á mu tséʼnga̱a̱ gátanimbaníí mbóoʼ dí ikháan xáʼngaaʼ gátani̱ (2 Cor. 8:12). Atayáá xóo mbá dí ma̱ndoo maʼsngáaʼ. Xámbumaaʼ xúgííʼ dí niʼnga̱a̱ʼ nitanimbaníí. Náa Biblia naʼthí: “Dios nindxu̱u̱ jmbii, ga̱jma̱a̱ tsémbumuu kaʼyoo ñajunʼ rí nu̱nila” (Heb. 6:10). Ikha jngóo nditháan xámbumaaʼ mangáán dí nitani̱. Atatsaʼwáminaʼ xúgííʼ meta dí niʼnga̱a̱ʼ nitanimbaníí xóo dí mambajxaaʼ ga̱jma̱a̱ Jeobá, magajnáaʼ gárataráʼa o majnguáanʼ iyááʼ. Xúgííʼ meta dí niʼnga̱a̱ʼ nitanimbaníí nasngájma dí maʼnga̱a̱ʼ matanimbaníí dí natagíminaʼ matani̱ xúgi̱ Jeobá ma gámbáyáaʼ mu maʼnga̱a̱ matanimbaníí meta ndrígáaʼ. Ikháán mangáán ma̱ndoo maraxtaa tsímáá índo̱ gídxúʼ ratanimbaníí meta dí xtaʼdáá á mu natayáá xú káʼnii Jeobá nambáyaaʼ ga̱jma̱a̱ naʼni tsajkhuramánʼ (2 Cor. 4:7). Mbaʼa dí májánʼ wéñuʼ gátandrígúu nda̱wa̱á á mu tsékanájkhaaʼ (Gál. 6:9). w23.05 31 kutriga̱ 16-18

Jeobá nanigu̱u̱ʼ masngájmún xa̱bi̱i̱ dí nandoo kaʼñúún ga̱jma̱a̱ dí nagruiguíin. Náa Biblia na̱ʼkha̱ raʼthí a̱jma̱ nuthu náa dí niʼthúu̱n Jesús dí ikhaa nindxu̱u̱ a̱ʼdióo bi̱ nandoo kaʼyoo ga̱jma̱a̱ bi̱ naʼni maxtáa gagi (Mat. 3:17; 17:5). Lá nanigua̱a̱ʼ rí Jeobá maʼtháanʼ rí nadxuu a̱jkiu̱u̱n kaʼyaaʼ ráʼ. Gajkhun má, ikhaa xáʼtulú asndu mekhuíí, mú naʼtulúʼ náa Ajngá rawuunʼ. Índo̱ nuraxnuu ajngáa mitsaanʼ rí Jesús niʼthúún xa̱bi̱i̱, nakumulú dí asndu xóo Jeobá xtáa raʼtulúʼ. Jesús ndiʼyaridoo májánʼ Anu̱u̱. Ikha jngóo índo̱ nuraxnuu dí Jesús niʼthúún xa̱bi̱i̱ bi̱ niguájun jmbu dí nandoo kaʼñúún maski ajndu nindxu̱ún xa̱bu̱ aʼkhá, ma̱ndoo mundxaʼwamíjna̱ dí Jeobá xtáa raʼtulúʼ ikhaa má kayuuʼ mangáánʼ (Juan 15:​9, 15). Índo̱ gúraʼníí xkujndu xúʼyáá xóo dí nánguá eyoo kaʼyulú Dios, ikhú náa dí ma̱ndoo musngajmá rí nandulúʼ kuʼyáá ga̱jma̱a̱ dí nakumulú kuʼyáá (Sant. 1:12). w24.03 28 kutriga̱ 10, 11