RÍ KAYÁ EDXU̱U̱ NÁA INUU I̱YI̱I̱ʼ | XÚGÍNʼ MA̱NDOO MAKRU̱ʼU̱U̱N BIBLIA
Lá gíʼdoo numuu muraxnuu Biblia ráʼ.
“Biblia nindxu̱u̱ mbá libro ndrígóo religión rí najmaʼnuʼ wéñuʼ. Mú tséʼkha̱ nditháan ga̱jma̱a̱ numuu china.” (LIN, NÁA CHINA)
“Tsíkroʼoʼ rí naʼthí náa i̱yi̱i̱ʼ ndrígóo religión hinduista náa na̱jkhá, ikha jngó, xú káʼnii gákroʼoʼ rí naʼthí náa Santa Biblia rá.” (AMIT, NÁA INDIA)
“Ndayamajkhuu Biblia numuu rí nindxu̱u̱ mbá libro wayuu ga̱jma̱a̱ nda̱yo̱o̱ rí ikhaa dí itháan naxtango̱jo̱o̱ náa xúgíʼ numbaaʼ. Mú nimbá miʼtsú xóó tséyóo mbóʼ.” (YUMIKO, NÁA JAPÓN)
Náa xúgíʼ numbaaʼ kuwa xa̱bu̱ bi̱ nduyamajkuíí Biblia maski asndu tseniʼnuʼ wéñuʼ. Itháan naguáʼniin rígi̱ mbaʼin wéñuʼ xa̱bu̱ Asia, mú ma̱ngaa náa xuajen mba̱ʼu̱ náa najuixnáraʼa wéñuʼ Biblia.
Mbáa natraximínáʼ: “Náa numuu gaguxnuu Biblia rá.” Rí ma̱ta̱ya̱a̱ rí eʼsngáa libro rígi̱ rí gíʼdoo numuu ma̱ndoo mambáyaʼ mu matani rígi̱:
Maraxtaa gagi náa vida ndrígáʼ
Matanimbánii xkujndu náa guʼwáaʼ
Matraʼníí rí naʼni maxmiéjuanʼ
Mambaxáʼ itháan májánʼ gajmiáanʼ eʼwíínʼ
Majmaʼ májánʼ mbújkha̱a̱
Mbá xkri̱da, mbáa a̱ʼgu̱ bi̱ xtáa náa Japón bi̱ nagumbiʼyuu Yoshiko nindoo mbaʼyoo ndiéjunʼ eʼthí náa Biblia, ikha jngó niguxnuu mbáwíi ikhaa. Ndiéjunʼ ni̱jkha̱nú ndiʼyoo xá. Ikhaa naʼthí: “Biblia nimbáyuʼ mba̱yo̱o̱ náa numuu rí xtáá ga̱jma̱a̱ rí nda̱wa̱á maxtáá itháan májánʼ. Nánguá xtáá gíná”. Amit, bi̱ niʼthá ga̱jma̱a̱ numuu nángi̱i̱, nigíminaʼ maguxnuu Biblia. Ikhaa naʼthí: “Rí na̱jkhá raguxnuu niʼniuʼ maguanúʼ tsiánguá. Rí naʼthí náa Biblia nambáñun xúgínʼ xa̱bu̱ numbaaʼ”.
Biblia nimbáñun mbaʼin wéñuʼ xa̱bu̱ mu makuwá itháan májánʼ. Náa numuu rí tsetagíminaʼ matraxnuu mu ma̱ta̱ya̱a̱ náa gámbáyaʼ ikháanʼ rá.